Read Vute Jâŋ 6 Bible Online

Jâŋ 6 - Vute bible

Jâŋ 6

¹Cùr kɨ́ no, Yésù ɨ́ pèndôŋ ɓáí Gàlìléè cəə́r, (ɨ́r ɓáí kíì á ɓwê Tìbèriyâdə̀).

²Kùŋkùŋ kàm nɨ̀vɨ́tɨ̀bì yaá ŋgə́ tùnɨ ɓe pê ŋgáb ya pə́kom lìím ŋgə́ ya ndɨŋkom ɓe wáŋhȩ̀ȩ́ nɨ̀yábì rè.

³Yésù ɓe nɨ̀fuùb noò ɨ́ wû ɓe kù ya, ŋgáb ɨ́ dùrê ɗàá.

⁵Yésù ɗə́əŋwú còóm, ŋgə́ ɨ́ pê kùŋkùŋ kàm nɨ̀vɨ́tɨ̀bì á ŋgə́ gàìnwònɨ, á ŋgə́ fɔ́ Fɨ́lɨ̂b ɨnè: «Ŋga á nɨ́m ɓa gùnnɨ cɔŋ nɨ́m na vùùm kàm nùb lèè lâs?»

⁶(Ŋgə́ yi fɔ́ fɔ́ kɨ́ u̧ óknɨ pìí Fɨ́lɨ́ɨ̀b á, ɓetí ŋgə́ nɨ̀mɨr yi ɗəəŋcií nɨ́m ŋgə́ ɓa ndɨ̀ŋniì).

⁷Fɨ́lɨ̂b ɨ́ pììnà Yésù ɨnè: «Dugɨ ɓe sure mònéè təmərì bɨrɨ́b, sàmàìn nɨ́m gwɨi bɨ̀rê nùb lâs a kwà dugɨ gbɨ́ktèìn mwi̧í̧ mwi̧ ɗàà.»[3]

⁸Nɨ̀fuùb ŋgéé kù, Àndɨ̀rê, wúrúb Sìmóŋ Píyéèr ɨ́ tànà ŋgə́ ɨnè:

⁹«Mwɨi ti nɨ̀ŋgwá kù á hò̧ ɓe bɨ̀rê kùb ɓóŋ ɓe mùm óòrjə̀ ŋgáré ŋgiì, ɓe həré bɨrɨ́b. Ɨ́dù ɓe vùùm nùb lèè, tɨ̀ ɓaŋce ŋgáb ŋga?»

¹⁰Á Yésù ta: «Tanáam nùb lâs dùré ɗàá.» Ɓwìn yaá yɨ́ kɨ́ ɓè cei. Nɨ̀vɨ́tɨ̀b ɨ́ dùréhá cè ɗàá. Ŋgáb lâs yaá sàmàìn ndɨŋ nɨ̀ŋgwáàb tɔ́sìn ŋgiì.

¹¹Yésù ɨ́ â bɨ̀rê bɨ rè, ŋgə́ ɨ́ sáktè Mèín, ŋgə́ ɨ́ nà nɨ̀fuùb noò gɔ̀knà nùb yi du ɓè kɨ́, ŋgə́ ɨ́ tà gɔ̀knàɓwê ŋgáb həré. Nùb lâs ɨ́ fùb.

¹²Ɓwâ nùb lâs yi fublé, Yésù ɨ́ tànà nɨ̀fuùb noò ɨnè: «Ɓáanáam tèré kɨ́, àm tɨ̀ ɓáaŋndé.»

¹³Ŋgáb ɨ́ ɓáhè tèré bɨ̀réè tɨ ŋgiì rè, há̧á̧ ɨ́ yúhè lɨ̀ŋtɨ̧̀ cóóŋ ɨ́ bɨrɨ́b.

¹⁴Hȩ nɨ̀vɨ́tɨ̀b pénɨ lɨ̀m Yésù yi ndɨŋ kíì, ŋgáb ɨ́ tàɓà wááŋ ɨnè: «Nɨ̀ŋgwá rè dumeɓa tɨ́kìn Mèèín yi ɓa gònɨ ɗɔ̀bín ndè á!»

