Read Vute Nùb róòm 14 Bible Online

Nùb róòm 14 - Vute bible

Nùb róòm 14

¹Nò ə́ə́m nóò du gó̧o̧ rɨ, gamnáam ŋgə́, nyí cè nɨ́ kɨ̀cáàb ŋgéé yòm.

²Nɨ́m tàpéyè ɨnè: Nò ə́ə́m tamnìí ɗəəŋtɨ́ ní á ɓe nyòm taŋ nɨ́ɨ́b lâs, u̧ kɨ́ nò ə́ə́m gó̧ne taŋhó̧ɗóo nɨ ke fèhí á.

³Nɨ ɗúwa nò du tàŋnɨ nɨ́ɨ́b lâs pə́sàkkɨ́ nò du cɔŋ bɨ kù tàŋnɨ ɗàwáá. Nò duce cɔŋ bɨ kù tàŋnɨ ɗàwáá nɨ nò du nɨ́ nɨ́ɨ́b lâs tàŋniì yòòm, ɓetí Mèín gamtɨ́ nɨ́ ŋgə́.

⁴Wu yomce wú nò ə́ré nɨ́ kùbè rè, wu a cè na? Ŋgə́ ə́ə̀ŋgɨ̀ kpéín yoo, ŋgə́ gùgɨ̀ gu̧ú̧ yoo, kí góom nɨ tá no ə́ré á. Ŋgə́ ɓaháce nɨ́ ə́ə̀ŋnɨ kpéín á ɓetí Kéké á ɓe nyòm gə́tɨ ŋgéé.

⁵Nùb kù á lə́ə̀mnɨ ye bɨ kù á dɨɨ́m ndóóŋ kɨ́b kù, u̧ kɨ́ nùb kù á cè lə́ə̀mnɨ ye lâs á nɨ́m mwi̧. Nɨ̀mwi̧ ə́ə̀ŋɓànɨ kpéín ɓe nɨ́m nó njɔ̧̀ne.

⁶Nò du nɨ́ dɨ̀ɨ̀mnɨ ye kwè, dɨɨmna nɨ Kéké á. Nò du nɨ́ tàŋnɨ nɨ́ɨ́b lâs taŋ nɨ àm dɨmɨ Kékéé á, ɓetí ŋgə́ á sáktɨ̀nɨ Mèín ɓe ɨ́r cɔŋ kíì. Nò duce nɨ́ tàŋnɨ nɨ́ɨ́b lâs ɗàwáá ndɨŋ nɨ u̧ àm dɨmɨ Kékéé á, ŋgə́ á cè nɨ́ sáktɨ̀nɨ Mèín.

⁷Ɓetí nɨ́m duú jáŋ, nɨ́m nɨ síí nɨ́m nɨ̀mibi dunaá sé, nɨ́m kúgɨ̀ kú̧u̧ nɨ́m nɨ síí nɨ́m nɨ̀mibi kúnaá sé.

⁸Nɨ́m duú jáŋ nɨ́m duna Kéké á, nɨ́m duú kúri nɨ́m kúna Kéké á. Nɨ́m dùgɨ̀ jáŋ, nɨ́m dùgɨ̀ kúri nɨ́m ók nɨ́ ɓe Kéké á.

⁹Ɓetí Krístù ya kú nɨ́ ɗà ŋgə́ ɨ́ sə̀ə̀mcùhô̧ cwéé àm ŋgə́ a dù Kéké nɨ̀kwííb ɓe nùb jááŋ cúú á.

¹⁰Ɨ́dù kɨ́ woò wu ŋgwince mwin yàá woò àm níì? Wu cè, wu pə́sakkɨ́ce mwin yàá woò àm níì? Nɨ́m lâs, nɨ́m kwá ə́ŋhɨ Mèèín tíí ŋgə́ a ŋgwìn nɨ́m.

¹¹Ɓetí káàtà Mèèín wáatɨ́ ɨnè: «Mɨ Kéké, mɨ nò du jááŋ, mɨ taá ɨnè: Nùb lâs kwá cáamsé ɗàá mo tíí, ɗà nò lâs a yà mgbíìnɨ Mèín.»

¹²Yɨ́ kɨ́ á nò lâs ɓa nyìnyààŋnɨ àm no sóò Mèèín tíí.

