Read Vute Jâŋ 4 Bible Online

Jâŋ 4 - Vute bible

Jâŋ 4

¹Fàrísààb yi óó ɨnayâna Yésù á ndɨ̀ŋnɨ nɨ̀vɨ́tɨ̀b ví̧i̧ sèì nɨ̀fuùb noò, ŋgə́ a kɔɔce ŋgáb kɔ ə́mní, ɨ́ ndóŋcɨ̀ nɨ́ kɨ́ Jâŋ ya ndɨŋkomndé. (U̧ kɨ́ Yésù ya nɨ́ kɔ̀ɔ̀nɨ kɔ ə́mní ɗàà, nɨ̀fuùb noò ya kɔɔkom bɨ́ ru.) Ɓwâ Yésù yi ók nɨ́ɨ́b kùb yi du nyìntèènɨ kíì, ŋgə́ ɨ́ éíkî nɨ́ Jùdê, gɨ̀cùnɨ Gàlìlê.

⁴Ŋgə́ gìnɨ Gàlìlê kɨ́, yaá ɗúnɨ ŋgə́ téínndóŋ ɗɔ̀ɔ́b Sàmàríì.

⁵Ɗɔ̀ɔ́b Sàmàríì ku, ŋgə́ ɨ́ féìn gín kwɨ́í kù ɨ́r yi du Sìkáàr. Kwɨ́í kɨ́ yaá gín mwai kù. Ɓwâ ya tákɨ̀rɨ́bí, Yákòb ya nakíí mwin nóò Yòsə̂b mwai kɨ́.

⁶Kɨ̀ɨ̀r mvúmí Yákòb yi cɨ́mndé yaá ɓè. Hȩ Yésù yi du yeín ɓe gùrí, ŋgə́ ɨ́ dùrê gín kɨ̀ɨ̀r mvúm kíì. Yɨɨ́m péín mvii ŋgwéé á.

⁷Nɨ̀gwi Sàmàríì kù ɨ́ gò mvúm túnɨ. Yésù ɨ́ tànà ŋgə́: «Yée! Na mɨ mvúm, mɨ mə̀ttɨ.»

⁸Nɨ̀fuùb Yésùù yi lə́ceé kwé tə̧ə̧́ gwɨ̀ìwònɨ cɔŋ.

⁹Nɨ̀gwi rè ɨ́ tànà Yésù: «Ɨna cɨ̀, wu Jwîf á, mɨ cè mɨ́ nò Sàmàríì, wu a ɓwèì wú mɨ mvúm à?» (Kí du Jwîf bɨ ɓe nùb Sàmàríì ya bɨ́ nyàŋkòm).

¹⁰Á Yésù tana ŋgə́ ɨnè: «Wu tɨ ɗə̀ə̀ŋyè nyər Mèèín ɓe nò du wú mvúm ndè ɓwèìniì naa, wu yè ɨ́ ɓweibɨ̂ŋ ɓe nò kɨ́ ru, ŋgə́ a nà wu mvúm du nànɨ mèè.»

¹¹Á nɨ̀gwi rè tana ŋgə́: «Tá, wu ɓe nɨ́m tú mvúmí ɗàà, kɨ̀ɨ̀r mvúm ndèè á cè nɨ́ lȩ́ȩ. I̧ á wu ɓace wú kwànɨ mvúm du nànɨ mèè kɨ́?

¹²Tákɨ̀r nɨ́mè Yákòb ya mbɨ́kkɨ́sona nɨ́m kɨ̀ɨ̀r mvúm ndèè ru, ŋgə́ nɨ̀mɨr ya məttɨ́ mvúm kɨ́, munɨ́b noò ɓe nyèém noò ya meiɓwéetɨ́. Wu ma ɗú tànɨ ní ndóŋtɨ́ Yákòb á hàye?»

¹³Yésù ɨ́ tàcùnà ŋgə́ ɨnè: «Nò lâs mei mvúm ndèè tɨ̀ ókcuhá nɨ́ síì;

¹⁴ɨ́dù nò ɓa mènnɨ mvúm mɨ ɓa ŋgə́ nàniì, tɨ̀ nɨ síì ókcɨ̀r. Ɓetí mvúm mɨ ɓa ŋgə́ nànɨ kɨ́ ɓa sènnɨ no ɓɔ̧ɔ̧ ŋgóndúm mvúm du nànɨ mè mɨ̀cɨ̧̀ á.»

