Read Vute Nùb róòm 11 Bible Online

Nùb róòm 11 - Vute bible

Nùb róòm 11

¹Kí du Mèín yi leetɨ́ nɨ́ gbàŋ noò na á hàye? Ɗàɓàwá! Ɓetí mɨ nɨ̀mɨ́r mɨ nò Ísràyéèl á, nyȩ Àbɨ̀ràháàm, gbàŋ Bèìnjàmə̧́ə̧̀ no.

²Mèín ya nɨ́ gbàŋ noò ŋgə́ ya cakɨ́yaɓaye ɗàá lèèwá. Káàtà Mèèín no, nyí ɗəəŋtɨ́ nyì̧í̧ Èlî yi nyi̧i̧na Mèín ɓe ɨ́r gbàŋ Ísràyéèl.

³Nyì̧í̧ kɨ́ yaá hà ɨnè ye: «Kéké, ŋgáb kwíikíí tɨ́kɨ̀nɨ́b woò, ŋgáb ɨ́ tèmɨ̀kî tə́bə̀rè múbí woò. Mɨ metɨ́ mɨ mwi̧, ŋgáb á cè mánɨ mɨ kwíìnɨ.»

⁴Ɨ́dù Mèín ya piinahaá ŋgə́ ɨnè ye: «Mɨ gə́tií nɨ̀vɨ́tɨ̀b tɔ́sìn tɨ́ɓaám yi du bɨ́ mèín sam ɨ́r kɨ́ du Bâl lɨ ɗàá cáàmsénàwáá.»

⁵Nɨ́m mwi̧ ɓwê jíì mwánnè no, nùb Mèín ya ca ɓe nyàŋnjɔ̧̀ noò tecií bɨ́ ŋgób.

⁶Ŋgə́ ya ca nɨ ŋgáb ɓe nyàŋnjɔ̧̀ noò á, yi nɨ́ ɓe nɨ́ɨ́b ŋgáb ya ndɨŋndé sé. Dù u̧ ɗàà nyàŋnjɔ̧̀ Mèèín yè nɨ́ nyàŋnjɔ̧̀ àmɨɨr sé.

⁷Nɨ́m ma ɓa tànɨ i̧? Gbàŋ Ísràyéèl yi nɨ́ kwàwá nɨ́m ŋgə́ yi du mániì. Sé nùb Mèín yi caré ɨ́ kwà bɨ́. Kɨ́ gbàŋ Ísràyéèl, ŋgáb ya bɨ́ sàmàìn ók njàb kíì ɗàà.

⁸Ɓetí káàtà Mèèín á wáànɨ ɨnè: «Mèín ndɨŋtɨ́ ŋgáb dù u̧, nɨ́m yɨ́ ŋgáb sóò ɗàà. Ŋgə́ ndɨŋtɨ́, há̧á̧ mwáín, ŋgáb bɨ pə̂r, ŋgáb cè bɨ́ ô.»

⁹Dàvît taɓwéetɨ́ ɨnè: «Cɔŋ ŋgábè dùnà ŋgáb hȩ ndù, hȩ kɨ̀ɨ̀r, ŋgáb guréé nó kùb a túùmnà ŋgáb jábɨ́r.

¹⁰Íí sɨ́ɨ̀mɓà ŋgáb, ŋgáb bɨ pə́cɨ̀r. Ndɨŋ ŋgáb pə́ jábɨ́r ɓwâ lâs.»

¹¹Hȩ du u̧ kɨ́, ndɔ̀k Jwîf bɨ ya guré nó kɨ́, ŋgáb ya meréé bɨ́ no kɨ́ gwìí mwi̧í̧ à? Ɗàɓàwá! Ɨ́dù ɓe ɨ́r kum ŋgábè kíì, gbàŋ bɨ kù ya kwandóóŋ ɓə́r, há̧á̧ Jwîf bɨ ɨ́ yà ŋgáb ɓə̀ndɨ̀cùnɨ.

¹²Óo nùb ɗɔ̀bɨ́nné ya kwandóóŋ nyɔ̧ɔ̧́ ɓe kum ŋgábè, ɗà nùb du Jwîf séé ɨ́ kwàndóŋɓwê bɨ́ nyɔ̧ɔ̧́ ɓe gusɨ̀r ŋgábè kɨ́, nyɔ̧ɔ̧́ kùb ɓa kwànɨ ɓe gànné ŋgáb gaincuwo jɨ̀r ɓə́rì ɓaha nɨ ndóŋnɨ á ye.

