Read Vute Nùb róòm 8 Bible Online

Nùb róòm 8 - Vute bible

Nùb róòm 8

¹Ɗàrò, nùb du bɨ́ ɓaín ɓe Yésù Krístùù, ŋgwìn Mèèín tɨ̀ nɨ ŋgáb bɨ̀ɓàcɨ̀r.

²Ɓetí nyòm Nyéhè Sarîn du nànɨ mè ɓe ɨ́r ju ɓaín ɓe Yésù Krístùù céínhó̧tɨ́ mɨ ɓíì du mɨ gèrénɨ cumí mɨ a kû no.

³Yi nɨ́ sàmàìn ɓíì Mòyíìs ndɨŋ nɨ́m kíì ɗàà, ɓetí njɔ̧̀ gó̧o̧ nɨ̀vɨ́tɨ̀bì yi harií nɨ́ ŋgə́. Ɨ́dù Mèín ndɨŋtɨ́ nɨ́m kɨ́, ŋgə́ tómwoó mwin nóò, mwin nó kɨ́ ɨ́ áwò síí cɨcómbì, gònɨ céínhó̧nɨ cɨcóòm nì̧ì̧ cumí no. Ɓe ndɨ̧̀ɨ̧́ u̧nè kɨ́, Mèín kwíikíí nyòm cumí yi du nɨ̀vɨ́tèé só ŋgáŋniì.

⁴Ŋgə́ yi ndɨŋ nɨ́m kɨ́ u̧ àm nɨ́m a dù ju ɗɨ́ɗɨ̧́ hȩ ɓíì du ɗúniì á. Yɨ́ kɨ́ ɓè, Nyéhè Sarîn ɨ́ ducɨ nɨ́ nɨ́m kɨ́ɨ́nɨ ru, nɨ mɨ̀lə́m nɨ̀vɨ́tèé sé cɨ̀.

⁵Ɓetí nùb du bɨ́ dùnɨ ju hȩ mɨ̀lə́m ŋgáb nɨ̀mibi ɗúré, ndɨŋháce bɨ́ nɨ́m mɨ̀lə́m kɨ́ du ɗúniì. Ɨ́dù nùb duce bɨ́ dùnɨ ju hȩ Nyéhè Sarîn duré, ndɨŋháce bɨ́ nɨ́m Nyéhè Sarîn kɨ́ du ɗúniì.

⁶Ndɨ̧̀ɨ̧́ nɨ́m mɨ̀lə́m wu nɨ̀mɨ́rí ɗúré á gèrénɨ cwéé. Ɨ́dù ndɨ̧̀ɨ̧́ nɨ́m Nyéhè Sarîn ɗúré á nànɨ mè ɓe ju ɗóóŋ.

⁷Nùb mɨ̀lə́m ndɨ̧̀ɨ̧́ nɨ́ɨ́b ŋgáb nɨ̀mibi du kɨ́ɨ́niì du bɨ nùb Mèèín ɓi̧ní á. Ŋgáb bɨ jə̀ŋnɨ ɓíì Mèèín ɗàà, sàmàìn ŋgáb jəŋɓacéye ɓíì kíì ɗàà.

⁸Nùb mɨ̀lə́m ŋgáb nɨ̀mibi du kɨ́ɨ́niì sàmàìn nyaŋ Mèín sumíì ɗàà.

⁹Ɨ́dù kɨ́ nyínè, nyí nɨ ndɨ̀ŋnɨ nɨ́ɨ́b mɨ̀lə́m nyí nɨ̀mibi ɗúré ɗàà, ɓetí Nyéhè Mèèín á nɨ́ nyínè só. Nò du nɨ́ ɓe Nyéhè Krístùù só ɗàwáá nɨ óknɨ ɓe ŋgə́ ɗàà.

