Read Vute Ə́rɨ́b nùb tómé yi ə́llé 18 Bible Online

Ə́rɨ́b nùb tómé yi ə́llé 18 - Vute bible

Ə́rɨ́b nùb tómé yi ə́llé 18

¹Cùr kɨ́ no, Pôl ɨ́ éì Àtên gìnɨ Kòréèntə̀.

²Kòréèntə̀ ku, ŋgə́ ɨ́ kwà nɨ̀ŋgwá Jwîf kù ɨ́r yi du Àkìlâs; kùb yi fein ŋgə́ ɗɔ̀ɔ́b Pôŋ no á. Ŋgə́ ɓe gwi noò Pɨ̀rìsîl féínsòkɨ́gɨ̀cèénɨ éíwòó Ìtàlî, yá kùb ya juwo ŋgábè á. Ɓetí Kùlôdə̀ yi ta Jwîf bɨ lâs éíkɨ́ níì kwé yáá. Pôl ɨ́ gàìnsò ŋgáb.

³Hȩ ŋgə́ yi ɗəəŋɓwéhe ə́r nyààŋtèé njáŋnè ɓe júú hȩ ŋgábè, ŋgə́ ɨ́ gì dùnɨ ŋgábè yó, ŋgáb a éíɓáace yá mwi̧.

⁴Dúú mɨ̀yú̧ú̧ no, ye Sàbáà lâs, Pôl yaá gàmlɨ́ŋnɨ nyindí mánɨ ndɨ̀ŋnɨ Jwîf bɨ ɓe Gɨrêk bɨ ə́ə̀mhá nɨ́m ní du tàniì.

⁵Ɓwâ Sílàs ɓe Tìmòtê yi féínsoré, éíwòó ŋgábè Màsèduwáàn, Pôl ɨ́ ábɨ̂ŋcɨ̀ nɨ́ ɓéhèé Kìn Mèèín, ŋgə́ a tananyaaŋce Jwîf bɨ wáànànɨ ŋgáb ɨnayâna, Yésù dumeɓa Mèsî á.

⁶Ɨ́dù ŋgáb ya bɨ́ ə́ə̀mnɨ àm kɨ́ ɗàà; ŋgáb ɨ́ yà bɨ́ ŋgə́ àndɨ̀nɨ. Kí á ŋgə́ lámkɨ́sona ŋgáb mvútúúb no júú, ŋgə́ ɨ́ tànà ŋgáb ɨnè: «Óo nyíne Mèín bɨ ɨ́ gɔ̀ɔ̀ɓà bɨ́, nyí ɨ́ máɓacɨ nɨ́ kí ru. Kí nɨ mɨ góòmcɨ̀wá. Yànɨ ɗàrò, mɨ tɨ̀ gɨcɨ mɨ yɨ́ nùb du bɨ́ Jwîf séé.»

⁷Kí á ŋgə́ éíkɨ́ ɓè, ŋgə́ ɨ́ gì yɨ́ nɨ̀ŋgwá kù ɨ́r yi du Tìtíyús Yùstûs; dúú nóò yaá gín dúú mɨ̀yú̧ú̧. Ŋgə́ yaá jə̀ŋlɨ́ŋnɨ Mèín.

⁸Kríspùs nò yi du mvèìn dúú mɨ̀yú̧ú̧ ɓe nùb no yóò lâs ɨ́ ə́mnè Kéké. Nùb Kòréèntə̀ ví̧i̧ yi ókkom Pôl nyìnniì ɨ́ ə́mnè Kéké, ŋgáb ɨ́ gàm kɔ ə́mní.

⁹Sɨ́mnɨ̀r kù no, Pôl ɨ́ pê Kéké gònɨ ŋgə́ tànànɨ ɨnè hȩ nɨ́m ndɨŋ wumné rɨ u̧: «Wu wu vùù lùr, nyinhá wu nyiín, wu wu néín dùr.

