Read Vute Jâŋ 8 Bible Online

Jâŋ 8 - Vute bible

Jâŋ 8

¹Yésù ɨ́ gì ɓe kùb yi ɓékom «Ɓe Òlìvíyéè» rɨ ya.

²Kpíí, yekɨ́rɨ̀b, ŋgə́ ɨ́ gɨ̀cù Dúú Jíri Mèèín no. Nɨ̀vɨ́tɨ̀b lâs ɨ́ gàìnsò ŋgə́. Ŋgə́ ɨ́ dùrê ɗàá, ɗà ŋgə́ ɨ́ yàrê ŋgáb tɔ̀ɔ̀nɨ.

³Nɨ̀gááŋ káàtàbì ɓe Fàrísààb ɨ́ gèwònà Yésù nɨ̀gwi kù kùb ya bɨré ɓe nɨ̀ŋgwáà. Ŋgáb ɨ́ gò ŋgə́ dɨ̀ɨ̀nɨ nɨ̀vɨ́tɨ̀bì tíí.

⁴Ŋgáb ɨ́ tànà Yésù ɨnè: «Nɨ̀gwi rè, kùb tɨ bɨréé ŋgə́ ɓe nɨ̀ŋgwá.

⁵Ɓíì Mòyíìs no, á ta̧á̧ ɨnayâna nɨ̀gwi kùb bɨré ɓe nɨ̀ŋgwáà, kùb lóòŋkwíìkɨ́ ŋgə́ ɓe sɨɨ. Kɨ́ woò wu taceé i̧?»

⁶Ŋgáb yi nyin nyindí kɨ́ u̧ nòòmnɨ Yésù àm vúm a bì ŋgə́ pìí ŋgéé yaà á. Ɨ́dù Yésù ɨ́ tɨ̀ɨ̀msê nɨ́ ɗàá, ŋgə́ ɨ́ yà tɨ̀ìntèènɨ nɨ́ɨ́b kù ɗàá ɓe mbə́re.

⁷Hȩ ŋgáb ya du ŋgə́ tòrɨ̀hánɨ ɓe fɔ́ɔ́, ŋgə́ ɨ́ ɗə́ə̀ŋcùwû còóm, ŋgə́ ɨ́ tà: «Mvókín nyínè no, nò du còmkɨ́yèwáá, lóŋyàyè ŋgə́ sɨɨ.»

⁸Á ŋgə́ tɨɨmcusé nɨ́ ɗàá, ŋgə́ ɨ́ yàcùrê tì̧ì̧nɨ nɨ́ɨ́b ɓe mbə́re.

⁹Hȩ ŋgáb yi ók nɨ́m Yésù yi nyinndé, ŋgáb ɨ́ ə́llê gùr mwi̧í̧ mwi̧, tíí yàyè nùb kwéhɨ́b. Yésù ɨ́ mè ɓè ɓe nɨ̀gwi rè no tíí ə́ŋhîn.

¹⁰Á Yésù ɗə́əŋcuwú còóm, ŋgə́ ɨ́ fɔ̂ nɨ̀gwi rè ɨnè: «Ɨna ŋgáb á bɨ ŋga, ŋgáb bɨ wu kwíìwá à?»

¹¹Nɨ̀gwi rè ɨ́ pìhè ɨnè: «Éì, Tá!» Yésù ɨ́ tà: «Mɨ mɨ wu kwíìcénɨ ɗàà. Á sàmàìn wu gɨré, wu ɨ́ du wú còmcɨ̀r.»]

¹²Yésù ɨ́ tànàkwà nɨ̀vɨ́tɨ̀b ɨnè: «Mɨ du hȩ mwa nùb ɗɔ̀bɨ́nné á. Nò sei nɨ̀fuùb moò ɓa kwànɨ mwa du nànɨ mèè á, ŋgə́ kwá nɨ sɨ́mnɨ̀rí gɨ̀cɨ̀r.»

