Read Vute Ə́rɨ́b nùb tómé yi ə́llé 21 Bible Online

Ə́rɨ́b nùb tómé yi ə́llé 21 - Vute bible

Ə́rɨ́b nùb tómé yi ə́llé 21

¹Ɓwâ nɨ́me kɨ̀jííb nùb ə́mní ya gɔɔré, nɨ́m ɨ́ lê kwáìn ɗà nɨ́m ɨ́ gɨ̀ɓà nɨ́ gi̧í̧ há̧á̧ Kôs; ye saín nɨ́m ɨ́ féìn Rôdə̀. Éíndôŋ ɓèé, nɨ́m ɨ́ gì féínnɨ Pàtàrâ.

²Nɨ́m kwàɗóòrê kór du gìnɨ Fènìsíì ɓè, nɨ́m ɨ́ lə́ndôŋ no, nɨ́m ɨ́ gì nɨ́.

³Nɨ́m féín gín Cîpɨ̀rə̀, nɨ́m ɨ́ pèìnndôŋ ŋgə́ péín ŋgáár pène. Nɨ́m ɨ́ gì nɨ́ péín Sìríì, á nɨ́m féín Tíìr; ɓè á haain yi du kwánnè yi du mènɨ.

⁴Nɨ́m yi kwatɨ́ nùb ə́mní kwé ku, nɨ́me ŋgáb ɨ́ jə̂b jíì tɨ́ɓaám. Ɓe nyòm Nyéhè Sarɨ́nne, ŋgáb ɨ́ sóŋhȩ̀ Pôl ŋgə́ nɨ Yèrúsàlèm gɨ̀r.

⁵Ɨ́dù hȩ jíì gùrí nɨ́mè yi ɗóoré, nɨ́m ɨ́ éícùrê gùrí. Ŋgáb ɓe gub ɓoò ɓe munɨ́b ɓoò ɨ́ háàsòɓà nɨ́m há̧á̧ gín mvúmí. Nɨ́m ɨ́ cáàmsê saséé gín mvúmí ɓè, Mèín yóŋnɨ.

⁶Ɓwâ nɨ́me ŋgáb ya nyindɨcáaŋndé, nɨ́m ɨ́ lê nɨ́ kwáìn, ŋgáb ɨ́ gɨ̀cùcê ŋgábè yúkbìn.

⁷Ə́rè nɨ́m yi éí Tíìr gìnɨ Tòlèmàyîs á gùr nɨ́mè kwánnè yi cɔ̧́. Tòlèmàyîs ɓè á nɨ́me mwin yàáb ə́mní yi nyindi ɗà nɨ́me ŋgáb ɨ́ jə̂b kpíí.

⁸Ye saín nɨ́m ɨ́ éíndôŋ, á nɨ́m gi féínnɨ Sèsàrê. Nɨ́m ɨ́ lê Fɨ́lɨ̂b[15] nò ta Kìn Mèèín yó, ŋgə́ ɨ́ ɗòb nɨ́m. Fɨ́lɨ̂b kɨ́ yaám nɨ̀mwi̧ mvókín nɨ̀ŋgwáàb tɨ́ɓaám kùb ya ca Yèrúsàlèm ndɨ no á.

⁹Ŋgə́ yaá ɓe munɨ́b nɨ̀gub nààsɨ̀b yi du tàndóŋnànɨ nɨ̀vɨ́tɨ̀b Kìn Mèín tómworé, ŋgáb yi bɨ́ ŋgwáá ŋgáré ɗàyèwá.

¹⁰Nɨ́m yaácɨ̀ ɓè jíìb ti nó, á tɨ́kìn Mèèín kù ɨ́r yi du Àgàbûs yi féínwo, éíwòó Jùdê.

