Read Vute Jâŋ 19 Bible Online

Jâŋ 19 - Vute bible

Jâŋ 19

²Sójààb ɨ́ jɨ̂b ɗə̀b lúŋmbí nyààŋnɨ kàŋ mvènnì no, ŋgáb ɨ́ hàndɨ̀nà Yésù. Ŋgáb ɨ́ lə́rə́nàɓwê ŋgə́ sàró jandîn kù.

³Ŋgáb ŋgɨɨrésoó ŋgə́ nó, ŋgáb a tà: «Ɨna, mvèìn jíri Jwîf ɓoò, wèìhá ɓɔ̧ kà!» Ŋgáb a láhè ŋgə́ ɓɔ̧ɔ̧.

⁴Pìlât ɨ́ fó̧kwàhâ, ŋgə́ ɨ́ tànà nɨ̀vɨ́tɨ̀b ɨnè: «Óknáye yáà, mɨ á mɨ́ nyí gècùhó̧nànɨ nɨ̀ŋgwá rè hò̧, nyí a ɗə̀ŋhȩ̀ ɨnayâna mɨ mɨ pə́wa ɓáŋhîn kù ŋgə́ ndɨŋ ɨ́ tà kwíìkɨ́ ŋgéé.»

⁵Kùb ɨ́ gèhó̧há cè Yésù, kàŋ mvènnì jɨ́ɨm ɓe ɗə̀b lúŋmbí rè ŋgwéé handîn, ɓe sàró jandîn só. Á Pìlât tana ŋgáb: «Ŋgə́ á ná rè!»

⁶Ɨ́dù ɓwâ mvènnɨ́b nùb na satɨgàà ɨ́ nùb gə́tɨ Dúú Jíri Mèèín yi pə́ Yésùù, ŋgáb ɨ́ gbə̀m ɨnè: «Kpáaŋwúum ŋgə́ bɨ̧̀ɨ̧́, kpáaŋwúum ŋgə́ bɨ̧̀ɨ̧́!» Pìlât ɨ́ tàcùnà ŋgáb: «Nyí nɨ̀miib genáam ŋgə́ kpáàŋwúnɨ bɨ̧̀ɨ̧́, ɓetí mɨ mɨ pə́wa ɓáŋhîn kù ŋgə́ ndɨŋ ɨ́ tà kùb kwíìkɨ́ ŋgéé.»

⁷Á Jwîf bɨ tacuna Pìlât ɨnè: «Nɨ́m á ɓe ɓíì nɨ́mè. Ɓíì nɨ́mè kɨ́ cè nɨ́ ə́ə̀mnɨ nyindí ŋgə́ wáhe ɨnayâna ní mwin Mèèín á na rè ɗàà, ɗú kwíìkɨ́ ŋgə́ á.»

⁸Ɓwâ Pìlât ók nyindí kíì, vùù ɨ́ bɨ̀ndóŋɓàgì ŋgə́ tíí.

⁹Ŋgə́ ɨ́ lə́cù hamnin, ŋgə́ ɨ́ fɔ̂ Yésù ɨnè: «Wu cè nò ŋgaà á?» Ɨ́dù Yésù ɨ́ mònnà nɨ́ ŋgə́ ɓɔ̧.

¹⁰Á Pìlât tana ŋgə́: «Wu mɨ ɓɔ̧ wènnànɨ ɗàwá à? Wu ɗə̀ə̀ŋwá mɨ á ɓe nyòm mɨ mbɨ́k wé, ɓe nyòm mɨ ndɨŋ kùb kpáàŋwú wu bɨ̧̀ɨ̧́ à?»

¹¹Yésù ɨ́ tàcùnà ŋgə́: «Mèín tɨ dù wu ə́ə̀mnàwá, wu yè wú ɓe nyòm kù mɨ ya ɗàà. Àm kɨ́ á cum nò njóowo mɨ wo tíí hò̧neè ndóŋ kɨ́ woò ru.»

