Read Vute Jâŋ 18 Bible Online

Jâŋ 18 - Vute bible

Jâŋ 18

¹Ɓwâ Yésù yi nyincáŋhȩ u̧nèé, ŋgə́ ɓe nɨ̀fuùb noò ɨ́ pèndôŋ Sèdɨ̀rôm cəə́r. Mwai kù yaá gə́nȩ̀ȩ́ ɓè, ŋgə́ ɓe nɨ̀fuùb noò ɨ́ lə́sò mwai kɨ́ no.

²Yúdàs nò yi ɓa ŋgə́ sə́rɨ̀niì yi ɗəəŋɓwéetɨ́ mwai kɨ́, ɓetí ŋgə́ ɓe ŋgáb lâs yaá gɨ̀lɨ́ŋnɨ mwa̧á̧ ku cúk.

³Á Yúdàs yi gɨso mwa̧á̧ ku, ŋgə́ ɨ́ gèsò sójààb ŋgáré, dùgɨ̀ nùb gə́tɨ Dúú jíri Mèèín, mvènnɨ́b nùb na satɨgàà ɓe nùb yi du Fàrísààb cùrìì yi tómndé. Ŋgáb lâs yaá ɓe túúŋ suu ŋgáré ŋgáré, gaar ŋgaméé ɓe lámbààb ŋgáré ŋgáré.

⁴Hȩ Yésù yi ɗəəŋkɨ́cɨ nɨ́m yi ɓa ŋgə́ féínnàniì rèé, ŋgə́ ɨ́ ŋgɨ̀ɨ̀résò ŋgáb no, ŋgə́ ɨ́ fɔ̂ ŋgáb ɨnè: «Nyí má na á?»

⁵Ŋgáb ɨ́ pììnà ŋgə́ ɨnè: «Nɨ́m má Yésù nò Nàsàréèt á.» Á Yésù tana ŋgáb: «Mɨ á rè.» Yúdàs nò yi sə́re ŋgéé yaá ɓè ə́ŋhîn.

⁶Tàá Yésù tana ŋgáb: «Mɨ á rè» na rè, vúm yè ŋgɨɨcuú cùrì na, ŋgáb ɨ́ gùhè ɗàá.

⁷Yésù ɨ́ fɔ́kwà ŋgáb: «Nyí má na á?» Á ŋgáb ta: «Nɨ́m má Yésù nò Nàsàréèt á.»

⁸Á Yésù tana ŋgáb: «Mɨ tanacií nyí mɨ á. Duú ɓè nyí máte mé, mbɨ́kná nɨ nɨ̀fuùb mo rè gɨ̀ bɨ.»

⁹U̧ á nyindí Yésù yi nyinndé yi fó̧ hàrák, ɓetí ŋgə́ yi taá: «Bɨ̀bá, nùb wu ya na mé, mɨ nɨ̀mwi̧ mvókín ŋgábè no mə̀mwá.»

¹⁰Sìmóŋ Píyéèr yaá ɓe kundi nóò, á ŋgə́ suŋhó̧, ŋgə́ ɨ́ téínkî nò ə́ré nɨ̀gáŋ satɨgàà tó ŋgáár lame. Ɨ́r nò ə́ré kíì yaá Màlkûs.

¹¹Á Yésù tana Píyéèr: «Kɨ́kcurə́əm kundi wóò mbȩ́ȩ́. Ɗú mɨ pə́ jábɨ́r Tá moò ta mɨ gò pénɨ rè á.»

¹²Sójààb ɓe mvèìn ɓoò, ɓáhîn ɓe nùb gə́tɨ Dúú Jíri Mèèín ndè ɨ́ bì Yésù, ŋgáb ɨ́ kwéì ŋgə́.

¹³Ŋgáb ɨ́ gèyàyè ŋgə́ Ánàà tíí. Ánà kɨ́ yɨɨ́m tɨ́gwìn Kàyíìf á. Kàyîf kɨ́ yi ɨ́ duce nɨ̀gáŋ satɨgàà dáín kɨ́ no ru.

¹⁴Ŋgə́ ɨ́ du nò yi tana kɨ̀jííb Jwîf bɨ ɨ́nayâna ŋgáb pə́wa á mîn nɨ̀vɨ́tè mwi̧ kúbɨ̂ŋ ɓe ɨ́r vúm lâs yàà ru.

¹⁵Sìmóŋ Píyéèr ɓe nɨ̀fuùb kù yaá tùsònɨ Yésù. Nɨ̀gáŋ satɨgàà yi ɗəəŋtɨ́ nɨ́ nɨ̀fuùb kɨ́, àm kɨ́ á nɨ̀fuùb kɨ́ ya lə́soɓáhe ɓe Yésù hamnin ku ru.

