Read Vute Nùb róòm 16 Bible Online

Nùb róòm 16 - Vute bible

Nùb róòm 16

¹Fèbê, mwin yàá nɨ́mè péín ə́mní du ə́nnɨ mɨ̀kwìn nùb ə́mní Sàŋkɨ̀réè noò á ná ɗàrɨ́.

²Gamnáam ŋgə́ ɓe ɨ́r Kékéé, hȩ du ɗúnɨ kùb ndɨ̀ŋ mvókín nùb Mèèín noò. Jábɨ́r cutɨ́b ɓa ɗúnɨ nyí kpɔ́k ŋgə́ no rɨ, nyí a kpɔ̂ ŋgə́. Ŋgə́ nɨ̀mɨr ŋgə́ kpɔ́kɓatɨ́ nɨ̀vɨ́tɨ̀b ví̧i̧, nò kù cóóŋ sé mɨ.

³Nyindɨnáam Pɨ̀rìsîl ɓe Àkìlâs, nùb nɨ́me ŋgáb du éínàɓáànɨ Yésù Krístù cúú.

⁴Ŋgáb yi ɓáí kúnɨ àm ɓátɨ mé. Nɨ mɨ mwi̧ sé ɗóò ɨ́ du ŋgáb sáktɨ̀nɨ, mɨ̀kwìn nùb ə́mní lâs du Jwîf séé á ŋgáb sáktɨ̀ɓwênɨ.

⁵Nyindɨnáɓwéem mɨ̀kwìn nùb ə́mní du ɓáànɨ ŋgábè yóò. Nyindɨnáɓwéem Èpàyìnêt ti mó péín ə́mní. Ŋgə́ ɨ́ du nò yàyɨ̀rí ɗɔ̀ɔ́b Àsíì no ya ə́əmyaye Krístùù ru.

⁶Nyindɨnáam Màríyà, ŋgə́ ə́nnaɓatɨ́ nyí cei.

⁷Nyindɨnáam Àndɨ̀rònìkûs ɓe Jùníyàs, nùb mo gbàŋné á, nɨ́me ŋgáb yaá nìrì cúk. Nɨ́me ŋgáb, ŋgáb ya seiyaye bɨ́ nùb ə́mní ru, nùb tómé á cè ɗúɓànɨ àm ŋgábè cei.

⁸Nyindɨnáam ɓwàjìrí moò Àmpɨ̀lɨ̀yàtûs, nɨ́me ŋgə́ á ɓaín ɓe ɨ́r Kékéé.

⁹Nyindɨnáam Ùrbə̧̂, nò nɨ́me ŋgáb du éínàɓáànɨ Krístù cúú, ɓe Sɨ̀tàkîs nò mɨ ɗúɓa ceí.

¹⁰Nyindɨnáam Àpêl, ŋgə́ nò ə́əŋɓa kpéín ɓe ə́mnèé Krístùù. Nyindɨnáam nùb Àrìstòbúùl yóò.

¹¹Nyindɨnáam Hèròdìyôŋ nò mo gbàŋné. Nùb Nààrsíìs yóò du ə́ə̀mnɨ Kékéé, nyindɨnáam ŋgáb.

¹²Nyindɨnáam Tɨ̀rìfên, ɓe Tɨ̀rìfôs nùb du ə́nnànɨ Kékéé, nyí a nyìndɨ̀ɓwê Pèèrsîdə̀ mɨ du ɗúɓàniì, ŋgə́ ə́nnaɓwéetɨ́ Kéké.

¹³Nyindɨnáam Rùfûs, nò Mèín yi caré, ɓe yà nóò, ŋgə́ duɓwée hȩ yà móò á.

¹⁴Nyindɨnáam Àsèìnkɨ̀rît, Fɨ̀lègôŋ, Hèrmês, Pàtɨ̀ròbâs, Hèrmâs ɓe mwin yàá bɨ ə́mní lâs du ɓe ŋgábè.

¹⁵Nyindɨnáam Fìlòlôgə̀ ɓe Jùlí, Nèrê ɓe mwingwi̧ nóò, Òlìmpâs ɓe nùb Mèèín lâs du ɓe ŋgábè.

¹⁶Bɨkuukɨ́náam, nɨ̀mwi̧ a nyìndè kùùŋ. Mɨ̀kwìn nùb ə́mní lâs ók ɓe Krístùù nyindɨsoó nyí.

