Read Vute Nùb róòm 15 Bible Online

Nùb róòm 15 - Vute bible

Nùb róòm 15

¹Nɨ́m nùb du ɓe ə́ə́m tamnìí, nɨ́m jíìná nùb du ɓe ə́ə́m gó̧ne. Ju nɨ́mè no nɨ́m nɨ nɨ́m nyaŋ nɨ́m sumíì máhó̧ɗóò.

²Nɨ́m máná ndɨ̀ŋnɨ nɨ́m nyaŋ mwin yàá sumíì, àm nò kɨ́ a dù mɨ́nne, ə́ə́m nóò a gì tíí.

³Ɓetí Krístù ya nɨ́ dùwá ɗɔ̀bín ɓe ɨ́r nɨ́m nyaŋ ŋgə́ sumíì. Ɓàcéyè káàtà Mèèín wáatɨ́ ɨnè: «Nyèìn kùb ya andɨkom wé lâs wúndóŋtɨ́ mɨ ya.»

⁴Nɨ́ɨ́b du tɨín Káàtà Mèèín noò, kùb ya tɨin bɨ kúríí nànɨ nɨ́m kɨ̀cáàb á. Àm jíhɨ́r ɓe tamnjɔ̧̀ káàtà Mèèín kɨ́ du nɨ́m nàniì a nà nɨ́m gírí.

⁵Mɨ yóóŋ Mèín ŋgə́ nò du nànɨ jíhɨ́r ɓe tamnjɔ̧̀, ŋgə́ nà nyí nyòm nyí du kúu mwi̧ mvókín nyínè no, nyí a tù guur gùrí Yésù Krístùù.

⁶Àm nyí a ɓáhè kúu mwi̧, ŋgə̀mnɨ Mèín, ŋgə́ nò du Tá Yésù Krístù nò du Kéké nɨ́mè.

⁷Hȩ dùnɨ u̧nèé, á ɗúnɨ nyí dù ju nò rè gaám kùùŋ, nò rè a gàm kùùŋ, hȩ Krístù ya gamɓwée nyínè, àm gbààŋ lâs a ŋgə̀m Mèèín.

⁸Ɓetí mɨ tànàɓà nyí, Krístù ya settɨ́ nò ə́nna Jwîf ɓoò, àm ndɨŋ ɓwáár Mèín ya ɓwáína tákɨ̀rɨ́b ŋgábè a fô̧ hàráá, túùmɓwênɨ ɨnayâna Mèín á jə̀ŋnɨ ɓwáár noò.

⁹Krístù ya goɓwée àm nùb du Jwîf séé a mgbíìɓwéhè Mèín ɓe àm nyàŋnjɔ̧̀ no kíì á, káàtà Mèèín á wáàɓàcéyènɨ ɨnè: «Àm kɨ́ á mɨ ɓa wu ŋgə̀mnɨ mvókín nùb du Jwîf séé no, mɨ ɓa sòŋnɨ wàì mɨ dɨmɨ wu noò á.»

¹⁰Káàtà Mèèín wáakwatɨ́ ɨnè: «Nyí nùb du Jwîf séé, ɓáanáam ɓe gbàŋ Mèèín, óknɨ mɨ̀tù.»

¹¹Káàtà Mèèín wáakwatɨ́ ɨnè: «Tɨb lâs, mgbíináam Kéké, gbàŋ bɨ lâs ŋgə̀m ŋgə́.»

¹²Èsáyà taɓwéetɨ́ ɨnè: «Nyȩ Jèséè[4] kwá go, ŋgə́ kwá ŋgáŋ nùb du Jwîf séé ya, ŋgáb a sə̀ŋ gíí ɓe ŋgə́.»

¹³Mɨ yóóŋ Mèín ŋgə́ nò du nànɨ gírí, ŋgə́ nàɓà nyí ju ɗóóŋ ɓe mɨ̀tù, ɓe ɨ́r ə́ə́m nyí ə́mne ŋgéé. U̧ á nyí ɓa dùɓà nɨ ɓe gíí, ɓe nyòm Nyéhè Sarɨ́nne.

¹⁴Mwin yàá bɨ ə́mní, kɨ́ moò mɨ ɗəəŋɓatɨ́ ɨnayâna nyí á kə́sə́k ndɨ̀ŋnɨ nɨ́m du nyɔ̧né, nyí ɗəəŋɓaceé nɨ́m du ɗúnɨ kùb ndɨ̀ŋte, nyí á cè nyòm na sóóŋ mvókín nyínè noò.

¹⁵Dugɨ nɨ́ u̧, káàtà moò no, mɨ̀yɨ́ bɨ kù á nó mɨ tɨín mɨ njɨ̧ɨ̧́ njɨ̀kwá, ɓetí mɨ ɗú nyí vùùŋcùnànɨ nɨ́m nyí yi ókcɨ ó̧ne á. Mɨ tɨin u̧ ɓe ɨ́r ə́r Mèín yi ɗob mɨ,

¹⁶mɨ dù nò ə́ré Yésù Krístùù, àm mɨ a kpɔ̂ nùb du Jwîf séé rè á. Mèín nɨ̀mɨr ɨ́ caɓa nɨ́ mɨ mɨ ɓéhɨ̀ Kìn Nyɔ̧ɔ̧́ noò ru, àm nùb du Jwîf séé a dù nyər nyɔ̧ɔ̧́ nyaŋɓa Mèèín sumí, Nyéhè Sarîn ndɨŋ dù fɨ́tîn ɓe nyər ók ɓe Mèèín.

¹⁷Àm kɨ́ á du sàmàìn mɨ ók mɨ̀tù ɓe ə́r mɨ du ə́nnànɨ Mèín ndè, ɓe ɨ́r ju ɓaín mɨ du ɓe Krístùù.