¹⁰Nyí ɨ́ dù ɓaín ɓe Krístù, dugɨ hȩ síí nyínè du nɨ́m ɓa kúnɨ kú̧u̧ ɓe àm cumí, Nyéhè Mèèín á nɨ́ nyínè só jáŋ, ɓetí Mèín ndɨŋtɨ́ nyí dù no íhín nùb ɗɨ́ɗɨ̧́.

¹¹Mèín ya səəmcuhó̧tɨ́ Yésù mvókín nɨ̀kwíbí. Hȩ Nyéhè Mèèín dùnɨ nyínè sóò, ɓe nyòm Nyéhè noò, ŋgə́ ɓa nàɓwênɨ síí nyínè du nɨ́m kú kú̧ne rè mè á.

¹²Hȩ dùnɨ u̧nèé, mwin yàá bɨ, nɨ́m duɓa ɗúnɨ nɨ́m ndɨ̀ŋte á ku, ɨ́dù nɨ tàwá nɨ́m ndɨ̀ŋnà nɨ́m kɨ́ mɨ̀lə́m nɨ́m nɨ̀mibi, àm nɨ́m a dù hȩ mɨ̀lə́m nɨ́m nɨ̀mibi du ɗúniì.

¹³Ɓetí nyí ɨ́ dù dùnɨ ju hȩ mɨ̀lə́m nyí nɨ̀mibi ɗúré, nyí ɓa kúnɨ á. Ɨ́dù, ɓe nyòm Nyéhè Sarɨ́nne, nyí ɨ́ kwíìkî ɗɨ́m cumí nyínè kɨ́, nyí ɓa dùnɨ ɓe mè tɨ́k kɨ́ tɨ́k á.

¹⁴Nùb lâs Nyéhè Sarîn du gèniì du bɨ munɨ́b Mèèín á.

¹⁵Ɓetí Nyéhè nyí yi gamndé nɨ Nyéhè du ndɨ̀ŋnɨ nyí dù mbɔ́klɨ́b, nyí a dùcùkwàcì ɓe vùklì nɨ sé, ɨ́dù du nɨ Nyéhè Sarîn nò du ndɨ̀ŋnɨ nɨ́m sèì munɨ́b Mèèín, nɨ́m a tà: «Yée, bɨ̀bá!» rɨ á.

¹⁶Nyéhè Sarîn nɨ̀mɨr á nɨ́m tànànɨ ɨnayâna nɨ́m munɨ́b Mèèín á.

¹⁷Nɨ́m munɨ́b noò á. Hȩ nɨ́m dùnɨ munɨ́b noò, nɨ́m ɓa kwàɓwênɨ nyɔ̧ɔ̧́ ŋgə́ ya ɓwáína gbàŋ noò á. Nɨ́me Krístù bɨ ɓa kwàɓáànɨ nyɔ̧ɔ̧́ kɨ́ cúk á. Nɨ́m ɨ́ dù pə́ɓáànɨ jábɨ́r ɓe ŋgə́, nɨ́m ɓa kwàɓáànɨ mgbíí ɓe ŋgə́ á.

¹⁸Mɨ ɗəəŋtɨ́ jábɨ́r nɨ́m du pénɨ ɗàròò sàmàìn ɗóhɨ ɓe ju mgbíhɨ́rí Mèín ɓa nɨ́m túùmnàniì ɗàà.

¹⁹Nɨ́ɨ́b lâs Mèín yi nyaaŋndé á móŋkɨ́ɓànɨ mvókín Mèín ɓa túùmnɨ mgbíí munɨ́b noò noò.

²⁰Nɨ́ɨ́b Mèín ya nyaaŋndé lâs yi guréé bɨ́ nyòm du nɨ́ ɓe bɨ̀ɨ̀r kù ɗàwáá ŋgáré. Nɨ ŋgáb nɨ̀miib sé yi ɗú, Mèín yi kɨ́klé nɨ́ ŋgáb nyòm kɨ́ no ku ru. Nɨ́m mwi̧ gíí á háyè ku.

