Read Vute Jâŋ 20 Bible Online

Jâŋ 20 - Vute bible

Jâŋ 20

¹Ye sóndèè yesə̀rì, sɨ́mnɨ̀r ti yaáyè no, á Màríyà nò Màkdàláà yi gi nyàbȩ́ȩ́. Ŋgə́ ɨ́ kwàcì na sɨɨ kàm kùb ya ɗeinkɨ́ ɓɔ̧ sèrì ɓe kí rè á nɨ́ gə́nȩ̀ȩ́ pɨ́ɨŋkí̧i̧.

²Ŋgə́ ɨ́ lùcùwò kwànɨ Sìmóŋ Píyéèr ɓe nɨ̀fuùb Yésù yi ɗúkomndé, á ŋgə́ tana ŋgáb: «Kùb yíhó̧ó̧ bɨ́ fín Kékéé sèrìn ku, nɨ́m cè nɨ́ ɗə̀ə̀ŋwá yɨ́ kùb gendóŋndé.»

³Píyéèr ɓe nɨ̀fuùb kù mwi̧í̧ rè ɨ́ ə́llê gìnɨ nyàbȩ́ȩ́ ku.

⁴Ŋgáb bɨrɨ́b lâs yaá lùhí, ɨ́dù nɨ̀fuùb kù mwi̧í̧ rè ɨ́ ndôŋ nɨ́ Píyéèr lùú, á ŋgə́ féínyaye nɨ́ nyàbȩ́ȩ́.

⁵Ŋgə́ ɨ́ tɨ̀ɨ̀mndésò sèrìn, ŋgə́ ɨ́ pê ndómbó kɨ̧́ɨ̧, ŋgə́ ɨ́ dù nɨ́ lə́sòwá.

⁶Sìmóŋ Píyéèr ɨ́ féíntèèwò, ŋgə́ ɨ́ lə́sò sèrìn, ŋgə́ ɨ́ pê ndómbó kɨ̧́ɨ̧,

⁷ŋgə́ ɨ́ pə́ɓwê júk kùb yi ɓomna Yésù ŋgwé nóò, ɨ́dù júk kɨ́ yi nɨ́ ɓe ndómbó yɨ́ mwi̧ kɨ̧́ɨ̧ ɗàà, yaá nɨ́ gə́nȩ̀ȩ́.

⁸Á nɨ̀fuùb kù mwi̧í̧ yi féínyaye sèrìn ndè yi lə́soɓwée, ŋgə́ ɨ́ pê fín Yésùù nɨ sèrìn ɗàà, á ŋgə́ ə́mne Yésù á jáŋ.

⁹Kí du nɨ́m káàtà Mèèín yi ta ɨnayâna Yésù kwá səəmcuhó̧ mvókín nɨ̀kwíbí na rè, nɨ̀fuùb ya du bɨ njàb kɨ́ ókháyèwá á.

¹⁰Á nɨ̀fuùb bɨrɨ́b lè gɨcu ŋgábè yó.

¹¹Màríyà yaá ə́ŋhîn laŋtɨ̧ɨ̧́ ɓɔ̧ sèrì, kɨ́kɨ́rí. Ŋgə́ á cè kɨ́kɨ́rí, á ŋgə́ tɨɨmsé ɗàá góòmndésònɨ sèrìn.

¹²Ŋgə́ ɨ́ pê dùgallɨb Mèèín bɨrɨ́b, júúb mɨ̀vûú só, du̧ú̧ yɨ́ kùb yi gúnde fín Yésùù rè, nò kù péín ŋgwéné, nò kù cè péín gureè.

¹³Dùgallɨb lè ɨ́ fɔ̂ ŋgə́ ɨnè: «Yàáŋ, wu kɨ́í ní á?» ŋgə́ ɨ́ pììnà ŋgáb: «Kùb yíí bɨ́ fín Kéké móò, mɨ cè mɨ́ ɗə̀ə̀ŋwá yɨ́ kùb gendóŋndé.»

¹⁴Nyìncáŋhȩ̀ȩ́ u̧nèé á ŋgə́ ɓandɨcu íí cùrì, ŋgə́ ɨ́ pê Yésù ə́ŋhîn, ɨ́dù ŋgə́ ɨ́ dù nɨ́ ŋgə́ ɗə̀ə̀ŋcùwá.

¹⁵Yésù ɨ́ fɔ̂ ŋgə́: «Yàáŋ, wu kɨ́í ní á? Wu má wú na?» Màríyà ɨ́ lə́mnè nɨ́ nɨ nò gə́tɨ mwarí á, á ŋgə́ ta ɓe ŋgə́: «Tá, duú ɓè wu hainkɨ́ fín ŋgéé, tana mɨ yɨ́ wu gɨ ŋgə́ kɨ́kniì, mɨ yè gií ŋgə́ hàìncùwònɨ.»

¹⁶Á Yésù ɓé ŋgə́: «Màríyà!» Ŋgə́ ɨ́ ɓàndɨ̀cùrê Yésù íí no, ŋgə́ ɨ́ tànà ŋgə́ ɓe nyindí Jwîf «Ràbùnî!» (kí ta, «Tá tɔ̀hí!» na á).