¹⁶Ɨ́dù Píyéèr ɨ́ mèkɨ́sò nɨ́ ɓɔ̧ hamni. Á nɨ̀fuùb kù mwi̧í̧ yi du marîn ɓe nɨ̀gáŋ satɨgàà rè yi fó̧cuwo nyìnnɨ ɓe nɨ̀gwi yi gə́tɨkom ɓavɨ̀rì, ŋgə́ ɨ́ gèrésògì Píyéèr.

¹⁷Nɨ̀gwi yi gə́tɨkom ɓavɨ̀r lè ɨ́ fɔ̂ Píyéèr ɨnè: «Wu á ɓwêhà kpáín nɨ̀fuùb nɨ̀ŋgwá rèè no ye?» Píyéèr ɨ́ tà: «Éì, mɨ mɨ nɨ̀fuùb ŋgéé sé ndóŋ.»

¹⁸Hȩ ndoŋnɨr yi du ndɨ̀ŋniì, nùb ə́ré hamnin kwe ɓe nùb gə́tɨ ɓɔ̧ hamni yi latií wa, ŋgáb ɨ́ yà ònnɨ. Píyéèr ɨ́ gòɓwê wa kɨ́ ònnɨ.

¹⁹Á nɨ̀gáŋ satɨgàà fɔ́ Yésù ɨnè: «Tanaye mɨ, kúúŋ tɔ̀ɔ́ ŋge á wu du nànɨ? Wu ɓáace nɨ̀fuùb àm níì?»

²⁰Yésù ɨ́ pììnà ŋgə́ ɨnè: «Mɨ ya nyinnakomɓa nɨ̀vɨ́tɨ̀b mɨ̀kùnín á, mɨ ya mɨ́ nyinndí kù yoó nyìnwá. Mɨ yaá tɔ̀ɔ̀lɨ́ŋnɨ dúhɨ́b mɨ̀yú̧ú̧ no, dùgɨ̀ Dúú Jíri Mèèín no, yá Jwîf bɨ lâs ya ɓáakomndé.

²¹Wu fɔ́ce mɨ fɔ́ àm níì? Fɔ́ɔm nùb ya ók mɨ nyìnniì nɨ́m mɨ yi nyinna ŋgábè, kɨ́ ŋgábè ŋgáb ɗəəŋɓatɨ́ nɨ́m mɨ yi nyinndé mîn.»

²²Ɓwâ Yésù yi pihe u̧nèé, nɨ̀mwi̧ mvókín nùb gə́tɨ Dúú Jíri Mèèín yi du ɓè ə́ŋhɨ́nne ɨ́ láhè Yésù ɓɔ̧ɔ̧, ŋgə́ ɨ́ tà: «U̧ á wu du pììnànɨ nɨ̀gáŋ satɨgàà nyinndí à?»

²³Yésù ɨ́ pììnà ŋgə́ ɨnè: «Duú ɓè mɨ nyin ɓáŋhɨ́nne, tana mɨ nɨ́m mɨ nyin ɓáŋhɨ́nne. Duceé ɓè mɨ nyin nyɔ̧né, àm níì á wu láace mɨ?»

²⁴Yésù á há cè ŋgárɨ̀b kwéin á Ánà tómso ŋgə́ yɨ́ Kàyíìf, nɨ̀gáŋ satɨgàà.

²⁵Mvókín kɨ́ no, Sìmóŋ Píyéèr á cè wa ùwèìhánɨ, á kùb fɔ́ ŋgə́ ɨnè: «Wu á ɓwêhà kpáín nɨ̀fuùb nɨ̀ŋgwá rèè no ye?» Á Píyéèr cam, ŋgə́ ɨ́ tà: «Éì, mɨ mɨ nɨ̀fuùb ŋgéé sé ndóŋ.»

²⁶Kpáín nùb ə́ré nɨ̀gáŋ satɨgàà no, nɨ̀mwi̧ yi du gbɨ̧̀ ɓe nò Píyéèr yi téínkɨ́ tó rè ɨ́ tà ɓe Píyéèr ɨnè: «Mɨ tɨ pə́haá wu ɓe Yésù mwa̧á̧ péín ndɨ ye?»

²⁷Ɨ́dù Píyéèr ɨ́ càmkwàhâ nɨ́. Mvókín kɨ́ no, cein tíí ɨ́ tôŋ.

