Read Vute Ə́rɨ́b nùb tómé yi ə́llé 13 Bible Online

Ə́rɨ́b nùb tómé yi ə́llé 13 - Vute bible

Ə́rɨ́b nùb tómé yi ə́llé 13

¹Mɨ̀kwìn nùb ə́mní Àŋtìyóòs no, nùb ɓéhèé Kìn Mèèín ɓe nùb tɔhɨ ə́mní yaá ku, nùb kɨ́ yɨɨ́m: Bàrnàbâs, Sìmèyôŋ (kùb yi ɓékom nò Sîn), Lùsíyùs (nò Sìréèn), Mànàyêŋ (nò yi hamwúɓáhe ɓe Hèrôdə̀ nò du gómnàà cúú), ɨ́ Sôl á.

²Ye kù ŋgáb yaá jìnɨ ɓɔ̧, ŋgáb á cè ɓáhîn mɨ̀yú̧ú̧, á Nyéhè Sarîn tana ŋgáb ɨnè: «Cahó̧kɨ́ná nɨ Bàrnàbâs ɓe Sôl gɨ́ní àm ŋgáb gɨ̀ yúùnɨ ə́rɨ́b mɨ ya ɓéwona ŋgábè.»

³Á ŋgáb ya ji ɓɔ̧, ŋgáb ɨ́ yôŋ Mèín, ɗà ŋgáb ɨ́ hèìwû Bàrnàbâs ɓe Sôl ŋgáár ŋgwéé tómnɨ ŋgáb gùr ə́ré. Ŋgáb ɨ́ mbɨ́kgì ŋgáb gìnɨ.

⁴Hȩ Nyéhè Sarîn tómnɨ Bàrnàbâs ɓe Sôl, á ŋgáb yi sé sɔ̀ Sèlə̀sî no lə́ndóŋnɨ tɨ́kwá̧ Cîpɨ̀rə̀ no.

⁵Ɓwâ ŋgáb yi féín Sàlàmíì, ŋgáb ɨ́ yà tànɨ kìn Mèèín dúhɨ́b mɨ̀yú̧ú̧ Jwîf ɓoò no. Jáŋ Máàrk yaá ɓe ŋgáb àm kpɔ́k ŋgábè.

⁶Ŋgáb ɨ́ pèɓà tɨ́kwá̧ rè kááŋ, há̧á̧ Pàfôs. Ɓè á ŋgáb yi kwa nɨ̀ŋgwá májɨ̀ɨ̀ kù ɨ́r yi du Bààryésù. Ŋgə́ yaám Jwîf á, ŋgə́ ɨ́ tà ní tɨ́kìn Mèèín á na.

⁷Ŋgə́ yɨɨ́m ɓwàjìrí Sèèrjíyùs Pólùs nò yi du gómnà tɨ́kwá̧ kíì á. Gómnà kɨ́ yaáɓà ɓe kɨ̀cáàb cei. Ŋgə́ ɨ́ tà kùb ɓéwònà ní Bàrnàbâs ɓe Sôl, ɓetí ŋgə́ yaá ɗúnɨ óknɨ kìn Mèèín.

⁸Ɨ́dù Èlìmâs (Ɓe nyindí gɨrêk, kí ta nò májɨ̀ɨ̀ na á) yi nɨ́ ɗúwa ŋgáb gòtɨ, ɓetí ŋgə́ yaá mánɨ ɓàndɨ̀kɨ́nɨ ə́ə́m Mèèín gómnàà sumí.

⁹Kí á Sôl kùb yi du ɓéɓwênɨ Pôl,[5] yúklîn ɓe nyòm Nyéhè Sarɨ́nne, yi kpáaŋndé nɨ̀ŋgwá rè íí no.