¹⁷Yésù ɨ́ tànà ŋgə́: «Wu wu mɨ dì̧nɨ̀r, mɨ mɨ yɨ́ Tá moò wúíyèwá. Ɨ́dù gɨm tànànɨ nɨ̀fuùb moò mɨ á wúícùnɨ yɨ́ Tá moò duɓwéece Tá nyínè; yɨ́ Mèín móò duɓwéece Mèín nyínè.»

¹⁸Á Màríyà nò Màkdàláà gɨ tànànɨ nɨ̀fuùb Yésùù ɨnè: «Mɨ péé Kéké!» Ŋgə́ ɨ́ átɨ̀nàcê ŋgáb nɨ́m Kéké tɨ tana ŋgéé.

¹⁹Ye sóndèè mwi̧ kɨ́, lɨ́tɔ̧ɔ̧́, nɨ̀fuùb Yésùù yaá ɓáhîn dúú kù no, ŋgáb ɨ́ kpàrɨ̀kî ɓavɨ̀ì lâs, ɓetí ŋgáb yaá lùnɨ kɨ̀jííb Jwîf. Ŋgáb sɨ̀rɨ̀cì na Yésù á ə́əŋkɨ́ ŋgábè tə̧ə̧́ rè. Ŋgə́ ɨ́ tànà ŋgáb: «Ju ɗóóŋ dù ɓe nyí!»

²⁰Cùr ŋgə́ nyin u̧nèé, ŋgə́ ɨ́ túùmnà ŋgáb lààm ɓàìbì, kɨ́b ŋgáréè ɓe kɨ́ ɓwàríì. Nɨ̀fuùb Yésùù ɨ́ ókɓà mɨ̀tù ɓwâ ŋgáb pə́ Kékéé.

²¹Á Yésù tanakwa ŋgáb: «Ju ɗóóŋ dù ɓe nyí. Hȩ Tá moò ya tómwo mé, mɨ tómɓwéetɨ́ nyí ɗɔ̀bín.»

²²Nyìncáŋhȩ̀ȩ́ u̧nèé, ŋgə́ ɨ́ fɨ̀tɨ̀wúsò ŋgáb fìí yá, ŋgə́ ɨ́ tà: «Gamnáam Nyéhè Sarîn.

²³Nùb nyí kwá tɨ́ína cumí, kwá kwa tɨ́ɨ́r. Nùb nyí kwá mvúce tɨ́ínànɨ cumí kwá bɨ tɨ́ɨ́r kwà.»

²⁴Nɨ́m mwi̧, ɓwâ Yésù yi túumna nɨ̀fuùb noò síhé, nɨ̀fuùb no kù mwi̧ ɨ́r yi du Tòmâ, (kùb yi ɓékom nyɔ̧ɔ̧), yi nɨ́ ɗàá ɗàà.

²⁵Kùb noò ɨ́ tànà ŋgə́ ɨnè: «Nɨ́m péé Kéké.» Á ŋgə́ tacuna ŋgáb: «Mɨ du pə́wa lààm ŋgéé ŋgáréè, mɨ ɨ́ hə̀lê mbə́re lààm kɨ́ no, mɨ ɨ́ hə̀lə́kwà ŋgáár ŋgéé ɓwàrí, mɨ tɨ̀ mɨ Yésù á na ə́mnɨ̀r.»

²⁶Sóndè mwi̧ cùr kɨ́ no, nɨ̀fuùb Yésùù yaácùhá ɓáhîn yó. Kí, Tòmâ yaácɨ̀ kpánȩ́ȩ́. Ɓavɨ̀ì lâs kparɨ́b, ɨ́dù ŋgáb sɨ̀rɨ̀cì na Yésù á ə́əŋkɨ́ nɨ́ ŋgábè tɨŋtɨ̧̀ɨ̧́ rè, ŋgə́ ɨ́ tànà ŋgáb: «Ju ɗóóŋ dù ɓe nyí!»

²⁷Á ŋgə́ tana Tòmâ: «Péye ŋgárɨ̀b moò, gewom mbə́re dì̧nɨ, naamwom ŋgáár, wu a hə̀lê mɨ ɓwàrí. Mbɨ́k mɨ̀sə́ndɨ̀r, wu a dù ɓe ə́ə́m!»

²⁸Á Tòmâ tana ŋgə́: «Kéké móò, Mèín móò!»

²⁹Yésù ɨ́ tànà ŋgə́: «Àm wu pə́gɨ mé á wu ə́əmgɨ ru. Mɨ̀tù á ɓe nùb du ɓe íí pə́wa, ŋgáb ɨ́ ə́mnèé.»

³⁰Nɨ̀fuùb noò tíí, Yésù yi ndɨŋkwatɨ́ lìím bɨ víi̧ du bɨ́ káàtà rè no tɨnndȩ́ȩ ɗàwáá.

³¹Ɨ́dù kɨ́ no tɨín ndè, yi du àm nyí a ə́mnè ɨnayâna Yésù du Mèsî, Mwin Mèèín á na á. Nyí ɨ́ ə́ə̀mcè ŋgə́, nyí ɓa kwànɨ mè ɓe ɨ́r ŋgéé á.