Read Vute Ə́rɨ́b nùb tómé yi ə́llé 10 Bible Online

Ə́rɨ́b nùb tómé yi ə́llé 10 - Vute bible

Ə́rɨ́b nùb tómé yi ə́llé 10

¹Nɨ̀ŋgwá kù ɨ́r yi du Kɔ̀ɔ̀rnéì yaá Sèsàrê, ŋgə́ yɨɨ́m mvèìn sójààb gbàŋ Rôm á, ɨ́r kúùŋ sójààb kíì yaá: «kúùŋ sójààb ti Ìtàlíì».

²Nɨ̀ŋgwá kɨ́ yaá jə̀ŋlɨ́ŋɓànɨ Mèín, ŋgə́ ɓe gbàŋ noò yaá ɓwâ lâs ɗómnɨ Mèín. Ŋgə́ yaá kpɔ́klɨ́ŋnɨ nùb tiri ví̧i̧ gbàŋ Jwîf bɨ no, ŋgə́ a yóŋlɨ́ŋce Mèín ɓwâ lâs.

³Mvii ɓɨ̀r kù no, péín mvii taarɨ́bí, nɨ̀ŋgwá kɨ́ ɨ́ pə́ɓà dùgal Mèèín laŋtɨ̧ɨ̧́ lə́sònɨ no yó hȩ ŋgə́ jəəm wum ndɨ́ u̧, dùgal kɨ́ ɨ́ ɓê ŋgə́: «Kɔ̀ɔ̀rnéì!»

⁴Ŋgə́ ɨ́ ŋgèèsò dùgal kɨ́ ɓe vùù cúk, ŋgə́ ɨ́ fɔ̂ ŋgə́ ɨnè: «Ní ɨ́ du ku, Kéké?» Dùgal Mèèín ɨ́ pììnà ŋgə́ ɨnè: «Mèín ə́əmtɨ́ mɨ̀yú̧ bɨ woò ɓe kpɨ́kpɔ́ wu tɨ kpɔ́kkom nùb tiri rɨ, ŋgə́ á cè wu lə́ə̀mnɨ.

⁵Nɨ̀ŋgwá kù ɨ́r du Sìmôŋ ndɨ á Jòpê, kùb á ŋgə́ ɓénɨ Píyéèr, tómsom nɨ̀vɨ́tɨ̀b ɗàrò gèèwònà wu ŋgə́.

⁶Nɨ̀ŋgwá ŋgə́ du yó jə́bniì nò gbaktee kwa nyèèmí á, dúú nóò á gín mɨ̀kwehɨ̀rí. Ɨ́r noò á ɓwê Sìmôŋ.»

⁷Ɓwâ dùgal Mèèín yi nyinkom nyindí rèè yi gɨré, á Kɔ̀ɔ̀rnéì yi ɓéwo nùb ə́ré noò bɨrɨ́b kù ɓe sójà kù yi éínakom ŋgə́, yi duɓwéece jə̀ŋlɨ́ŋɓànɨ Mèèín.

⁸Ŋgə́ ɨ́ átɨ̀nà ŋgáb nɨ́ɨ́b tɨ ndóŋndé lâs, ŋgə́ ɨ́ tómsògì ŋgáb Jòpê.

⁹Kpíí kɨ́ no péín mvii ŋgwéé, nùb kɨ́ yaá gɨ̀sénɨ jȩ̀ȩ̀, ŋgáb yi ŋgóobcií ɓe kúr, Píyéèr ɨ́ wúícê ŋgwé dúhéé Mèín yóŋnɨ.[3]

¹⁰Hȩ cɨ̧̀ ya nóm ŋgéé, ŋgə́ ɨ́ ɗû tàŋnɨ cɔŋ. Ɓwâ kùb yi du ŋgə́ cɔŋ sìnàniì á nɨ́m kù yi ndɨŋ ŋgə́ hȩ ŋgə́ jəəm wum.

¹¹Ŋgə́ ɨ́ pê ɓɨɨr kumnîn, pààm kàm yáin kù a sóce hȩ nɨ̀vɨ́tɨ̀b nààsɨ̀b ɨ́ du bɨ̀ndə̀ə̀msówònɨ ɗàá rɨ u̧.