¹¹Ŋgə́ ɨ́ gàìnwò nɨ́m, ŋgə́ ɨ́ áhô̧ lí ŋgù̧né Póòl, ŋgə́ ɨ́ kwéícùɓà gurub ɓe ŋgárɨ̀b ŋgə́ nɨ̀mɨrí no. Á ŋgə́ ta: «Nyéhè Sarîn wáaɓatɨ́ ɨnè: Nɨ̀mɨr lí ŋgù̧né rèè Jwîf bɨ ɓa ŋgə́ kwéíɓwênɨ Yèrúsàlèm u̧ á, ŋgáb a gɔ̀ksòkɨ́nà ŋgə́ nùb du Jwîf séé.»

¹²Hȩ nɨ́m óknɨ u̧nèé, nɨ́me nùb Sèsàréè ɨ́ yôŋ Pôl ŋgə́ nɨ Yèrúsàlèm gɨ̀r.

¹³Ɨ́dù Pôl ɨ́ tàcù ɨnè: «Àm níì á nyí du kɨ́ínɨ mánɨ nànɨ mɨ yəré? Kɨ́ moò, mɨ á mɨ kə́sə́k ə́ə̀mnɨ nɨ́ɨ́b lâs. Tàgɨ̀ kùb kwéí mɨ kwéin, tàgɨ̀ mɨ kú Yèrúsàlèm ku ɓe ɨ́r Yésùù nò du Kéké nɨ́mè.»

¹⁴Hȩ ŋgə́ yi mvú nɨ́ óknɨ nyindí nɨ́mè ɓɔ̧ne, nɨ́m ɨ́ mbɨ́kcì nɨ́ yô̧ ŋgéé, á nɨ́m ta: «Nɨ́ɨ́b lâs ndɨ̀ŋhácɨ̀ hȩ Kéké ɗúré!»

¹⁵Nɨ́m ɨ́ jə̂b ɓè jíìb ti kù, á nɨ́m nyaŋhȩ gùr gìnɨ Yèrúsàlèm.

¹⁶Nùb ə́mní Sèsàréè ɨ́ háàsò nɨ́m; féín ku ŋgáb ɨ́ gè nɨ́m yɨ́ nɨ̀ŋgwá yi ɓa nɨ́m ɗòbniì. Ŋgə́ yɨɨ́m nò Cîpɨ̀rə̀ á, ɨ́r noò yaá Nàsôŋ, ŋgə́ ya yaɓa nɨ ə́ə́m kúríí á.

¹⁷Ɓwâ nɨ́m féín Yèrúsàlèèm, mwin yàáb ə́mní ɨ́ gàmɓà nɨ́m ɓe mɨ̀tù.

¹⁸Ye saín, nɨ́me Pôl bɨ ɨ́ gì Jáàk yó, yɨ́ kɨ̀jííb ɓe mɨ̀kwìn nùb ə́mní lâs yi ɓáaré.

¹⁹Cùr nɨ́me ŋgáb ya nyindɨré, á Pôl átɨna ŋgáb láár hȩ Mèín ya ndɨŋ ŋgə́ yúù ə́rɨ́b ŋgə́ ya éíkom mvókín nùb du Jwîf séé noò.

²⁰Hȩ ŋgáb ónɨ sà̧à̧ kíì. Ŋgáb ɨ́ mgbíhè Mèín, á nɨ̀vɨ́tè mwi̧ tana Pôl ɨnè: «Mwin yàá ə́mní, péye vùùm Jwîf bɨ sei nùb ə́mní rè; ŋgáb á cè bɨ́ jə̀ŋɓànɨ ɓíì Mòyíìs cei.

²¹Kùb tɨ wáanaá ŋgáb ɨnayâna, wu ta Jwîf lâs du dùtèènɨ mvókín nùb du Jwîf séé noò, ŋgáb mbɨ́k ɓíì Mòyíìs. Wu ɨ́ tàkwà ŋgáb bɨ munɨ́b ɓoò ndɨ̀ lə́nàr; ŋgáb a dùcè bɨ́ ɗɨ́m Jwîf ɓoò tùr.

²²Nɨ́m a tɨ̀ ndɨŋ ɗàrò ɨna? Ɓetí ndɨŋgi i̧, ŋgáb ɓa ɗə̀ə̀ŋnɨ ɓè wu féínndé á.