¹⁰Mɨ á wu gə́tɨ̀nɨ. Nò kù tɨ̀ nɨ wu dì̧nɨ̀r àm ndɨŋ wu ɓáŋhɨ́nne, ɓetí kwɨ́í lè no, nùb ók ɓe mé á bɨ ví̧i̧.»

¹¹Pôl ɨ́ jə̂b Kòréèntə̀ ku há̧á̧ dáín mwi̧ ɨ́ gbɨ́ktèìn ŋgə́ a tanace nɨ̀vɨ́tɨ̀b Kìn Mèèín.

¹²Ɓwâ ya kɨ́, nɨ̀ŋgwá Róòm kù ɨ́r yi du Gàlìyôŋ yi ɨ́ du gómnà ɗɔ̀ɔ́b Àkàyíì ru, á Jwîf bɨ yi ɓáhe ɓɔ̧ ɗà ŋgáb ɨ́ bɨ̀gè Pôl yɨ́ ŋgù̧ní.

¹³Ŋgáb ɨ́ gì ku tànɨ ɨnè: «Nɨ̀ŋgwá rè á njóòrénɨ nɨ̀vɨ́tɨ̀b jɨ̧ Mèèín no, jɨ̧ kɨ́ ɨ́ dù nɨ́ hàrák ɓe nɨ́m ɓíì du tàniì ɗàà.»

¹⁴Pôl ɗúnɨ wèìnɨ ɓɔ̧, á Gàlìyôŋ gam nyindí tànànɨ Jwîf bɨ ɨnè: «Tɨ dùyè àm kwíhèé ŋgwéé, kɨ́ kù àm ɓáŋhîn kàm kù, mɨ yè mbɨ́ktɨ́ nyí Jwîf bɨ ɗàrɨ́ nyí nyìntɨ.

¹⁵Ɨ́dù hȩ nyí du nɨ́ ndáŋnɨ sɨ̀ɨ̀ŋ nyindíí ya, ɓe ɓíì nyí nɨ̀mibi ya, dùgɨ̀ ɨ́r bɨ rèé; ɗə̀ə̀ŋnáɓà nɨ hȩ nyí ɓa nɨ́ ndɨ̀ŋniì. Mɨ mɨ ɗúwa dùnɨ tɨ́ŋgù̧ú̧ kúúŋ àám kíì no!»

¹⁶Ŋgə́ ɨ́ tà ŋgáb éíkɨ́ bɨ ní ya.

¹⁷Kí á ŋgáb ya bɨ Sòstên, nò yi du mvèìn dúú mɨ̀yú̧ú̧, ŋgáb ɨ́ yàrê ŋgə́ jɨ̀mnɨ yɨ́ ŋgù̧ní ɓè. Ɨ́dù Gàlìyôŋ yi nɨ́ jɨ̀ɨ̀m kɨ́ ɓɔ̧ɔ̧ áréwa.

¹⁸Pôl ɨ́ dùɓà nɨ́ Kòréèntə̀ ku jíìb no, ɗà ŋgə́ ɨ́ mbɨ́kkɨ́sò mwin yàáb ə́mní, ŋgə́ ɨ́ ə́llê, ŋgə́ ɓe Pɨ̀rìsîl ɓe Àkìlâs gìnɨ Sìrî. Ŋgáb féín sɔ̀ Sàŋkɨ̀réè no yɨ́ ŋgáb yi ɓa lénɨ kwáìn gìnɨ kɨ́, Pôl ɨ́ njèìnkɨ́gì ŋgwé túùmnɨ ɨnayâna ní cáaŋtɨ́ ɓwáár ní ya ɓwáína Mèèín.

¹⁹Ŋgáb ɨ́ féìn Èfês, yɨ́ ŋgə́ ɓe Pɨ̀rìsîl ɓe Àkìlâs yi gɔɔré, ŋgə́ ɨ́ gì dúú mɨ̀yú̧ú̧ no ndáŋnɨ ɓe Jwîf bɨ.

