Read Vute Jâŋ 14 Bible Online

Jâŋ 14 - Vute bible

Jâŋ 14

¹Yésù ɨ́ tànà nɨ̀fuùb noò ɨnè: «Nyí nɨ sum lòm, səŋnáam gíí ɓe Mèín. Nyí a sə̀ŋɓwê gíí ɓe mɨ.

²Yɨ́ juù á ví̧i̧ tá moò yó, mɨ gɨ nyí nyààŋkɨ́nànɨ yɨ́ juù á. Tɨ dùyè àmɨrì sé, mɨ yè mɨ́ nyí tànàwá.

³Ɓwâ mɨ ɓa gìnɨ nyí nyààŋkɨ́nànɨ yɨ́ juù, mɨ ɓa cùwònɨ á, mɨ a gò nyí gècùnɨ, ɓwâ kɨ́ yɨ́ mɨ duré nyí a dùɓwéhè.

⁴Yɨ́ mɨ du gìnɨ rè, nyí ɗəəŋtɨ́ jɨ̀r gɨ kwe.»

⁵Á Tòmâ tana ŋgə́: «Kéké, yɨ́ wu du gìniì, nɨ́m ɗə̀ə̀ŋɓàyèwá, jɨ̀r gɨ kwe á nɨ́m ɓa ɗə̀ə̀ŋgɨ̀nɨ ru à?»

⁶Yésù ɨ́ tànà ŋgə́: «Mɨ du jɨ̀r á, mɨ àmɨɨr á, mɨ ɨ́ du nànɨ mè ru. Sàmàìn nò kù féín yɨ́ Táà ɓè nò kɨ́ du mɨ tùwáá ɗàà.

⁷Óo nyí ɗəəŋtɨ́ mɨ, nyí ma ɗəəŋceé nɨ́ tá moò á. Yànɨ ɗàrò, nyí ɗəəŋtɨ́ ŋgə́, nyí pə́ceé ŋgə́.»

⁸Á Fɨ́lɨ̂b tana ŋgə́: «Kéké, túumnam nɨ́m tá ye, njɔ̧̀ yè séé nɨ́m ɗàá.»

⁹Yésù ɨ́ tànà Fɨ́lɨ̂b ɨnè: «Á cɨ̀ nȩ̀ȩ́ nɨ́me nyí du dùnɨ, wu a tà ní mɨ ɗə̀ə̀ŋwá na á à Fɨ́lɨ̂b! Nò pə́ mé, pə́cií nɨ́ Tá moò, àm níì á wu tace: ‹Túumnam nɨ́m Tá woò›?

¹⁰Kí du wu wu ə́ə̀mwá ɨnayâna mɨ á ɓaín ɓe Bɨ̀bá, Bɨ̀bá á cè ɓaín ɓe mɨ na á hàye. Nɨ́m mɨ du nyí nyìnnàniì nɨ mɨ̀lə́m mɨ nɨ̀mɨrí sé, Bɨ̀bá nò du ɓaín ɓe mé ɨ́ du nɨ́ éí ŋgə́ nɨ̀mɨrí ə́nnɨ ru.

¹¹Ɓwâ mɨ ta mɨ á ɓaín ɓe Bɨ̀bá, Bɨ̀bá á cè ɓaín ɓe mɨ rɨ, ə́əmnáam. Nyí dugɨ ə́ə̀mwá kɨ́ mɨ nyinna nyí ɓe ɓɔ̧ rè, ə́əmhó̧náháye ɓe ɨ́r nɨ́ɨ́b mɨ du ndɨ̀ŋnɨ rè.

¹²Mɨ tanaɓa nyí àmɨɨr wááŋ á: nò ə́mne mé, nò kɨ́ ɓa ndɨ̀ŋɓwênɨ nɨ́ɨ́b mɨ du ndɨ̀ŋnɨ rè á; nò kɨ́ ɓa ndɨ̀ŋnɨ kɨ́b ndóŋ kíí á, ɓetí mɨ gɨ mɨ yɨ́ Bɨ̀báá á.

¹³Nyí ɨ́ ɓwèì mɨ nɨ́m àm nyí du nɨ̀fuùb moò, mɨ ɓa ndɨ̀ŋnɨ nɨ́m kɨ́ á, àm mwin a túmnè mgbíí Táà.

¹⁴Nyí ɨ́ ɓwèì mɨ nɨ́m àm nyí du nɨ̀fuùb moò, mɨ ɓa ndɨ̀ŋnɨ nɨ́m kɨ́ á.»

¹⁵«Nyí ɨ́ dù mɨ ɗúnɨ, nyí ɓa jə̀ŋnɨ ɓíì moò á.

¹⁶Mɨ ɓa ɓwèìnɨ bɨ̀bá ŋgə́ tómwònà nyí nò kpɔ́k nyínè á, àm ŋgə́ a dù ɓe nyí ɓwâ lâs.

