Read Vute Nùb róòm 5 Bible Online

Nùb róòm 5 - Vute bible

Nùb róòm 5

¹Hȩ Mèín á nɨ́ nɨ́m nùb ɗɨ́ɗɨ̧́ ɓe àm ə́ə́m nɨ́m du ɓe kíí, Yésù Krístù nò du Kéké nɨ́mè ndɨŋtɨ́ nɨ́m dù ju ɗóóŋ ɓe Mèín.

²Ə́ə́m nɨ́m du ɓe kíí ndɨŋtɨ́ ɨnayâna Yésù nà nɨ́m mvókín nɨ́m lə́ ndɨ̀ŋnyàáŋ Mèèín nɨ́m dukɨ́ nó ɗàrò rè no. Nɨ́m duce nɨ́m nànɨ mɨ̀tùú du gíí nɨ́m du sə̀ŋnɨ kwàmèɓànɨ mgbíí Mèèín ndè á.

³Nɨ́m á ókɓàcéyènɨ mɨ̀tù cei ɓwâ nɨ́m du jábɨ́rí, ɓetí nɨ́m ɗəəŋtɨ́ ɨnayâna jábɨ́r á nànɨ mɨ̀súktéín,

⁴mɨ̀súktéín á nànɨ jíhèé kɨhɨri, jíhèé kɨhɨri á cè nànɨ gíí.

⁵Gíí kɨ́ cè nɨ́ nɨ́m mbáàŋnɨ ɗàà, ɓetí Nyéhè Sarîn Mèín ya na nɨ́m ndè á nɨ́m túùmnànɨ ɗûnɨ́m Mèín ya kɨ́kléɓa nɨ́mè njɔ̧̀ne.

⁶Ɓetí ɓwâ nɨ́m yi duye ɓe nyòme ɗàwáá, Krístù yi kúú ɓwâ Mèín yi ɓwállé ɓe ɨ́r nɨ́m nùb du cɨcómbì.

⁷Á ɓà ɓí nɨ̀vɨ́tè ə́mnɨ̀ cwé ɓe ɨ́r nò ɗɨ́ɗɨ̧́. Duú ɓe ɨ́r nò njɔ̧̀ nyɔ̧né, á sàmàìn nɨ̀vɨ́tè ə́əmhá kúniì.

⁸Ɨ́dù Mèín túumnatɨ́ nɨ́m ɗûnɨ́m ŋgə́ ɗú nɨ́mè, ɓetí ɓwâ nɨ́m yi duye cɨcómbì, Krístù yi kúú ɓe ɨ́r nɨ́mè.

⁹Cwá ŋgə́ kú hȩ satɨgàà ndɨŋtɨ́ nɨ́m dù Mèèín tíí nùb ɗɨ́ɗɨ̧́. Kɨ́ ŋgə́ ɓa nɨ́m pààhó̧kɨ́nɨ njùŋ Mèèín noò á ŋgə́ tɨ̀ dugɨ nɨ́ ndɨ̀ŋ ndu à?

¹⁰Nɨ́m yɨɨ́m nùb ɓi̧ní Mèèín á, ɨ́dù ŋgə́ ɨ́ ndɨ̀ŋ ju nyàáŋ sə̀mcù mvókín nɨ́me ŋgábè, ɓe cwá mwin nóò ya kú kɨ́, ɗóògɨ̀ ɗàrò nɨ́me ŋgáb ducɨ nyɔ̧ɔ̧́ rè, mè mwin nóò du ɓe kí rè a dùgɨ̀ nɨ́ nɨ́m ɓátɨ̀r à?

¹¹Cáŋhȩ̀ kɨ́ nɨ kí sé. Nɨ́m á óknɨ mɨ̀tù ɓe Mèín, ɓetí Yésù Krístù nò du Kéké nɨ́mè nyaaŋcutɨ́ nɨ́me Mèín bɨ.

¹²Nɨ̀vɨ́tè mwi̧ ya geróó cum ɗɔ̀bín, cum ɨ́ gèróndóŋcè cwé, nò kɨ́ yɨɨ́m Àdâm á. Hȩ dùnɨ u̧nèé, nùb lâs du bɨ nùb ɓa kúnɨ kú̧ne á, ɓetí nùb lâs comtɨ́.

¹³Mèín ma Mòyîs ɓíì nàɓàyèwá, cum yaá cɨ̀ nɨ ku. Ɨ́dù hȩ ɓíì yi du nɨ́ ɗàwáá, Mèín yi nɨ́ góòmnɨ íí cumí ya ɗàà.