¹³Ɗàrò mɨ nyinna nyí nùb du Jwîf séé á. Mɨ nò tómé kùb ya ɗobna gbàŋ du Jwîf séé á. Hȩ mɨ dùnɨ nò tómé, mɨ á óknɨ mɨ̀tù ɓe ə́r mó kɨ́.

¹⁴Mɨ ɓa ndɨ̀ŋnɨ nùb mo gbàŋné dù ɓe ɓi̧í̧ sumí á, àm Mèín a ɓátè nùb kù mvókín ŋgábè no ɓe ɨ́r moò.

¹⁵Kí du ɓwâ kùb ya ákɨ́ ŋgáb kpánéné, Mèín ɨ́ nyàŋcù ɓe nùb ɗɔ̀bɨ́nné. Ɓwâ Mèín ɓace ŋgáb gàmcùrénɨ kpánéné, ní ɨ́ ɓace ndóŋnɨ? Ɓa dùnɨ hȩ ɓwâ nùb ya kú kú̧ne du sə̀ə̀mcùniì á.

¹⁶Óo bɨ̀rê ɓéíhó̧yayeré ɨ́ dù kɨ́ kùb mób Mèín ɓe kíí, kɨ́b ɓa ɓéíwònɨ cùrìì lâs ókɓwéeha nɨ ɓe ŋgə́ á ye. Nò kù ɨ́ môb Mèín gwàŋnɨ́b yɔ̀ɔ, tamnɨ̀b yɔ̀ kíì lâs ókɓwéeha bɨ ɓe Mèín á ye.

¹⁷Gbàŋ Ísràyéèl du hȩ yɔ̀ Òlìvíyéè kùb yi ɗoŋ, ɗà kùb ɨ́ tȩ́nɨ̀kî tamnɨ̀b kwè á. Wu nò du Jwîf séé, wu á hȩ taàm Òlìvíyéè káhȩ̀né kùb téínwo gònɨ kpáŋndénɨ[2] kɨ́ kwéè kùb tɨ téínkɨ́ rè ya kwe. Ɓwâ kɨ́ ɓè wu ɓáíhó̧ɓwée cɨ wu ɓe mvúm Òlìvíyéè kwéè rè du nyə́mwúnɨ ɗɔ̀bɨ́nné á.

¹⁸Àm kɨ́ á du nɨ́ ɗúwa wu pə́wààmkɨ́ taàm kùb tɨ téínkɨ́ ténne. Wu á ce wú síí ɓe àm níì? Nɨ wu sé ɨ́ du hànnɨ gwàáŋ, gwàáŋ ɨ́ du nɨ́ wu hànnɨ ru.

¹⁹Á sàmàìn wu tana mɨ ɨnayâna kùb yi téínkɨ́ha taàm kɨ́ àm kùb kpáŋcuré mɨ mɨ̀yɨ́ kíì á ye.

²⁰Á ɓàhá hàrák, kùb ya téínkɨ́ ŋgáb àm ŋgáb yi du bɨ́ ɓe ə́ə́m ɗàwáá á, kùb ɨ́ kɨ́kcùrê wu mɨ̀yɨ́ kɨ́ ɓe àm wu du ɓe ə́mní, ɨ́dù wu wu síí â, gə́tɨ wu.

²¹Ɓetí Mèín ma dùgɨ̀ Jwîf bɨ nɨ̀miib nùb du taàm yɔ̀ kùb ɗoŋ ɗo̧né mbɨ́kwa ɗóògɨ̀ wu nò du taàm kùb téínwo káhȩ̀né à?

²²Péye hȩ Mèín du túùmnɨ nyàŋnjɔ̧̀ noò ɓe nyɨ́nyȩ́ nóò. Ŋgə́ á nyȩ́ȩ ɓe nùb ndɨŋ ɓáŋhɨ́nne, ŋgə́ á cè njɔ̧̀ nyɔ̧ɔ̧́ ɓe wu. Ɨ́dù á ɗúnɨ wu sə̀ŋ gíí ɓe nyàŋnjɔ̧̀ noò, duú u̧ ɗàà, ŋgə́ ɓa wu téínkɨ́ɓwênɨ hȩ taàm yɔ̀ɔ á.

²³Jwîf bɨ ɨ́ mbɨ́kcè tamnjɔ̧̀ ŋgábè, Mèín ɓa ŋgáb kpáŋcùrénɨ yɨ́ ŋgáb yi duye tíí á, ɓetí ŋgə́ á ɓe nyòm kpáŋcuré ŋgábè.

