Read Vute Jâŋ 16 Bible Online

Jâŋ 16 - Vute bible

Jâŋ 16

¹«Mɨ nyinkɨ́na nyí nɨ́ɨ́b kɨ́ ɗàá àm nyí a ə́ə̀ŋɓà kpéín ə́ə́m nyínè noò á.

²Kùb kwá juteehó̧ nyí dúhɨ́b mɨ̀yú̧ú̧ no. Ɓa dùɓàcéyènɨ ɓwâ kù, nò kwíhe nyínè a lə́mnè ní ə́nna nɨ Mèín á yáá.

³Àm ŋgáb du bɨ́ Tá moò, dùgɨ̀ mɨ nɨ̀mɨr ɗə̀ə̀ŋwáá á ŋgáb kwá ndɨ̀ŋ u̧ ru.

⁴Mɨ tana nyí àm ɓwâ ŋgáb kwá ndɨŋ nyí nɨ́ɨ́b kíì, nyí a lə́ə̀mcù ɨnayâna mɨ ya takɨ́nacií vúm na á.» «Ɓwâ mɨ yi ya tɔ̀hí, mɨ yi du mɨ nyí tànàwá àm mɨ yi duye mɨ́ ɓe nyí rè á.

⁵Ɗàrò, mɨ gɨcu yɨ́ nò ya tómwo mé á. Mvókín nyínè no, nò kù cè nɨ́ mɨ wu gɨ ŋga yàà na fɔ́wa.

⁶Ɨ́dù njɔ̧̀ fettɨ́ nyí àm mɨ tana nyí mɨ á gɨ̀cùnɨ rè.

⁷Nɨ́m mwi̧ mɨ tana nyí àmɨɨr á: á mîn mɨ gɨ̀ gwɨ̀ì lè, àm nò kpɔ́k nyínè a gòó. Ɓetí mɨ ɨ́ dù mɨ́ gɨ̀wá, ŋgə́ tɨ̀ nɨ gòo. Mɨ gɨceé, mɨ ɓa nyí ŋgə́ tómwònànɨ á.

⁸Ɓwâ ŋgə́ ɓace gòniì, ŋgə́ ɓa túùmnànɨ nùb ɗɔ̀bɨ́nné cum ŋgábè á, ŋgə́ a túùmnà ŋgáb jɨ̀r àmɨɨr. Ŋgə́ a tànàɓwê ŋgáb hȩ ŋgwìn Mèèín kwá duré.

⁹Cum ŋgábè kɨ́ du ə́ə́m ŋgáb du bɨ́ mɨ ə́ə̀mnɨ ɗàà rè á.

¹⁰Jɨ̀r àmɨɨr kɨ́ du àm mɨ ɓa gɨ̀cùnɨ yɨ́ Tá moò, nyí a dù nɨ́ mɨ pə́cɨ̀r lè á.

¹¹Ŋgwìn Mèèín ndè du kɨ́ bɨ nò tɨ ŋgáŋkom ɗɔ̀ɔ́b lè no rè á.

¹²«Mɨ á ɓàyè ɓe nɨ́ɨ́b mɨ nyinna nyínè ví̧i̧, ɨ́dù ɗàrò sàmàìn nyí jíiré ɗàà.

¹³Ɓwâ Nyéhè du túùmnɨ àmɨɨr Mèèín ɓa gòniì, ŋgə́ ɓa ndɨ̀ŋnɨ nyí ɗə̀ŋhɨ̀ àmɨɨr lâs á. Ŋgə́ tɨ̀ nɨ ɓe nyòm ŋgə́ nɨ̀mɨrí nyìnɗóòwá, ŋgə́ ɓa tànɨ nɨ́ɨ́b lâs ŋgə́ ókworé á, ŋgə́ a tànàɓwê nyí nɨ́m ɓa ndɨ̀ŋnɨ cɨ́m yȩné.

¹⁴Ŋgə́ ɓa túùmnɨ mgbíí moò á, ɓetí nɨ́ɨ́b ŋgə́ ɓa nyí tànàniì lâs, fó̧ nɨ́ mo ɓɔ̧ɔ̧ á.

¹⁵Nɨ́m Bɨ̀báá duɓwée nɨ́m móò á, àm kɨ́ á mɨ ta Nyéhè kɨ́ ɓa nyí tànànɨ nɨ́m fó̧ mó ɓɔ̧ne á ru.»

¹⁶«Hò̧ mvin ti ŋgób, nyí tɨ̀ nɨ mɨ pə́cɨ̀r. Cùr kɨ́ no, mvin ŋgób, nyí a pə́cù mɨ.»

¹⁷Nùb kù mvókín nɨ̀fuùb Yésùù no ɨ́ yà nyìntèènɨ mvókín ŋgábè no ɨnè: «Kɨ́ ŋgə́ wáana nɨ́m: ‹hò̧ mvin ti ŋgób, nyí tɨ̀ nɨ mɨ pə́cɨ̀r, cùr kɨ́ no mvin ŋgób nyí a pə́cù mɨ›, ŋgə́ ɨ́ tàkwà: ‹àm mɨ du mɨ́ gɨ̀cùnɨ yɨ́ Tá moò› á na rè, ŋgə́ ɗúce nɨ́ tànɨ ní á?

¹⁸‹Mvin ti ŋgób› ŋgə́ ta rè, ma tace ní? Nɨ́m nɨ ókwa nɨ́m ŋgə́ ɗú tànɨ kɨ́.»