¹⁵Yésù ɨ́ ɗə̀ŋhȩ̀ nɨ́ ɨnayâna ŋgáb ɓa bɨ gònɨ ní bìnɨ ɓe nyòme kɨ́kwúnɨ ní mvènnì á, ŋgə́ ɨ́ wúíndôŋ nɨ́ ɓeè còóm ŋgə́ mwi̧.

¹⁶Ɓwâ lɨ́tɔ̧ yi kerɨré, nɨ̀fuùb Yésùù ɨ́ sê sɔ̀ɔ́.

¹⁷Ŋgáb ɨ́ lê kwáìn, pènɨ ɓáá, gìnɨ péín Kàpèrnàwúùm. Mɨ̀sɨ́mnɨ̀r yi sɨ́ɨmcií, Yésù yi nɨ́ ŋgáb kwàsòháyèwá.

¹⁸Ɓárín ku, mvúm yaá nɨ tɔ̀nɨ ɓetí kəŋmbə́r yaá nɨ fùnɨ cei.

¹⁹Ŋgáb yi gɨɓacií sàmàìn kílòmétà ŋgiì ɓe tínmwi̧, ŋgáb ɨ́ pê ŋgə́ ŋgáb gàìnsònɨ ŋgə́ a ɗeisoce mvúmí còóm. Vùù ɨ́ bì ŋgáb.

²⁰Kí á Yésù tana ŋgáb ɨnè: «Nyí nɨ vùù ô, mɨ á!»

²¹Ŋgáb ɗúnɨ ŋgə́ gàmndésònɨ kwáìn, ŋgáb sɨ̀rɨ̀cì na kór féíntɨ́ nɨ́ sɔ̀ɔ́ féin yɨ́ ŋgáb yi du gìniì.

²²Ye saín, nùb yi me ɓáá cəré yi ɗəəŋtɨ́ ɨnayâna kór tɨ á há nɨ sɔ̀ɔ́ ɓè mwi̧; Yésù tɨmcè nɨ́ kwáìn lə́wa ɓe nɨ̀fuùb noò gìnɨ cəə́r, ŋgáb tɨ gɨɓa bɨ ŋgáb kɨ́ ŋgáb á.

²³Ɨ́dù kwááì kù yi éíwo bɨ́ Tìbèriyâdə̀ ɨ́ féínwò ɓè, yɨ́ ŋgáb tɨ taŋ bɨ̀rê Yésù tɨ gɔkna ŋgáb cùr ŋgə́ tɨ sákte Mèín ndè.

²⁴Hȩ nɨ̀vɨ́tɨ̀b pə́ bɨ́ ɨnayâna dùgɨ̀ Yésù, dùgɨ̀ nɨ̀fuùb noò bɨ ɓè ɗàwáá, ŋgáb ɨ́ lê kwááì lè no gìnɨ Kàpèrnàwûm másénɨ Yésù.

²⁵Ŋgáb ɨ́ gì kwànɨ Yésù cəə́r ku, ŋgáb ɨ́ fɔ̂ ŋgə́: «Tá tɔ̀hí, wu féínce wú hò̧ ɓwâ ŋge?»

²⁶Yésù ɨ́ pììnà ŋgáb ɨnè: «Mɨ tanaɓa nyí àmɨɨr wááŋ á: nyí má nɨ́ mɨ àm nyí tɨ taŋ bɨ̀rê nyí ɨ́ fùb lè á, nɨ àm nyí tɨ ók njàb lìím mɨ tɨ ndɨŋndé sé.

²⁷Nyí nɨ ə́r ɓe ɨ́r cɔŋ du ɓáàŋnɨ ɓáŋhɨ́nne ə̂r, éínáam ɓe ɨ́r cɔŋ du ɓáàŋnɨ ɗàwáá, duce nànɨ mè mɨ̀cɨ̧̀. Cɔŋ kɨ́, Mwin Nɨ̀rì ɓa nyí nànɨ á. Lɨ̀m Mèín nɨ̀mɨr nò du Táà á ŋgéé só.»

