Read Vute Ə́rɨ́b nùb tómé yi ə́llé 26 Bible Online

Ə́rɨ́b nùb tómé yi ə́llé 26 - Vute bible

Ə́rɨ́b nùb tómé yi ə́llé 26

¹Àgɨ̀rɨ̀pâ ɨ́ tànà Pôl ɨnè: «Á sàmàìn wu nyin nɨ́m wó ɓɔ̧ne.» Á Pôl gam nyindí, ŋgə́ ɨ́ yàrê kààŋnɨ síí, ŋgə́ ɨ́ tà:

²«Àgɨ̀rɨ̀pâ, nɨ̀mɨr tií, mɨ á mwáín ɓe mɨ̀tù àm mɨ go ə́ə̀ŋnɨ wo tíí hò̧, kààŋnɨ síí móò ɓe ɨ́r nɨ́m Jwîf bɨ du tàrénɨ mɨ só rè.

³Mɨ̀tɔ̀k kɨ́ duɓa ví̧i̧ àm wu ɗəəŋnyaaŋɓa ɗɨ́m Jwîf ɓoò ɓe sɨ̀ɨ̀ŋ nyindíí ŋgáb ndáŋlɨ́ŋ yáà rè á. Mɨ yóŋtɨ́ wu, wu jíì óknyààŋɓànɨ nɨ́m mɨ ɓa nyìnniì.

⁴«Jwîf bɨ lâs ɗəəŋtɨ́ hȩ ɗɨ́m móò ya duré, yàwòó wàánjɨ́ɨ́l moò no. Yàwòó yàllì, ɗɨ́m juu mɨ ya dukom ɓe kí mo ti̧í̧, dùgɨ̀ Yèrúsàlèm, Jwîf bɨ lâs ɗəəŋtɨ́.

⁵Ŋgáb ya ɗəəŋɓa bɨ mɨ kúríí. Kpáín nùb mɨ̀yú̧ú̧ du tùɓànɨ ɓíì jɨ́k jɨ́k kùb du ɓénɨ Fàrísààb lɨ, mɨ yaá no. Á sàmàìn ŋgáb ə́əmna mé, ɓè ŋgáb ɗúré.

⁶Ɗàrò kùb dɨɨ mɨ ŋgù̧ní àm mɨ du móŋkɨ́ɓànɨ ɓe gíí ɓwáár Mèín ya ɓwáína tákɨ̀rɨ́b nɨ́mè rè á.

⁷Gbàŋ bɨ nɨ́mè cóóŋ ɨ́ bɨrɨ́b lè á cè móŋnɨ yúklèé ɓwáár kíì, ɓe éínàá Mèín ɓwâ lâs ɓe nyòme cúú. Ɓe ɨ́r gíí kíì á cè Jwîf bɨ du mɨ àám ndè só tàrénɨ ru, tá!

⁸Nyí Jwîf bɨ rè, àm níì á nyí duce ə́ə̀mnɨ àm Mèín ɓa sə̀ə̀mcùhó̧nɨ nɨ̀kwííb á na kɨ́ ɗà?

⁹Mɨ nɨ̀mɨr mɨ ya lə́əmɓacéyetɨ́ ɓáàŋkɨ́nɨ ɨ́r Yésù nò Nàsàréèt kɨ́, ndɨŋgi ɨna.

¹⁰Mɨ ɨ́ ndɨ̀ŋmècè nɨ́m kɨ́ Yèrúsàlèm. Mvènnɨ́b nùb na satɨgàà ya naréɓacéyetɨ́ mɨ káàtà ə́r kíì ŋgáré. Mɨ ya njóoréé nùb ə́mní ví̧i̧ dúú nìrì. Mɨ yaá ə́ə̀mɓàcéyènɨ kùb kwíì ŋgáb.

¹¹Mɨ yaá ŋgáb túùmlɨ́ŋnɨ jábɨ́r dúhɨ́b mɨ̀yú̧ú̧ no, mɨ a ndɨ̀ŋ ŋgáb càm ə́ə́m ŋgáb yi ə́mne Yésùù. Ɓe njùŋ kàm yi mó sumí ɓe ɨ́r ŋgábèè, mɨ yaá ŋgáb njóndɨ̀sòɓànɨ há̧á̧ kùbè kwé.»