¹²Nyó̧nɨ́b ɓe nyèém fɨ́te ŋgáb kwaá ya kwe, gààì kèè, nyèém kpácókéé kèè ɓe kɨ́b ɓannì lâs yaá pààm kɨ́ ya.

¹³Á ŋgə́ ók kúu kù ŋgə́ tànànɨ ɨnè: «Píyéèr, éíwúum còóm, kwíhɨm wu a tàŋ!»

¹⁴Ɨ́dù Píyéèr ɨ́ pììnà ŋgə́ ɨnè: «Áì! Ɗàwá Kéké, ɓetí mɨ mɨ tàŋkɨ́yèwá nɨ́m jɨ̀rí, dùgɨ̀ kɨ́ du nyɔ̧ɔ̧́ ɗàwá kùb tàŋtɨ rɨ.»

¹⁵Kúu tɨ hwè ɨ́ tàcùnà ŋgə́: «Nɨ́m Mèín ta kùb tàŋtɨ rɨ, wu wu nɨ́m kɨ́ hȩ nɨ́m kùb tàŋnde pə̂r.»

¹⁶Nɨ́m kɨ́ yi ndɨŋtɨ́ u̧ há̧á̧ gwì taarɨ́b, á pààm kàm ndè lə́cuwú nɨ́ ɓɨllin ɓè mu̧u̧.

¹⁷Píyéèr yaá cè lə́ə̀mkɨ́nɨ ní á Mèín ɗú ní tànànɨ nɨ́m ní pə́ rè no. Ɨ́dù mvókín kɨ́ no nùb Kɔ̀ɔ̀rnéì ya tómsoré ya fɔ́ɔ́teesoó yɨ́ dúú Sìmóòŋ duré, ŋgáb yaá cɨ̀ ɓavɨ̀rì.

¹⁸Ŋgáb ɨ́ ɓérésò fɔ́nɨ ɨnè: «Sìmôŋ kùb ɓé Píyéèr lɨ jə́b yó hò̧ á à?»

¹⁹Píyéèr yaá yè mánɨ ɗə̀ə̀ŋnɨ njàb nɨ́m ŋgə́ tɨ pə́ rè, á Nyéhè Sarîn tana ŋgə́ ɨnè: «Ókye, nɨ̀ŋgwáàb taarɨ́b á wu mánɨ,

²⁰éíwúum còóm, wu wu ɗà̧nɨ̀r, sésom nyíne ŋgáb a gì ɓetí mɨ ɨ́ tómwo ŋgáb lu.»

²¹Píyéèr ɨ́ sésògì yɨ́ nùb lèè, ŋgə́ ɨ́ tànà ŋgáb: «Nò nyí má kɨ́, mɨ kɨ́ maá rè. Ní ɨ́ du ku?»

²²Ŋgáb ɨ́ pìhè ɨnè: «Kɔ̀ɔ̀rnéì, mvèìn sójàbì ɨ́ tómwo nɨ́m ndu. Ŋgə́ nɨ̀ŋgwá hàráá du jə̀ŋnɨ Mèín ɓwâ lâs Jwîf bɨ duce ɗúniì á. Dùgal Mèèín kù ta ŋgə́ ɓésò wu no yó, óknɨ nɨ́m du ɗúnɨ wu tànà ŋgéé.»

²³Á Píyéèr yi geré ŋgáb yó ɗòbnɨ. Ye saín, ŋgə́ ɓe ŋgáb ɨ́ ə́llê. Nùb ə́mní bɨ kù kwɨ́í kɨ́ noò ɨ́ háàsò ŋgáb.

²⁴Kpíí, ŋgáb ɨ́ féìn Sèsàrê. Kɔ̀ɔ̀rnéì ɓe nùb no gbàŋné kù, ɓe ɓwàjììb ŋgə́ ya ɓéré yaá móŋkɨ́nɨ Píyéèr bɨ ku.

²⁵Ɓwâ Píyéèr yi du yó lə́sòniì á Kɔ̀ɔ̀rnéì yi go ŋgə́ gàmnɨ, ŋgə́ ɨ́ tɨ̀ɨ̀msê ɗàá nyìndɨ̀nɨ Píyéèr ɓe jɨ̧ kàm jíri.