¹³Á Fàrísààb tana ŋgə́ ɨnè: «Wu ə́əŋcu wu mɨ̀námé wu nɨ̀mɨrí á à? Àmɨɨr kù ma nɨ ɓè ɗàà.»

¹⁴Á Yésù piina ŋgáb ɨnè: «Mɨ ə́əŋcugɨ mɨ́ mɨ̀nám mɨ nɨ̀mɨrí, nɨ́m mɨ ta kɨ́ á nɨ àmɨrì, ɓetí mɨ ɗəəŋtɨ́ mɨ́ yɨ́ mɨ éíworé, mɨ ɗəəŋceé mɨ́ yɨ́ mɨ du mɨ́ gìniì. Ɨ́dù kɨ́ nyínè, nyí nɨ ɗə̀ə̀ŋwá yɨ́ mɨ éíworé, dùgɨ̀ yɨ́ mɨ du gìniì.

¹⁵Kɨ́ nyínè, nyí á ténnɨ ŋgwìn íhé, kɨ́ moò mɨ mɨ ŋgùnnɨ nò kù ɗàà.

¹⁶Ɨ́dù, ɨ́ tà mɨ ŋgwìn ŋgù̧ú̧, ŋgwìn moò á hàrák, ɓetí nɨ mɨ mwi̧ sé ɨ́ du ŋgùnnɨ, nɨ́me Tá moò nò ya tómwo mé á nɨ cúk.

¹⁷Á tɨín káàtà ɓíhɨ̀bì nyínè no ɨnayâna nɨ̀vɨ́tɨ̀b bɨrɨ́b ɨ́ ə́ŋhȩ̀ mɨ̀námé, ŋgáb ɨ́ dù ɓɔ̧ mwi̧, mɨ̀nám kɨ́ á àmɨɨr.

¹⁸Mɨ á ə́ə̀ŋcùnɨ mɨ̀nám mɨ nɨ̀mɨrí. Tá moò nò ya tómwo mé á mɨ ə́ə̀ŋnàɓwênɨ mɨ̀námé.»

¹⁹Á ŋgáb fɔ́ ŋgə́ ɨnè: «Tá wo kɨ́ á cè ŋga?» Yésù ɨ́ pììnà ŋgáb: «Nyí nɨ mɨ ɗə̀ə̀ŋwá, nyí cè nɨ́ Tá moò ɗə̀ə̀ŋwá. Nyí tɨ ɗə̀ə̀ŋyè mɨ, nyí yè ɗəəŋɓwéeceé Tá moò.»

²⁰Yésù á cè tɔ̀hí Dúú Jíri Mèèín no á ŋgə́ nyin nyindí rè ru. Ŋgə́ yaá du̧ú̧ gín kɨr múbí. Nò kù ɨ́ dù nɨ́ ŋgə́ bɨ̀wá ɓetí ɓwâ ŋgéé yi nɨ́ ɗóòyèwá.

²¹Yésù ɨ́ tànàkwà ŋgáb: «Mɨ ɓa mɨ gìnɨ á, nyí a mátèè mɨ, ɨ́dù nyí kwá kú ɓe cum nyínè kɨ́ só. Yɨ́ mɨ du gìnɨ rè, sàmàìn nyí gɨ kwe ɗàà.»

²²Jwîf bɨ ɨ́ tà: «Kɨ́ ŋgə́ ta yɨ́ ní du gìniì sàmàìn nɨ́m gɨ kwe ɗàà na rè, ŋgə́ ɓa nɨ síí kwíìkɨ́nɨ kèè?»

²³Á Yésù piina ŋgáb: «Nyí nɨ nùb ɗɔ̀ɔ́b lè noò á, kɨ́ moò mɨ sówoce mɨ́ ɓɨllin á. Nyí ók nɨ́ ɓe ɗɔ̀ɔ́b á, kɨ́ moò mɨ mɨ ɓe ɗɔ̀ɔ́b ókwa.