¹⁰Ŋgə́ ɨ́ tà: «Ɓwà ti mbááŋ kɨ̀ mbááŋ, ɓáŋnjɔ̧̀ kɨ̀ ɓáŋnjɔ̧̀ rè, mwin Sátàìn sam ɓà, nò du jìnɨ nɨ́m du nyɔ̧né! Wu tɨ̀ mbɨ́khace ɓáàŋkî ɓwáár Kékéé à?

¹¹Ɗàrò, ókye, Kéké ɓa wu lóŋnɨ yáb íhé á, íí a ɓòŋhó̧yè wu mvókín ti ŋgób, wu a dù wú mwa mvihɨri pə́cɨ̀r.» Ɓè mu̧u̧ íí ɨ́ sɨ́mnè Èlìmâs ndùúŋ, ŋgə́ nàkɨ̀ɨ̀m: ŋgə́ ɨ́ yà yáàtèènɨ ŋgáár péín ndè péín ndè, mánɨ nò ɓa ŋgə́ ɗààmgèniì.

¹²Hȩ gómnà yi pə́ nɨ́m yi ndɨŋ kíì, ŋgə́ ɨ́ ə́mnè àm Mèèín. Tɔ̀ɔ́ yi du ɓe ɨ́r Kékéé kɨ́ yi ɗiɓatɨ́ ŋgə́ sumí.

¹³Pôl ɓe nùb no gùrí ɨ́ éì Pàfôs gìnɨ Péèrjə̀ ti Pàmfìlíì no. Ɓè á Jáŋ Máàrk yi mbɨ́kkɨ́so ŋgáb, ŋgə́ ɨ́ gɨ̀cù nɨ́ Yèrúsàlèm.

¹⁴Ŋgáb ɨ́ éíndôŋ Péèrjə̀ ɓè, á ŋgáb gi féínnɨ Àŋtìyôs ti Pìsìdíì no. Ye Sàbáà, ŋgáb ɨ́ lə́sò dúú mɨ̀yú̧ú̧ no. Ŋgáb ɨ́ dùrê ɗàá.

¹⁵Ɓwâ kùb ya faincáŋhȩ káàtààb ɓíhɨ̀b Mòyíìs ɓe nɨ́ɨ́b tɨ́kɨ̀nɨ́b Mèèín ya tɨnndé, á mvènnɨ́b dúú mɨ̀yú̧ú̧ yi ta kùb tàndóŋsònà ŋgáb ɨnè: «Mwin yàáb, ɗàrò, óo nyí duú ɓe nɨ́m nyí nyinna nɨ̀vɨ́tɨ̀bì tààmnɨ ŋgáb njɔ̧̀ nokwe, á sàmàìn nyí nyinndé.»

¹⁶Á Pôl yi éíwú còóm, ŋgə́ ɨ́ mábsò nɨ̀vɨ́tɨ̀b ŋgáár ndɨ̀ŋnɨ ŋgáb dù néín, ŋgə́ ɨ́ tà: «Nùb Ísràyéèl ɓe nyí nùb du yóŋnɨ Mèèín, óknáam nɨ́m mɨ du tànɨ rè!

¹⁷Mèín gbàŋ Ísràyéèl du yóŋniì yi caá tákɨ̀rɨ́b nɨ́mè. Ŋgə́ ya víhií gbàŋ kɨ́ ɓwâ ŋgáb ya duye kùbè ti̧í̧ ti Èjíìbtə̀ noò, ɗà ŋgə́ ɨ́ ácùhô̧ ŋgáb ɓe nyòm noò.

¹⁸Ŋgə́ ɨ́ jíhè ŋgáb ŋgwàì ndɨ̀ŋnì sàmàìn dáín vii bɨrɨ́b.

¹⁹Ŋgə́ yi ndɨŋtɨ́ kùb ndùùkɨ́ gbàŋ tɨ́ɓaám ti Kànàâŋ no, kùb ɨ́ nàkî gbàŋ noò ɗɔ̀ɔ́b nùb kíì.