²⁶Ɨ́dù Píyéèr ɨ́ bɨ̀cùwû ŋgə́ còóm ŋgə́ a tace: «Ɗə́əŋwúum còóm, ɓetí mɨ nɨ̀mɨr mɨ duɓwée mɨ nɨ̀vɨ́tè hȩ wu á.»

²⁷Á ŋgə́ ya lə́ yó ŋgə́ ɓe Kɔ̀ɔ̀rnéì a nyingeece, ŋgə́ ɨ́ kwà nɨ̀vɨ́tɨ̀b ví̧i̧ yi ɓáaso yó kwe.

²⁸Ŋgə́ ɨ́ tànà ŋgáb: «Nyí ɗəəŋhaá ɓíì Jwîf ɓoò á tànɨ wu duú Jwîf wu wu yɨ́ nɨ̀gúrí féìn, kɨ́ kù no yó lə̂r ye. Ɨ́dù Mèín túumnatɨ́ mɨ, mɨ mɨ nò kù â hȩ nò ɓáŋhîn kùb du bɨ́ ju ɓe kí ɓáàre, kɨ́ kù hȩ nò kùb du bɨ́ lɨ́ŋnde.

²⁹Àm kɨ́ á ɓwâ nyí tɨ ɓéwo mé, mɨ tɨ du mɨ́ mvúwa gònɨ ru. Ɗàrò, tànàná mɨ nɨ́m nyí tɨ ɓéwona mé kà.»

³⁰Kɔ̀ɔ̀rnéì ɨ́ pìhè ɨnè: «Á mwáín jíì nààsɨ̀b, mvii ɓɨ̀r hȩ mvókín mvii taarɨ́bí nɨ́m dukɨ́ nó rè u̧, mɨ tɨ á mo yó Mèín yóŋnɨ. Mɨ ɨ́ sɨ̀rɨ̀cɨ̀ na, nɨ̀ŋgwá kù júk só mɨ̀vɨ́rì tóm tóm á ə́əŋkɨ́ nɨ́ mo tíí rè.

³¹Ŋgə́ ɨ́ tànà mɨ́ ɨnè: ‹Kɔ̀ɔ̀rnéì, Mèín óktɨ́ mɨ̀yú̧ wóò, ŋgə́ cè nɨ́ cə̀mláŋwa kpɨ́kpɔ́ wu tɨ kpɔ́kteekom nùb tiri rɨ.

³²Tómsom nɨ̀vɨ́tɨ̀b Jòpê, ŋgáb gèèwònà wu Sìmôŋ kùb du ɓénɨ Píyéèr lɨ. Ŋgə́ jə́b nɨ̀ŋgwá gbaktee kwaá kù ɨ́r du ɓwéhe Sìmôŋ ndɨ yó gín mɨ̀kwehɨ̀rí á.›

³³Á mɨ tómkɔ́ɔso nɨ̀vɨ́tɨ̀b ɓè mu̧u̧ wu ɓéwònɨ, wu ɨ́ ə́ə̀mcè gònɨ. Ɗàrò, nɨ́m lâs nɨ́m á Mèèín tíí óknɨ nɨ́m Kéké tómwo wu nyìnte.»

³⁴Ɗà Píyéèr ɨ́ gàmgì nyindí, ŋgə́ ɨ́ tà: «Ɗàrò mɨ ɗəəŋnyaaŋɓagií mîn ɨnayâna Mèín nɨ kɨ́klénɨ gɔ̀ mvókín nɨ̀vɨ́tɨ̀bì ɗàà:

³⁵Nò lâs, dùgɨ̀ gbàŋ ti ŋgé noò, du ŋgə́ jə̀ŋnɨ, duce ndɨ̀ŋnɨ nɨ́m ɗɨ́ɗɨ̧́ ndɨ, ŋgə́ á nɨ ŋgə́ gàmnɨ.

³⁶Nyí ɗəəŋɓatɨ́ Kìn Mèín yi tómsona gbàŋ Ísràyéèl du tànɨ mvókín Mèín ɓe nɨ́mè, ju ɗóóŋ á ku ɓe ɨ́r Yésù Krístù nò kɨ́k nɨ̀vɨ́tɨ̀b lâs na rɨ.