²⁰Ŋgáb ɨ́ tà ŋgə́ jə́b ɓe vúm nȩ̀ȩ́ yáá, ɨ́dù ŋgə́ ɨ́ mvû nɨ́.

²¹Ŋgə́ ɨ́ mbɨ́kkɨ́sò nɨ́ ŋgáb ŋgə́ a tace: «Mɨ ɓa cùwòhánɨ yɨ́ nyínè á, ɓè Mèín ə́əmndé.» Ŋgə́ ɨ́ lê nɨ́ kwáìn gìnɨ Sèsàrê.

²²Ɓwâ ŋgə́ féín Sèsàréè, ŋgə́ ɨ́ gì Yèrúsàlèm nyìndɨ̀nɨ mɨ̀kwìn nùb ə́mní ku, ɗà ŋgə́ ɨ́ gɨ̀ndôŋ Àŋtìyôs du ɗɔ̀ɔ́b Sìríì rɨ no.

²³Ŋgə́ ɨ́ jə́bhô̧ Àŋtìyôs ɓè ŋgób, ŋgə́ ɨ́ éícùrê. Ŋgə́ ɨ́ ɔ̀kndôŋ ɗɔ̀ɔ́b Gàlàtî ɓe Fɨ̀rìjíì ŋgə́ a taamgece njɔ̧̀ nùb ə́mní.

²⁴Nɨ̀ŋgwá Jwîf kù ɨ́ féínsò Èfês ku. Ɨ́r noò yaá Àpòlôs, kùb yi fein ŋgə́ Àlèksàndɨ́rî á. Nɨ̀ŋgwá kɨ́ yaá wáàɓànɨ nyindí mîn, ŋgə́ yi ɗəəŋceé njàb Kìn Mèèín du tɨín káàtà Mèèín noò.

²⁵Ŋgə́ ya ɗəəŋɓatɨ́ àm Kékéé mîn. Ŋgə́ ɨ́ yà tànɨ Kìn Mèèín, ŋgə́ a tɔɔce nyindí du ɓe ɨ́r Yésùù hàrák ɓà ɓe mɨ̀tù sumí. Ɨ́dù kɔ ə́mní ŋgə́ ya kɔkɗóoré á kɨ́ Jáàŋ.

²⁶Dúú mɨ̀yú̧ú̧ no, ŋgə́ ɨ́ yàrê nyìnɓànɨ ŋgə́ vùù ókwa. Ɓwâ Pɨ̀rìsîl ɓe Àkìlâs yi ók ŋgə́ nyìnniì, ŋgáb ɨ́ gè ŋgə́ ɓo yó tànànyààŋnɨ ŋgə́ njàb jɨ̀r Mèèín mîn.

²⁷Cùr kɨ́ no, Àpòlôs ɨ́ ɗû gìnɨ ɗɔ̀ɔ́b Àkàyíì no. Mwin yàáb ə́mní ɨ́ ə́ə̀mnàɓà ŋgə́ àm kɨ́, á ŋgáb tɨinsona nùb ə́mní ɗɔ̀ɔ́b kɨ́ noò tàsònànɨ ŋgáb, ŋgáb gàmɓà ŋgə́ mîn. Ɓwâ ŋgə́ yi féín kwe, ŋgə́ ɨ́ kpɔ́kɓà nùb ya ə́mne Yésù àm Mèín yi du ɓe ŋgáb ceí.

²⁸Ɓetí ɓe sɨ̀ɨ̀ŋ nyindíí bɨ ví̧i̧, ŋgə́ yaá nyìnnàɓànɨ Jwîf bɨ laŋtɨ̧ɨ̧́, tànànɨ ŋgáb ɨnayâna ŋgáb á ɓe kum: ɓe nɨ́ɨ́b du tɨín káàtà Mèèín noò á ŋgə́ yi du túùmnànɨ Jwîf bɨ ɨnayâna Yésù dumeɓa Mèsî á ru.