Read Vute Nùb róòm 10 Bible Online

Nùb róòm 10 - Vute bible

Nùb róòm 10

¹Mwin yàá bɨ ə́mní, nɨ́m mɨ du ɗúɓànɨ, mɨ duce ɓwèìnɨ Mèín ɓe ɨ́r Jwîf ɓoò á ɨnayâna Mèín ɓátɨ̀ ŋgáb.

²Á sàmàìn mɨ taɓa wááŋ ɓe ɨ́r Jwîf bɨ ɨnayâna ŋgáb á ɗúɓànɨ àm Mèèín, ɨ́dù kɨ̀cáàb ɗûú Mèèín ŋgábè kɨ́ nɨ hàrák ɗàà.

³Ɓetí ŋgáb bɨ ɗə̀ə̀ŋwá i̧ á Mèín du ndɨ̀ŋnɨ nɨ̀vɨ́tè sèì no tíí nò ɗɨ́ɗɨ̧́. Ŋgáb nɨ̀miib ya ta vúm yè kwaháá kɨ̀cáb vúm fɨ́tɨ ndɨ̀ŋnɨ vúm a dù Mèèín tíí nùb ɗɨ́ɗɨ̧́ɨ̧́. Ɓe ndɨ̧̀ɨ̧́ u̧nè kɨ́ á ŋgáb mvú jə̀ŋnɨ nɨ́m Mèín yi ta ndɨ̀ŋtɨ àm nɨ̀vɨ́tè a dù nò ɗɨ́ɗɨ̧́ɨ̧́ ru.

⁴Ɓetí Krístù ndɨŋtɨ́ ɓíì Mòyíìs kɨ́k ŋgwé, àm nùb ə́əmndé lâs a dù ɗɨ́ɗɨ̧́ Mèèín tíí.

⁵Nɨ́m Mòyîs yi tɨin ɓe ɨ́r ju ɗɨ́ɗɨ̧́ kùb fɨ́tɨ dùnɨ Mèèín tíí ɓè kùb jəŋ ɓíhì á ɨnè: «Nò ndɨŋ nɨ́m ɓíì ta ndɨ̀ŋte ɓa ɓáínɨ ɓe ɓíì kɨ́ á.»

⁶Ɨ́dù nɨ́m du ta̧á̧ ɓe ɨ́r ju ɗɨ́ɗɨ̧́ kùb fɨ́tɨ dùnɨ Mèèín tíí àm nò kɨ́ du ɓe ə́mní á ɨnè: «Wu wu lə́mnɨ̀r wu a tà: na ɨ́ ɓaye wúínɨ ɓɨllin?» (Kí ta: gìnɨ ɓésówònɨ Krístù na á).

⁷Wu wu lə́ə̀mɓwéhɨ̀r wu a tà: «Na ɨ́ ɓaye lénɨ ko̧ó̧?» (Kí ta gìnɨ ɓécùhó̧nɨ Krístù mvókín nɨ̀kwíbí na á).

⁸Á hà ta̧á̧ ɨnè ye: «Kìn á ɗàrɨ́, á wó ɓɔ̧ɔ̧, á cè wó sumí». Kìn kɨ́ du kìn du ɓe ɨ́r ə́mní nɨ́m du ɓéènɨ rè á.

⁹Wu ɨ́ tàhó̧ɓà wo ɓɔ̧ɔ̧ nɨ̀vɨ́tɨ̀b lâs tíí ɨnayâna Yésù ɨ́ du Kéké, wu ɨ́ ə́ə̀mcè wo sumí Mèín ya səəmcuhó̧ó̧ ŋgə́ mvókín nɨ̀kwíbí, wu ɓa ɓáínɨ á.

¹⁰Ɓetí nò ə́əmɓa no sumíì, Mèín ɓa ndɨ̀ŋnɨ nò kɨ́ sèì no tíí nò ɗɨ́ɗɨ̧́ á, nò tahó̧ɓace no ɓɔ̧ɔ̧ Yésù Kéké á rɨ, Mèín ɓa ɓátɨ̀nɨ nò kɨ́ á.

¹¹Káàtà Mèèín á wáàɓàcéyènɨ ɨnè: «Nò lâs ə́mne ŋgéé nɨ njɔ̧̀ lòm.»

