Read Vute Jâŋ 2 Bible Online

Jâŋ 2 - Vute bible

Jâŋ 2

¹Cùr kɨ́ no jíì bɨrɨ́b, ɗɔ̀ɔ́b Gàlìléè, nò kù ɨ́ ɓù gùúm kwɨ́í Kànâ no. Yà Yésùù yaá ɓè.

²Kùb yi ɓéɓwéetɨ́ Yésù ɓe nɨ̀fuùb noò jùrúb gùúm kíì.

³Ɓwâ súm yi cɔ̧́ré, á yà Yésùù go tànànɨ Yésù ɨnè: «Súm ma cɔ̧́tɨ́ nɨ́ ku.»

⁴Yésù ɨ́ pììnà yà ní ɨnè: «Yàáŋ, wu a tanakwacɨ mɨ ta̧á̧ à? Ɓwâ moò ɨ́ du nɨ́ ɗóòyèwá ru.»

⁵Á yà Yésùù tana nùb ə́ré ɨnè: «Ndɨŋnáhá nɨ nɨ́ɨ́b lâs ŋgə́ ɓa tànɨ nyí ndɨ̀ŋtɨ rɨ.»

⁶Nɔɔ̀b ma̧á̧ ɓe sɨɨ yaá ɓè tínmwi̧, nu mwi̧ yaá sàmàìn du létà təmərì mwi̧. Jwîf bɨ ya dɨɨkom bɨ mvúm nó, ŋgáb ɓànɨ lénɨ mɨ̀yú̧ú̧, ŋgáb a sàtè síí no.

⁷Yésù ɨ́ tànà nùb ə́ré ɨnè: «Yúunáam nɔɔ̀b lè lâs.» Á nùb ə́ré yúhe nɔɔ̀b kɨ́ ɗéé ɗéé.

⁸Yésù ɨ́ tànàgì ŋgáb: «Túhó̧náam mvúm kɨ́ ŋgób, nyí a gènà tɨ́gɔ̀.» Ŋgáb ɨ́ túgènà ŋgə́.

⁹Tɨ́gɔ̀ ɨ́ kə̀k mvúm yi seicɨ nɨ́ súm ndè. Ŋgə́ yi nɨ́ ɗə̀ə̀ŋwá ŋga á súm kɨ́ go (Ɨ́dù nùb ə́ré, ŋgáb nùb yi tú mvúm kíì, yi ɗəəŋtɨ́ bɨ́). Ŋgə́ ɨ́ ɓéwògì nɨ̀ŋgwá gùmní,

¹⁰Ŋgə́ ɨ́ tànà ŋgə́: «Kùb gɔkyaye bɨ súm gwéin á, ɓwâ nɨ̀vɨ́tɨ̀b meiɓacɨ cei lɨ́, kùb a gɔ̀kgì kɨ́ wamnîn. Ɨ́dù kɨ́ woò wu gə́tií wú súm gwéin há̧á̧ ɗàrò à!»

¹¹U̧ á Yésù yi ndɨŋ lɨ̀m yàyɨ̀rí noò Kánà, ɗɔ̀ɔ́b Gàlìléè no. Nɨ́m ŋgə́ yi ndɨŋ kɨ́ ya á ŋgə́ yi túmne mgbíí noò, nɨ̀fuùb noò ɨ́ ə́mnè ŋgə́.

¹²Cùr ŋgə́ yi ndɨŋ nɨ́m kíì, ŋgə́ ɨ́ sê Kàpèrnàwûm ŋgə́ ɓe yà nóò, ɓe mwin yàáb noò ɨ́ nɨ̀fuùb noò, ŋgáb ɨ́ jə̂b ku jíìb ti ŋgób.

¹³Jùrúb Páskàà yi ŋgóobtɨ́, á Yésù wú Yèrúsàlèm.

¹⁴Dúú Jíri Mèèín no, ŋgə́ ɨ́ kwà nùb sə́rɨ ndèìn kèè, ndèɗúúb kèè, mɨ̀lúbè kèè. Nùb cə́ndɨ mònéè yaá ɓwê yó ku.[2]

¹⁵Ŋgə́ ɨ́ â lí, ŋgə́ ɨ́ jɨ̂b jɨ́ɨm, nyààŋnɨ lòré no, ŋgə́ ɨ́ jùhô̧ ŋgáb lâs lúu, dùgɨ̀ ndèɗúúb ɓe ndèèìn lâs. Ŋgə́ ɨ́ njóòtèèsékî tə́bə̀rɨ̀b mònɨ̀b kíì lâs ɗàá,

¹⁶á ŋgə́ tana nùb sə́rɨ mɨ̀lúbèè ɨnè: «Yanáam hà̧à̧kɨ́nɨ nɨ́ɨ́b kɨ́ hò̧! Dúú Tá moò nɨ dúú mákə́tìì sé!»

¹⁷Á nɨ̀fuùb Yésùù lə́əmcugi nyindí du tɨín káàtà Mèèín no ɨnè rè: «Mèín móò, ɗûnɨ́m mɨ ɗú dúú wóò, ɓa ndɨ̀ŋnɨ njɔ̧̀ ɓéí mɨ ɓéin á.»

¹⁸Á kɨ̀jííb Jwîf bɨ tana Yésù ɨnè: «Ndɨŋ lɨ̀m túmnɨ ɨnayâna wu á ɓe nyòm ndɨŋ nɨ́m kíì!»

¹⁹Yésù ɨ́ tàcùnà ŋgáb ɨnè: «Ɓətɨkɨ́náam Dúú Jíri Mèèín* ndè, mɨ á ŋgə́ óŋcùnɨ jíì taarɨ́b.»

²⁰Kɨ̀jííb Jwîf bɨ ɨ́ tàcùnà ŋgə́ ɨnè: «Ə́r lè ndɨŋtɨ́ há̧á̧ dáín vii bɨrɨ́b ɨ́ tínmwi̧, wu ɨ́ tà ní óŋcu ŋgə́ jíì taarɨ́b na á à?»

²¹Ɨ́dù Dúú Jíri Mèèín Yésù yi ta rè yi du nɨ síí ŋgə́ nɨ̀mɨrí á.

²²Ɓwâ Mèín ya səəmcuhó̧ Yésù mvókín nɨ̀kwíbí rè, nɨ̀fuùb noò ɨ́ lə́ə̀mcù nɨ́m ŋgə́ ya nyin u̧ kɨ́. Ŋgáb ɨ́ ə́mnè nɨ́m yi du tɨín káàtà Mèèín noò, ŋgáb ɨ́ ə́ə̀mɓwê nyindí Yésù yi nyin kɨ́.

²³Jíìb Yésù yi duye Yèrúsàlèm kɨ́, mvókín jùrúb Páskàà, nɨ̀vɨ́tɨ̀b ví̧i̧ yi pə́ lìím ŋgə́ yi ndɨŋndé, yi səŋtɨ́ gíí ɓe ŋgə́.

²⁴Ɨ́dù, Yésù ɨ́ dù nɨ́ ŋgáb síí ŋgáré lèèréwa ɓetí ŋgə́ yi ɗəəŋɓatɨ́ nɨ́ mɨ̀lə́m ŋgábè mîn.

²⁵Àm nɨ̀vɨ́tɨ̀bì sóò, yi nɨ́ ɗúwa kùb tànàyè ŋgə́ ta̧á̧, ɓetí ŋgə́ nɨ̀mɨr yi ɗəəŋɓatɨ́ nɨ́ nɨ́m yi du ŋgábè sumíì.