²⁸Á ŋgáb fɔ́gi ŋgə́ ɨnè: «Ní á nɨ́m fɨ́tɨ ndɨ̀ŋnɨ, nɨ́m a éì ə́r Mèín ɗúré?»

²⁹Á Yésù piina ŋgáb: «Nɨ́m Mèín ɗú nyí ndɨ̀ŋte du nyí ə́mnɨ̀ nò ŋgə́ yi tómworé á.»

³⁰Ŋgáb ɨ́ tànà ŋgə́ ɨnè: «Ní á wu ɓace nɨ́m túùmnànɨ? Wu ma ndɨ̀ŋnà nɨ́m lìím kù kà, nɨ́m a ə́ə̀mhà nɨ́ wu ye.

³¹Tákɨ̀rɨ́b nɨ́mè ya taŋtɨ́ Mân[4] ŋgáb a cè ti sumnií. Káàtà Mèèín taá u̧, ɓetí á no tɨín ɨnè: ‹Mèín ya naá ŋgáb cɔŋ só ɓɨllɨnne.› »

³²Yésù ɨ́ pììnà ŋgáb: «Mɨ tanaɓa nyí àmɨɨr wááŋ á, nɨ Mòyîs sé yi na nyí cɔŋ só ɓɨllɨnne, ɨ́dù Tá moò ɨ́ du nànɨ cɔŋ àmɨrì só ɓɨllɨnne ru.

³³Ɓetí cɔŋ Tá moò du nàniì du cɔŋ só ɓɨllɨnne duce nànɨ mèè á.»

³⁴Á ŋgáb tana ŋgə́ ɨnè: «Tá, nalɨ́ŋ nɨ́m cɔŋ kɨ́ ye.»

³⁵Yésù ɨ́ wáànà ŋgáb ɨnè: «Mɨ du cɔŋ du nànɨ mè àmɨrì á. Nò gainwo mé, cɨ̧̀ kwá nɨ ŋgə́ nôm. Nò ə́mne mé, síì kwá nɨ ŋgə́ ndɨ̀ŋ.

³⁶Ɨ́dù, mɨ tanacií nyí: nyí péé mɨ, nyí ɨ́ dù nɨ́ mɨ ə́ə̀mnɨ ɗàà.

³⁷Nùb Tá na mé lâs ɓa mɨ gàìnwònɨ mwi̧í̧ mwi̧ á; nò gainwoce mé, mɨ tɨ̀ mɨ nò kɨ́ lèècée.

³⁸Ɓetí mɨ éísówo mɨ ɓɨllin gònɨ ndɨ̀ŋnɨ nɨ́m nò yi tómwo mé ɗúré á, nɨ kɨ́ mɨ nɨ̀mɨr mɨ ɗúré sé.

³⁹Nɨ́m nò yi tómwo mé ɗúré á rè: nùb ŋgə́ ya na mé lâs, nɨ̀mwi̧ nɨ lɔ̧̂, ɨ́dù ye cáŋhȩ̀ ɗɔ̀bí, mɨ sə̀ə̀mcùhó̧ ŋgáb cwéé.

⁴⁰Nò lâs ɗəəŋcu mwin Tá tómworé, ɨ́ ə́mnè mwin kíì, nùb kɨ́ á kwànɨ mè mɨ̀cɨ̧̀, mɨ a sə̀ə̀mcùhô̧ ŋgáb cwéé ye cáŋhȩ̀ ɗɔ̀bí. Àà, nɨ́m Tá moò ɗúré á ná kí yáà.»

⁴¹Jwîf bɨ ɨ́ yà ŋgùùŋtèènɨ àm Yésù yi ta: «Mɨ du mɨ cɔŋ só ɓɨllɨnne á» na rè.

⁴²Á ŋgáb yaré ŋgùùŋtèènɨ mvókín ŋgábè no ɨnè: «Ɨna! Yésù mwin Yòsə́ə̀b nɨ rè sé à? Nɨ́m ɗəəŋɓatɨ́ tá noò ɓe yà nóò, ŋgə́ a tà ní só nɨ́ ɓɨllin á na á à?»