¹²Hȩ dùnɨ u̧nèé, gɔ̀ nɨ mvókín Jwîf ɓe nùb du Jwîf séé no ɗàwá, ŋgáb á lâs ɓe Kéké mwi̧, du nànɨ nò lâs kɨ́ŋɓé ŋgéé nyɔ̧ɔ̧́ noò.

¹³Ɓetí káàtà Mèèín á wáànɨ ɨnè: «Nò lâs kɨ́ŋɓé Kékéé ɓa ɓáínɨ á.»

¹⁴Ɨ́dù i̧ á cè ŋgáb ɓa ŋgə́ kɨ́ŋɓénɨ, ɓè ŋgáb du bɨ́ ŋgə́ ə́ə̀mwáá? I̧ á cè ŋgáb ɓa ŋgə́ ə́ə̀mnɨ ɓè ŋgáb du bɨ́ ókwa kùb nyìnnɨ àm noò? I̧ á cè ŋgáb ɓa óknɨ àm noò ɓè kùb du ŋgáb ɓéènàwáá?

¹⁵I̧ á cè kùb ɓa ɓéènɨ kìn kɨ́ ɓè tɨ́kɨ̀nɨ́b du bɨ́ ɗàwáá? Hȩ káàtà Mèèín du wáànɨ ɨnè rè: «Gwɨ̀ì kùb gewo kìn nyɔ̧ɔ̧́ rè duɓa nɨ́m nyɔ̧ɔ̧́ á.»

¹⁶Ɨ́dù nɨ nùb lâs ya ók ɓéhèé Kìn Nyɔ̧né sé ya ə́mne. Èsáyà taɓacéyeé ɨnè: «Kéké, nɨ nùb lâs sé ə́mne Kìn nɨ́m ɓéeré.»

¹⁷Hȩ dùnɨ u̧nèé, ə́ə́m ɗoŋwo nɨ ô kùb ók Kìn Nyɔ̧né ya á. Kìn Nyɔ̧ɔ̧́ duce nɨ́ àm Krístùù kùb du ɓéèniì á.

¹⁸Ŋgáb ma ɗú tànɨ vúm ya bɨ́ Kìn Nyɔ̧ɔ̧́ kɨ́ ókwa á hàye? Ŋgáb ya ókɓagií. Káàtà Mèèín á wáànɨ ɨnè: «Kùb ya óktɨ́ kúu ŋgábè ɗɔ̀ɔ́b lè bɨ̂ŋ, nyindí ŋgábè ɓɔ̧ne ɨ́ féìn há̧á̧ ndúkín ɗɔ̀bí.»

¹⁹Kí du gbàŋ Ísràyéèl ɗúɓwée tànɨ ɨnayâna ní ya nɨ́ ókwa kúu ŋgábè kɨ́ á hàye? Duú kɨ́ pìí fɔ́ kíì, tíí yàyè, Mòyîs ya taá ɨnayâna Mèín taá ɨnè: «Mɨ á ndɨ̀ŋnɨ nyí ɓə̀ndɨ̀ nùb du bɨ́ tɨb àmiib séé. Mɨ ɓa ə́tɨ̀nɨ njùŋ nyínè ɓe ɨ́r tɨb du ɓe kɨ̀cáàb ɗàwáá á.»

²⁰Èsáyà wáatɨ́ ɨnayâna Mèín taá ɨnè: «Nùb yi du bɨ́ mɨ mánɨ ɗàwáá ɨ́ kwa bɨ́ mɨ ru. Nùb yi du bɨ́ mɨ nɨ́m kù fɔ́nɨ ɗàwáá, mɨ nɨ̀mɨ́r ɨ́ túùmnà ŋgáb síí.»

²¹Ɨ́dù ɓe ɨ́r gbàŋ Ísràyéèl, ŋgə́ taá ɨnè: «Ye lâs, mɨ ya yaamnaá nɨ̀vɨ́tɨ̀b ŋgáár, mɨ ya yaamna gbàŋ ya du ɓe sàkɨ̂ɨ́, ya duɓwée ŋgwé ɓáŋhɨ́nne á.»