³⁷Nyí ɗəəŋtɨ́ nɨ́m yi féínyaye ɗɔ̀ɔ́b Gàlìléè, ɨ́ féìn ti Jùdéè bɨ̂ŋ cùr Jâŋ yi tatee àm Mèín, ŋgə́ ɨ́ kɔ̀hè kɔ ə́mní rɨ.

³⁸Nyí ɗəəŋtɨ́ hȩ Mèín ya ca Yésù nò Nàsàréèt, nànɨ ŋgə́ nyòm Nyéhè Sarɨ́nne rɨ. Nyí ɗəəŋɓwéetɨ́ hȩ Yésù ya yəŋ ti rè ŋgə́ a ndɨŋteece nyɔ̧ɔ̧́, ŋgə́ a ɓátɨce nùb nɨ̀wàtɨ̀b yi du kɨ́ɨ́niì rɨ, ɓetí Mèín yaá ɓe ŋgə́.

³⁹Nɨ́m du mɨ̀námé nɨ́ɨ́b lâs ŋgə́ ya ndɨŋ Yèrúsàlèm dùgɨ̀ ti Jwîf no rɨ á. Ŋgáb yi ndɨɨ́ŋ kùb kpáàŋkwíìwúkî ŋgə́ bɨ̧̀ɨ̧́.

⁴⁰Ɨ́dù Mèín yi nacutɨ́ nɨ́ ŋgə́ mè jíì taarɨ́bí no, ŋgə́ ɨ́ ndɨ̀ŋ ŋgə́ túmnɨ̀ síí.

⁴¹Nɨ nùb lâs sé yi pə́ ŋgə́, jɔ̀sé nɨ́m nùb Mèín ya cakɨ́yaye dù mɨ̀náméé. Cùr Mèín ya səəmcuhó̧ ŋgə́ cwéé, nɨ́me ŋgáb yi taŋcutɨ́ cɔŋ.

⁴²Yésù yi tómtɨ́ nɨ́m, nɨ́m tàtèètɨ nɨ́m a ɓéètèèkwà ɨnayâna ní ɨ́ du nò Mèín yi ca dù nò ŋgwin nɨ̀vɨ́tɨ̀bì ru.

⁴³Tɨ́kɨ̀nɨ́b Mèèín lâs ya nyintɨ́ ɓe ɨ́r Yésùù ɓwâ ŋgáb ya ta nò lâs ɓa ŋgə́ ə́ə̀mniì, Mèín ɓa nò kɨ́ tɨ́ínɨ ɓe ɨ́r ŋgéé á rɨ.»

⁴⁴Píyéèr á cè nyìnkɨ́yènɨ, Nyéhè Sarîn ɨ́ sówò vùùm nùb ya du óknɨ nɨ́m ŋgə́ yi du nyìnnɨ ɓe ɨ́r Mèèín ndè lâs ya.

⁴⁵Nùb ə́mní yi du Jwîf yi go ɓe Píyéèr yi gbɨɨŋɓatɨ́ cei ɓe àm nùb yi du Jwîf séé yi kwaɓwéhe Nyéhè Sarîn Mèín yi tómworé rè.

⁴⁶Ɓetí kùb yi óktɨ́ ŋgáb nyìnnɨ nyindí kùb ɗə̀ə̀ŋwáá ŋgáb a kúumce ə́rɨ́b Mèèín. Á Píyéèr ta:

⁴⁷«Ɗàrò, nùb lè kwaɓwéetɨ́ Nyéhè Sarîn hȩ nɨ́m, sàmàìn kùb harɨci bɨ́ kùb kɔ̀ɔ̀ ŋgáb kɔ ə́mní ɓe mvúmí nɨ ɗà?»

⁴⁸Á ŋgə́ tagi kùb kɔ̀ɔ̀ ŋgáb ɓe ɨ́r Yésù Krístùù. Kí á ŋgáb ta Píyéèr jə́bhó̧kwàyè ɓe vúm jíìb ti ŋgób yáá.