Read Vute Jâŋ 9 Bible Online

Jâŋ 9 - Vute bible

Jâŋ 9

¹Yésù ɓe nɨ̀fuùb noò yaá ndóŋnɨ, ŋgə́ ɨ́ pə́sò ɓùɓú̧ fɨnni kù.

²Á nɨ̀fuùb noò fɔ́ ŋgə́ ɨnè: «Tá tɔ̀hí, kɨ́ kùb ya feince bɨ́ nɨ̀ŋgwá rè ɓùɓú̧ rè, yɨɨ́m àm ŋgə́ nɨ̀mɨr ya comndé kèè àm tá noò ɓe yà nóò ya comndé?»

³Yésù ɨ́ pìhè ɨnè: «Nɨ àm ŋgə́ nɨ̀mɨr ya comndé, kɨ́ kù àm tá noò ɓe yà nóò ya comndé sé kùb yi fein ŋgə́ ɓùɓú̧. Nɨ́m kɨ́ yi ndɨŋ u̧ àm Mèín a túmnè ə́r nóò ŋgə́ yaà á.

⁴Á ɗúnɨ nɨ́m ndɨ̀ŋná ə́r nò ya tómwo mé yi ta nɨ́m ndɨ̀ŋte, ɓwâ mwa duye yá rè. Sɨ́mnɨ̀r á nɨ gònɨ, sàmàìn kùb éí bɨ́ ə́r sɨ́mnɨ̀nné ɗàà.

⁵Ɓetí ɓwâ mɨ duye ɗɔ̀bín ndè, mɨ du mɨ mwa nɨ̀vɨ́tɨ̀bì á.»

⁶Cùr Yésù ya nyin u̧nèé, ŋgə́ ɨ́ túŋsê cwàá ɗàá, ŋgə́ ɨ́ lə̀ŋtè njobé ɓe cwàá nó kɨ́, ŋgə́ ɨ́ sàwû ɓùɓú̧ rè íhé.

⁷Ŋgə́ ɨ́ tà: «Gɨm tí lììnɨ Sìlòwê.» (Ɨ́r mvúm kíì ta: «Tómsoó» na á.) Ɓùɓú̧ rè ɨ́ gì, ŋgə́ ɨ́ lìhè tí. Ŋgə́ cùwònɨ no yó, ŋgə́ yaácɨ̀ nɨ pénɨ.

⁸Nùb ɓe kùb yi dukom yɨ́ mwi̧í̧ ɓe nùb yi pə́teekom ŋgə́ dùtèènɨ ju ɓoréé yaá tànɨ ɨnè: «Ɨna nɨ̀ŋgwá yi duteekom hò̧ ju ɓoréé rè nɨ rè sé à?»

⁹Nùb kù yaá tànɨ: «Ŋgə́ á ɓàgɨ̀.» Nùb kù a tàcè: «Ɗàà, fɨ́tɨ nɨ ŋgə́ fɨ́tîn á.» Nɨ̀ŋgwá kɨ́ nɨ̀mɨr yaá cè tànɨ: «Mɨ kɨ́ ma á ɓàgɨ̀ rè.»

¹⁰Ŋgáb ɨ́ fɔ̂ ŋgə́: «Ndɨŋce nɨ́ i̧ wu ɨ́ yàrê wú pénɨ íhín?»

¹¹Ŋgə́ ɨ́ pìhè: «Nɨ̀ŋgwá kùb ɓé Yésù rɨ tɨ ləŋtií njobé, ŋgə́ ɨ́ sàwúnà mɨ íhé, ŋgə́ ɨ́ tà: ‹Gɨm lììkɨ́nɨ tí Sìlòwê›, mɨ ɨ́ gì. Ɓwâ mɨ liicáŋhȩ tíí, mɨ ɨ́ yàrê pénɨ íhín!»

¹²Á ŋgáb fɔ́ ŋgə́: «Nɨ̀ŋgwá kɨ́ á cè ŋga?» Ŋgə́ ɨ́ tà: «Mɨ mɨ ɗə̀ə̀ŋwá.»

¹³Kùb ɨ́ gèsò nɨ̀ŋgwá tɨ ɓùɓú̧ rè Fàrísàbì tíí.

¹⁴Ye Yésù yi ləŋte njobé kùùmnànɨ nɨ̀ŋgwá rè íí no rè, yɨɨ́m ye Sàbáà á.