²⁰Ŋgáb ɨ́ dù no sàmàìn dáín təmərì nààsɨ̀b ɨ́ yɔ̀k vii bɨrɨ́b ɨ́ cóóŋ. «Cùr kɨ́ no, Mèín ɨ́ nà tákɨ̀rɨ́b nɨ́mè mvènnɨ́b, há̧á̧ ɨ́ gò féínnɨ ɓwâ yi Sàmíyèèl tɨ́kìn Mèèín.

²¹Á ŋgáb ya ɓwei mvèìn jíri, ɗà Mèín ɨ́ nà ŋgáb Sôl, mwin Kíìs yi fó̧ gbàŋ Bèìnjàmə̧́ə̧̀ noò. Ɗà Sôl kɨ́ ɨ́ gwîn mvèìn há̧á̧ dáín vii bɨrɨ́b.

²²Hȩ Mèín mvúcùnɨ Sóòl, ŋgə́ ɨ́ bɨ̀cùwúnà ŋgáb Dàvît mvènnì. Ŋgə́ ɨ́ nyìn ɓe ɨ́r ŋgéé ɨnè: ‹Mɨ kwatɨ́ Dàvît mwin Jèséè; njɔ̧̀ moò á ŋgə́ ya, ŋgə́ ɓa yúùnɨ nɨ́ɨ́b lâs mɨ du ɗúnɨ ŋgə́ ndɨ̀ŋte á.›

²³Yésù Mèín ya kɨ́k dù tɨ́céín gbàŋ Ísràyéèl hȩ Mèín nɨ̀mɨr ya ɓwállé rɨ duɓwée nyȩ Dàvíìt á.

²⁴Jâŋ ya ɓéekɨ́nayayeé gbàŋ Ísràyéèl. Ŋgə́ ɨ́ tà ŋgáb ɓàndɨ̀ sum ŋgáb a kɔ̀k kɔ ə́mní. Ɓwâ kɨ́ kùb ya bɨ́ Yésù fèìnɓàyèwá.

²⁵Mvókín Jâŋ yi du ə́r nóò no cáàŋniì, ŋgə́ yaá tànɨ ɨnè: ‹Nyí ma lə́əmce mɨ ma cè na? Nò nyí móŋ kɨ́ nɨ mɨ sé. Ɨ́dù óknáye, ŋgə́ á yè nɨ cùrì; mɨ ɓàcéyè ɗóhîn ɓe nò parɨkɨ́na ŋgə́ lí nó tə́bì ɗàà.›

²⁶«Mwin yàáb, nyí nùb du nyȩrɨ́b Ábɨ̀ràháàm ɓe nyí nùb goce hò̧ gwɨ̀ì mɨ̀yú̧ Mèèín, nùb Mèín tómwona kìn ɓə́r ní du nɨ̀vɨ́tɨ̀b ɓátɨ̀nɨ rè, nɨ́me nyí á.

²⁷Ɓetí nùb Yèrúsàlèèm ɓe mvènnɨ́b ŋgábè bɨ ɗə̀ə̀ŋwá na á du Yésù. Ŋgáb cè bɨ́ óknyààŋwá nɨ́ɨ́b tɨ́kɨ̀nɨ́b Mèèín yi tɨin kùb duce fàìnnɨ ye Sàbáà lâs lɨ, ɨ́dù ŋgáb ya yúutɨ́ bɨ́ nyindí kɨ́ ɓe kwíhèé ŋgáb ya kwíhe Yésùù.

²⁸Dugɨ hȩ ŋgáb ya du kwàwá nɨ́m ŋgáb ə́əŋwo yá àm kwíhe ŋgéé, ŋgáb ɨ́ tà Pìlât ndɨ̀ŋhá kùb kwíhɨ̀ ŋgə́.

²⁹Cùr ŋgáb yi ndɨŋ nɨ́ɨ́b yi du káàtààb Mèèín no tɨín ɓe ɨ́r Yésùù fó̧ hàráá, á ɓwàjììb noò yi ásó fín nóò bɨ̧̀ɨ̧́, gìnɨ kɨ́klénɨ sèrìn.

³⁰Ɨ́dù Mèín yi səəmcuhó̧tɨ́ ŋgə́ mvókín nɨ̀kwíbí.

³¹Yésù yi túumnaá nùb ya háawo ŋgə́, yàwònɨ Gàlìlê há̧á̧ Yèrúsàlèm ndɨ síí, jíìb ví̧i̧ ɓàì. Nùb kɨ́ ɨ́ ducɨ ɗàrò mɨ̀námé du nyìnnànɨ gbàŋ Ísràyéèl àm ŋgéé ru.

³²Kìn Nyɔ̧ɔ̧́ kɨ́ á nɨ́m nɨ̀miib nɨ́m gewona nyí ru; nɨ́m Mèín ya ɓwáína tákɨ̀rɨ́b nɨ́mè rɨ,

³³nɨ́m nùb du nyȩrɨ́b ŋgábè, Mèín yúunatɨ́ nɨ́m nɨ́m kɨ́ ɗàrò ɓe sə̀mmèé ŋgə́ səəmcuhó̧ Yésù cwéé, hȩ nɨ́m du tɨín káàtà wàìbì no gɔ̀ bɨrɨ́bí ɨnè: ‹Wu ɨ́ du mwin móò ru, yànɨ mwáín mɨ tá woò á› rɨ.

³⁴Mèín yi ta ní kwá səəmcuhó̧ ŋgə́ mvókín nɨ̀kwíbí, àm ŋgə́ tɨ̀ kúcuré. Kɨ́ kíí ŋgə́ ya taɓatɨ́ ɨnè: ‹Mɨ ɓa nyí nàmènɨ faám mɨ ya ɓwáína Dàvît lɨ á.›

³⁵Àm kɨ́ á tɨtɨnné káàtà wàìbì du tànɨ gbɨ́ktèìn kù no ɓe ɨ́r Mèèín ɨnè ru: ‹Wu tɨ̀ wu ə́ə̀mwá nò ə́ré jɨ̧ɨ̧́ woò kútɨ, ŋgə́ a ɓwèìn sèrìn.›

³⁶Kɨ́ Dàvíìt, ŋgə́ yi ndɨŋtɨ́ hȩ Mèín yi ɗúré ɗà ŋgə́ ɨ́ kû. Kùb ɨ́ vɨ́rè ŋgə́ gín tákɨ̀rɨ́b ŋgéé, ŋgə́ ɨ́ ɓwèìn,

³⁷Ɨ́dù nò Mèín ya səəmcuhó̧ nɨ́ cwéé ya nɨ́ ɓwèìnwá.

³⁸Mwin yàáb, á ɗúnɨ nyí ɗə̀ə̀ŋɓà ɨnayâna, ɓe ɨ́r Yésùù á nɨ́m du nyí tànànɨ àm tɨ́ɨ́r cumí ru; ɓe ɨ́r ŋgéé á nò ə́əmndé, Mèín du ŋgə́ céínhó̧nɨ cum ɓíì Mòyíìs yi du sàmàìn céínhó̧ nyí no ɗàwáá no ru.

³⁹

⁴⁰Nyí ma gə́tìi, àm nɨ́ɨ́b tɨ́kɨ̀nɨ́b Mèèín yi taré tɨ̀ féínna nyínè. Ŋgáb yi taá ɨnè:

⁴¹‹Óknáye, nyí nùb du nyìnɓáàŋkɨ́nɨ nɨ́m Mèín taré. Sɨrɨnáam, nyí a éíkî mɨ íhín, ɓetí ɓwâ nyí duye jáŋ ndè, mɨ ɓa ndɨ̀ŋnɨ kúúŋ nɨ́m kù du sàmàìn nyí ə́əmndé ɗàà ɓè kùb átɨna nyí átɨ́nne á!› »

⁴²Ɓwâ Pôl ɓe Bàrnàbâs yi fó̧ dúú mɨ̀yú̧ú̧, á kùb ta ŋgáb cùwò ye Sàbáà cùrìì, gònɨ nyìncùhánɨ àm mwi̧ kɨ́.