²³Àà, ndɨŋhácɨ wu nɨ́m nɨ́m ɓa nɨ́ wu tànàniì. Nɨ́m á ɓe nɨ̀vɨ́tɨ̀b hò̧ nààsɨ̀b yi ɓwáína Mèèín ɓwállí.

²⁴Geem ŋgáb, nyíne ŋgáb a ndɨ̀ŋ ə́rɨ́b sàtèé síhé[16] Mèèín tíí kɨ́ cúk, wu a njáblè mwèìn ə́rɨ́b kíì àm ŋgáb a njèìn ŋgwéé. U̧ á nùb lâs ɓa ɗə̀ə̀ŋnɨ ɨnayâna, nɨ́ɨ́b kùb tɨ nyin wó sóò lâs nɨ kààŋ á, wu á ɓàhá wu jə̀ŋnɨ ɓíì Mòyíìs.

²⁵Kɨ́ nùb duce Jwîf séé yi sei nùb ə́mní, nɨ́m tɨ tɨnnaá ŋgáb káàtà, tàsònànɨ ŋgáb nɨ́m nɨ́m tɨ taré. Nɨ́m tɨ taá ŋgáb bɨ fè kùb mób mèín saai ɓe kíí tàŋ, dùgɨ̀ tɨ́m, dùgɨ̀ nyàm kùb du téin téínwaá. Nɨ́m ɨ́ tàkwà ŋgáb tɨ̀ ɓei bɨ́ ɓíì du ɓe ɨ́r ŋguŋnì.»

²⁶Kí á Pôl yi ge nɨ̀ŋgwáàb nààsɨ̀b lè. Gwín kpíí, ŋgə́ ɓe ŋgáb ɨ́ ndɨ̀ŋhácè ə́rɨ́b sàtèé síhé Mèèín tíí. Ŋgə́ ɨ́ gɨ̀gì Dúú Jíri Mèèín no tànɨ ye ə́rɨ́b sàtèé síhé kɨ́ ɓa cɔ̧́niì, kí ta ye kùb ɓa nànɨ satɨgà ŋgáb lâs tùré tùré na á.

²⁷Jíìb Pôl ya ɓwáí kɨ́ ɓànɨ cɔ̧́nɨ, á Jwîf bɨ Àsíì pə́ ŋgə́ Dúú Jíri Mèèín no. Ŋgáb ɨ́ bì ŋgə́, ŋgáb ɨ́ yà kɨ́ɨ̀ŋnɨ ɨnè àm wúte mɨ̀kwìn nɨ̀vɨ́tɨ̀bì: «Nùb Ísràyéèl, ɓáawonáam yoo! Nɨ̀ŋgwá du sóòŋɓáàŋkɨ́nɨ nɨ̀vɨ́tɨ̀b yɨ́ lâs, ŋgə́ a nyinɓáaŋce ɓe ɨ́r gbàŋ Ísràyéèl, dùgɨ̀ ɓe ɨ́r ɓíì Mòyíìs ɓe Dúú Jíri Mèèín ndè á kaín ndè. Ɗàrò ŋgə́ geró ɓacéyetɨ́ nùb du bɨ́ Jwîf séé Dúú Jíri Mèèín no, gònɨ ɓáàŋkɨ́nɨ dɨmɨɨr Dúú kíì!»

²⁹Ŋgáb yi nyin u̧ àm ŋgáb ya lə́mne ɨnayâna, Pôl yi geréé Tɨ̀ròfîm nò Èféès ɓe kùŋ ya yəŋteekom kwé tə̧ə̧́ rè Dúú Jíri Mèèín noò á.

³⁰Kúr bɨ̂ŋ ɨ́ ɓàndɨ̀ɓà jùùr, nɨ̀vɨ́tɨ̀b ɨ́ yà lùùtèèwònɨ. Ŋgáb ɨ́ bɨ̀ŋgùùndóŋhô̧ Pôl lúu. Ŋgáb ɨ́ ɗòònɨ̀kɔ́ɔ̀kî ɓavɨ̀ì.