¹⁵Fàrísààb ɨ́ fɔ́ɓwê nɨ̀ŋgwá rè i̧ á tɨ ndɨŋ ŋgə́ ɨ́ yàrê pénɨ. Á ŋgə́ tana ŋgáb ɨnè: «Ŋgə́ sawúnaɗóoháce mɨ njobé íhé, mɨ ɨ́ gɨ̀cè tí lììkɨ́nɨ, á mɨ du pénɨ íhín ndè.»

¹⁶Fàrísààb kù ɨ́ tà ɨnè: «Nɨ̀ŋgwá ndɨŋ nɨ́m kíì nɨ nò Mèèín sé, ɓetí ŋgə́ jə̀ŋnɨ ye sàbáà ɗàà.» Ɨ́dù Fàrísààb kù ɨ́ tà: «Nɨ̀vɨ́tè duú cɨcóm, ŋgə́ a ndɨ̀ŋ kúúŋ lɨ̀m ndèè à?» Nyindí kɨ́ ɨ́ gèrégì gɔ̀ mvókín Fàrísàbì.

¹⁷Fàrísààb ɨ́ fɔ́kwà nɨ̀ŋgwá rè ɨnè: «Wu cè, hȩ ŋgə́ kuumna wú íí kɨ́, wu tace ŋgə́ a cè na?» Á ŋgə́ ta: «Ŋgə́ tɨ́kìn Mèèín á.»

¹⁸Dugɨ u̧, kɨ̀jííb Jwîf bɨ yi bɨ́ ə́ə̀mháwa ɨnayâna nɨ̀ŋgwá rè yɨɨ́m ɓùɓú̧ fɨnni á, á ŋgə́ yarégi pénɨ ɗàrò ru. Àm kɨ́ á ŋgáb ya ɓéwo tá noò ɓe yà nóò,

¹⁹ŋgáb ɨ́ fɔ̂ ŋgáb: «Mwin nyínè á rè à? Nyí feinɓahá ŋgə́ ɓùɓú̧ á à? I̧ á ndɨŋce ŋgə́ yaré pénɨ íhín ɗàrò?»

²⁰Á tá noò ɓe yà nóò ta: «Mwin nɨ́mè á ɓà, nɨ́m yi feince nɨ́ ŋgə́ u̧ ɓùɓú̧ á.

²¹Ɨ́dù nɨ́m nɨ ɗə̀ə̀ŋwá i̧ á ndɨŋ ŋgə́ yaré pénɨ íhín ɗàrò, nɨ́m cè nɨ́ ɗə̀ə̀ŋwá na tɨ ɨ́ kuumna ŋgə́ íí. Fɔ́náam ŋgə́, ŋgə́ nɨ mutí sé cɨ̀, ŋgə́ nɨ̀mɨr ɓa nyí tànànɨ á!»

²²Tá noò ɓe yà nóò ya téínkɨ́ bɨ́ pìí kɨ́ u̧ àm ŋgáb ya du bɨ́ lùnɨ kɨ̀jííb Jwîf rè á. Ɓetí kɨ̀jííb Jwîf bɨ yi bií ɓɔ̧, ŋgáb ɨ́ tà nò ɓa tàhó̧ɓànɨ no ɓɔ̧ɔ̧ ɨnayâna Yésù Mèsî á na rɨ, vúm á ŋgə́ ŋgɨ́íhó̧kɨ́nɨ dúú mɨ̀yú̧ú̧.

²³Àm kɨ́ á yà nóò ɓe tá noò ya ta bɨ́ ŋgə́ nɨ mutí sé cɨ̀, ŋgáb fɔ́ɓà bɨ ŋgə́ nɨ̀mɨr lu.

²⁴Fàrísààb ɨ́ ɓécùwòhâ nɨ̀ŋgwá rè, ŋgáb ɨ́ tànà ŋgə́: «Taɓam àm Mèín ɗəəŋndé. Kɨ́ nɨ́mè nɨ́m ɗəəŋtɨ́ nɨ́ nɨ̀ŋgwá tɨ kuumna wu íí rè nɨ cɨcóm á.»

²⁵Á nɨ̀ŋgwá rè pihe ŋgə́ ɨ́ tà: «Ŋgə́ dùgɨ̀ cɨcóm yoo, ŋgə́ dùgɨ̀ cɨcóm sé yoo, kí góomɓa nɨ nyí á. Kɨ́ moò, nɨ́m mɨ ɗəəŋɗóoré á mwi̧: mɨ yɨɨ́m ɓùɓú̧ á, ŋgə́ kuumatɨ́ mɨ íí, mɨ á cè mɨ́ pénɨ.»

²⁶Fàrísààb ɨ́ fɔ̂ ŋgə́: «Ŋgə́ tɨ ndɨŋɓacéye i̧, ŋgə́ ɨ́ kùùmnà wu íí?»

