Read Vute Jâŋ 15 Bible Online

Jâŋ 15 - Vute bible

Jâŋ 15

¹Yésù ɨ́ tànà nɨ̀fuùb noò ɨnè: «Mɨ duɓa hȩ yɔ̀ á, Tá moò cè nɨ̀mɨr yɔ̀ kíì.

²Taàm du mɨ ya, ɨ́ dù nɨ́ gòmnɨ ɗàà rɨ, ŋgə́ a tȩ́nɨ̀kî. Taàm duce gòmniì, ŋgə́ a nyàŋhȩ̀ ŋgáb àm ŋgáb a gòmɓà ceí.

³Tɔ̀ɔ́ mɨ yi na nyínè nyaaŋkɨ́cií nɨ́ nyí.

⁴Dunáam ɓaín ɓe mɨ hȩ mɨ duce ɓaín ɓe nyínè. Sàmàìn tam yɔ̀ɔ gom ɓè ŋgə́ du ɓaín ɓe mɨ́cɨní ɗàwáá ɗàà. U̧ á ɓwê du ɓe nyí, nyí ɨ́ dù nɨ́ ɓaín ɓe mɨ ɗàà, sàmàìn nyí na gumí nɨ ɗàà.

⁵Mɨ du hȩ yɔ̀ á, nyí cè taàm á. Nò du ɓaín ɓe mɨ, mɨ ɨ́ dùcè ɓaín ɓe ŋgéé á gòmɓànɨ cei, ɓetí sàmàìn nyí ndɨŋ nɨ́m kù ɓè mɨ du nyí kpɔ́kwaá ɗàà.

⁶Nò du nɨ́ ɓaín ɓe mɨ ɗàwáá, kùb a lèèhô̧ ŋgə́ lúu hȩ tam yɔ̀ɔ, ŋgə́ a cə́ŋkî. Taàm cɨ́ŋni, kùb á árɨ̀nɨ lèèrénɨ wa̧á̧, tòŋkɨ́nɨ.

⁷Nyí ɨ́ dù ɓaín ɓe mɨ, nyí ɨ́ gə́tɨ̀rê tɔ̀ɔ́ móò nyínè njɔ̧̀, ɓweináam Tá moò nɨ́m nyí ɗúré, nyí ɓa kwànɨ á.

⁸Nanáam gum ví̧i̧, nyí a dù nɨ̀fuùb moò, u̧ á nyí ɓa túùmnɨ mgbíí Tá moò ru.

⁹Mɨ á nyí ɗúnɨ hȩ Tá moò ya ɗú mé. Dunáam ɓwâ lâs ɗûnɨ́m móò no.

¹⁰Nyí ɨ́ jə̀ŋ ɓíì moò, ɗûnɨ́m móò ɓa dùnɨ nyí ya hȩ mɨ jəŋ Tá moò, ɗûnɨ́m nóò duce mɨ ya rè á.

¹¹«Mɨ nyinna nyí nɨ́ɨ́b kɨ́ àm nyí a ókɓwêɓà mɨ̀tù hȩ du mó sumíì, ɗà mɨ̀tɔ̀k nyínè kɨ́ a dùɓà yúklɨ́nne á.

¹²Ɓíì moò á rè: dunáam ɓe ɗûnɨ́m mvókín nyínè no hȩ mɨ ɗúce nyínè.

¹³Ɗûnɨ́m jíri nɨ̀vɨ́tè fɨ́tɨ túùmniì á kàìkîí mè noò ɓe ɨ́r kùb ɓwàjìbì.

¹⁴Nyí ɓwàjììb moò á ɓè nyí ndɨŋ nɨ́m mɨ ta nyí ndɨ̀ŋte.

¹⁵Mɨ mɨ nyí ɓécɨ̀nɨ nùb ə́ré ɗàà, ɓetí nò ə́ré nɨ ɗə̀ə̀ŋwá ɓwáár tá no ə́ré. Mɨ ɓécɨ mɨ nyí ɓwàjììb á ɓetí mɨ ndɨŋtɨ́ nyí ɗə̀ŋhɨ̀ nɨ́ɨ́b lâs Tá moò yi ta mɨ ndɨ̀ŋte.