²¹Nɨ́ɨ́b lâs Mèín ya nyaaŋndé, Mèín kwá céínhó̧kɨ́ ŋgáb nyòm ɓáŋhîn du ŋgáb gèrénɨ nìrì rè no, ŋgáb a dùɓà mvòŋsòòŋ, ŋgáb a kwàɓwéhè mgbíí àm ŋgáb du munɨ́b Mèèín.

²²Nɨ́m ɗəəŋtɨ́, ɗàrò ɗɔ̀ɔ́b lè bɨ̂ŋ á ɓe jábɨ́r hȩ ɓwâ nɨ̀gwi du ndáŋnɨ ɓe yînɨ́m fù̧ní rɨ.

²³Ɨ́dù nɨ tàhó̧ɗóòwá ɗɔ̀ɔ́b lè bɨ̂ŋ, dùgɨ̀ nɨ́m nùb kwacɨ Nyéhè Sarîn du nyər yàyɨ̀rí Mèín du nàniì rè, nɨ́m á ɓwê ɓe yînɨ́m sumí, ɓwâ nɨ́m duye móŋkɨ́nɨ Mèín ndɨ̀ŋ nɨ́m sèì munɨ́b noò, ɗà nɨ́m a dùɓà mvòŋsòòŋ ndè.

²⁴Ɓetí nɨ́m ɗəəŋtɨ́ kùb yi ɓátɨcií bɨ́ nɨ́m. Nɨ́m dukɨ́cɨ nɨ ɓe gíí á. Ɨ́dù wu ɨ́ pə́cì wú nɨ́m wu tɨ du sə̀ŋnɨ gíí ní ɓa péniì, ma nɨ gíí sé cɨ̀. Na ɨ́ fɨ́tɨ sə̀ŋnɨ gíí ní ɓa pénɨ nɨ́m kù, u̧ kɨ́ ŋgə́ ma pə́kɨ́ nɨ́m kɨ́?

²⁵Ɨ́dù nɨ́m ɨ́ dù sə̀ŋnɨ gíí nɨ́m ɓa pénɨ nɨ́m kwè, njɔ̧̀ nɨ́mè tɨ̀ dukɨ́há yá.

²⁶U̧ á ɓwê Nyéhè Sarîn du gònɨ nɨ́m kpɔ́knɨ, ɓetí nɨ́m á gó̧o̧, nɨ́m nɨ ɗə̀ə̀ŋwá yóŋnɨ Mèín hȩ du ɗúniì. Ɨ́dù Nyéhè á nɨ́m ɓwèìnànɨ nɨ́ɨ́b yɨ́ Mèèín ɓe dú̧ cúk, wèré ɓɔ̧ɔ̧ a yà ŋgə́ yɔ́knɨ.

²⁷Mèín nò ɗəəŋce njɔ̧̀ nɨ̀vɨ́tɨ̀bì, ɗəəŋtɨ́ nɨ́m Nyéhè Sarîn ɗú ŋgáb ɓwèìnàniì, ɓetí Nyéhè Sarîn yóŋ nɨ́ ɓe ɨ́r nùb ók ɓe Mèèín hȩ Mèín nɨ̀mɨ́r ɗúré á.

²⁸Nɨ́m nɨ́m ɗəəŋndé á rè: Nùb du ɗúnɨ Mèèín, Mèín á hə̀llénɨ ŋgáár nɨ́ɨ́b ŋgáb du ndɨ̀ŋniì no àm a fó̧nà ŋgáb mɨ́nne. Nùb kɨ́ Mèín ya ɓé nɨ́ ŋgáb ɗóhîn ɓe ɓwáár noò á.

²⁹Ɓetí nùb Mèín ya cakɨ́yaye tíí rɨ, ŋgə́ ya takɨ́yacií nɨ́ ɨnayâna ní ɓa ndɨ̀ŋnɨ ŋgáb dù hȩ mwin níì á, àm mvókín ŋgábè no mwin níì kɨ́ a dù mwin ŋgwéé.