²⁷Á ŋgə́ ta: «Mɨ tanacií nyí, nyí cè nɨ́ ə́ə̀mwá, nyí fɔ́cukwace fɔ́ níì? Kèè nyí ɗú nɨ́ sèìɓwênɨ nɨ̀fuùb ŋgéé?»

²⁸Fàrísààb ɨ́ àndè ŋgə́. Á ŋgáb ta: «Kɨ́ woò, wu ma jəŋ wu nɨ̀ŋgwá kɨ́ á. Kɨ́ nɨ́mè, nɨ́m jəŋ nɨ Mòyîs á kà.

²⁹Kɨ́ nɨ́mè nɨ́m ɗəəŋtɨ́ nɨ́ Mèín ya weinaá Mòyîs ɓɔ̧. Kɨ́ ŋgéé ɗàrɨ́, ŋgə́ yènɨ na kè, nɨ́m nɨ ɗə̀ə̀ŋwá!»

³⁰Nɨ̀ŋgwá rè ɨ́ tà: «Àm kɨ́ ma yɔ́kgií mɨ ɗə̀ə̀ŋnɨ. Nyí ta vúm ŋgə́ ɗə̀ə̀ŋwá, ŋgə́ ma kuumkɨ́na mɨ íí à?

³¹Nɨ́m ɗəəŋtɨ́ Mèín nɨ mbɨ́knɨ cɨcóm ndɨ̀ŋ kúúŋ nɨ́m kíì ɗàà, ɨ́dù, nò jəŋ Mèèín, ɨ́ ndɨ̀ŋ nɨ́m Mèín ɗúré, á sàmàìn ndɨŋ kúúŋ nɨ́m kíì.

³²Nɨ́m ókkɨ́yèwá ɨnayâna nò kù kuumnatɨ́ ɓùɓú̧ fɨnni íí.

³³Nɨ̀ŋgwá ndɨŋ nɨ́m kíì dùyè nò Mèèín sé, ŋgə́ yè nɨ́ kúúŋ nɨ́m kíì ndɨ̀ŋwá.»

³⁴Á Fàrísààb tana ŋgə́: «Wu, cɨcóm ŋgwé ɓe lur, nɨ́m wu fɨ́tɨce nɨ́m tɔ̀ɔ̀nàniì á ní?» Á ŋgáb ŋgɨ́í nɨ̀ŋgwá rè.

³⁵Hȩ Yésù ók ɨnayâna kùb ŋgɨ́íhó̧tɨ́ nɨ̀ŋgwá rè lúu na rèé, ŋgə́ ɨ́ gì ŋgə́ kwànɨ, ɗà ŋgə́ ɨ́ fɔ̂: «Wu ə́əmtɨ́ Mwin Nɨ̀rì à?»

³⁶(Á ŋgə́ pihe ŋgə́ ɨ́ tà: «Tá, nò kɨ́ macè nɨ́ na, mɨ yè ə́əmtɨ́ ŋgə́.»

³⁷Yésù ɨ́ tànà ŋgə́ ɨnè: «Nò du wu nyìnnànɨ wu du pə́kɨ́ɓànɨ rè, ŋgə́ á.»)

³⁸Á nɨ̀ŋgwá rè ta: «Kéké, mɨ ə́əmtɨ́.» Ɗà nɨ̀ŋgwá rè ɨ́ cáàmsê ɗàá Yésùù tíí ŋgə́ ɗómnɨ.

³⁹Yésù ɨ́ tà ɨnè: «Mɨ yi go mɨ ɗɔ̀bín gèhó̧nɨ nɨ́ɨ́b lâs laŋtɨ̧ɨ̧́ á. Ɓùɓú̧ù̧b pə́ íhín, nùb yi duce péniì a dùcù ɓùɓú̧ù̧b.»

⁴⁰Á Fàrísààb kù yi du ɓe ŋgə́ ɓèé, hȩ ŋgáb óknɨ nyindí kíì, ŋgáb ɨ́ fɔ̂ Yésù ɨnè: «Kí du wu ma ɗú tànɨ nɨ́m duɓwée nɨ ɓùɓú̧ù̧b á hàye?»

⁴¹Yésù ɨ́ pììnà ŋgáb ɨnè: «Nyí tɨ dùyè ɓùɓú̧ù̧b, nyí yè nɨ́ cɨcóòm sé. Ɨ́dù hȩ nyí ta nɨ́ vúm á bɨ pə́ɓànɨ íhín mîn ndèé, nyí á háyè cum nyínè kɨ́ no.»