¹⁶Nɨ nyí sé yi ca mɨ, ɨ́dù kɨ́ moò mɨ caá nyí, mɨ ɨ́ tôm nyí gɨ̀ nànɨ gum cei, gum du ɓwèìnnɨ ɓweín ɗàwáá. Hȩ du u̧nèé, Tá moò ɓa nyí nànɨ nɨ́ɨ́b lâs nyí ɓwei ŋgə́ àm nyí du nɨ̀fuùb moò á.

¹⁷Nɨ́m mɨ ta nyí ndɨ̀ŋte á nyí dù ɓe ɗûnɨ́m mvókín nyínè no.»

¹⁸«Nùb ɗɔ̀bɨ́nné ɨ́ ɓə̀ndè nyí, ɗəəŋnáam ŋgáb ya ɓəndɨyaɓaye bɨ mɨ á.

¹⁹Nyí tɨ dùyè nùb ɗɔ̀bɨ́nné, kùb yè á nyí ɗúnɨ, ɓetí nyí ók ɓe ɗɔ̀ɔ́b á. Ɨ́dù mɨ yi caá nyí, mɨ ɨ́ áhó̧kî nyí mvókín nùb ɗɔ̀bɨ́nné no. Nyí nɨ ɓe ŋgáb ókcɨ̀wá, àm kɨ́ á ŋgáb du nyí ɓə̀ndɨ̀nɨ ru.

²⁰Lə́əmcunáye nɨ́m mɨ yi tana nyínè: ‹Mbɔ́ɔ́ nɨ tá no mbɔ́klí dɨmɨɨr ndóŋwa.› Duú ɓè ŋgáb yi túmne mɨ jábɨ́rí, ŋgáb ɓa nyí túùmɓwênɨ u̧ á. Duceé ɓè ŋgáb yi jəŋ ɓíì moò, ŋgáb ɓa jə̀ŋɓwênɨ kɨ́ nyínè á.

²¹Ɨ́dù ŋgáb ɓa ndɨ̀ŋnɨ nɨ́ɨ́b kɨ́ lâs àm nyí du nɨ̀fuùb moò rè á, ɓetí ŋgáb bɨ ɗə̀ə̀ŋwá nò ya tómwo mé.

²²Mɨ yi dùyè gòwá ŋgáb nyìnnànɨ, ŋgáb yè bɨ́ àm só ɗàà. Ɨ́dù ɗàrò ŋgáb bɨ ɓe ɓɔ̧ ɗàà ɓe ɨ́r cum ŋgábè kíì.

²³Nò ɓəndɨ mé, ɓəndɨɓwée nɨ Tá moò á.

²⁴Mɨ ya dùyè nɨ́ɨ́b nò kù du sàmàìn ndɨŋndé ɗàwáá ndɨ̀ŋwá ŋgáb a pə́ce, ŋgáb yè bɨ́ àm só ɗàà. Ɗàrò ŋgáb pə́ɓaháceé nɨ́ɨ́b mɨ ndɨŋndé, ɨ́dù ŋgáb á nɨ́me Tá moò ɓə̀ndɨ̀nɨ.

²⁵Ɨ́dù nɨ́m kɨ́ ndɨŋ u̧ àm nɨ́m du tɨín ɓíì ŋgábè noò a fô̧ hàráá á, á tɨín ɨnè: ‹ŋgáb yi ɓəndií mɨ u̧, ŋgwé ɓɨ̀ndíí ɗàà.›

²⁶«Nò kpɔ́k nyínè ɓa nyí gònànɨ á. Nò kɨ́ du Nyéhè du túùmnɨ àmɨɨr Mèèín á. Mɨ ɓa nyí ŋgə́ tómwònànɨ á, éíwòó yɨ́ Táà. Ŋgə́ gò nyí tànànyààŋnɨ àmɨɨr mo sóò.

²⁷Nyí ɓwê, nyí ɓa tànyààŋnɨ àmɨɨr mo sóò á, ɓetí yànɨ ɓwâ mɨ yi yaré tɔ̀hí, nyí yaá ɓe mɨ.»