¹²Ɓè mu̧u̧ Pìlât ɨ́ yàrê mánɨ kɨ̀cáàb ní mbɨ́kcu Yésùù. Ɨ́dù Jwîf bɨ ɨ́ yà gbə̀mnɨ ɨnè: «Wu ɨ́ mbɨ́kcù wú nɨ̀ŋgwá ɗàrɨ́, wu ma wu ɓwàjìrí mvèìn kàm jírií sé á. Nò wáahó̧ɓa ɓɔ̧ɔ̧ ní mvèìn jíri á na rɨ jundɨ nɨ ju kɨ́ ɓe mvèìn kàm jíri á!»

¹³Ɓwâ Pìlât ók nyindí kíì, ŋgə́ ɨ́ tà kùb gèhó̧ Yésù lúu. Ŋgə́ ɨ́ gì dùrénɨ kò ŋgù̧ní ya. Kò kɨ́ yaá alléso̧ó̧ yɨ́ kùb du ɓénɨ «Gwa sɨkli.» (Ɨ́r gwa kíì yaá ɓe nyindí Jwîf «Gàbátà»).

¹⁴Yɨɨ́m péín mvii ŋgwéé á, kùb a nyaaŋkɨ́ce àm jùrúb Páskàà. Á Pìlât tana Jwîf bɨ ɨnè: «Mvèìn jíri nyínè á ná ɗàrɨ́!»

¹⁵Ɨ́dù ŋgáb ɨ́ yà gbə̀mnɨ ɨnè: «Kwíhɨm ŋgə́, kwíhɨm ŋgə́, Kpáaŋwúum ŋgə́ bɨ̧̀ɨ̧́!» Á Pìlât fɔ́ ŋgáb ɨnè: «Nyí ɗúú mɨ kpáàŋwúkɨ́ mvèìn jíri nyínè bɨ̧̀ɨ̧́ à?» Mvènnɨ́b nùb na satɨgàà ɨ́ tà: «Nɨ́m nɨ ɓe mvèìn kù ɗàndóŋwa, sé mvèìn kàm jíri.»

¹⁶Á Pìlât mbɨ́kna ŋgáb Yésù, ŋgáb ɨ́ gì ŋgə́ kpáàŋwúnɨ bɨ̧̀ɨ̧́. Kí á ŋgáb bi Yésù.

¹⁷Ŋgáb ɨ́ gèhô̧ ŋgə́ kúr gɨ́ní, gìnɨ yɨ́ kùb du ɓénɨ «Tum ŋgwéé», (ɓe nyindí Jwîf, ɨ́r kɨ́ á «Gòlgótà»). Yésù nɨ̀mɨr a haince bàŋ noò.

¹⁸Ɓè á ŋgáb yi kpáaŋwú Yésù bɨ̧̀ɨ̧́. Ŋgáb ɨ́ kpáàŋwúɓwê nɨ̀ŋgwáàb bɨrɨ́b bɨ̧̀ɨ̧́ péín ndè péín ndè, Yésù nɨ̀mɨr á cè tə̧ə̧́.

¹⁹Pìlât ɨ́ tà kùb tɨ̀ìn nɨ́m kù, kùb a kpáŋwúsò bàŋ kɨ́ ya. Nɨ́m yi du tɨín kɨ́ á ɨnè: «Yésù nò Nàsàréèt, mvèìn jíri Jwîf ɓoò.»

²⁰Jwîf bɨ ví̧i̧ yi faintɨ́ nɨ́m yi du tɨín kɨ́, ɓetí yɨ́ kùb ya kpáŋwú Yésù bɨ̧̀ɨ̧́ rè yaá nɨ́ gín kúrì. Nɨ́m kɨ́ yaá tɨín ɓe nyindí Jwîf, nyindí Róòm ɨ́ nyindí gɨrêk.