⁴³Yésù ɨ́ tànà ŋgáb: «Uweenáam ŋguŋguŋné!

⁴⁴Nò kù sàmàìn gainwo mé ɓè Tá ya tómwo mé du nò kɨ́ njɔ̧̀ nə̀tɨ̀nàwáá ɗàà. Nò kɨ́ cè, ye cáŋhȩ̀ ɗɔ̀bí, mɨ ɓa ŋgə́ sə̀ə̀mcùhó̧nɨ cwéé á.

⁴⁵Tɨ́kìn Mèèín kù yi tɨintɨ́ ɨnè: ‹ŋgáb lâs, Mèín ɓa ŋgáb tɔ̀ɔ̀nɨ á›. Nò lâs ók tɔ̀ɔ́ Táà, ɨ́ jə̀ŋɓwê tɔ̀ɔ́ kíì, ɓa mɨ gàìnwònɨ á.

⁴⁶Nò kù nɨ Tá pə́kɨ́yèwá, sé nò Mèín yi tómworé ɨ́ pə́ Tá.

⁴⁷Mɨ tanaɓa nyí àmɨɨr wááŋ á: nò ə́mne mé, á ɓe mè mɨ̀cɨ̧̀.

⁴⁸Mɨ du cɔŋ du nànɨ mè àmɨrì á.

⁴⁹Tákɨ̀rɨ́b nyínè ya taŋtɨ́ cɔŋ kùb ɓé Mân ndɨ ti súmnií. Cɔŋ kɨ́ ɨ́ dù nɨ́ ŋgáb mè mɨ̀cɨ̧̀ nàwá.

⁵⁰Ɨ́dù nò ɓa tàŋnɨ cɔŋ só ɓɨllɨnne, ɓa dùnɨ ɓe mè mɨ̀cɨ̧̀ á.

⁵¹Mɨ du cɔŋ jáŋ só ɓɨllɨnne á. Nò taŋ cɔŋ kíì ɓa dùnɨ ɓe mè mɨ̀cɨ̧̀ á. Cɔŋ mɨ ɓa nànɨ kɨ́ du síí mɨ nɨ̀mɨ́rí á; mɨ nakɨ́ síí mó kɨ́ u̧ àm nùb ɗɔ̀bɨ́nné a ɓáì á.»

⁵²Nyindí Yésù yi nyin kɨ́ ɨ́ nà Jwîf bɨ njù̧, ŋgáb ɨ́ yàrê wáàmnɨ mvókín ŋgábè no ɨnè: «Ɓwà rè duye nɨ i̧ á, nànɨ nɨ́m sɨ́r noò nɨ́m tàŋtɨ na á à?»

⁵³Yésù ɨ́ tànà ŋgáb ɨnè: «Mɨ tanaɓa nyí àmɨɨr wááŋ á, nyí ɨ́ dù sɨ́r Mwin Nɨ̀rì tàŋwá, nyí ɨ́ dù tɨ́m noò mèìɓwêwá, nyí tɨ̀ nɨ ɓe mè dùr.

⁵⁴Nò taŋ sɨ́r moò, ɨ́ mèìkwà tɨ́m moò á ɓe mè mɨ̀cɨ̧̀, mɨ ɓace ŋgə́ sə̀ə̀mcùhó̧nɨ cwéé ye cáŋhȩ̀ ɗɔ̀bí á.

⁵⁵Ɓetí sɨ́r moò du cɔŋ àmɨrì á, tɨ́m moò cè súm àmɨrì.

⁵⁶Nò taŋ sɨ́r moò, ɨ́ mèìkwà tɨ́m moò á ɓaín ɓe mɨ, mɨ á cè ɓaín ɓe ŋgə́.

⁵⁷Tá ya tómwo mé á jáŋ, ŋgə́ ɨ́ du mɨ nànɨ mè ru; u̧nè á ɓwê mɨ du nànɨ nò taŋ sɨ́r moò mè.