¹⁴U̧ kɨ́, yànɨ ɓwâ Àdáàm, há̧á̧ ɓwâ Mòyíìs, cwé yaá ŋgáŋnɨ nɨ̀vɨ́tɨ̀b ya, dùgɨ̀ nùb ya du còmwáá ya, hȩ Àdâm nò ya jaaŋkɨ́ɓa ɓíì Mèèín ndɨ. Àdâm yaágèhá hȩ nò yi ɓa gòniì.

¹⁵Ɨ́dù kum Àdáàm nɨ hàrák ɓe nyər Mèín du nànɨ kɨ́ samí ɗàà. Á mè u̧, nɨ̀vɨ́tɨ̀b ví̧i̧ ya kúú ɓe ɨ́r cum nò mwi̧ kíì, ɨ́dù ndɨ̀ŋnyàáŋ kàm Mèín ya túumna nɨ̀vɨ́tɨ̀b ví̧i̧ ɓe ɨ́r nɨ̀vɨ́tè mwi̧, Yésù Krístù rè á nɨ́ jíri cei.

¹⁶Nɨ́m nyər Mèín naré du ndɨ̀ŋniì á nɨ́ nyin, kɨ́ cum nɨ̀vɨ́tèé du ndɨ̀ŋniì á cè nɨ́ nyin. Cum nɨ̀vɨ́tè mwi̧ yi ndɨŋndé yi gewotɨ́ ŋgù̧ú̧, ŋgù̧ú̧ ɨ́ bɨ̀cê nɨ̀vɨ́tɨ̀b. Ɨ́dù, dugɨ hȩ ŋgáb ya ndɨŋ cum ví̧ne, nyər Mèín du nànɨ kɨ́ samí ɨ́ gò ŋgáb ɓátɨ̀nɨ.

¹⁷Yàwòó cum nɨ̀vɨ́tè mwi̧í̧ ya kwe, ɓe ɨ́r nɨ̀vɨ́tè mwi̧ kíì, cwé ya ŋgáŋtɨ́ nɨ̀vɨ́tɨ̀b ya. Ɨ́dù ɓe ɨ́r Yésù Krístù mwi̧í̧, nɨ́m á kwàɓànɨ nɨ́ɨ́b ví̧i̧. Ŋgə́ á nɨ́m túùmnàɓànɨ ndɨ̀ŋnyàáŋ noò, ŋgə́ a ndɨ̀ŋ nɨ́m dù no íhín nùb ɗɨ́ɗɨ̧́. Ɓe ɨ́r Krístùù, nɨ́m kwá du ɓe mè mɨ̀cɨ̧̀.

¹⁸Hȩ du u̧ kɨ́, cùr cum Àdáàm, nɨ̀vɨ́tè mwi̧ ya ndɨŋ ŋgù̧ú̧ bɨ̀ nɨ̀vɨ́tɨ̀b lɨ, u̧ á ɓwê ə́r hàrák, Yésù nɨ̀vɨ́tè mwi̧ ya ə́llé ndɨŋtɨ́ nɨ̀vɨ́tɨ̀b sèì Mèèín íhín nùb ɗɨ́ɗɨ̧́, ŋgáb a dù ɓe mè mɨ̀cɨ̧̀.

¹⁹Jɨ̀ sàkɨ̂ Àdâm nɨ̀vɨ́tè mwi̧ ya ndɨŋ nɨ̀vɨ́tɨ̀b ví̧i̧ sèì cɨcóòm ndɨ, u̧ á ɓwê jɨ̧ Yésù Krístù nɨ̀vɨ́tè mwi̧ ɓa ndɨ̀ŋɓwênɨ nɨ̀vɨ́tɨ̀b ví̧i̧ sèì nùb ɗɨ́ɗɨ̧́ Mèèín íhín.

²⁰Ɓíì ya léé mvókín ndɨ̀ŋyàáŋ ɓe cumí, àm kum nɨ̀vɨ́tɨ̀bì a vîí. Ɨ́dù yɨ́ cum yi víré, ndɨ̀ŋnyàáŋ Mèèín yi víndóŋɓwéeceé.

²¹U̧nè ɓwê, jɨ̀ cum ya du ɓe nyòm ndɨŋ nɨ̀vɨ́tè kúte, u̧ á ɓwê ndɨ̀ŋnyàáŋ Mèèín du ɓe nyòm ndɨŋ nɨ̀vɨ́tè sèì nò ɗɨ́ɗɨ̧́ Mèèín tíí, àm geré nɨ́m mè mɨ̀cɨ̧̀ɨ̧́ ɓe ɨ́r Yésù Krístù nò du Kéké nɨ́mè.