²⁴Àm kɨ́ á mɨ tɨ ta ɨnayâna nyí ɓa kúnɨ ɓe cum nyínè kɨ́ só á ru. Ɓetí nyí ɨ́ dù nɨ́ ə́ə̀mwá ɨnayâna ‹Mɨ du nò mɨ du rè›[5] á, nyí á kúnɨ ɓe cum nyínè kɨ́ só.»

²⁵Á ŋgáb fɔ́ ŋgə́: «Wu macè na?» Yésù ɨ́ pììnà ŋgáb: «Mɨ ɗòŋhá nyí tànànɨ nò mɨ duré á.

²⁶Mɨ á ɓe nɨ́ɨ́b ví̧i̧ mɨ nyin nyínè ŋgwéné, kɨ́b mɨ fɨ́tɨce nyí no ŋgùnniì á ku. Ɨ́dù mɨ tanaɗóoháce mɨ́ nùb ɗɔ̀bɨ́nné nɨ́m nò ya tómwo mé yi tɔɔna mé á, ŋgə́ á cè nɨ́ tànɨ àmɨɨr.»

²⁷Jwîf bɨ ɨ́ dù bɨ́ ókwa «Nò ya tómwo mé» Yésù ta rè du Tá noò du ɓɨllɨnne á.

²⁸Yésù ɨ́ tànàgì ŋgáb ɨnè: «Ɓwâ nyí ɓa kpáàŋwúnɨ Mwin Nɨ̀rì bɨ̧̀ɨ̧́ rɨ á nyí ɓa ɗə̀ə̀ŋgɨ̀nɨ ɨnayâna ‹Mɨ du nò mɨ du rè á›[6] ru; nyí a ɗə̀ə̀ŋɓwêcè ɨnayâna mɨ mɨ ndɨ̀ŋnɨ nɨ́m kù ɓe nyòm mɨ nɨ̀mɨrí ɗàà, mɨ ndɨŋɗóoháce mɨ́ nɨ́m Tá yi tɔɔna mé á.

²⁹Nò ya tómwo mé á ɓe mɨ, ŋgə́ nɨ mɨ mwi̧ mbɨ́kwa, ɓetí ɓwâ lâs mɨ á ndɨ̀ŋnɨ nɨ́m nyaŋ ŋgə́ sumíì.»

³⁰Hȩ Yésù yi nyin u̧nèé, nɨ̀vɨ́tɨ̀b ví̧i̧ ɨ́ ə́mnè ŋgə́.

³¹Yésù ɨ́ tànà Jwîf bɨ yi ə́mne ŋgéé ɨnè: «Nyí ɨ́ dù jə̀ŋmèɓànɨ tɔ̀ɔ́ móò, nyí ma mèɓà nɨ̀fuùb moò á.

³²U̧ á nyí ɓa ɗə̀ə̀ŋnɨ àmɨɨr, àmɨɨr kɨ́ a ákî nyí nìrì.»

³³Á ŋgáb tana Yésù ɨnè: «Nɨ́m nɨ nyȩrɨ́b Àbɨ̀ràháàm á, nò kù ya nɨ́ nɨ́m hȩ mbɔ́ɔ́ túkkɨ́céyèwá, i̧ á wu fɨ́tɨce tànɨ nɨ́m a éíkî nìrì?»

³⁴Yésù ɨ́ tànà ŋgáb: «Mɨ tanaɓa nyí àmɨɨr wááŋ á, nò comndé lâs du nɨ mbɔ́ɔ́ cumí á.

³⁵Mbɔ́ɔ́ nɨ nò gbàŋné sé, ɨ́dù mwin duɓa nɨ nò gbàŋné á.

³⁶Mwin ɨ́ ákî nyí nìrì, nyí ɓa dùmèɓànɨ mvòŋsòòŋ á.

