Read Vute Jâŋ 21 Bible Online

Jâŋ 21 - Vute bible

Jâŋ 21

¹Cùr kɨ́ no, jíìb kù no, Yésù ɨ́ túùmnàkwàhâ nɨ̀fuùb noò síí gín ɓáí Tìbèriyâdə̀. Ínè á ŋgə́ yi túumna ŋgáb síí:

²Sìmóŋ Píyéèr, Tòmâ (kùb yi du ɓénɨ nyɔ̧ɔ̧), Nàtànàyêl (nò yi du nò Kánà ɗɔ̀ɔ́b Gàlìléè noò), munɨ́b Sèbèdéè ɓe nɨ̀fuùb Yésùù bɨrɨ́b kù yaá ɓáhîn.

³Sìmóŋ Píyéèr ɨ́ tànà ŋgáb: «Mɨ gɨnáyeé mɨ́ həréé yáà!» Ŋgáb ɨ́ tà: «Nɨ́m á gɨ̀ɓwênɨ.» Ŋgáb ɨ́ gì, ŋgáb ɨ́ lê kwáìn. Ɨ́dù sɨ́mnɨ̀r kɨ́ no, ŋgáb ɨ́ dù bɨ́ nɨ́m kù bɨ̀wá.

⁴Ɓwâ ye yi yaré wáàŋniì, Yésù ɨ́ féínsò gín mvúmí ku, ɨ́dù nɨ̀fuùb noò ɨ́ dù bɨ́ ŋgə́ ɗə̀ə̀ŋsòwá.

⁵Yésù ɨ́ fɔ́sò ŋgáb ɨnè: «Ína ɓwàjììb moò, nyí bií həré à?» Á ŋgáb ta: «Ɗàwá.»

⁶Ŋgə́ ɨ́ tànà ŋgáb: «Wààréná mvɨ́njá péín ŋgáár lame, nyí ɓa bìnɨ á. Ŋgáb ɨ́ wààhácè mvɨ́njá, ɗàmcùhô̧ kɨ́ ɨ́ yɔ̂ ŋgáb ɓe yû həré yi yúk nóò.»

⁷Nɨ̀fuùb Yésù yi ɗúɓa ceí ɨ́ tànà Píyéèr: «Kéké á!» Ɓwâ Sìmóŋ Píyéèr ók «Kéké á», na rèé, ŋgə́ ɨ́ lə́cùrê júk só, ɓetí ŋgə́ yaá nɨ́ síí sam. Ŋgə́ ɨ́ gùrésò mvúúm.

⁸Nɨ̀fuùb meré ɨ́ gò ɓe kór, ŋgáb a ɗamwoce mvɨ́njá həré nó ɗéé. Ŋgáb yi bɨ́ cóo ɓe sɔ̀ ɗàà, yaá ɗaŋhîn sàmàìn métà təmərì mwi̧.

⁹Ɓwâ ŋgáb yi sé ɗàá, ŋgáb ɨ́ kwà bɨ̀rê á rè, wa latîn, həré cè ya ɓə́nnɨ.

¹⁰Á Yésù tana ŋgáb: «Həré nyí bɨ ɗàrɨ́, áwonáye kɨ́b kù.»

¹¹Sìmóŋ Píyéèr ɨ́ lê kwáìn, ŋgə́ ɨ́ ɗàmsówò mvɨ́njá ɗàá, hərɨ́b jííb no ɗéé. Hərɨ́b kɨ́ yaá lâs təmərì mwi̧ ɨ́ yɔ̀k vii bɨrɨ́b ɨ́ cóóŋ ɨ́ taarɨ́b. Ɓe vùùm hərɨ́b kíì lâs, mvɨ́njá tȩ́ȩ̀wá.

¹²Yésù ɨ́ tànà ŋgáb: «Gonáam tàŋnɨ càmɨ̀kà.» Mvókín nɨ̀fubì, nò kù cè nɨ́ fɔ́wa: «Wu cè na á?» Ɓetí ŋgáb yi ɗəəŋtɨ́ bɨ́ ɨnayâna nɨ Kéké á.

¹³Yésù ɨ́ ŋgɨ̀ɨ̀sò, ŋgə́ ɨ́ â bɨ̀rê, ŋgə́ ɨ́ nà ŋgáb, ŋgə́ ɨ́ nàɓwéhè ŋgáb həré.

¹⁴Cùr Mèín yi səəmcuhó̧ Yésù mvókín nɨ̀kwíbí, gwì taarɨ́bí ŋgə́ yi túumna nɨ̀fuùb noò síhé á kí.