²⁴Wu nò du wú Jwîf séé, wu du taàm fó̧ Òlìvíyéè káhȩ̀né yaà á. Kùb téíntɨ́ wu, kùb ɨ́ gì bɨ́ wu kpáŋndénɨ mɨ́cin kùb yi ɗoŋ bɨ́ ɗo̧né ya. Kɨ́ Jwîf bɨ, ŋgáb duce bɨ́ taàm fó̧ɓa nɨ́ mɨ́cin kùb yi ɗoŋ bɨ́ ɗo̧né kɨ́ yaà á. Kpáŋcùrénɨ ŋgáb mɨ́cin ŋgáb ya fó̧ bɨ́ ya kwe á nɨ́ kə́sə́k.

²⁵Mwin yàá bɨ ə́mní, àmɨɨr mɨ ɗú nyí vììnànɨ àm nyí tɨ̀ áá síhé á rè: Nùb kù gbàŋ Ísràyéèl noò á bɨ́ ɓe ɗèìntóo, ɨ́dù ɗèìntóo ŋgábè kɨ́ ɓa yə̀ŋɗóònɨ há̧á̧ hȩ gbàŋ bɨ kù lâs ɓa kwànɨ ɓə́rì á.

²⁶U̧ á gbàŋ Ísràyéèl lâs kwá ɓáí, ɓetí káàtà Mèèín wáatɨ́ ɨnè: «Tɨ́céín kwá du nò Sìyóòŋ, ŋgə́ kwá cáaŋkɨ́na nyȩrɨ́b Yákòòb ɗèìntóo ŋgábè.

²⁷Ɓwâ mɨ kwá ákɨ́na ŋgáb cuum ŋgábè, jin nyàáŋ mɨ kwá jin ɓe ŋgábè á kí.»

²⁸Ɨ́ tà kùb gómɨ̀ mvû Jwîf bɨ ya mvú Kìn Nyɔ̧né, ŋgáb du bɨ nùb ɓi̧ní Mèèín á, àm nyí a dù nyɔ̧né. Ɨ́dù kùb ɨ́ góòmcùcè cɨca Mèèín, ŋgáb du bɨ nùb Mèín ɗúré á, ɓe ɨ́r tákɨ̀rɨ́b ŋgábè.

²⁹Ɓetí Mèín nɨ́ ácùnɨ faám ŋgə́ na nɨ̀vɨ́tèé ɗàà, ŋgə́ cè nɨ́ cə́ndɨ̀nɨ ɓɔ̧ ɓe ɨ́r nùb ŋgə́ ya ɓéré ɗàà.

³⁰Ɓwâ ya tíí, nyí ya sakkíí Mèín, ɨ́dù ɗàrò, nyí ɗəəŋtɨ́ mwàm ŋgə́ du ɓe kí àm Jwîf bɨ sakkɨ́ ŋgéé.

³¹Nɨ́m mwi̧ ɓwê, ŋgáb sakkɨ́ɓwéetɨ́ Mèín ɗàrò àm ŋgə́ a ô nyí mwàmí, ɨ́dù duɓwée nɨ àm ŋgáb a ɗə̀ŋhȩ̀ mwàm ŋgə́ du ɓe kíí á.

³²Ɓetí Mèín mbɨ́kléé nɨ̀vɨ́tɨ̀b nì̧ì̧ tamŋgwéé ŋgábè no, àm ŋgáb a pê mwàm ŋgə́ du ɓe kíí.

³³Nyàŋnjɔ̧̀ Mèèín á ɓà jíri, ŋgə́ á ɓà ɓe kɨ̀cáàb ɨ́ ɗɨɨ́ŋ cei yáà! Nò kù nɨ ɗə̀ə̀ŋwá njàb ɓwáár ŋgéé.

³⁴Káàtà Mèèín á wáànɨ ɨnè: «Nò kù nɨ ɗə̀ə̀ŋwá mɨ̀lə́m Kékéé, na ɨ́ fɨ́tɨɓacéye ŋgə́ nànɨ sóóŋ?

³⁵Na yi nayaɓacéye ŋgə́ nɨ́m kù àm ŋgə́ a nàcùcê níì?»

³⁶Ɓetí ŋgə́ ɨ́ du nànɨ nɨ́ɨ́b lâs lu, nɨ́ɨ́b lâs du ɓe nyòm noò á, dunace nɨ́ ŋgə́ á. Mgbíí dù ɓe Mèín tɨ́k kɨ́ tɨ́k. Àmèn!