²¹Á Jwîf bɨ yi du mvènnɨ́b nùb na satɨgàà yi tana Pìlât ɨnè: «Nɨ́m du tɨín ‹Mvèìn jíri Jwîf ɓoò› rè, nɨ ɗúwa wu mbɨ́k u̧, ɗú nɨ́ dù tɨín ɨnè á: ‹Nɨ̀ŋgwá rè ta ní mvèìn jíri Jwîf ɓoò á.› »

²²Á Pìlât tacuna ŋgáb: «Nɨ́m mɨ tɨnndé mècɨ̀ tɨín u̧.»

²³Ɓwâ sójààb yi kpáaŋwú Yésù bɨ̧̀ɨ̧́, ŋgáb ɨ́ â júúb noò, ŋgáb ɨ́ gɔ̀klê tə̧ə̧́ nààsɨ̀b, nɨ̀mwi̧ ɨ́ â kɨ́ noò. Ŋgáb ɨ́ áɓwéhè sàró nóò. Sàró nó kɨ́ yi nɨ́ tə́r ya ɗàà; yaá nɨ lu̧ú̧.

²⁴Sójààb ɨ́ tà mvókín ŋgábè no ɨnè: «Nɨ́m nɨ sàró rè aám àmkɨ́nâr, nɨ́m kàìkɨ́ná dùrí, nò ndóblé a â.» Nɨ́m sójààb yi ndɨŋndé á kí. U̧ á nɨ́m yi du tɨín káàtà Mèèín noò yi fó̧ hàrák, ɓetí káàtà Mèèín no, á tɨín wááŋ ɨnè: «Ŋgáb gɔktɨ́ júúb moò mvókín ŋgábè no, ŋgáb ɨ́ kàìkî sàró móò dùrí.»

²⁵Yà Yésùù ɓe wúrúb yaá gín bàŋ kíì ə́ŋhîn, dùgɨ̀ Màríyà gwi Kɨ̀lòpáàs ɓe Màríyà nò Màkdàláà.

²⁶Yésù ɨ́ pê yà nóò ɓe nɨ̀fuùb ŋgə́ yi ɗúkomɓa ceí gín yà nó kíì. Á ŋgə́ tana yà nóò: «Yàáŋ, mwin wóò á ɗàrɨ́.»

²⁷Ŋgə́ ɨ́ tànàcè nɨ̀fuùb kɨ́ ɨnè: «Yà wóò á ɗàrɨ́.» Yàrê ɓwâ kíì á nɨ̀fuùb kɨ́ yi gamndé yà Yésùù no yó, dùcɨ̀ nɨ hȩ nò no gbàŋné.

²⁸Cùr kɨ́ no, hȩ Yésù yi ɗəŋhȩ ɨnayâna ɗàrò nɨ́ɨ́b lâs fó̧tɨ́ hàrák lèé, ɓe ɨ́r nɨ́m du tɨín Káàtà Mèèín noò fó̧ɓà lâs hàráá, ŋgə́ ɨ́ tà ɨnè: «Síì á mɨ ndɨ̀ŋnɨ.»

²⁹Nɔk kù yaá ɓè, súm no ɗéé. Á sójààb yi sɨ́ndé tùú kù no, ŋgáb ɨ́ tɨ́blê ŋgɨ́ŋ kù ya, ŋgáb ɨ́ swèìwúsònà Yésù ŋgə́ nyə́mtɨ.

³⁰Ɓwâ ŋgə́ yi nyə́m súm kíì, ŋgə́ ɨ́ tà: «Nɨ́ɨ́b lâs fó̧tɨ́ hàrák.» Á ŋgə́ tɨɨmsé ŋgwé ɗàá, ŋgə́ ɨ́ kû!

³¹Yɨɨ́m ye jumbarìì á, kɨ̀jííb Jwîf ɓoò yɨɨ́mcè bɨ́ ɗúwa ɨnayâna nùb kùb ya kpáŋwú bɨ̧̀ɨ̧́ mè còóm ku, ɓetí ye Sàbáà yɨɨ́m ye jíri á. Á ŋgáb yi ɓwei Pìlât, ŋgə́ ndɨ̀ŋ kùb ɓə̀tɨ̀kɨ́ ŋgáb gurùb, kùb a árɨ̀sókî fɨ́nɨ́b ŋgábè.