¹⁵Nɨ̀gwi rè ɨ́ tànà ŋgə́: «Tá, na wu mɨ mvúm kɨ́ ye, mɨ a dù mɨ́ síì ókcɨ̀r, mɨ yè uweɓwéeceé mɨ́ gwɨ̀ì mvúúm hò̧neè.»

¹⁶Á Yésù tana ŋgə́: «Gɨm ɓéwònɨ ŋgwáá woò, nyíne ŋgə́ a gò.»

¹⁷Nɨ̀gwi rè ɨ́ tànà ŋgə́: «Mɨ mɨ ŋgwáá ŋgáré ɗàà.» Á Yésù ta: «Á sàmàìn wu tame ní ŋgwáá ŋgáré ɗàwáá;

¹⁸ɓetí wu yi ɓuú ŋgwáá ŋgiì, nò nyíne ŋgə́ duce ɗàrò rè nɨ ŋgwáá woò sé. Wu tanaá mɨ àmɨrì.»

¹⁹Á nɨ̀gwi rè tana Yésù ɨnè: «Tá, mɨ péé mɨ́ wu du wu tɨ́kìn Mèèín á.

²⁰Tákɨ̀rɨ́b nɨ́mè nɨ́m nùb Sàmàríì yaá ɗómnɨ Mèín ɓe rè ya, ɨ́dù kɨ́ nyínè, nyí Jwîf bɨ nyí taá nɨ́ ɨnayâna yɨ́ kùb ɗóm Mèín á nɨ Yèrúsàlèm.»

²¹Yésù ɨ́ tànà ŋgə́ ɨnè: «Mɨ tànà wu, ɓwâ kù kwá féín, kùb tɨ̀ bɨ Tá ɓe rè ya ɗómcɨ̀r, dùgɨ̀ Yèrúsàlèm.

²²Nyí nùb Sàmàríì, nyí ɗə̀ə̀ŋwá na á nyí du ɗómnɨ, kɨ́ nɨ́mè nɨ́m Jwîf bɨ, nɨ́m ɗəəŋtɨ́ nɨ́ nò nɨ́m du ɗómniì, ɓetí nɨ́m ɗəəŋtɨ́ ɨnayâna nò Mèín ya ɓwáí gò ɓátɨ̀nɨ nɨ̀vɨ́tɨ̀bì fó̧ nɨ́ gbàŋ Jwîf no á.

²³Ɨ́dù mvókín kù á gònɨ, mvókín kɨ́ féínɓacéecií nɨ́, nùb du ɗómmèɓànɨ Mèèín, ɓa ɗómnɨ Mèín àmɨrìí ɓe nyòm Nyéhè Sarɨ́nne á, ɓetí Tá á ɗúnɨ nùb du ŋgə́ ɗómnɨ u̧nèé.

²⁴Mèín du nɨ Nyéhè á, á ɗúnɨ nùb du ŋgə́ ɗómniì ɗómmèɓà ŋgə́ hȩ du ɗúniì, ɓe nyòm Nyéhè Sarɨ́nne, ŋgə́ nò du Mèín àmɨrìí.»

²⁵Nɨ̀gwi rè ɨ́ tà: «Mɨ ɗəəŋtɨ́ Mèsî ɓa gònɨ á. (Mèsî, ɓe nyindí gɨrêk ta Krístù á). Ɓwâ ŋgə́ ɓa féínniì, ŋgə́ ɓa nɨ́m tànànyààŋnɨ nɨ́ɨ́b lâs á.»

²⁶Á Yésù tana ŋgə́ ɨnè: «Mɨ Mèsî kɨ́ á, mɨ du wu nyìnkɨ́nànɨ rè.»

²⁷Mvókín kɨ́ no á nɨ̀fuùb Yésùù féíncuwo; ŋgáb ɨ́ gbɨ̀ɨ̀ŋɓà bɨ́ hȩ ŋgáb pénɨ Yésù nyìnnɨ ɓe nɨ̀gwiì. Ɨ́dù kɨ̀cáb ŋgáb fɔ́ kóo ní ɨ́ du ku, kɨ́ kù wu tuce sà̧à̧ ɓe nɨ̀gwi rè àm níì yàà ɨ́ yɔ̂ ŋgáb.