³¹Ŋgáb yaá mánɨ kwíìnɨ Pôl. Á kùb go tànànɨ nò kɨ́ɨ́ mvènnɨ́b sójàbì ɨnayâna, Yèrúsàlèm ɓandií nɨ́ yáá.

³²Ɓè mu̧u̧, ŋgə́ ɨ́ ɓê mvènnɨ́b sójàbì ɓe sójààb nɨ̀miib, ŋgáb ɨ́ ə́llê. Ɓwâ Jwîf bɨ yi pə́ ŋgə́ ɓe sójààb gòniì, ŋgáb ɨ́ mbɨ̂ jɨ̀mèé Póòl.

³³Kí á nò kɨ́ɨ́ mvènnɨ́b sójàbì rè ŋgɨɨso. Ŋgə́ ɨ́ tà kùb bɨ̀ Pôl, ɗà kùb a kpàìkî ŋgə́ ŋgárɨ̀b ɓe háínkòb bɨrɨ́b. Á ŋgə́ fɔ́gi ŋgáb: «Nò rè ma cè na, ní á ŋgə́ ndɨŋce?»

³⁴Ɨ́dù nò kɨ́ɨ́ mvènnɨ́b sójàbì rè ya nɨ́ sàmàìn óknyaaŋɓa pìí ŋgábè mɨ́nne ɗàà, ɓetí mɨ̀kwìn nɨ̀vɨ́tɨ̀bì yaá nɨ sumkí̧i̧ vɨ̀ntìì; nùb kù gbə̀mnɨ kɨ́ rè, nùb kù a gbəmndóŋce kɨ́ rè. Ŋgə́ ɨ́ tà kùb gèwúndóŋ Pôl dúú ó̧o̧ tamnìí no ku.

³⁵Ɓwâ Pôl ɓe sójààb ya féín yɨ́ wúísòó ɓavɨ̀rì, á sójààb haincɨ bɨ́ ŋgə́ haín, ɓetí mɨ̀kwìn nɨ̀vɨ́tɨ̀bì yaá nɨ ŋgə́ ɓálɨ̀nɨ.

³⁶Nùb lâs yaá ŋgə́ tùnɨ ŋgáb a gbəmgece: «Á ɗúnɨ kwíì ŋgə́!»

³⁷Mvókín kùb yi ɓa gèréndóŋnɨ Pôl dúú ó̧o̧ tamnì rè noò, á ŋgə́ fɔ́ nò kɨ́ɨ́ mvènnɨ́b sójàbì rè ɨnè: «Á sàmàìn mɨ nyinnaá wu nɨ́m kù à?» Á nò kɨ́ ta: «Á! Wu á wu nyìnnɨ gɨrêk ye!

³⁸Nò Èjíìbtə̀ tɨ wúte nɨ̀vɨ́tɨ̀b mvókín kù no hò̧, ŋgə́ ɨ́ gèhô̧ nùb ŋgwé ɓáŋhɨ́bí há̧á̧ tɔ́sìn nààsɨ̀b ŋgwàì cɨ́ŋnií rè mahà nɨ wu sé ye?»

³⁹Á Pôl pihe, ŋgə́ ɨ́ tà: «Kɨ́ moò, mɨ mɨ Jwîf á. Kùb fein mɨ Táàrsə̀ á, ɗɔ̀ɔ́b Sìlìsíì no. Mɨ cè mɨ́ nò kwɨ́í kùb ɗəəŋɓa mɨ́nne nokwe á. Yée, mbɨ́kháye mɨ nyìnnà nɨ̀vɨ́tɨ̀b nyindí.»

⁴⁰Á nɨ̀ŋgwá rè ə́əmna ŋgə́. Ɗà Pôl ɨ́ ə́ə̀ŋsówò ɓavɨ̀rì, ŋgə́ ɨ́ mábsònà nɨ̀vɨ́tɨ̀b ŋgáár. Ɓwâ ŋgáb yi kerɨɓa yɨrɨ́b, á ŋgə́ yarégi nyìnnànɨ ŋgáb ɓe nyindí Jwîf ɓoò, ŋgə́ ɨ́ tà: