Read Vute Jâŋ 17 Bible Online

Jâŋ 17 - Vute bible

Jâŋ 17

¹Cùr Yésù yi nyincáŋhȩ u̧nèé, ŋgə́ ɨ́ góòmwî íí còóm, ŋgə́ ɨ́ tà: «Bɨ̀bá, ɓwâ wu túmnɨ mgbíí mwin wóò, ɗà mwin a túùmɓwêcè mgbíí woò ɗóotɨ́.

²Ɓetí wu naá mwin wó kɨ́ nyòm ŋgə́ kɨ́k nɨ̀vɨ́tɨ̀bì, àm ŋgə́ a nà nùb wu ya na ŋgéé mè mɨ̀cɨ̧̀ɨ̧́.

³Mè mɨ̀cɨ̧̀ kɨ́ du ɨnayâna ŋgáb ɗə̀ŋhɨ̀ wu á, wu nò du Mèín mwi̧ du àmɨrìí. Ŋgáb a ɗə̀ə̀ŋɓwêcè mɨ Yésù Krístù, nò wu ya tómworé á.

⁴Mɨ túumtɨ́ mgbíí woò ɗɔ̀bín. Ə́r wu yi ɗob mé, mɨ cáaŋceé.

⁵Ɗàrò, Bɨ̀bá, nacugɨ mɨ mgbíí mɨ ya du ɓe kí wo tíí, ɓwâ kɨ́ nɨ́ɨ́b lâs ma nyààŋyèwáá.

⁶Nùb ɗɔ̀bɨ́nné wu ya á wu ɨ́ nà mɨ rɨ, mɨ ndɨŋtɨ́ ŋgáb ɗə̀ŋhɨ̀ wu. Ŋgáb yi ókkom ɓe wu á, wu ɨ́ nà mɨ ŋgáb, ŋgáb ɨ́ jə̀ŋcê Kìn woò.

⁷Ɗàrò, ŋgáb ɗəəŋtɨ́ ɨnayâna, nɨ́ɨ́b mɨ du ɓe kíí lâs fó̧ wo ŋgáré á, wu ɨ́ na mɨ ru,

⁸ɓetí mɨ tanaá ŋgáb Kìn wu yi taré mó ɓɔ̧ne, ŋgáb ɨ́ ə́mnè. Ŋgáb ɗəəŋmeɓagií mɨ éíwo yɨ́ woò á, ŋgáb ə́əmceé ɨnayâna wu ya tómwo mɨ ru.

⁹«Nùb wu ya na mɨ kɨ́, mɨ yóŋ ɓe ɨ́r ŋgábè á, ɓetí ŋgáb ók ɓe wu á. Mɨ mɨ yóŋwa ɓe ɨ́r nùb ɓáŋhɨ́b ɗɔ̀bɨ́nné.

¹⁰Nùb lâs ók ɓe mé, ókɓwée ɓe wu á. Nùb lâs ókce ɓe wé, ókɓwée ɓe mɨ á. Ŋgáb á cè ndɨ̀ŋnɨ mgbíí moò fó̧ laŋtɨ̧ɨ̧́.

¹¹Kɨ́ ŋgábè ŋgáb me bɨ ɗɔ̀bín á. Yànɨ ɗàrò, mɨ mɨ ɗɔ̀bín ɗàcɨ̀wá, mɨ gɨ mɨ yá woò á. Bɨ̀bá, wu nò du járkɨ́táá, gə́tɨm ŋgáb ɓe nyòm woò, nyòm wu ya na mɨ rè, àm ŋgáb a dù ɓaín hȩ nɨ́me wu duce ɓanné.

¹²Ɓwâ mɨ ya duye ɓe ŋgábè, mɨ ya gə́tií ŋgáb ɓe nyòm woò, nyòm wu ya na mɨ rɨ; mɨ ya gə́tií ŋgáb, nɨ̀vɨ́tè mwi̧ lɔ̧́wa, sé nò yi ɓa lɔ̧́nɨ àm nɨ́m yi du tɨín Káàtà Mèèín noò a fô̧ hàráá rɨ.