¹³Mvókín nɨ́mè no nɨ́m nɨ ɓe yùúm dùnâr. Mbɨ́knáam ndɨ̧̀ɨ̧́ nɨ́m fɨ́tɨ gèrénɨ mwin yàá nyínè jɨ̀r cumí noò.

¹⁴Ɓe ju ɓaín mɨ du ɓe Yésù nò du Kékéé, mɨ ɗəəŋɓatɨ́ mîn ɨnayâna nɨ̀vɨ́tèé sumí, nɨ́m du sarîn ɗàwáá nɨ ɗàà. Ɨ́dù nò pə́ nɨ́ nɨ́m kù, ŋgə́ ɨ́ lə́mnè nɨ́ no sumí nɨ́m kɨ́ nɨ sarîn ɗàà rɨ, kí dunaɓa nɨ ŋgə́ á.

¹⁵Wu ɨ́ ndɨ̀ŋ mwin yàá woò ók yəré sumí ɓe cɔŋ wu du tàŋniì, wu wu ju ɗûnɨ́mí du̧ú̧ sé cɨ̀. Gə́tɨm, cɔŋ wu du tàŋniì tɨ̀ ndɨŋ nò Krístù ya kú ɓe ɨ́r ŋgéé lɔ̧́tɨ.

¹⁶Nɨ́m duna nyí nɨ́m nyɔ̧ɔ̧́ rɨ, nɨ ɗúwa nyí ndɨ̀ŋ nùb kù pə́ nɨ́m kɨ́ dù nɨ́m ɓáŋhîn.

¹⁷Ɓetí Ŋgɔ̧́ɔ̧̀ Mèèín nɨ àm cɔɔ̀ŋ ɓe àm mɨlli sé. Ŋgɔ̧́ɔ̧̀ Mèèín du nɨ ju ɗɨ́ɗɨ̧́, ju ɗóóŋ ɓe ju mɨ̀tùú Nyéhè Sarîn du nàniì á.

¹⁸Nò du ə́nnànɨ Krístù u̧nèé á Mèèín sumí nyɔ̧ɔ̧́, nɨ̀vɨ́tɨ̀b á cè nò kɨ́ ə́ə̀mnɨ.

¹⁹Nɨ́m mánábɨ̂ŋ nɨ́m du nyɔ̧ɔ̧́ ɓe ɨ́r ju ɗóóŋ, duɓwée sàmàìn taamnace nɨ́m ə́mní.

²⁰Wu wu ŋgáár ə́ré Mèèín ɓáàŋkɨ̂r ɓe ɨ́r cɔɔ̀ŋ. Á sàmàìn kùb taŋɓahá nɨ́ɨ́b lâs, ɨ́dù ánɨ ɓáŋhîn ɓè cɔŋ wu du tàŋnɨ gín mwin yàá woò kɨ́ du nɨ́ ndɨ̀ŋnɨ ŋgə́ gùré cumí.

²¹Nɨ́m du mɨ́nne á wu mbɨ́k cɔŋ fèhí, kɨ́ kù mə̀ré súmé, dùgɨ̀ ndɨ̧̀ɨ̧́ níì gín mwin yàá woò ɓè wu pə́ wú ɓa nɨ́ ŋgə́ gèrénɨ cumí á.

²²Gə́tɨhá wu nɨ́m ə́ə́m wóò ta wu ndɨ̀ŋte, kí du nɨ sà̧à̧ nyíne Mèèín á. Mɨ̀tù á ɓe nò ɗəəŋɓa no sumí ɨnayâna nɨ́m ní du ndɨ̀ŋnɨ rè nɨ ɓáŋhîn ɗàwáá.

²³Ɨ́dù nò kù ɨ́ tàŋ nɨ́ cɔŋ kù ɓe mɨ̀sə́ndɨ̀r sumí, ŋgwìn Mèèín bií nɨ́ ŋgə́, ɓetí nɨ́m ŋgə́ ndɨŋ kɨ́ nɨ ə́mní ya ɗòŋwòwá. Nɨ́m lâs nɨ̀vɨ́tè ndɨŋ du nɨ́ ə́mní ya ɗòŋwòwáá du nɨ cum á.