¹⁹Yésù ɨ́ ɗə̀ŋhȩ̀ ŋgáb ɗú ní fɔ́nɨ fɔ́ á. Á ŋgə́ tana ŋgáb: «Àm mɨ wáana nyí: ‹hò̧ mvin ti ŋgób, nyí tɨ̀ nɨ mɨ pə́cɨ̀r. Cùr kɨ́ no mvin ti ŋgób, nyí a pə́cù mɨ› rè á nyí du fɔ́tèènɨ fɔ́ mvókín nyínè no ru à?

²⁰Mɨ tanaɓa nyí àmɨɨr wááŋ á, ɓa nyí só yínɨ á, nyí a kɨ́ì; ɨ́dù nùb ɗɔ̀bɨ́nné a ókcè bɨ́ mɨ̀tù. Nyí ɓa óknɨ yəré sumí á, ɨ́dù yəré nyínè sumí kɨ́ a sèìcù mɨ̀tù.

²¹Ɓwâ mámɓur ŋgóble fènniì, ŋgə́ á ɓe yəré sumí, ɓetí ɓwâ yíìnɨ́mí ɗóotɨ́. Ɨ́dù ɓwâ ŋgə́ feincɨré, ŋgə́ a ɨ̀lâŋ yíìnɨ́m ɓetí ŋgə́ á ɓe mɨ̀tù àm nɨ̀vɨ́tè só ɗàá.

²²U̧ á ɓwê nyí du ɓe yəré sumí ɗàrò. Ɨ́dù nɨ́m ɓa ɓàìncùnánɨ á, nyí a dù ɓe mɨ̀tù sumí. Nyí kwá dulɨ́ŋ ɓe mɨ̀tɔ̀k kɨ́ sumí u̧, nò ɓáaŋkɨ́ré ɗàà.

²³«Ɓwâ ye kɨ́ ɓa sànniì, nyí tɨ̀ nɨ mɨ fɔ́ nɨ́m kù ya fɔ́cɨ̀r. Mɨ tanaɓa nyí àmɨɨr wááŋ á: Bɨ̀bá ɓa nyí nànɨ nɨ́ɨ́b lâs nyí ɓwei àm nyí du nɨ̀fuùb moò á.

²⁴Há̧á̧ ɗàrò nyí nɨ́m kù àm nyí du nɨ̀fuùb moò ɓwèìháyèwá. Ɓweináam, Tá moò ɓa nyí nànɨ á, ɗà mɨ̀tù nyínè sumíì a dùɓà yúklîn.»

²⁵«Mɨ nyinnatɨ́ nyí nɨ́ɨ́b kɨ́ lâs ɓe gɨ̀gàìn. Ɨ́dù ɓwâ kù mɨ tɨ̀ mɨ nyí ga̧a̧nîn gà̧à̧nàcɨ̀r, mɨ ɓa nyí nyìnnàɓànɨ àm Tá moò wááŋ á.

²⁶Ɓwâ ye kɨ́ kwá sallé, nyí kwá ɓwei Bɨ̀bá nɨ́m àm nyí du nɨ̀fuùb moò. Mɨ tɨ̀ mɨ mɨ̀yú̧ ɓe ɨ́r nyínè ndáŋcɨ̀r,

²⁷ɓetí Bɨ̀bá nɨ̀mɨr á nyí ɗúnɨ. Ŋgə́ ɗú nyí àm nyí ɗúɓwéece mɨ nyí ɨ́ ə́ə̀mcè ɨnayâna ŋgə́ ɨ́ tómwo mɨ ru na rè á.

²⁸Bɨ̀bá ɨ́ tómwo mɨ ru, á mɨ go ɗɔ̀bín. Ɗàrò, mɨ á éícùkɨ́nɨ ɗɔ̀bín, mɨ a gɨ̀cù yɨ́ Bɨ̀báá.»

²⁹Á nɨ̀fuùb noò tanagi ŋgə́ ɨnè: «À pə́gɨye, ɗàrò wu nyinnatɨ́ nɨ́m wááŋ, wu wu nɨ́m nyindí ga̧a̧nîn gà̧à̧nàcɨ̀wá.

³⁰Ɗàrò nɨ́m pə́gií ɨnayâna nɨ wu ɗúnàwá fɔ́, ɓetí nɨ́m kùb ɗú wu fɔ́niì, wu ɗəəŋkɨ́yayeé, àm kɨ́ á nɨ́m ə́mne ɨnayâna Mèín ɨ́ tómwo wu ru.»

³¹Yésù ɨ́ tànà ŋgáb: «Nyí ə́əmgií hàye!

³²Àà mɨ tànà nyí, ɓa dùnɨ ɓwâ kù, ɓwâ kɨ́ ɗóoɓácéecií nɨ́, nyí ɓa sììnɨ á, nò lâs a gì no yó. Nyí a mbɨ́kkɨ́sò mɨ mwi̧, ɨ́dù mɨ mɨ mwi̧ ɗàà, Bɨ̀bá á ɓe mɨ.

³³Mɨ nyinna nyí nɨ́ɨ́b kɨ́ u̧ ɓe àm ju ɓaín nɨ́me nyí du dùnɨ rè, nyí a kwà ju ɗóóŋ na á. Nyí kwá pə́ jábɨ́r ɗɔ̀bín, ɨ́dù tamnáam njɔ̧̀. Nyòom ɓáŋhɨ́b ɗɔ̀ɔ́b lè noò, mɨ ɓəttɨ́ ŋgáb su!»