Read Vute Nùb róòm 12 Bible Online

Nùb róòm 12 - Vute bible

Nùb róòm 12

¹Mwin yàá bɨ, hȩ Mèín túùmnànɨ nɨ́m nyàŋnjɔ̧̀ noò, mɨ ta nyí nàkɨ́ɓà síí nyínè bɨ̂ŋ hȩ satɨgà jáŋ nyí kɨ́kna Mèèín, ɓace ŋgə́ sumí nyàŋniì. U̧ á duɓa ɗúnɨ nyí ɗóm Mèín.

²Ɗɨ́m nyínè nɨ hȩ kɨ́ nùb ɗɔ̀bɨ́nné dùr, ɨ́dù mbɨ́kná Mèín cə́ndɨ̀ɓà mɨ̀lə́m nyínè bɨ̂ŋ, ŋgə́ a na nyí kɨ̀cáàb heé. Kɨ̀cáàb nyínè kɨ́ cə́ndií, nyí a ɗə̀ə̀ŋgì nɨ́m Mèín ɗúré á nɨ́m du nyɔ̧né, nɨ́m nyaŋ ŋgə́ sumíì ɓe nɨ́m du ɗɨ́ɗɨ̧́ nɨ́m yɨ̀tíí ya ɗàà rɨ.

³Ɓe ɨ́r nyər Mèín na mɨ ɓe nyàŋnjɔ̧̀ noò, mɨ tanaá nyí lâs ɨnè: nyí nɨ vúm ɨ́ duɓa ru na tà. Nò lâs áhá nɨ síí hȩ ŋgə́ duré, ɗóhîn ɓe ə́ə́m Mèín ya na ŋgéé.

⁴Síí nɨ̀vɨ́tèé á hà mwi̧, nɨ́ɨ́b á cè ya ví̧i̧, nò mwi̧ ɓe ə́r nóò.

⁵U̧nè ɓwê, dugɨ hȩ nɨ́m du ví̧ne, nɨ́m du nɨ síí mwi̧ á ɓe ɨ́r ju ɓaín nɨ́m du ɓe Krístùù. Nɨ́m á cè ɓaín mvókín nɨ́mè no hȩ nɨ́ɨ́b sóò duce ɓanné.

⁶Mèín yi naá nɨ́m lâs nyər nyiín nyin. Nò ŋgə́ yi na ɗɨɨ́ŋ ta Kìn ŋgə́ tómworé, nò kɨ́ éí ə́r kɨ́ ɗóhîn ɓe ə́ə́m nò kɨ́ du ɓe kíí.

⁷Nò ŋgə́ yi nace ɗɨɨ́ŋ ə́nna kùbè, nò kɨ́ ə́ttɨ. Nò ŋgə́ yi na ɗɨɨ́ŋ tɔ̀hí, ŋgə́ tɔ̀ɔ̀tɨ.

⁸Nò ŋgə́ yi na ɗɨɨ́ŋ taamna kùb njɔ̧̀, nò kɨ́ éí ə́r nóò. Nò ŋgə́ yi na njɔ̧̀ nyərí, nò kɨ́ nàɓà sum mwi̧. Nò ŋgə́ yi na ɗɨɨ́ŋ gə́tɨ nɨ̀vɨ́tɨ̀bì nɨ nyȩȩ́ no gèrə̂r. Nò ŋgə́ yi nace njɔ̧̀ kpɔ́k nùb tiri, nò kɨ́ éí ə́r kɨ́ ɓe mɨ̀tù cúk.

⁹Ɗûnɨ́m dùɓàhá ɗûnɨ́m nɨ̀mɨr. Ɓəndɨnáam nɨ́m du ɓáŋhɨ́nne. Kɨ́klénáam njɔ̧̀ ndɨ̧̀ɨ̧́ nyɔ̧né no.

¹⁰Dunáɓam ɓe ɗûnɨ́m mvókín nyínè no hȩ mwin yàá ə́mní ɓe kùb. Dunáam kə́sə́k túùmnànɨ kùŋ mwin yàá jɨ̧.

¹¹Nyí nɨ nyɨnyáàb dùr. Nakɨ́náɓam síí nyínè bɨ̂ŋ ə́nnànɨ Kéké.

¹²Óknáam mɨ̀tù àm nyí du sə̀ŋnɨ gíí ɓe Mèín ndè. Jíináam jábɨ́r. Yóŋnáam Mèín ɓe jɨ̧ cúk.

¹³Kpɔ́knáam mwin yàá nyínè ɓwâ nɨ́m kù du ŋgə́ jábɨ̀niì, nò goce yɨ́ nyínè, nyí a gàmɓà ŋgə́ mîn.

¹⁴Ɓweináam Mèín ŋgə́ fàm nùb du nyí túùmnɨ jábɨ́rí, nyí nɨ ŋgə́ káí ŋgáb na ɓòr.

¹⁵Nùb du mɨ̀tùú, óknáam mɨ̀tù ɓe ŋgáb. Nùb duce kɨ́kɨ́rí, nyí a kɨ́ì ɓe ŋgáb.

¹⁶Dunáam kúu mwi̧ mvókín nyínè no. Nyí nɨ síí wútɨ̀r, ɨ́dù gesénáam síí ɗàá. Nyí nɨ vúm nùb kɨ̀cáblì á na tà.

¹⁷Nyí nɨ ɓáŋhîn kùb ndɨŋ nyínè ɓáábɨ̀r. Mánáam ndɨ̀ŋnɨ nyɔ̧ɔ̧́ nùb lâs tíí.

¹⁸Ɓwâ mvókín səmndé, dunáam ju ɗóóŋ ɓe nùb lâs, ɓè gèróò ju ɗóóŋ kɨ́ gómɨ nyínè.

¹⁹Ɓwàjììb moò, nyí nɨ̀miib nyí nɨ síí lɔ̧̀. Mbɨ́knáam njùŋ Mèèín éínɨ ə́r nóò, ɓetí Kéké taá káàtà noò no ɨnè: «Mɨ ɨ́ du nò ɓa lɔ̧̀nɨ nɨ̀vɨ́tɨ̀bì ru. Mɨ ɨ́ du nò ɓa ɓáàbnɨ ɓáŋhîn kùb ndɨŋndé ru.» Nɨ́m Kéké taré á kí.

²⁰Káàtà Mèèín wáakwatɨ́ ɨnè: «Cɨ̧̀ ɨ́ dù nómnɨ nò wo ɓi̧ní, nam ŋgə́ cɔŋ. Síì ɨ́ dù ŋgə́ ndɨ̀ŋnɨ, nam ŋgə́ mvúm. Ɓe ndɨ̧̀ɨ̧́ u̧nè kɨ́, du hȩ wu sɨiwú ŋgə́ ɓukàré waá ŋgwéé á.[3]»

²¹Nɨ ɗúwa wu mbɨ́k ndɨ̧̀ɨ̧́ ɓáŋhɨ́nne ɓèì wu su. Ɓeibɨ̂ŋ ŋgə́ su ɓe ndɨ̧̀ɨ̧́ nyɔ̧né woò.