Read Vute Ə́rɨ́b nùb tómé yi ə́llé 14 Bible Online

Ə́rɨ́b nùb tómé yi ə́llé 14 - Vute bible

Ə́rɨ́b nùb tómé yi ə́llé 14

¹Féín Ìkòníyòm, Pôl ɓe Bàrnàbâs ɨ́ lə́ɓwéhè dúú mɨ̀yú̧ú̧ Jwîf ɓoò no. Ɓe àm Mèèín ŋgáb ya tanyaŋhȩ yó kwe á Jwîf bɨ ví̧i̧, dùgɨ̀ nùb yi du Jwîf séé ya ə́mne Yésù.

²Ɨ́dù Jwîf bɨ yi mvú ə́ə̀mnɨ Yésùù yi wútií nùb yi du Jwîf séé, njóònɨ ŋgáb; ŋgáb lə́mɨ̀ ɓáŋhîn ɓe ɨ́r mwin yàá bɨ ə́mní.

³Ɨ́dù, dugɨ u̧, Pôl ɓe Bàrnàbâs ɨ́ jə́bhâ bɨ́ Ìkòníyòm nȩ̀ȩ́. Ɓe ɨ́r gíí ŋgáb ya du sə̀ŋnɨ ɓe Kékéé, vùù ya nɨ́ ŋgáb bìnɨ ɓe nɨ́m ŋgáb yi nyinkomndé ɗàà. Yésù nò du Kékéé yaá cè ŋgáb nànɨ nyòm ŋgáb ndɨŋ lìím bɨ ɓe nɨ́ɨ́b sɨ̀sɨ̀rí àm túmnɨ ɨnayâna, kìn ŋgáb du tànɨ ɓe ɨ́r ndɨ̀ŋnyàáŋ níì kɨ́ nɨ àmɨɨr á.

⁴Gɔ̀ ɨ́ lê mvókín nùb kwéè no, nùb kù ɨ́ ə́ə̀mnà Jwîf bɨ, nùb kù ɨ́ ə́ə̀mnàcè nùb tómé.

⁵Jwîf bɨ ɓe nùb yi du Jwîf séé, ɨ́ mvènnɨ́b ɓoò yaá nyààŋkɨ́nɨ àm vúm jɨm Pôl ɓe Bàrnàbâs, vúm a lóòŋkwíìkî ŋgáb ɓe sɨkli.

⁶Hȩ Pôl ɓe Bàrnàbâs ya cɨ́ bɨ́ àm kíì, á ŋgáb lundóŋ Lîstɨ̀rə̀ ɓe Dêrbə̀ ɨ́ kwíì cutɨ́b du gín kwɨ́ì jííb kíì, ɗɔ̀ɔ́b Lìkàwònî ku.

⁷Féín kwɨ́ì kɨ́ no, ŋgáb ɨ́ yàrê tànɨ Kìn Nyɔ̧ɔ̧́.

⁸Lîstɨ̀rə̀ ku, nɨ̀ŋgwá kù yaá ndɨ̀ktèèlɨ́ŋnɨ ɗàá àm gurub noò ya du nɨ́ kúrií. Nɨ̀ŋgwá kɨ́ ya nɨ́ gùr gɨ̀kɨ́yèwá; ŋgə́ yaám kɨ̀ɓók fɨnni á.

⁹Ye kù ŋgə́ yaá óònɨ nɨ́m Pôl yi du nyìnniì. Pôl ɨ́ kpáàŋndê ŋgə́ íí no, ŋgə́ ɨ́ pê gíí ní ɓa ŋgə́ ɓátɨ̀niì nɨ̀ŋgwá kɨ́ yi du ɓe kíí.

¹⁰Á ŋgə́ tana ŋgə́ kúu còóm: «Éíwúum còóm, ə́əŋɓam gurub woò ya!» Nɨ̀ŋgwá rè ɨ́ éíwû còóm gɨ́ɨ̀r, ŋgə́ ɨ́ yàrê gùr.

¹¹Ɓwâ nɨ̀vɨ́tɨ̀b yi pə́ nɨ́m Pôl yi ndɨŋ kíì, á ŋgáb gbəm ɓe nyindí ti̧né ɨnè: «Kɨ́ rè mèín bɨ ɨ́ settɨ bɨ́ síí ɓóò nɨ̀vɨ́tɨ̀b, gàìnsówònɨ nɨ́m ndu!»

¹²Ŋgáb ya pə́ bɨ́ Bàrnàbâs hȩ «Jə̂s» á, Pôl cè «Hèrmês»,[7] ɓetí Pôl yɨɨ́m tɨ́kìn á.

¹³Dúú kùb yóŋ mèín ŋgábè Jə̂s kɨ́ no kwe yaá ŋgwé kúrì, á nò na satɨgàà dúú kɨ́ noò yi geewo ndèìn bɨ ɓe fɨ́láwààb só túrɨ́b túrɨ́b ɓavɨ̀rì ku, ŋgə́ ɓe nɨ̀vɨ́tɨ̀b yaá kúu mwi̧ àm na Bàrnàbâs ɓe Pôl satɨgàà.