¹⁷Nò kɨ́ du Nyéhè Sarîn du túùmnànɨ nɨ̀vɨ́tɨ̀b àmɨɨr Mèèín á. Sàmàìn nùb ɗɔ̀bɨ́nné ə́mne ŋgéé ɗàà, ɓetí ŋgáb bɨ ŋgə́ pénɨ ɗàà, ŋgáb cè bɨ́ ŋgə́ ɗə̀ə̀ŋwá. Ɨ́dù kɨ́ nyínè, nyí ɗəəŋtɨ́ nɨ́ ŋgə́, ɓetí ŋgə́ ɓa dùnɨ ɓe nyí á, nyíne ŋgáb a dù ɓaín.

¹⁸Mɨ tɨ̀ mɨ nyí u̧ hȩ munɨ́b kwíhɨ̀b mbɨ́kwa, mɨ ɓa nyí gàìncùwònɨ á.

¹⁹Hò̧ mvin ŋgób, nùb ɗɔ̀bɨ́nné tɨ̀ bɨ mɨ pə́cɨ̀r. Ɨ́dù kɨ́ nyínè nyí ɓa mɨ pə́cùnɨ á, ɓetí mɨ ɓa dùcùnɨ jáŋ á nyí a dùɓwê jáŋ.

²⁰Ɓwâ ye kɨ́ kwá sallé, nyí a ɗə̀ə̀ŋgì ɨnayâna mɨ á ɓaín ɓe Tá moò. Nyí á ɓaín ɓe mɨ, mɨ á cè ɓaín ɓe nyí.

²¹«Nò gə́tɨré ɓíì moò sumí, ɨ́ jə̀ŋ nɨ́m mɨ taré, nò ɗú mé á. Tá moò ɓa ɗúnɨ nò ɗú mé á; mɨ ɓa nò kɨ́ ɗúɓwênɨ á, mɨ a dù mɨ́ ŋgə́ síí yòònàr.»

²²Á Jûdə̀ (Yúdàs Ìskàrìyôt sé) tana Yésù ɨnè: «Kéké, àm níì á síí kɨ́ wu túumhó̧naháce wú nɨ́m, wu du wú nùb lâs túùmnàr?»

²³Á Yésù piina Jûdə̀ ɨnè: «Nò ɗú mé ɓa jə̀ŋnɨ nyindí mó ɓɔ̧ne á. Tá moò ɓa ŋgə́ ɗúnɨ á, ɗà nɨ́me Tá moò a gì yɨ́ nò kíì dùnɨ.

²⁴Nò du mɨ ɗúnɨ ɗàwáá nɨ jə̀ŋnɨ ɓíì moò ɗàà. Nɨ́m nyí ók mɨ nyìnnɨ rè nɨ mɨ̀lə́m mɨ nɨ̀mɨrí sé, du nɨ nɨ́m Tá moò yi tómwo mé ta mɨ gò nyìnniì á.

²⁵Mɨ nyinna nyí nɨ́ɨ́b kɨ́ ɓwâ mɨ duye ɓe nyí rè á.

²⁶Nyéhè Sarîn ɓa nyí kpɔ́knɨ, Tá moò ɓa tómwònɨ gò mɨ cə́ndɨ̀nɨ rè ɓa nyí tɔ̀ɔ̀nànɨ nɨ́ɨ́b lâs á, ŋgə́ a vùùŋcùnà nyí nɨ́ɨ́b lâs mɨ ya nyinna nyínè.

²⁷«Ju ɗóóŋ móò á mɨ nakɨ́so nyí ɗàrɨ́. Mɨ mɨ nyí nàwá ju ɗóóŋ kɨ́ hȩ nùb ɗɔ̀bɨ́nné du nàniì. Nyí nɨ sum lòm, nyí nɨ vùù ô.

²⁸Nyí tɨ óktɨ́ mɨ tànɨ: ‹mɨ gɨ̀yèe, mɨ a cùwògì yɨ́ nyínè›. Nyí tɨ dùyè mɨ ɗúnɨ, nyí yè óktɨ́ mɨ̀tù hȩ mɨ du gìnɨ yɨ́ Táà kɨ́, ɓetí Tá ndóŋtɨ́ nɨ́ mɨ.

²⁹Mɨ tɨ takɨ́nacií nyí ɗàá, àm ɓwâ nɨ́ɨ́b kɨ́ ɓa ndɨ̀ŋniì, nyí a ə́mnè nɨ́ɨ́b mɨ yi taré.

³⁰Mɨ tɨ̀ mɨ ɓe nyí nȩ̀ȩ́ nyìncɨ̀r, ɓetí mvèìn ɗɔ̀ɔ́b lèè á gònɨ. Sàmàìn ŋgə́ kɨ́k mé ɗàà.

³¹Ɨ́dù, á ɗúnɨ nùb ɗɔ̀bɨ́nné ɗə̀ŋhɨ̀ ɨnayâna mɨ á ɗúnɨ Tá moò, mɨ á cè ndɨ̀ŋnɨ nɨ́m ŋgə́ ta mɨ ndɨ̀ŋte. Éíwúnáam còóm, nɨ́m gɨ̀náa!»