Read Vute Jâŋ 13 Bible Online

Jâŋ 13 - Vute bible

Jâŋ 13

¹Jùrúb Páskàà yaáyè tíí, Yésù yi ɗəəŋceé ɨnayâna ɓwâ ní éíkɨ́ ɗɔ̀bín gɨ̀cùnɨ yɨ́ Táà ɗóotɨ́. Ŋgə́ ya ɗúɓatɨ́ nùb noò ya du ɗɔ̀bɨ́nné, ŋgə́ ɨ́ ɗû ŋgáb há̧á̧ ŋgə́ ɨ́ kúrê no.

²Yésù ɓe nɨ̀fuùb noò yaá cɔŋ lɨ́tɔ̧né tàŋnɨ. Sátàìn yi fɨtɨcií nɨ́ njɔ̧̀ Yúdàs Ìskàrìyôt, mwin Sìmóòŋ, ŋgə́ sə́rɨ̀kɨ́ Yésù.

³Yésù yi ɗəəŋceé ɨnayâna ní yi éíwo nɨ yɨ́ Mèèín á, ní gɨcuce nɨ́ yɨ́ Mèèín á. Mèín yi naceé ní nyòm noò lâs.

⁴Ŋgə́ ɨ́ éíwî còóm, júk yaá no só bɨrɨ́b, ŋgə́ ɨ́ njèìkî kɨ́ péín còmné, ŋgə́ ɨ́ kɨ́ksò ku. Ŋgə́ ɨ́ áwò júk kù, ŋgə́ ɨ́ kóllê ŋgù̧ú̧.

⁵Á ŋgə́ túré mvúm súwá kù no, ŋgə́ ɨ́ yàrê nàtɨ̀nànɨ nɨ̀fuùb noò gurub ŋgə́ a pəkkɨ́ce ɓe júk ŋgə́ tɨ kóllé ŋgù̧ú̧ rè.

⁶Ŋgə́ féínndé Sìmóŋ Píyéèr ya, á Sìmôŋ fɔ́ ŋgə́ ɨnè: «Kéké, wu ɨ́ ɓa mɨ nàtɨ̀cùnànɨ gurub ru à?»

⁷Yésù ɨ́ pììnà ŋgə́ ɨnè: «Ɗàrò wu ɗə̀ə̀ŋyèwá àm níì á mɨ du ndɨ̀ŋnɨ u̧, ɨ́dù wu ɓa ɗə̀ə̀ŋhánɨ á.»

⁸Á Píyéèr tana ŋgə́: «Éì, wu mɨ nàtɨ̀nànɨ gurub kù ɗàɓàwá!» Yésù ɨ́ tàcùnà ŋgə́: «Mɨ ɨ́ dù wu gurub nàtɨ̀nàwá, nɨ́me wu tɨ̀ nɨ ɓaín dùcɨ̀r.»

⁹Sìmóŋ Píyéèr ɨ́ tàcùnà ŋgə́: «Duú u̧ Kéké, wu wu mɨ gurub nàtɨ̀nàɗóò, nàtɨ̀nàɓwê wu mɨ ŋgárɨ̀b, wu a sènàɓwê wú mɨ ŋgwé!»

¹⁰Á Yésù tana ŋgə́: «Nò cuwo kɔɔ́, síí nóò bɨ̂ŋ á nɨ sarîn, ŋgə́ tɨ̀ nɨ kɨ́ gwì bɨrɨ́bí kɔ̀kcɨ̀wá, ŋgə́ ɓa nɨ nàtɨ̀hó̧ɗóònɨ gurub á. Kɨ́ nyínè nyí á nɨ sarîn, ɨ́dù nɨ nyí lâs sé.»

¹¹Yésù yi ɗəəŋtɨ́ nò yi ɓa ŋgə́ sə́rɨ̀niì, àm kɨ́ á ŋgə́ yi ta nɨ ŋgáb lâs sé ɨ́ du sarîn ndu.

¹²Yésù natɨcáaŋna ŋgáb gurub, ŋgə́ ɨ́ lə́cùrê júk nóò, ŋgə́ ɨ́ dùcùrê cɔɔ̀ŋ. Á ŋgə́ fɔ́ ŋgáb: «Nyí óktɨ́ njàb nɨ́m mɨ ndɨŋna nyí rè à?