⁵⁸Cɔŋ só ɓɨllɨnne á rè: cɔŋ kɨ́ nɨ hȩ kɨ́ tákɨ̀rɨ́b nyínè ya taŋ ɗà ɨ́ dù nɨ́ ŋgáb mè mɨ̀cɨ̧̀ nàwá rɨ ɗàà, nò taŋ cɔŋ ndèè ɓa nɨ dùnɨ ɓe mè mɨ̀cɨ̧̀ á.»

⁵⁹Yésù yi nyin nyindí rè ŋgə́ á cè Kàpèrnàwûm, Dúú mɨ̀yú̧ú̧ no tɔ̀hí á.

⁶⁰Hȩ nɨ̀fuùb Yésùù óknɨ nyindí ŋgə́ yi nyin kíì, ŋgáb ɨ́ tà: «Tɔ̀ɔ́ kɨ́ á ɓa nɨ ɓí yáà, na ɨ́ fɨ́tɨ ə́ə̀mnɨ kí?»

⁶¹Hȩ Yésù ɗəŋhȩ ɨnayâna nɨ̀fuùb noò á bɨ ŋgùùŋtèènɨ rèé, ŋgə́ ɨ́ fɔ̂ ŋgáb: «Kí ɨ́ ɓa nɨ́ ndɨ̀ŋnɨ ə́ə́m nyínè gùu ru à?

⁶²Nyí ɨ́ pə́cè Mwin Nɨ̀rì wúícùnɨ yɨ́ ŋgə́ yi goré na!

⁶³Nyéhè Sarîn ɨ́ du nànɨ mè ru, nɨ̀vɨ́tè nɨ̀mɨr sàmàìn kwa mè ɗàà. Nyindí mɨ yi nyinna nyínè ɨ́ du ndɨ̀ŋnɨ nyí kwà Nyéhè Sarîn du nànɨ mèè ru.

⁶⁴Ɨ́dù, nùb kù mvókín nyínè no nɨ mɨ ə́ə̀mnɨ ɗàà.» Yésù yi nyin u̧ ɓetí yànɨ ɓwâ ŋgə́ ɓe nɨ̀fuùb noò yi marɨré, ŋgə́ yi ɗəəŋtɨ́ nùb yi du ɓe ə́ə́m ɗàwáá ɓe nò yi ɓa ŋgə́ sə́rɨ̀niì.

⁶⁵Yésù ɨ́ tàkwà ɨnè: «Àm kɨ́ á mɨ tɨ tana nyí ɨnayâna nò kù sàmàìn gainwo mé ɓè Mèín du nò kɨ́ njɔ̧̀ nə̀tɨ̀nàwáá ɗàà ru.»

⁶⁶Yànɨ ɓwâ kɨ́ á nɨ̀fuùb noò ví̧i̧ ya mbɨ́kci bɨ́ ŋgə́ tùnɨ.

⁶⁷Á Yésù fɔ́ nɨ̀fuùb cóóŋ ɨ́ bɨrɨ́b lè ɨnè: «Ɨna, nyí nɨ gɨ̀ɓwênɨ ɗàwá à?»

⁶⁸Sìmóŋ Píyéèr ɨ́ pììnà ŋgə́ ɨnè: «Kìn wo ɓɔ̧ne ɨ́ du nànɨ mè mɨ̀cɨ̧̀ ru, nɨ́m gàìnndóŋkwàcɨ̀ na.

⁶⁹Ɗàrò nɨ́m ə́əmtɨ́ wu, nɨ́m ɗəəŋceé ɨnayâna wu ɨ́ du nò járkɨ́ták Mèín yi tómworé ru.»

⁷⁰Yésù ɨ́ tànà ŋgáb ɨnè: «Nyí cóóŋ ɨ́ bɨrɨ́b lâs, mɨ ɨ́ caha nyí ru ye! Ɨ́dù nɨ̀mwi̧ mvókín nyínè noò nɨ sátàìn á!»

⁷¹Sátàìn ndè, Yésù yi ɓé Yúdàs mwin Sìmóŋ Ìskàrìyôt á. Ɓetí Yúdàs ɨ́ du nò yi ɓa sə́rɨ̀nɨ Yésùù ru, dugɨ hȩ ŋgə́ ya du mvókín nɨ̀fuùb cóóŋ ɨ́ bɨrɨ́bì.