³⁰Nùb ŋgə́ ya takɨ́yaye tíí ní ɓa ndɨ̀ŋnànɨ nɨ́ɨ́b kíì, ŋgə́ ya ɓéɓwéetɨ́ ŋgáb; nùb ŋgə́ ya ɓé kɨ́, ŋgə́ ya ndɨŋɓwéetɨ́ ŋgáb sèì no íhín nùb ɗɨ́ɗɨ̧́; nùb ŋgə́ ya ndɨŋce sèì no íhín nùb ɗɨ́ɗɨ̧́ kɨ́, ŋgə́ ya naɓwéetɨ́ ŋgáb mgbíí noò.

³¹Nɨ́m ma ɓa tàkwànɨ i̧? Hȩ Mèín dùnɨ nɨ́m kpɔ́niì, nò fɨ́tɨkwa nɨ́m ɓánniì nɨ ɗàà.

³²Mèín ya nɨ́ mwin ŋgə́ nɨ̀mɨ́rí jábɨ́rí pààhó̧kɨ́wa, ɨ́dù ŋgə́ ya gɔkkíí ŋgə́ hȩ satɨgà ɓe ɨ́r nɨ́m lâs. I̧ á, ɓe ɨ́r mwin nó kíì ŋgə́ tɨ̀ dukwacɨ nɨ́m nɨ́ɨ́b lâs nàr?

³³Nò kù sàmàìn gbándɨ nùb Mèín ya caré ɗàà, ɓetí Mèín nɨ̀mɨ́r ɨ́ á ɓa nɨ́ ŋgáb ánɨ no íhín nùb ɗɨ́ɗɨ̧́ ru.

³⁴Nò kù sàmàìn ta àm bií ŋgábè nɨ ɗàà, ɓetí Yésù Krístù du nò yi kú, ɨ́ sə̀ə̀mcùhô̧, ɗà ɨ́ gì dùnɨ ŋgáár lam Mèèín noò á. Ŋgə́ á cè yóŋnɨ Mèín ɓe ɨ́r nɨ́mè.

³⁵Ní ɨ́ fɨ́tɨ nɨ́m gɔ̀ɔ̀kɨ́nɨ ɓe ɗûnɨ́m Krístùù? Jábɨ́r kèè, yînɨ́m sumíì? Jábɨ́r péín ə́mní kèè cɨ̧̀? Tii kèè, ju ŋgwé cwéé yaà? Kèè cwé bɨ̂ŋ? Ɗàɓàwá!

³⁶Ɓetí káàtà Mèèín á wáànɨ ɨnè: «Ɓe ɨ́r woò, nɨ́m á ɓwâ lâs ŋgwé cwéé ya, nɨ́m á hȩ jírɨ́b kùb du gènɨ ténniì.»

³⁷Ɨ́dù, ɓe vùùm nɨ́ɨ́b du nɨ́m féínnànɨ kɨ́ lâs, nò du nɨ́m ɗúniì á nɨ́m nànɨ nyòm nɨ́m ɓeiɓa nɨ́ɨ́b kɨ́ suu.

³⁸Ɓetí mɨ ɗəəŋɓatɨ́ ɨnayâna sàmàìn nɨ́m kù gɔɔkɨ́ nɨ́m ɓe ɗûnɨ́m nóò ɗàà. Nɨ́m dùgɨ̀ jáŋ, nɨ́m dùgɨ̀ kúri, dùgɨ̀ dùgallɨb, dùgɨ̀ nyòme ɓe nùb du kɨ́ɨ́nɨ ɓɨllɨnne, dùgɨ̀ ɗàrò, dùgɨ̀ cɨ́m yȩné.

³⁹Nyòm kɨ́ dùsógɨ̀ ɓɨllin, dùwúgɨ̀ ɗɔ̀bín, dùgɨ̀ nɨ́m nyaŋhîn ŋge, nɨ́m kù sàmàìn gɔɔkɨ́ nɨ́m ɓe ɗûnɨ́m Mèín yi túmne Yésù Krístù nò du Kéké nɨ́mè yaà ɗàà.