¹³Ɨ́dù ɗàrò, mɨ gɨ yɨ́ woò á, mɨ nyince u̧ ɓwâ mɨ dukɨ́ye ɗɔ̀bín ndè, àm mɨ̀tɔ̀k mo sumí yúklîn ndè, ŋgáb a dùɓwê ɓe kíí á.

¹⁴Mɨ yi naréé ŋgáb Kìn woò ɓɔ̧ɔ̧, ɨ́dù nùb ɗɔ̀bɨ́nné ɨ́ ɓə̀ndè bɨ́ ŋgáb, ɓetí ŋgáb yi bɨ́ ɓe nùb kɨ́ ɓaín ɗàɓwêwá hȩ mɨ nɨ̀mɨr.

¹⁵Mɨ mɨ wu yóŋwa ɨnayâna wu ákɨ́ ŋgáb ɗɔ̀bín, ɨ́dù mɨ yóŋ wu wu gə́tɨ̀ ŋgáb àm Sátàìn tɨ̀ ndɨŋ ŋgáb ɓáŋhɨ́nne á.

¹⁶Ŋgáb bɨ ɓaín ɓe nùb ɗɔ̀bɨ́nné ɗàɓwêwá hȩ mɨ nɨ̀mɨr.

¹⁷Túumnam ŋgáb àmɨɨr, ɗà ŋgáb a ô ɓe wu. Àmɨɨr kɨ́ du Kìn woò á.

¹⁸Mɨ tómtɨ́ ŋgáb ɗɔ̀bín, hȩ wu ya tómwoɓwée mɨ ɗɔ̀bɨ́nné.

¹⁹Ɓe ɨ́r ŋgábè, mɨ nakíí wu mè moò àm Kìn àmɨrì woò a ndɨ̀ŋ ŋgáb ók ɓe wu.

²⁰«Mɨ wu yóŋɗóòwá ɓe ɨ́r ŋgábè, ɨ́dù mɨ yóŋɓwée wu ɓe ɨ́r nùb lâs kwá ók Kìn ŋgábè ɓɔ̧ne a ə́mnè mé á.

²¹Bɨ̀bá, mɨ yóŋ wu àm ŋgáb lâs dù ɓanné á. Hȩ nɨ́me wu du ɓanné, ŋgáb ɓàìnɓwê ɓe nɨ́m u̧, àm nùb ɗɔ̀bɨ́nné lâs a ə́mnè ɨ́nayâna wu ɨ́ tómwo mɨ ru.

²²Mɨ naá ŋgáb mgbíí wu ya na mé, àm ŋgáb a dù ɓaín hȩ nɨ́me wu duce ɓanné.

²³Mɨ dù ɓaín ɓe ŋgáb hȩ wu duce ɓaín ɓe mé, ŋgáb a dù mwi̧, ɗà nùb ɗɔ̀bɨ́nné a ɗə̀ŋhȩ̀ ɨnayâna wu yi tómwo mɨ ru, wu á cè ŋgáb ɗúnɨ hȩ wu ɗúɓwée mé.

²⁴Bɨ̀bá, wu yi naá mɨ nɨ̀fuùb lè ru. Mɨ ɗúceé yɨ́ mɨ ɓa dùniì, ŋgáb dùɓwê ɓè, àm ŋgáb a pê mgbíí mo wu ya na mɨ àm wu ya ɗú mé, nɨ́ɨ́b lâs ma nyààŋyèwáá.

²⁵Bɨ̀bá, wu nò du ɗɨ́ɗɨ̧́ɨ̧́, nùb ɗɔ̀bɨ́nné bɨ wu ɗə̀ə̀ŋwá, ɨ́dù kɨ́ moò mɨ ɗəəŋtɨ́ mɨ́ wu. Nɨ̀fuùb mo rè ɗəəŋceé bɨ́ ɨnayâna wu ɨ́ tómwo mɨ ru.

²⁶Mɨ yi ndɨŋtɨ́ ŋgáb ɗə̀ŋhɨ̀ wu, mɨ ɓace ndɨ̀ŋlɨ́ŋnɨ u̧ á, àm ɗûnɨ́m ŋgáb du ɓe kíí a dù hȩ kɨ́ wu ya ɗú mé, mɨ a dùcè ɓaín ɓe ŋgáb.»