Read Vute Jâŋ 3 Bible Online

Jâŋ 3 - Vute bible

Jâŋ 3

¹Nɨ̀ŋgwá kù yaá ku, ɨ́r noò yaá Nìkòdêm. Ŋgə́ yɨɨ́m nò Fàrísààb kpánéné á. Ŋgə́ yɨɨ́mɓwê kɨ̀jíri Jwîf á.

²Ŋgə́ ɨ́ nȩ̀wò yɨ́ Yésùù cɨ́ɨ́m, ŋgə́ ɨ́ tànà ŋgə́ ɨnè: «Tá tɔ̀hí, nɨ́m ɗəəŋtɨ́ ɨnayâna Mèín ya tómwo wu, wu gò nɨ́m tɔ̀ɔ̀nɨ á; ɓetí lìím wu du ndɨ̀ŋnɨ rè sàmàìn nò kù ndɨŋndé ɗàà ɓè Mèín du nò kɨ́ ə́ə̀mnàwáá.»

³Yésù ɨ́ pììnà ŋgə́ ɨnè: «Mɨ tanaɓa wu àmɨɨr wááŋ á, nò kù sàmàìn lə́ Ŋgɔ̧́ɔ̧̀ Mèèín no ɓè kùb du ŋgə́ fin ji fèìncùwáá ɗàà.»

⁴Á Nìkòdêm fɔ́cu ŋgə́ ɨnè: «Nɨ̀vɨ́tè gbákkí̧i̧ lâs, i̧ á kùb fɨ́tɨ ŋgə́ fèìncùnɨ fin ji? Ŋgə́ ma ɓa lə́cùnɨ yà nóò ɓɔ̧ɔ̧ kùb a fèìncù ŋgə́ kɨ́ gwì bɨrɨ́bí kèè, ɨna?»

⁵Yésù ɨ́ pììnà ŋgə́ ɨnè: «Mɨ tanaɓa wu àmɨɨr wááŋ á: nò kù sàmàìn lə́ Ŋgɔ̧́ɔ̧̀ Mèèín no, ɓè kùb du ŋgə́ kɔ̀ɔ̀wá kɔ ə́mní ɓe mvúm, cùr kɨ́ no ɓe Nyéhè Sarɨ́nne ɗàà.

⁶Fin nɨ̀vɨ́tè feinndé du nɨ nɨ̀vɨ́tè á, fin feince nɨ́ ɓe nyòm Nyéhè Sarɨ́nne duce nɨ́ Nyéhè á.

⁷Wu wu gbɨ̀ŋhɨ̀r àm mɨ tana wu ɨnayâna vùùm nyínè lâs ɗú kùb fèìncù nyí fin ji á na rè.

⁸Péye kəŋmbə́r, wu á óknɨ wùúm nóò. Wu ɗə̀ə̀ŋwá yɨ́ ŋgə́ éíworé, wu cè ɗə̀ə̀ŋwá yɨ́ ŋgə́ du gìniì. U̧ á nò du nɨ́ fin Nyéhè Sarɨ́nne duɓwée.»

⁹Á Nìkòdêm fɔ́ Yésù ɨnè: «I̧ á nɨ́m kɨ́ fɨ́tɨce ndɨ̀ŋnɨ?»

¹⁰Yésù ɨ́ pììnà ŋgə́: «Tá tɔ̀hí jíri hȩ wu u̧, wu a dù nɨ́ɨ́b kɨ́ ɗə̀ə̀ŋwá à!

¹¹Mɨ tanaɓa wu àmɨɨr wááŋ á: nɨ́m nyinna nyí nɨ́m nɨ́m ɗəəŋndé á, nɨ́m tanace nyí nɨ́m nɨ́m pə́ré á. Ɨ́dù nyí nɨ ɗúwa ə́ə̀mnɨ nɨ́ɨ́b nɨ́m du nyí tànànɨ kɨ́.