¹²«U̧ á cè, ɓwâ mɨ yi gi Dàmâs, mvènnɨ́b nùb na satɨgàà ya ɗob mɨ ə́r bììhèé nùb ə́mní, ŋgáb ɨ́ tɨ̀nndê mɨ káàtà ŋgáré, nànɨ mɨ nyòm mɨ ndɨŋ nɨ́m kíì.

¹³Kí du nɨ̀mɨr tií, mɨ yaá jȩ̀ȩ̀ gìnɨ Dàmâs. Á mvii ŋgwéé na, mɨ ɨ́ pə́cì mwa kàm kù aaŋɓa nɨ́ kɨ́ mvihɨri lomsówotɨ́ ɓɨllin nɨ́me nùb mo gùrí ya.

¹⁴Nɨ́m lâs nɨ́m ɨ́ gù. Á mɨ ók kúu kù mɨ tànànɨ ɓe nyindí Jwîf ɨnè: ‹Sôl, Sôl, wu túumce mɨ jábɨ́r ɓe ní? Wu nyɨɓa wu hȩ ndèìn sakkɨ́ ŋgɨ́ŋ tá noò sam á.›

¹⁵Mɨ ɨ́ fɔ́cùsò ɨnè: ‹Wu cè wú na á, Kéké?› Kéké ɨ́ pìhè ɨnè: ‹Nò wu du túùmnɨ jábɨ́r ɗàrɨ́, mɨ Yésù á.

¹⁶Ɨ́dù, éíwúum còóm. Mɨ túumna wu síí ndɨ̀ŋnɨ wu sèì nò ə́ré moò á; wu ɓa dùnɨ mɨ̀námé móò á, wu a átɨ̀nà nùb kù hȩ wu tɨ pə́ mɨ mwánnè, wu a tànàkwà ŋgáb nɨ́m mɨ ɓa wu túùmnàkwàniì.

¹⁷Mɨ ɓa wu céínhó̧nɨ dùgɨ̀ Jwîf bɨ ŋgáré, dùgɨ̀ nùb du Jwîf séé mɨ ɓa wu tómsònɨ yɨ́ kíí ŋgáré á.

¹⁸Mɨ tóm wu àm wu a ndɨ̀ŋ ŋgáb pée á, wu a ákî ŋgáb mɨ̀sɨ́mnɨ̀rí, gèhó̧nɨ ŋgáb mwahí, wu a ácùhó̧kî ŋgáb nyòm Sátààìn no gènànɨ Mèín. Ɓwâ kɨ́ ŋgáb a kwà tɨ́ɨ́r cum ŋgábè ɓe mɨ̀yɨ́ juu mvókín nùb ók ɓe Mèèín no, ɓe ə́ə́m ŋgáb ɓa mɨ ə́ə̀mniì.› »

¹⁹«Mɨ ɨ́ dùcè mɨ́ jààŋkɨ́wa nɨ́m mɨ yi pə́ sónɨ ɓɨllin kɨ́, tá.

²⁰Ɨ́dù nùb Dàmáàs á mɨ ɓéenayaye Kìn Mèèín, ɨ́ tùrégì nùb Yèrúsàlèèm, nùb ɗɔ̀ɔ́b Jùdéè ɓe nùb ti kù noò du bɨ́ Jwîf séé. Mɨ ɨ́ tànà ŋgáb, ŋgáb ɓàndɨ̀ sum ŋgáb a ɓàndɨ̀cùrê Mèín no; ŋgáb a ndɨ̀ŋcè nɨ́ɨ́b du túùmmèɓànɨ ɨnayâna ŋgáb ɓandɨtɨ́ sumí.

²¹Àm kɨ́ maá ɓwâ mɨ tɨ du Dúú Jíri Mèèín noò, Jwîf bɨ tɨ bií mɨ, ŋgáb ɨ́ tà vúm yè kwíitɨ́ mɨ ru.