⁴³Cùr ɓáhɨ́r kíì, Jwîf bɨ ví̧i̧ ɓe nùb yi ɓandɨkɨ́ síí ɓóò Jwîf ɓe àm ə́mní ɨ́ háàsò Pôl ɓe Bàrnàbâs. Á Pôl ɓe Bàrnàbâs ya du ŋgáb nyìnnànɨ, ŋgáb ɨ́ tà nùb kɨ́ sə̀ŋhácɨ̀ gíí ɓe nyàŋnjɔ̧̀ Mèín túumna ŋgábè.

⁴⁴Hȩ Sàbáà cùrìì ya ɗóoré, á nɨ̀vɨ́tɨ̀b ví̧i̧ kwɨ́í kɨ́ noò ya ɓáawo gònɨ óknɨ Kìn Kékéé.

⁴⁵Ɓwâ Jwîf bɨ yi pə́ kùŋkùŋ kàm nɨ̀vɨ́tɨ̀bì rè, njɔ̧̀ ɨ́ ɓáàŋɓà ŋgáb. Ŋgáb ɨ́ yà pììɓáàŋnɨ nyindí Póòl, ŋgáb a andɨce ŋgə́.

⁴⁶Kí á Pôl ɓe Bàrnàbâs ya tanagi ŋgáb ɨnè wááŋ: «Yi ɗú nyindí Mèèín gònàyàyè nyí á, ɨ́dù hȩ nyí mvú nɨ́ ə́ə̀mnɨ nyindí kɨ́, nyí ɨ́ tàcè nɨ́ vúm bɨ ɗóhîn ɓe mè mɨ̀cɨ̧̀ ɗàwá rèé, àà nɨ́m ɓacɨ nɨ gìnɨ ɗàrò yɨ́ nùb du bɨ́ Jwîf séé á.

⁴⁷Ɓetí nɨ́m Kéké tana nɨ́mè á rè: ‹Mɨ kɨ́ɨ́ wu, wu dù hȩ mwa ɓe ɨ́r gbààŋ lâs, àm nùb ɗɔ̀bɨ́nné lâs a kwà ɓə́r ɓe ɨ́r woò.› »

⁴⁸Ɓwâ nùb yi du Jwîf séé yi ók nyindí kíì, ŋgáb ɨ́ ô mɨ̀tù. Ŋgáb ɨ́ tà nyindí Kékéé á jíri. Nùb lâs Mèín yi ca ɓe ɨ́r mè mɨ̀cɨ̧̀ɨ̧́ ɨ́ sèì nùb ə́mní.

⁴⁹Nɨ̀vɨ́tɨ̀b ɨ́ yà óksénɨ Kìn Nyɔ̧ɔ̧́ tíí tíí ɗɔ̀ɔ́b kɨ́ no.

⁵⁰Ɨ́dù Jwîf bɨ ɨ́ wútè nɨ̀gub njɔdìì yi yóŋlɨ́ŋkom Mèèín, dùgɨ̀ nùb ɨ́r sóò yi du kwɨ́í kɨ́ noò; ŋgáb ɨ́ ndɨ̀ŋ kùb jábɨ̀ Pôl ɓe Bàrnàbâs, ɗà kùb ɨ́ jùkî ŋgáb ɗɔ̀ɔ́b kɨ́ no.

⁵¹Kí á Pôl ɓe Bàrnàbâs lámkɨ́sona ŋgáb mvútúúb ŋgábè gureè,[6] ɗà ŋgáb ɨ́ gì bɨ́ Ìkòníyòm.

⁵²Nùb ə́mní Àŋtìyóòs yaá yúklîn ɓe Nyéhè Sarîn, ɓe mɨ̀tù ɓwê.