¹²Mɨ nyinnaá nyí nɨ́m du ndóŋnɨ ɗɔ̀bɨ́nné, nyí mɨ ə́ə̀mwá, ɓwâ mɨ ɓa nyí nyìnnànɨ kɨ́ du ndóŋnɨ ɓɨllɨnne á nyí ɓa mɨ ə́ə̀mgɨ̀nɨ ru à?

¹³Nò kù nɨ ɓɨllin wɨ́íkɨ́yèwá, sé Mwin Nɨ̀rì nò yi sówo kwe.

¹⁴Hȩ Mòyîs yi ndɨŋ ŋgwàì ndɨ̀ŋnì, ŋgə́ yi nyaŋhi̧í̧ nyó̧ó̧ ɓe tú̧, ŋgə́ ɨ́ kóllê ŋgɨ̧́ɨ̧̀ kpáŋwúnɨ còóm ndɨ, u̧ á ɓwê kùb ɓa kpáŋwúnɨ Mwin Nɨ̀rì bɨ̧̀ɨ̧́,

¹⁵àm nò ə́mne ŋgéé lâs a kwà mè mɨ̀cɨ̧̀.

¹⁶Ɓetí Mèín ya ɗúɓatɨ́ nɨ̀vɨ́tɨ̀b cei há̧á̧ ŋgə́ ɨ́ kàìkî kpòk muní noò, àm nò lâs ə́mne ŋgéé a dù nɨ́ kûr, nò kɨ́ a kwà mè mɨ̀cɨ̧̀.

¹⁷Mèín ya nɨ́ mwin nóò tómwòwá ɗɔ̀bín ŋgə́ gò láàŋkɨ́nɨ nɨ̀vɨ́tɨ̀b. Ŋgə́ yi tómwo nɨ ŋgə́, ŋgə́ gò ɓátɨ̀nɨ nɨ̀vɨ́tɨ̀b á.

¹⁸Nò ə́mne mwin Mèèín nɨ lɔ̧́wa, ɨ́dù nò du nɨ́ mwin Mèèín ə́ə̀mwáá, ŋgə́ lɔ̧́cií nɨ́, ɓetí ŋgə́ nɨ kpòk muní Mèèín ə́ə̀mwá.

¹⁹Mwa ya goó ɗɔ̀bín, nɨ̀vɨ́tɨ̀b ɨ́ dù bɨ́ ŋgə́ ə́ə̀mwá, ŋgáb ɨ́ ɗúbɨ̂ŋ bɨ́ mɨ̀sɨ́mnɨ̀r ɓetí nɨ́ɨ́b ndɨ̧ɨ̧́ ŋgábè yaá bɨ ɓáŋhɨ́b. Yɨ́ nɨ̀vɨ́tɨ̀b lɔ̧́ré du kí á.

²⁰Nò lâs du ndɨ̀ŋnɨ ɓáŋhɨ́nne á nɨ jìnɨ mwa, ŋgə́ cè nɨ́ fó̧nɨ mwahín ɗàà ɓetí ŋgə́ á óknɨ vùù nɨ́ɨ́b ɓáŋhɨ́b ní du ndɨ̀ŋniì lâs tɨ̀ fó̧ nɨ́ laŋtɨ̧ɨ̧́.

²¹Ɨ́dù, nò du ndɨ̀ŋnɨ nɨ́m àmɨrìí á nɨ fó̧nɨ mwahín àm kùb a pə́ɓà laŋtɨ̧ɨ̧́ ɨnayâna nɨ́ɨ́b ní du ndɨ̀ŋniì du nɨ àm ní du jə̀ŋnɨ Mèèín á.»

²²Cùr kɨ́ no, Yésù ɓe nɨ̀fuùb noò ɨ́ gì ɗɔ̀ɔ́b Jùdéè no. Ŋgə́ ɓe ŋgáb ɨ́ jə̂b ku jíìb ti kù ŋgə́ a kɔɔce nɨ̀vɨ́tɨ̀b kɔ ə́mní.