²⁸Kɨ́rɨ̀b kɨ́rɨ̀b, érèé yɨ́ Kàyíìf, kùb ɨ́ gè Yésù Pìlât nò yi du gómnàà hamnin. Ɨ́dù mvènnɨ́b Jwîf ɓoò ɨ́ dù bɨ́ hamnin ku lə́wa àm jɨ́nɨ̀m cumí tɨ̀ laiwo vúmè. Vúm tɨ̀ du bɨ́ cɔŋ Páskàà tàaŋ.

²⁹Àm kɨ́ á Pìlât yi gainhó̧so ŋgáb lúu, gìnɨ ŋgáb fɔ́nɨ ɨnè: «Ŋgwé àmnì nyí gewo nɨ̀ŋgwá rè hò̧neè á ní?»

³⁰Ŋgáb ɨ́ tà: «Ŋgə́ tɨ dùnɨ ɓáŋhîn kù ndɨ̀ŋwá, nɨ́m yè nɨ́ wu ŋgə́ hò̧ne gèwònàwá.»

³¹Á Pìlât tana ŋgáb: «Nyí nɨ̀miib gená nɨ ŋgə́ ŋgùnnɨ hȩ ɓíì nyínè du tàniì.» Ŋgáb ɨ́ tàcùnà ŋgə́: «Nyí nùb Róòm, nyí nɨ nɨ́m nàwá nyòm nɨ́m kwíhe nɨ̀vɨ́tèé.»

³²U̧ á nyindí Yésù yi nyin, tànànɨ nɨ̀vɨ́tɨ̀b kúúŋ cwá ŋgə́ ɓa kúniì yi fó̧gi hàrák.

³³Á Pìlât lə́cu hamnin, ŋgə́ ɨ́ ɓê Yésù fɔ́nɨ ɨnè: «Wu ɨ́ du mvèìn jíri Jwîf ɓoò ru à?»

³⁴Yésù ɨ́ fɔ́cù ŋgə́ ɨnè: «Wu ma nyin nɨ́m fó̧ɓa wu nɨ̀mɨ́rí sumíì kèè, kèè nò kù ɨ́ tana wu àm mo sóò?»

³⁵Pìlât ɨ́ tà: «Ɨna, mɨ mɨ Jwîf á à? Nùb wo ti̧né ɓe mvènnɨ́b nùb na satɨgàà ɨ́ gewoha wu mo tíí hò̧ ru ye. Wu tɨ ndɨŋcéye wu ní?»

³⁶Yésù ɨ́ tàcù: «Haam mvènnì moò nɨ ɗɔ̀bín hò̧ ɗàà, haam mvènnì moò tɨ dùyè ɗɔ̀bín hò̧, nùb moò yè lɨɨŋtɨ́ àm Jwîf bɨ tɨ̀ bɨ mé. Ɨ́dù haam mvènnì moò nɨ ɗɔ̀bín hò̧ ɗàà.»

³⁷Á Pìlât fɔ́ Yésù ɨnè: «Wu wu mvèìn jíri á hàye?» Yésù ɨ́ pìhè: «Á hȩ wu ta kɨ́, mɨ mvèìn á. Kùb yi fein mɨ àm mɨ gò ɗɔ̀bín tànɨ Kìn àmɨrì á. Nò lâs du tùnɨ jɨ̀r àmɨrìí á ónɨ Kìn mo ɓɔ̧ne.»

³⁸Pìlât ɨ́ fɔ́cù ŋgə́: «Kìn àmɨrì macè ní?» Hȩ Pìlât tànɨ u̧nèé, ŋgə́ ɨ́ gàìncùhô̧ Jwîf bɨ. Ŋgə́ ɨ́ wáànà ŋgáb ɨnè: «Mɨ mɨ pə́wa ɓáŋhîn kù nɨ̀ŋgwá rè ndɨŋ ɨ́ tà kwíìkɨ́ ŋgéé.

³⁹Dáín lâs, ɓwâ jùrúb Páskàà, mɨ á nyí áhó̧kɨ́lɨ́ŋnànɨ nɨ̀vɨ́tè mwi̧ nìrì, nyí ɗúú mɨ mbɨ́kcù mvèìn jíri Jwîf ɓoò à?»

⁴⁰Á ŋgáb gbəm ɨnè: «Ɗàwá, ŋgə́ sé, mbɨ́kcùnàbɨ̂ŋ nɨ́m Bàrábàs!» U̧ kɨ́ Bàrábàs yɨɨ́mɓà ŋgàyɨ́r kàm tamŋgwéé kù á.