³⁷Mɨ ɗəəŋtɨ́ nyí nyȩrɨ́b Àbɨ̀ràháàm á, ɨ́dù hȩ nyí du nɨ́ ə́ə̀mnɨ tɔ̀ɔ́ móò ɗàwáá, nyí á mánɨ mɨ kwíìnɨ.

³⁸Kɨ́ moò mɨ nyin mɨ nɨ́m mɨ pə́wo yɨ́ Tá moò á, ɨ́dù kɨ́ nyínè, nyí ndɨŋ nɨ nɨ́m tá nyínè tana nyínè á.»

³⁹Ŋgáb ɨ́ tànà Yésù ɨnè: «Àbɨ̀ràhâm ɨ́ du nɨ́ tá nɨ́mè ru.» Á Yésù tacuna ŋgáb: «Nyí tɨ dùmèɓàyè munɨ́b Àbɨ̀ràháàm, nyí yè ndɨŋɓwéetɨ́ nɨ́m ŋgə́ ya ndɨŋndé.

⁴⁰Ɨ́dù ɗàrò, dugɨ hȩ mɨ tana nyí àmɨɨr Mèín ta mɨ gò nyí tànàniì, nyí á mánɨ mɨ kwíìnɨ. Àbɨ̀ràhâm ma yi nɨ́ kúúŋ nɨ́m kù u̧ ndɨ̀ŋwá ye!

⁴¹Nyí ndɨŋɓwée nɨ nɨ́m tá nyínè ndɨŋndé á.» Á ŋgáb piina ŋgə́: «Kɨ́ nɨ́mè nɨ́m nɨ munɨ́b màŋnì sé. Tá nɨ́mè á há nɨ mwi̧, Mèín há cè.»

⁴²Yésù ɨ́ tànà ŋgáb: «Mèín tɨ dùmèɓàyè tá nyínè, nyí yè ɗútɨ́ mɨ, ɓetí Mèín ɨ́ tómwo mɨ ru, ɓe nyòm ŋgéé á mɨ du hò̧ ru. Nɨ mɨ nɨ̀mɨr sé ɨ́ goɓa, ŋgə́ ɨ́ tómwo nɨ́ mɨ ru.

⁴³Nyí duce nɨ́ ókwa njàb nɨ́m mɨ taré àm níì? Duha nɨ àm nyí mvú óknɨ Kìn moò rè á ye!

⁴⁴Kɨ́ nyínè, tá nyínè du nɨ Sátàìn á, nyí gamceé ɗɨ́m nóò ŋgáár bɨrɨ́b. Yàwòɓàá yàllì, ŋgə́ ya nɨ́ nò kwíhɨ nɨ̀rì á. Ŋgə́ nɨ nɨ́m àmɨrì kù ndɨ̀ŋkɨ́yèwá ɓetí àmɨɨr nɨ no ɓɔ̧ɔ̧ ɗàà. Ə́r nóò á nɨ kààŋ, ɓetí ŋgə́ nɨ tɨ́kàŋkɨ̧́ á.

⁴⁵Ɨ́dù kɨ́ moò, mɨ á mɨ tànɨ àmɨɨr, àm kɨ́ á nyí du mɨ ə́ə̀mnɨ ɗàà ru.

⁴⁶Na á mvókín nyínè no fɨ́tɨ tànɨ mɨ á ɓe cum? Duceé ɓè mɨ du tànɨ àmɨrìí, nyí ma duce nɨ́ mɨ ə́ə̀mwá ɓe àm níì?

⁴⁷Nò ók ɓe Mèèín á óknɨ kìn Mèèín. Ɨ́dù nyí nɨ ɓe Mèín ókwa, àm kɨ́ á nyí du óknɨ nyindí mó ɓɔ̧ne ɗàà ru.»