²³Jâŋ yaá cè kɨ́ noò Àyìnôŋ, gín Sàlíìm, kɔ̀ɔ̀ɓwênɨ kɔ ə́mní, ɓetí mvúm yaá ɓè ví̧i̧. Nɨ̀vɨ́tɨ̀b yaá ŋgə́ gànnɨ ŋgə́ a kɔɔce ŋgáb kɔ ə́mní.

²⁴Ɓwâ kɨ́ Jâŋ nìrì lə́ɓàyèwá.

²⁵Nɨ̀fuùb Jáàŋ kù ɨ́ yà ndáŋnɨ ɓe Jwîf kù ɓe ɨ́r ɗɨ́m sàtèé síhé.

²⁶Ŋgáb ɨ́ gàìnsò Jâŋ, ŋgáb ɨ́ tànà ŋgə́ ɨnè: «Tá tɔ̀hí, wu ɗəəŋcuhaá nò nyíne ŋgə́ tɨ du Jùrdə̧̂ cəə́r, wu tɨ nyinna nɨ́m àm noò rɨ ye? Àà, ŋgə́ maácɨ̀ nɨ kɔ̀ɔ̀nɨ kɔ ə́mní ku, nùb lâs gáícɨ bɨ ŋgə́ á!»

²⁷Jâŋ ɨ́ pììnà ŋgáb ɨnè: «Sàmàìn nò kù kwa nɨ́m kù ɓè Mèín du ŋgə́ ə́ə̀mnàwáá ɗàà.

²⁸Nyí nɨ̀miib nyí ya ókɓaháá mɨ tànɨ mɨ mɨ Krístù sé, ɨ́dù mɨ du mɨ nò Mèín ya tómwoyaye ŋgéé tíí á.

²⁹Nɨ̀ŋgwá gùmní ɨ́ du nɨ́ nɨ̀mɨr gwiì ru. Ɨ́dù ɓwàjìrí nɨ̀ŋgwá gùmní a dù gín ŋgéé, ŋgə́ a jə̀ŋ nɨ́m nò kɨ́ du tàniì. Ɓwàjìrí kɨ́ á ɓe mɨ̀tù óknɨ kúu kùùŋ. Ɗàrò, mɨ̀tɔ̀k mo sumíì á ɓwê u̧, á cè yúklîn.

³⁰Ɗúú wúúm ŋgéé gɨ̀ tíí á, kɨ́ moò a cɔ̧́cùcê cɔ̧́ɔ̧.»

³¹«Nò Mèín tómworé ndóŋtɨ́ nɨ́ɨ́b lâs, nò duce nɨ́ nò ɗɔ̀bɨ́nné ók nɨ́ ɓe ɗɔ̀ɔ́b á, ŋgə́ nyince nɨ́ nɨ́ɨ́b ɗɔ̀bɨ́nné á. Nò Mèín tómworé [ndóŋtɨ́ nɨ́ nɨ́ɨ́b lâs.]

³²Ŋgə́ ta nɨ nɨ́m ŋgə́ pə́ré ɓe kɨ́ ŋgə́ óklé á, ɨ́dù nò kù cè nɨ́ ə́ə̀mnɨ àm kɨ́ ɗàà.

³³Nò ə́mne àm kíì túum nɨ ɨnayâna Mèín á tànɨ àmɨɨr na á.

³⁴Nò Mèín tómworé á nyìnnɨ nɨ́m Mèín taré, ɓetí Mèín á nò kɨ́ nàɓànɨ Nyéhè noò.

³⁵Tá á ɗúnɨ mwin, ŋgə́ naréé nɨ́ɨ́b lâs no ŋgáré.

³⁶Nò ə́mne muní, á ɓe mè mɨ̀cɨ̧̀. Nò pə́sakkɨ́ce muní kwá nɨ mè mɨ̀cɨ̧̀ kɨ́ kwà, ŋgə́ kwá ɓáblɨ́ŋ ɓe jábɨ́r Mèín yi ɓwállé.»