¹⁸Ɓetí nɨ́m mɨ fɨ́tɨ nyìnniì ɗàà, sé kɨ́ Krístù na mɨ nyòm mɨ ndɨŋ nùb du Jwîf séé jə̀ŋ Mèín ndè. Ŋgə́ ndɨɨ́ŋ ŋgáb jə̀ŋ Mèín, yàwòó Kìn mɨ yi taré ɓe nɨ́ɨ́b ndɨ̧ɨ̧́ moò ya,

¹⁹ɓe nyòm lìím ɓe nɨ́ɨ́b kàtɨ́b sɨ̀sɨ̀rí mɨ ya ndɨŋndé, ɓe nyòm Nyéhè Sarɨ́nne ɓwê ya á. Mɨ ya tateeɓatɨ́ Kìn Nyɔ̧ɔ̧́ du ɓe ɨ́r Krístùù yɨ́ lâs, yàwòó Yèrúsàlèm há̧á̧ ɗɔ̀ɔ́b Ìlìríì.

²⁰Ɨ́dù mɨ ta, á ɗúnɨ mɨ tà Kìn Nyɔ̧ɔ̧́ yɨ́ kùb ya du bɨ́ àm Krístùù ókkɨ́yèwáá, àm mɨ tɨ̀ éí mɨ́ ə́r nò kù ya yaréré,

²¹mɨ yè ndɨŋɓwéece mɨ́ nɨ́m káàtà Mèèín wáhɨ ɨnè rè: «Nùb kùb ya du bɨ́ Kìn noò tànàwáá kwá pə́ ŋgə́, nùb ya duce bɨ́ ókwa kùb nyìnnɨ àm noò kwá ɗəŋhɨ ŋgə́.»

²²Nɨ́m harɨɓa mɨ gwì ví̧i̧ gìnɨ yɨ́ nyínè á kí.

²³Ɨ́dù ɗàrò, mɨ cáaŋcií mɨ́ ə́r móò ŋgɨ̀ŋgɨ́ŋ ɗɔ̀ɔ́b lèè no. Á cɨ̀ nɨ mwáín dáín ví̧i̧ mɨ du ɗúnɨ gìnɨ nyí lɨ́ŋnɨ.

²⁴Mɨ á cè ɗúnɨ gùr mɨ du gìnɨ Èspânyə̀ rè, mɨ ə́ə̀ŋndóŋ ɓè. Ɓetí mɨ á ɗúnɨ nɨ́me nyí ɓàìnndóŋtɨ, nɨ́m a kwànácè mvókín nɨ́m duhó̧ ŋgóbí, nyí a nàcè mɨ nɨ́m nyí kpɔ́k mɨ ɓe ɨ́r gwɨ̀ì mo kíì.

²⁵Ɨ́dù ɗàrò, mɨ gɨye Yèrúsàlèm á, kpɔ́knɨ nùb Mèèín du kwe.

²⁶Ɓetí nùb ə́mní Màsèduwáàn ɓe Àkàyíì tɨ ta vúm á ɓáànɨ mòné tómsònànɨ nùb tiri ók ɓe nùb Mèèín du Yèrúsàlèèm.

²⁷Ŋgáb nɨ̀miib tɨ ɓwáíɓa bɨ́ u̧ ru, ɨ́dù tɨ ɗúɓahá ŋgáb ndɨ̀ŋ u̧ á ɓetí faám Mèín yi na nùb ə́mní Jwîf du dùnɨ Yèrúsàlèèm, nùb du Jwîf séé yi kwaɓwéetɨ́. Ɗúce nùb du Jwîf séé kpɔ́kɓwê ŋgáb ɓe nɨ́ɨ́b ŋgáb du ɓe kíí á.

²⁸Ɓwâ mɨ ɓa cáàŋnɨ nɨ́ɨ́b kíì, mɨ ɨ́ nàcè ŋgáb mwèìn kùb tɨ ɓáana ŋgáb kɨ́, mɨ a ə́llégì gwɨ̀ì Èspânyə̀, mɨ a tì ə́ə̀ŋndôŋ yɨ́ nyínè.

²⁹Mɨ ɗəəŋtɨ́ ɓwâ mɨ ɓa féínnɨ yɨ́ nyínè, mɨ ɓa nyí gèsònàɓànɨ ndɨ̀ŋnyàáŋ Krístùù á.

³⁰Ɨ́dù, mwin yàá bɨ ə́mní, ɓe ɨ́r Yésù Krístù nò du Kéké nɨ́mè, ɓe ɨ́r ɗûnɨ́m Nyéhè Sarîn du nàniì, nɨ́m mɨ ta nyí ndɨ̀ŋte á rè: ɓwâ nyí du Mèín yóŋnɨ ɓe ɨ́r moò, ɓáaréná mɨ no nɨ́m lɨ̀ɨ̀ŋnáa.

³¹Yóŋnáam Mèín mɨ ɓáíhó̧ nùb Jùdéè du bɨ́ Krístù ə́ə̀mnɨ ɗàwá rɨ ŋgáré, ɗà nùb Mèèín du Yèrúsàlèèm a gàmɓà ɓúúm mɨ du ŋgáb gènànɨ rè mîn.

³²U̧nè á mɨ ɓa féínɓànɨ yɨ́ nyínè ɓe mɨ̀tù, ɓè Mèín ə́əmndé; mɨ a kwàcè ùwí ɓwâ mɨ du mvókín nyínè noò.

³³Mɨ yóóŋ Mèín nò du nànɨ ju ɗóóŋ, ŋgə́ dù ɓe nyí lâs. Àmèn!