²⁸Nɨ̀gwi rè ɨ́ mbɨ́kkɨ́sò nɔk mvúmí noò ɓè, ŋgə́ ɨ́ gɨ̀cù nɨ́ kwé, ŋgə́ ɨ́ yàrê tàtèènànɨ nɨ̀vɨ́tɨ̀b ɨnè:

²⁹«Gonáam pénɨ nɨ̀ŋgwá kù, ŋgə́ takɨ́naá mɨ nɨ́ɨ́b mɨ du ndɨ̀ŋniì lâs. Ŋgə́ ɓa nɨ dùnɨ Mèsî kèè?»

³⁰Nɨ̀vɨ́tɨ̀b ɨ́ éítèèsò kwé gànnɨ Yésù.

³¹Mvókín kɨ́ no, nɨ̀fuùb á cè kpɔ́ɔ̀hánɨ Yésù ŋgáb a tace ɨnè: «Tá tɔ̀hí, kɨ́kléháam nɨ́m ti cɔɔ̀ŋ ɓɔ̧ɔ̧.»

³²Ɨ́dù ŋgə́ ɨ́ tàcùnà ŋgáb ɨnè: «Mɨ á ɓe cɔŋ kù nyí du nɨ́ ɗə̀ə̀ŋwáá.»

³³Á nɨ̀fuùb fɔ́ mvókín ŋgábè no ɨnè: «Nò kù tɨ gewonaá nɨ́ ŋgə́ cɔŋ kèè?»

³⁴Yésù ɨ́ tànà ŋgáb ɨnè: «Cɔŋ moò du jə̧̀ə̧́ nɨ́m nò ya tómwo mé ɗúré á, mɨ a cáàŋcè ə́r ŋgə́ ya ɗob mé.

³⁵Nyí rè, nyí á hà tànɨ ɨnè ye: ‹Hò̧ njumi nààsɨ̀b lɨ, mɨ́ŋgòòŋ cə́ŋtɨ́ á› ye. Ɨ́dù kɨ́ moò, mɨ tànà nyí, góomnáɓaye mwaai mîn: mɨ́ŋgòòŋ á cɨ̀ nɨ cɨ́ŋni, ɗóhîn ɓe ɓə̀llê kárȩ́né!

³⁶Nò du ɓə̀nnɨ mɨ́ŋgòŋnì á kwànɨ lɔ̀ɔ́ nóò, mɨ́ŋgòòŋ ŋgə́ duce ɓə̀nnɨ kɨ́ tɨ̀ dulɨ́ŋ tɨ́k. Yɨ́ kɨ́ ɓè, nò ɗoŋ ɗo̧né ɓe nò ɓei ɓənné a ókɓáhè mɨ̀tù.

³⁷Ɓetí gɨ̀gàìn du tànɨ: ‹Nò ɗoŋ ɗo̧né á nyin, nò ɓeice ɓənné á nyin› ndè nɨ àmɨɨr á.

³⁸Mɨ tómtɨ́ nyí ɓə̀nnɨ mɨ́ŋgòòŋ mwai nyí ya du ɗȩ̀nɨ̀wáá no; nùb kù ya ɗȩne bɨ́ mwai kɨ́ ru, kɨ́ nyínè, nyí saice nɨ́ ya saín á.»

³⁹Nùb Sàmàríì ví̧i̧ yi du kwɨ́í kɨ́ noò ɨ́ ə́mnè Yésù àm nɨ̀gwi rè ya wáana ŋgáb ɨnayâna ŋgə́ takɨ́naá ní nɨ́ɨ́b ní ndɨŋndé lâs na rè.

⁴⁰Àm kɨ́ á ɓwâ nùb Sàmàríì yi gainwo Yésùù, ŋgáb ɨ́ yôŋ ŋgə́, ŋgə́ dùyè ɓe vúm yáá. Yésù ɨ́ jə̂b ɓè jíì bɨrɨ́b.

⁴¹Nyindí Yésù nɨ̀mɨr yi du nyìnniì ɨ́ ndɨ̀ŋ nùb Sàmàríì bɨ kù ví̧i̧ ə́ə̀mɓwê Yésù.

⁴²Á ŋgáb tana nɨ̀gwi rè ɨnè: «Ɗàrò, nɨ́m nɨ ŋgə́ ə́ə̀mɗóòwá àm wu tɨ átɨna nɨ́m nɨ́m tɨ ndóŋndé, duɓwée nɨ àm nɨ́m nɨ̀miib nɨ́m tɨ ókɓa nɨ́m ŋgə́ du nyìnniì rè á, nɨ́m ɗəəŋceé ɨnayâna ŋgə́ ɨ́ dumeɓa tɨ́céín ɗɔ̀bɨ́nné ru.»