¹⁷Mwin yàá bɨ ə́mní, mɨ tànà nyí: nùb du bɨ́ gèrénɨ gɔ̀ɔ́ mvókín nùb ə́mní, ŋgáb a ndɨ̀ŋ nùb kɨ́ lɔ̧́tɨ ɓe nyìnnèé ŋgáb du nyìnɓáàŋnɨ ɓe ɨ́r tɔ̀ɔ́ nyí ya ók lɨ, gə́tɨnáam ɓe ŋgáb, həknáɓa nɨ ŋgáb hə̧ə̧́.

¹⁸Ɓetí kúúŋ nùb u̧ kíì, ŋgáb bɨ ə́nnànɨ Krístù nò du Kéké nɨ́mè ɗàà, ŋgáb ə́nna bɨ ɓwɨi ŋgábè á. Ɓe nyààŋ nyindí mbáŋní ŋgábè ɓɔ̧ne á ŋgáb du mbáàŋnɨ nùb cutɨ́b saai ru.

¹⁹Nùb lâs ɗəəŋtɨ́ hȩ nyí du jə̀ŋnɨ Kékéé. Mɨ á cè ókɓànɨ mɨ̀tù cei ɓe ɨ́r nyínè, ɨ́dù mɨ á ɗúnɨ nyí dù ɓe kɨ̀cáàb ɓe ɨ́r ndɨ̧̀ɨ̧́ nyɔ̧né. Nyí a dù kə́sə́k hə̀knɨ ndɨ̧̀ɨ̧́ nɨ́m ɓáŋhɨ́nne.

²⁰Mèín nò du nànɨ ju ɗóóŋ ŋgóobtɨ́ nyí ɗèìŋgírɨ̀kɨ́nànɨ Sátàìn. Mɨ yóóŋ Yésù nò du Kéké nɨ́mè, ŋgə́ nà nyí faám.

²¹Tìmòtê kùŋ mo ə́ré nyindɨsoó nyí. Lùsíyùs, Jàsôŋ, Sòsìpàtéèr nùb mo gbàŋné nyindɨsoɓwéetɨ́ nyí.

²²Mɨ Tèrtíyùs nò tɨince káàtà rèè, mɨ nyindɨsoɓwéetɨ́ nyí ɓe ɨ́r ju ɓaín nɨ́m duná ɓe Kéké nò du nɨ́m ɓáàniì.

²³Gàyûs nò gam gúúr moò, no yó á mɨ duce ɓáànɨ mɨ̀kwìn nùb ə́mní ru, ŋgə́ nyindɨsoɓwéetɨ́ nyí. Hèrâs nò du bâŋmasà kwéè ɓe mwin yàá nɨ́mè Kààrtûs nyindɨɓwéetɨ́ nyí. [

²⁴Ndɨ̀ŋnyàáŋ Yésù Krístù nò du Kéké nɨ́mè dù ɓe nyí lâs. Àmèn!]

²⁵Mgbíí dù ɓe Mèín ɓetí, ŋgə́ á ɓe nyòm taamna nyí ə́ə́m nyínè, ɗóhîn ɓe Kìn Nyɔ̧ɔ̧́ mɨ du tàniì, ɓe kìn mɨ du ɓéènɨ ɓe ɨ́r Krístùù, ɗóhîn ɓwê ɓe kɨ̀cáàb Mèín yi na nɨ́m ɓe ɨ́r ɓwáár ŋgéé yi du yo̧né. Ɓwâ yi tíí, ɓwáár kɨ́ yaá nɨ yo̧ó̧.

²⁶Ɗàrò ɓwáár kɨ́ fó̧gií nɨ́ laŋtɨ̧ɨ̧́ káàtààb tɨ́kɨ̀nɨ́bí no, ɗóhîn ɓe nɨ́m Mèín mɨ̀cɨ̧̀ ta ndɨ̀ŋte. Ɓwáár kɨ́ duna gbàŋ bɨ lâs á, àm ŋgáb a ə́mnè, ŋgáb a jə̀ŋɓwêcè Mèèín.

²⁷Ɓe ɨ́r nɨ́m Yésù Krístù ndɨŋndé, mgbíí dù ɓe Mèín tɨ́k kɨ́ tɨ́k, ŋgə́ mwi̧ ŋgə́ nò du ɓe kɨ̀cáblì. Àmèn!