¹³Nyí á mɨ ɓénɨ ‹Tá tɔ̀hí›, nyí a ɓékwà mɨ ‹Kéké›, nyí ɓéɓa mɨ hàrák á, ɓetí mɨ dumeɓa tá tɔ̀hí ɓe Kéké á.

¹⁴Mɨ nò du Kéké ɓe tá tɔ̀hí, hȩ mɨ nàtɨ̀nànɨ nyí gurubi, ɗúɓwéece mvókín nyínè no, nò kù natɨnaá kùùŋ gurub, nò kù a nàtɨ̀cùnàce? kùùŋ á.

¹⁵Nɨ́m mɨ ndɨŋ ɓe nyí kɨ́, mɨ na nyí túúm àm nyí a ndɨ̀ŋɓwê u̧ mvókín nyínè noò á.

¹⁶Mɨ tanaɓa nyí àmɨɨr wááŋ á, mbɔ́ɔ́ nɨ tá no mbɔ́klí dɨmɨɨr ndóŋwa. Nò kùb tómndé cè nɨ́ nò tómwo ŋgéé dɨmɨɨr ndóŋwa.

¹⁷Ɗàrò nyí ɗəəŋtɨ́ nɨ́ɨ́b kɨ́. Nyí ɨ́ ndɨ̀ŋ u̧, nyí ɓa dùnɨ ɓe mɨ̀tù á.

¹⁸Mɨ mɨ tàwá nyí lâs, mɨ ɗəəŋtɨ́ nùb mɨ yi caré. Ɨ́dù á ɗúnɨ nɨ́m du tɨín káàtà Mèèín noò fó̧ hàrák, á tɨín ɨnè: ‹Nò nɨ́me ŋgə́ tɨ həllə́ɓáhe cɔɔ̀ŋ ɓəndɨcuú nɨ́ mɨ.›

¹⁹Mɨ takɨ́na nyí ɗàá á, àm ɓwâ nɨ́m kɨ́ ɓa ndɨ̀ŋniì, nyí a ɗə̀ŋhȩ̀ ɨnayâna ‹mɨ du nò mɨ du rè› á.

²⁰Mɨ tanaɓa nyí àmɨɨr wááŋ á, nò gam nò mɨ tómndé, gamɓwée mɨ á. Nò gam mé, gamɓwée nò ya tómwo mé á.»

²¹Nyìncáŋhȩ̀ȩ́ u̧nèé, njɔ̧̀ ɨ́ vɨ̀ndɨ̀rê Yésù ɓɔ̧ɔ̧, ŋgə́ ɨ́ tà: «Mɨ tanaɓa nyí àmɨɨr wááŋ á: mvókín nyínè no, nɨ̀mwi̧ ɓa mɨ sə́rɨ̀nɨ á.»

²²Nɨ̀fuùb ɓe kùb ɨ́ yà ɓàìntèènɨ íí. Ŋgáb yi bɨ́ ɗə̀ə̀ŋwá na á Yésù yi ta ɓa ní sə́rɨ̀nɨ.

²³Nɨ̀mwi̧ mvókín nɨ̀fubì, nò Yésù yi du ɗúɓànɨ ceí yaá du̧ú̧ gín Yésùù.

²⁴Á Sìmóŋ Píyéèr yáasona nò kɨ́ ŋgáár, tànɨ ŋgə́ fɔ́ Yésù nò ɓa ŋgə́ sə́rɨ̀nɨ kɨ́.

²⁵Á nò kɨ́ tɨɨmndéso Yésù no, ŋgə́ ɨ́ fɔ̂ ŋgə́ ɨnè: «Kéké, na ɨ́ ɓaye nɨ́ wu sə́rɨ̀nɨ?»

²⁶Yésù ɨ́ pììnà ŋgə́ ɨnè: «Mɨ ɓa kùmnɨ bɨ̀rê á, mɨ a ndùklê cùcùbín, nò mɨ ɓa nànɨ rɨ, nò kɨ́ á.» Á Yésù á gbɨ́ktèìn bɨ̀rê, ŋgə́ ɨ́ ndùklê cùcùbín, ŋgə́ ɨ́ nà Yúdàs mwin Sìmóŋ Ìskàrìyôt.