⁴³Cùr Yésù yi jə́b ɓè jíì bɨrɨ́b kɨ́, ŋgə́ ɨ́ gɨ̀cù nɨ́ Gàlìlê.

⁴⁴Ɓetí Yésù nɨ̀mɨr ya wáaɓatɨ́ ɨnè: «Kùb bɨ jə̀ŋnɨ tɨ́kìn Mèèín ŋgə́ nɨ̀mɨrí ti̧í̧ ɗàà.»

⁴⁵Ɓwâ ŋgə́ yi féín Gàlìléè, nùb ɗɔ̀ɔ́b kɨ́ noò, hȩ ŋgáb yi pə́ nɨ́ɨ́b lâs ŋgə́ ya ndɨŋ Yèrúsàlèm ɓwâ jùrúb Páskàà, ɓetí ŋgáb yaá ɓwê ku, ŋgáb ɨ́ gàmɓà ŋgə́ mîn.

⁴⁶Yésù ɨ́ cùwògì Kànâ du ɗɔ̀ɔ́b Gàlìléè rɨ no, yɨ́ ŋgə́ ya settɨkɨ́ mvúm dù súm ndɨ. Nò ə́ré jíri gómnàà kù yaá ɗɔ̀ɔ́b Gàlìléè ku, mwin nɨ̀ŋgwá kíì yaá Kàpèrnàwûm yábnɨ yáam.

⁴⁷Ɓwâ nɨ̀ŋgwá rè yi ók ɨnayâna Yésù yi éíwoó ɗɔ̀ɔ́b Jùdéè gònɨ ɗɔ̀ɔ́b Gàlìléè na rèé, ŋgə́ ɨ́ gàìnsò ŋgə́ yóŋnɨ ɨnayâna ŋgə́ sésò Kàpèrnàwûm ɓátɨ̀nɨ mwin níì du yábniì, ŋgə́ á cɨ̀ fín kɨ́ fín yáá.

⁴⁸Yésù ɨ́ tànà nɨ̀ŋgwá rè: «Kí du mɨ ɨ́ dù mɨ́ lìím ɓe nɨ́ɨ́b sɨ̀sɨ̀rí ndɨ̀ŋwá, sàmàìn nyí ə́mne mé ɗàwá hàye!»

⁴⁹Nɨ̀ŋgwá rè ɨ́ tànà Yésù ɨnè: «Yée tá, kɔ́ɔwom ɓwâ mwin móò du kúyèwá rè.»

⁵⁰Á Yésù tacuna ŋgə́ ɨnè: «Gɨcum, nɨ́m kù tɨ̀ nɨ mwin wóò ndɨ̀ŋ.» Nɨ̀ŋgwá rè ɨ́ ə́mnè nɨ́m Yésù tana ŋgə́ kɨ́, ŋgə́ ɨ́ gì.

⁵¹Nɨ̀ŋgwá rè gɨ̀cùnɨ no yó, á ŋgə́ ɓanndé ɓe nùb no ə́ré jȩ̀ȩ̀ gònɨ ŋgə́ tànànɨ ɨnè: «Mwin wóò wáaŋtɨ́!»

⁵²Á ŋgə́ fɔ́ nùb lè, mvókín ŋge no á mwin níì tɨ wáŋhȩ. Ŋgáb ɨ́ tànà ŋgə́: «Tɨm yáya, mvii mwi̧ á cɨ̀mcɨ̀m kɨ́ cɔ̧́.»

⁵³Nɨ̀ŋgwá rè ɨ́ lə́ə̀mcù ɨnayâna mvókín mwi̧ kɨ́ no ɓwê á Yésù tɨ tana ní yáya «Nɨ́m kù tɨ̀ nɨ mwin wóò ndɨ̀ŋ» ndu. Ŋgə́ ɓe nùb no yóò lâs ɨ́ ə́mnè Yésù.

⁵⁴Lɨ̀m bɨrɨ́bí Yésù yi ndɨŋ ɓwâ ŋgə́ yi éícuwo ɗɔ̀ɔ́b Jùdéè gòcùnɨ ɗɔ̀ɔ́b Gàlìléè á kí.