¹⁴Hȩ nùb tómé bɨrɨ́b lè ya cɨ́ bɨ́ àm kíì, á ŋgáb aamkɨ́ júúb ŋgábè sóò túùmnɨ vúm á njù̧ú̧. Ŋgáb ɨ́ éíwììrésò kùŋkùŋ nɨ̀vɨ́tɨ̀bì rè no ŋgáb a wáamsoce ɨnè:

¹⁵«Ínaná yáà, nyí ndɨŋce nɨ́ u̧ ɓe ní? Nɨ́m duɓwée nɨ nɨ̀vɨ́tɨ̀b hȩ nyí á. Nɨ́m gewona nyí Kìn Nyɔ̧ɔ̧́ á. Kìn kɨ́ ta nyí mbɨ́k mèín saai nyaŋhɨ́b ɗàrɨ́, nyí a ɓàndɨ̀cùrê Mèín nò du jááŋ yi nyaŋhȩ ɓɨɨr, ɗɔ̀ɔ́b, mɨ̀kwehɨ̀r ɓe nɨ́ɨ́b lâs lɨ no á.

¹⁶Ɓwâ yi tíí ŋgə́ yi mbɨ́ɨ́ gbàŋ bɨ lâs ndɨ̀ŋɓà nɨ́ɨ́b ŋgáb ɗúré.

¹⁷U̧ rɨ, ŋgə́ yaá cè túùmhánɨ ní á ku ɓe nyɔ̧ɔ̧́ ŋgə́ ya ndɨŋkomndé: ŋgə́ á nyí tómsówònànɨ nà̧á̧, ŋgə́ a nàkwà nyí nàám ɓè ɓwâ kɨ́ ɗóoré. Ŋgə́ á nyí nànɨ cɔŋ, ŋgə́ a yúhè njɔ̧̀ nyínè ɓe mɨ̀tù.»

¹⁸Dugɨ ɓe wɨ́wáámé kɨ́, nùb tómé ya nomɓacɨ bɨ noóm á ŋgáb ɨ́ hàrè ŋgáb satɨgà kɨ́ ru.

¹⁹Jwîf bɨ yi goó Àŋtìyôs ɓe Ìkòníyòm, ŋgáb ɨ́ gò sóòŋɓáàŋkɨ́nɨ nɨ̀vɨ́tɨ̀b. Ŋgáb ɨ́ lóŋhȩ̀ Pôl ɓe sɨɨ àm kwíhe ŋgéé, ɗà ŋgáb ɨ́ ŋgùùlèèhó̧sò ŋgə́ kúr gə́nȩ̀ȩ́, ɓetí ŋgáb yi lə́mne ŋgə́ kúcií nɨ́.

²⁰Ɨ́dù ɓwâ nùb ə́mní ya ɓáakɨre ŋgéé, ŋgə́ ɨ́ éícùwû còóm ɗà ŋgə́ ɨ́ lə́cù kwé tə̧ə̧́. Ye saín ŋgə́ ɓe Bàrnàbâs ɨ́ gì bɨ́ Dêrbə̀.

²¹Pôl ɓe Bàrnàbâs ɨ́ ɓéhè Kìn Nyɔ̧ɔ̧́ Dêrbə̀. Ɓè á ŋgáb yi ndɨŋ nɨ̀vɨ́tɨ̀b ví̧i̧ ə́ə̀m Kéké. Cùr kɨ́ no, ŋgáb ɨ́ gɨ̀cù Lîstɨ̀rə̀, ŋgáb ɨ́ wúíndôŋ Ìkòníyòm gɨ̀cùnɨ Àŋtìyôs du Pìsìdî rɨ no.

²²Ŋgáb yaá tààmnànɨ nùb ə́mní njɔ̧̀, nànɨ ŋgáb nyòme ŋgáb ə́ə̀ŋɓà kpéín ɓe jɨ̧ Kékéé, ŋgáb a tace ɨnè: «Á ɗúnɨ nɨ́m pə́náɓà jábɨ́r cei ɗà nɨ́m a lə́nágì Mèèín hamnin.»

²³Mɨ̀kwìn nùb ə́mní lâs no, ŋgáb ɨ́ càtèèhô̧ kɨ̀jííb no. Cùr ŋgáb ya ji ɓɔ̧, ŋgáb ɨ́ yôŋ Mèèín á ŋgáb ya naré nùb kɨ́ Kékéé ŋgáré. Kéké nùb kɨ́ yi ə́mne kɨ́.

²⁴Cùr kɨ́ no, ŋgáb ɨ́ ààŋndôŋ ɗɔ̀ɔ́b Pìsìdíì há̧á̧ ŋgáb ɨ́ gì féínnɨ Pàmfìlî.

²⁵Ŋgáb ɨ́ tà Kìn Mèèín Péèrjə̀, ɗà ŋgáb ɨ́ gɨ̀ndôŋ Àtàlî.

²⁶Ə́rè ɓèé, ŋgáb ɨ́ lê kwáìn gìnɨ Àŋtìyôs, kwɨ́í kùb ya naré ŋgáb Mèèín ŋgáré àm ŋgə́ a túùmnà ŋgáb nyàŋnjɔ̧̀ noò ɓe ɨ́r ə́rɨ́b ŋgáb ya yúucáŋhȩ rèè no.

²⁷Ɓwâ ŋgáb yi féín Àŋtìyôs, ŋgáb ɨ́ ɓáhè mɨ̀kwìn nùb ə́mní átɨ̀nànɨ ŋgáb nɨ́ɨ́b lâs Mèín ya ndɨŋ ŋgáb yúùte: hȩ ŋgə́ ya kuumnaɓwéhe nùb yi du Jwîf séé jɨ̀r ŋgáb fɨ́tɨ ə́ə̀mɓwênɨ Kékéé.

²⁸Ŋgáb ɓe nùb ə́mní ɨ́ jə́bɓà bɨ́ ɓè jíìb ti nó.