²⁷Jɔ̀ Yúdàs gàmnɨ bɨ̀rê rèè, á Sátàìn lə́ ŋgə́ sumí. Yésù ɨ́ tànà ŋgə́ ɨnè: «Ndɨŋkɨ́cɨm nɨ́m wu du ndɨ̀ŋniì!»

²⁸(Vùùm ŋgáb yi du cɔɔ̀ŋ lâs, nò kù ɨ́ dù nɨ́ ókwa àm níì á ŋgə́ yi tana Yúdàs u̧.

²⁹Hȩ Yúdàs yi du nò gə́tɨ càká mònéè rèé, ŋgáb yi lə́mne bɨ́ ɨnayâna Yésù yi ta ŋgə́ gɨ̀ gùrɨ̀wònɨ nɨ́ɨ́b jùrúbí, kɨ́ kù ŋgə́ áhó̧ mòné nànɨ nùb tiri na á.)

³⁰Yúdàs gam gbɨ́ktèìn bɨ̀réè, ŋgə́ ɨ́ fó̧cè nɨ́ ɓè mu̧u̧. Yaá cɨ̀ nɨ cɨ́ɨ́m.

³¹Ɓwâ Yúdàs fó̧ré, Yésù ɨ́ tà: «Ɗàrò, Mwin Nɨ̀rì kwatɨ́ mgbíí, ŋgə́ túumnaceé nɨ̀vɨ́tɨ̀b mgbíí Mèèín.

³²Hȩ ŋgə́ túumna nɨ̀vɨ́tɨ̀b mgbíí Mèèín, Mèín ɓa túùmnàɓwênɨ nɨ̀vɨ́tɨ̀b mgbíí ŋgéé á. Nɨ́m kɨ́ ɓace nɨ́ ndɨ̀ŋnɨ ɗàrò á.

³³Munɨ́b cutɨ́b móò, mvókín juu nɨ́me nyínè á cɨ̀ nɨ ŋgób. Nyí ɓa mɨ mánɨ á, ɨ́dù nɨ́m mɨ tɨ tana Jwîf bɨ rɨ á mɨ du nyí tànàɓwênɨ rè. Yɨ́ mɨ du gìnɨ rè, sàmàìn nyí gɨ nɨ́ kwe ɗàà.

³⁴Ɓíì heé á mɨ du nyí nànɨ rè: dunáam ɓe ɗûnɨ́m mvókín nyínè no. Á ɗúnɨ nyí dù ɓe ɗûnɨ́m mvókín nyínè no hȩ mɨ ya ɗúɓwéece nyínè.

³⁵Nyí ɨ́ dù ɓe ɗûnɨ́m mvókín nyínè no, nùb lâs ɓa ɗə̀ə̀ŋnɨ ɨnayâna nyí nɨ̀fuùb moò á.»

³⁶Sìmóŋ Píyéèr ɨ́ fɔ̂ Yésù ɨnè: «Kéké, wu gɨye wu ŋga?» Yésù ɨ́ pììnà ŋgə́ ɨnè: «Yɨ́ mɨ du gìnɨ kɨ́ sàmàìn wu tuge mɨ ku ɗàrò ɗàà, ɨ́dù wu ɓahá mɨ tùnɨ á.»

³⁷Á Píyéèr tacuna ŋgə́: «Kéké, mɨ duce mɨ́ wu ɗàrò tùr ɓe ní? Mɨ á kə́sə́k ə́ə̀mnɨ cwé ɓe ɨ́r woò!»

³⁸Yésù ɨ́ tànà Píyéèr: «Wu ta ní á kə́sə́k ə́ə̀mnɨ cwé ɓe ɨ́r moò na á à? Mɨ tanaɓa wu àmɨɨr wááŋ á: cein tíí gònɨ tóŋnɨ rɨ, wu tacií há̧á̧ gwì taarɨ́b ní mɨ ɗə̀ə̀ŋwá á.»