²²Ɨ́dù Mèín ɓátií mɨ há̧á̧ mwáín. Mɨ á cè mɨ́ tàsénàhánɨ nɨ̀vɨ́tɨ̀b lâs àmɨɨr, wu dùgɨ̀ na. Nɨ́m kù mɨ du ŋgáb tànàniì nɨ ɗàà, cóóŋ sé kɨ́ tɨ́kɨ̀nɨ́b* ɓe Mòyîs ya ta ɓa ndɨ̀ŋnɨ rɨ.

²³Ŋgáb ya ta: Á ɗúnɨ Mèsî pə́ jábɨ́r, ŋgə́ a kû. Ŋgə́ a dù nò tíí ɓa sə̀ə̀mcùhó̧yàyènɨ mvókín nɨ̀kwíbí, ŋgə́ a tànàcè nɨ̀vɨ́tɨ̀b ɨnayâna, ɓwâ Mèín kwá ɓátɨ gbàŋ nɨ́mè ɓe nùb tɨb kù noò du bɨ́ Jwîf séé, ɓə́r kwá du hȩ mwa.»

²⁴Hȩ Pôl yi du gɨ̀séhánɨ tíí ɓe kàŋhȩ̀ȩ́ síhé, á Fèstûs yi wámsona ŋgə́ ɨnè: «Wu á wú yɨŋmîn, Pôl. Wu fobɨɓatɨ́ wú cei, kí á yɨɨŋkɨ́ nɨ́ wu ru!»

²⁵Pôl ɨ́ pììnà ŋgə́ ɨnè: «Mɨ mɨ yɨŋmîn ɗàà, nɨ̀mɨ́r tií. Mɨ nyinɓa mɨ nɨ́m du àmɨrìí á. Mɨ á cè mɨ́ ɓe kɨ̀cáàb moò hàrák.

²⁶Àgɨ̀rɨ̀pâ nò du mvèìn jírií óktɨ́ àm kɨ́, á sàmàìn mɨ nyinɓacéye ɓe gíí no tíí hò̧. Mɨ lə́mne ŋgə́ ɗəəŋtɨ́ nɨ́ɨ́b tɨ ndóŋndé lâs, ɓetí nɨ́ɨ́b kɨ́ tɨ bɨ ndúkín kù no yoó ndɨ̀ŋwá.

²⁷Àgɨ̀rɨ̀pâ, mɨ ɗəəŋtɨ́ wu á ə́ə̀mnɨ nɨ́ɨ́b tɨ́kɨ̀nɨ́b Mèèín yi taré!»

²⁸Kí á Àgɨ̀rɨ̀pâ fɔ́ Pôl ɨnè: «Wu lə́mne wu ɓa ndɨ̀ŋnɨ mɨ sèì nò Krístùù u̧ kɔ́klîn á à?»

²⁹Pôl ɨ́ tàcù ɨnè: «Dùgɨ̀ ɗàrò, dùgɨ̀ ɓwâ ŋge, mɨ á yóŋnɨ Mèín ɨnayâna wu sèìɓwê hȩ mɨ, dùgɨ̀ nyí lâs dukɨ́ hò̧ mɨ óknɨ rè. Ɨ́dù ɓe háínkòb lè ŋgáré sé!»

³⁰Á mvèìn jíri, ɓe gómnà, ɓe Bèrènîs ɨ́ nùb yi du ɓèé lâs yi éíwú bɨ́ còóm.

³¹Ŋgáb ɨ́ éíkî ɓè. Ŋgáb ɨ́ yà nyì̧ì̧tèènɨ mvókín ŋgábè no ɨnè: «Ɓáŋhîn kù nɨ̀ŋgwá rè ndɨŋ ɨ́ tà kùb kwíì ŋgə́, kɨ́ kù kɨ́klé ŋgə́ dúú nìrì na nɨ ɗàà.»

³²Á Àgɨ̀rɨ̀pâ tanagɨ Fèstûs ɨnè: «Nɨ̀ŋgwá rè tɨ dùyè tàwá ŋgù̧ú̧ gɨ̀ndóŋ mvèìn kàm jírií tíí naa, kùb yè mbɨ́ɨ́ bɨ́ ŋgə́.»