¹⁵Cùr ŋgáb yi taŋcáŋhȩ cɔɔ̀ŋ, Yésù ɨ́ fɔ̂ Sìmóŋ Píyéèr ɨnè: «Sìmôŋ, mwin Jáàŋ, ɗûnɨ́m wu ɗú mé ndóŋtɨ́ kɨ́ nùb lè du mɨ ɗúniì à?» Á Sìmóŋ Píyéèr ta: «I̧i̧, Kéké, wu ɗəəŋtɨ́ mɨ á wu ɗúnɨ.» Yésù ɨ́ tànà ŋgə́: «Gə́tɨm nùb du hȩ ndèɗúúb moò rè.»

¹⁶Á ŋgə́ fɔ́kwa kɨ́ gwì bɨrɨ́bí: «Sìmôŋ mwin Jáàŋ, wu á mɨ ɗúnɨ à?» Sìmôŋ Píyéèr ɨ́ tà: «I̧i̧ Kéké, wu ɗəəŋtɨ́ mɨ á wu ɗúnɨ.» Yésù ɨ́ tànà ŋgə́: «Gə́tɨm nùb du hȩ ndèɗúúb moò rè.»

¹⁷Á ŋgə́ fɔ́kwa kɨ́ gwì taarɨ́bí: «Sìmôŋ, mwin Jáàŋ, wu á mɨ ɗúmèɓànɨ à?» Píyéèr ɨ́ kpáícì nɨ́ tí àm Yésù fɔ́ ŋgə́ kɨ́ gwì taarɨ́bí: «Wu á mɨ ɗúnɨ à?» na rè, á Sìmôŋ tana ŋgə́: «Kéké, wu ɗəəŋtɨ́ nɨ́ɨ́b lâs, wu ɗəəŋtɨ́ mɨ á wu ɗúnɨ!» Yésù ɨ́ tànà ŋgə́: «Gə́tɨm nùb du hȩ ndèɗúúb moò rè.

¹⁸Mɨ tana wu àmɨɨr wááŋ á: ɓwâ wu yi duye wàánjíí, wu yaá nyààŋnɨ gùr woò, wu a gì yɨ́ wu ɗúré, ɨ́dù ɓwâ wu ɓa kwéèniì, wu ɓa yààmnɨ ŋgáár á, nò kù a nyààŋnà wu gùr, ŋgə́ á gè wu yɨ́ wu du ɗúwa gìniì.»

¹⁹(Nyindí Yésù yi nyin u̧ kɨ́, ŋgə́ yi ɗú túùmnànɨ Píyéèr kúúŋ cwá ŋgə́ ɓa kúnɨ, mgbíìnɨ Mèín nóò á.) Á Yésù tana ŋgə́: «Tuwom mɨ!»

²⁰Píyéèr ɓandɨcu íí cùrì, ŋgə́ ɨ́ pê nɨ̀fuùb Yésù ɗûnɨ́mí á gònɨ. (Nɨ̀fuùb kɨ́ yɨɨ́m nò yi tɨɨmndéso Yésù no ŋgáb á cè cɔɔ̀ŋ, ŋgə́ ɨ́ fɔ̂: «Kéké, na ɨ́ ɓa wu sə́rɨ̀nɨ?» yàà na rè á.)

²¹Píyéèr pə́ nɨ̀fuùb kɨ́, ŋgə́ ɨ́ fɔ̂ Yésù ɨnè: «Kéké, kɨ́ noò cè, ní ɨ́ ɓa ŋgə́ féínnànɨ?»

²²Yésù ɨ́ pììnà ŋgə́ ɨnè: «Mɨ ɨ́ ɗû ŋgə́ dù jáŋ há̧á̧ hȩ mɨ kwá cuworé, nɨ́m yíce wu sóò á ní? Tuwo wu mɨ!»

²³Àm ɨ́ èrɨ̀cì nɨ́ mvókín nɨ̀fubì ɨnayâna nò kɨ́ tɨ̀ nɨ kûr. U̧ kɨ́ Yésù yi nɨ́ tànàwá Píyéèr ɨnayâna ŋgə́ tɨ̀ nɨ kûr, ŋgə́ yi tahá nɨ́ ɨnayâna ní ɨ́ ɗû nɨ̀fuùb kɨ́ dù há̧á̧ hȩ ní ɓa cùwòniì, nɨ́m yíce ŋgə́ sóò á níí.

²⁴Nɨ̀fuùb mwi̧ kɨ́ ɨ́ du átɨ̀nɨ nɨ́ɨ́b lè ru, ŋgə́ ɨ́ tɨ̀ìnɓwê tɨín. Nɨ́m ɗəəŋceé ɨnayâna nɨ́m ŋgə́ du tànɨ kɨ́ àmɨɨr á.

²⁵Yésù yi ndɨŋkwatɨ́ nɨ́ɨ́b kù ví̧i̧. Óo yi tà kùb tɨ̀ìn tɨín, tùré tùré, mɨ lə́mne ɗɔ̀ɔ́b lè bɨ̂ŋ yè á kí kɨ́ kí, yɨ́ kùb kɨ́kndóŋ kɨ́ jií a tùŋ.