³²Á sójààb yi go ɓə̀tɨ̀kɨ́nɨ gurùb nò tíí ɓe kɨ́ nò bɨrɨ́bí kùb yi kpáŋwúɓwée bɨ̧̀ɨ̧́ gín Yésùù rè.

³³Ŋgáb féínndé Yésù ya, ŋgáb ɨ́ kwà ŋgə́ á cɨ̀ nɨ kúri, àm kɨ́ á ŋgáb yi du bɨ́ ŋgə́ gurùb ɓə̀tɨ̀wá ru.

³⁴Ɨ́dù nɨ̀mwi̧ mvókín sójàbì ɨ́ túmndê Yésù páín ɓwàrí, ɓè mu̧u̧ tɨ́m ɓe mvúm ɨ́ yà súhó̧nɨ.

³⁵Nò du átɨ̀nɨ nɨ́ɨ́b yi ndóŋ ndèè yaá ɗàá, nɨ́ɨ́b ŋgə́ duce átɨ̀nɨ kɨ́ àmɨɨr á. Ŋgə́ nɨ̀mɨ́r ɗəəŋceé ɨnayâna ní ta àmɨɨr á, àm nyí a dùɓwê ɓe ə́mní.

³⁶Nɨ́m kɨ́ yi ndɨŋ u̧ àm nɨ́m du tɨín Káàtà Mèèín noò a fô̧ hàráá á, ɓetí á tɨín ɨnè: «Kùb ya bɨ́ kúkwí ŋgéé sóò mwi̧ ɓà rɨ ɓèìwá.»

³⁷Á kwà tɨín ɨnè: «Ŋgáb kwá ɓandɨso íí péín nò ŋgáb ya túmndé páín ɓwàríì.»

³⁸Cùr kɨ́ no, Yòsə̂b nò Àrɨ̀màtéè ɨ́ ɓwèì Pìlât fín Yésùù. (Yòsə̂b yɨɨ́m nɨ̀fuùb Yésùù á, ɨ́dù ŋgə́ yi nɨ́ túùmhó̧nɨ síí laŋtɨ̧ɨ̧́ ɗàà ɓetí vùù yaá ŋgə́ bìnɨ ɓe kɨ̀jííb Jwîf ɓoò.) Á Pìlât yi ə́əmna ŋgə́, ŋgə́ hàìn fín Yésùù.

³⁹Nìkòdêm, nɨ̀ŋgwá yi go kwànɨ Yésù cɨ́ɨ́m ndè ɨ́ gɨ̀sòɓwê. Ŋgə́ ɨ́ gèsò làmɨ́ndà kùb ɓé míìr lɨ ɓe kɨ́ kùb ɓé àlòwês lɨ ŋgáré, sàmàìn kílò vɨríí ɨ́ cóóŋ, àm miina fɨ́nní.

⁴⁰Ŋgáb ɨ́ hàìn fín Yésùù, ŋgáb ɨ́ ɓòmndê ndómbóó, ŋgáb a miiwúce làmɨ́ndà hȩ Jwîf bɨ ndɨŋlɨ́ŋ ɓwâ ŋgáb du vɨ́rɨ̀nɨ nɨ̀vɨ́tèé.

⁴¹Yɨ́ kùb ya kpáaŋwú Yésù bɨ̧̀ɨ̧́ rè, mwai kù yaá ɓè. Mwai kɨ́ no cè, sèè heé kùb ya du nɨ̀vɨ́tè no kɨ́klékɨ́yèwáá yaá nó.

⁴²Jùrúb Sàbáà Jwîf ɓoò yaá hȩ yȩȩ́ u̧. Hȩ sèè kɨ́ yi duce cóo ɗàwáá, ŋgáb ɨ́ gì kɨ́klénɨ Yésù no.