⁴⁸Jwîf bɨ ɨ́ tànà Yésù ɨnè: «Hȩ nɨ́m ta wu nò Sàmàríì á, wu á cè ɓe nɨ̀wàtɨ̀b só na rè, nɨ́m ma ndɨŋ kààŋ á à?»

⁴⁹Yésù ɨ́ tà: «Mɨ mɨ ɓe nɨ̀wàtɨ̀b kù só ɗàà. Mɨ dɨɨm mɨ Tá moò á, kɨ́ nyínè nyí nyaaceé mɨ dɨ̀ɨ̀mnɨ.

⁵⁰Nɨ mɨ nɨ̀mɨr sé ɨ́ du mánɨ dɨmɨɨr moò, nò du mɨ mánànɨ dɨmɨri á ku, ŋgə́ ɨ́ duce ténnɨ àm ɗɨ́ɗɨ̧́.

⁵¹Mɨ tanaɓa nyí àmɨɨr wááŋ á, nò jəŋ nyindí mó ɓɔ̧ne kwá nɨ kûr.»

⁵²Á Jwîf bɨ ta: «Ɗàrò nɨ́m dəəŋɓagií wu á ɓe nɨ̀wàtɨ̀b só. Àbɨ̀ràhâm yi kúú, tɨ́kɨ̀nɨ́b Mèèín yi kúɓwéetɨ́, kɨ́ woò wu a tà nò jəŋ nyindí níì ɓɔ̧ne kwá nɨ kûr na á à?

⁵³Tá nɨ́mè Àbɨ̀ràhâm yi kúú, wu ɗú tànɨ wu ndóóŋ ŋgə́ á hàye? Tɨ́kɨ̀nɨ́b Mèèín yi kúɓwéetɨ́, wu a cè na?»

⁵⁴Yésù ɨ́ pììnà ŋgáb: «Mɨ nɨ̀mɨr ɨ́ dɨ̀ɨ̀mcùɓà síí, dɨmɨɨr kɨ́ du nɨ sam á. Nò du mɨ dɨ̀ɨ̀mniì du Tá moò nyí du tànɨ ‹Mèín nɨ́mè›,

⁵⁵nyí a dù nɨ́ ɗə̀ə̀ŋwá ɗàrɨ́ á. Kɨ́ moò mɨ ɗəəŋtɨ́ mɨ́ ŋgə́. Mɨ tɨ tàyè mɨ ŋgə́ ɗə̀ə̀ŋwá, mɨ yè mɨ́ tɨ́kàŋkɨ̧́ ɓwê hȩ nyí á. Ɨ́dù mɨ ɗəəŋtɨ́ mɨ́ ŋgə́, mɨ á cè mɨ́ jə̀ŋnɨ nyindí nó ɓɔ̧ne.

⁵⁶Tá nyínè Àbɨ̀ràhâm yaá óknɨ mɨ̀tù àm ŋgə́ yi ɗəŋhȩ ní ɓa pénɨ ye mɨ ɓa gòniì, ŋgə́ ɨ́ pə́mècè. Á ŋgə́ yi ókɓa mɨ̀tù.»

⁵⁷Á Jwîf bɨ ta: «Áì, wu dáín vii bɨrɨ́b ɨ́ cóóŋ féínyèwá wu ɨ́ tà ní péé Àbɨ̀ràhâm na á à?»

⁵⁸Yésù ɨ́ pììnà ŋgáb: «Mɨ tanaɓa nyí àmɨɨr wááŋ á: kùb Àbɨ̀ràhâm fèìnɓàyèwá, ‹Mɨ yaá cɨ̀ mɨ ku.› »[7]

⁵⁹Á ŋgáb árɨwo sɨɨ àm vúm lóŋhɨ ŋgéé, ŋgə́ ɨ́ lɔ̧́rê nɨ́ mɨ̀kwìn kɨ́ no ɓè, ŋgə́ ɨ́ fó̧kî nɨ́ Dúú Jíri Mèèín ku.