Read Vute Nùb róòm 9 Bible Online

Nùb róòm 9 - Vute bible

Nùb róòm 9

¹Mɨ taɓa mɨ àmɨɨr á, cè nɨ́ kààŋ sé, ɓetí mɨ ók mɨ́ ɓe Krístù á. Njɔ̧̀ moò, ɓe nyòm Nyéhè Sarɨ́nne, á mɨ tànàɓwênɨ nɨ àmɨɨr á.

²Mɨ á ɓà ɓwâ lâs ɓe yînɨ́m sumí cei.

³Mɨ á ɗúɓànɨ ɓè Mèín ákɨ́ɓaye mɨ íí ya, ɗà nɨ́me Krístù a gɔ̀klè, àm mwin yàá bɨ moò a dù mɨ́nne. Ŋgáb ɓwê Jwîf bɨ hȩ mɨ á.

⁴Ŋgáb nùb gbàŋ Ísràyéèl á. Mèín ndɨŋtɨ́ ŋgáb dù munɨ́b noò, á ŋgə́ gɨ dùnɨ ju mgbíhɨ́rí noò mvókín ŋgábè no; ŋgə́ yi kwéítɨ́ jin nyàáŋ ɓe ŋgáb, ɗà ŋgə́ ɨ́ nà ŋgáb ɓíì Mòyíìs, ŋgə́ ɨ́ túùmnà ŋgáb hȩ kùb fɨ́tɨ ɗómnɨ Mèèín, ŋgə́ ɨ́ ɓwáínà ŋgáb ɓwáár.

⁵Ŋgáb du nyȩrɨ́b tákɨ̀rɨ́bí á, Krístù cè, kɨ́ ŋgə́ du nɨ̀vɨ́tèé, ŋgə́ du nò ŋgábè gbàŋné á, ŋgə́ nò ndóŋ nɨ́ɨ́b lâs. Nɨ́m ŋgə̀mná Mèín ɓwâ lâs. Àmèn!

⁶Mɨ tàwá ɨnayâna ɓwáár Mèèín lɔ̧́séé ɗàá sam, ɓetí nɨ nùb Ísràyéèl lâs sé dumeɓa nùb Ísràyéèl.

⁷Nɨ nyȩrɨ́b Àbɨ̀ràháàm lâs sé dumeɓa nyȩrɨ́b noò, ɓetí Mèín ya tanaá Àbɨ̀ràhâm ɨnè: «Ìsâk ɨ́ ɓa dùnɨ nò kwá feinna wu nyȩrɨ́b mɨ ya ɓwáína wé ru.»

⁸Kí ta ɨnayâna nɨ munɨ́b kùb fein hȩ nùb lâs du fènniì sé ɨ́ du munɨ́b Mèèín, jɔ̀sé munɨ́b kùb fein ɗóhîn ɓe ɓwáár Mèèín ndɨ ɨ́ du munɨ́b àmiib ru.

⁹Ɓetí Mèín ya nyintɨ́ ɓwáár noò no ɨnè: «Mɨ á cùwònɨ hò̧ dáín cùrìì mvókín ndè no ɓwê, gwi woò Sárà ɓa ce dùnɨ ɓe mwin ŋgáré á.»

¹⁰Cáŋhȩ̀ kɨ́ nɨ kí sé. Munɨ́b Rə̀békàà bɨrɨ́b lâs yaá tá mwi̧. Yɨɨ́m Ìsâk tákɨ̀r nɨ́mè ndùtì ndútí á.

¹¹Ɨ́dù Mèín á nɨ́ ɓe ɓwáár noò, ɓwâ ŋgə́ du cànɨ nɨ̀vɨ́tɨ̀bì. Cɨca nó kɨ́ ɗoŋwo nɨ ɓə́r ŋgə́ ɓé ŋgábè ya á, nɨ ɗòŋwòwá nɨ́ɨ́b ndɨ̧ɨ̧́ ŋgábè ya. Mèín ɗúú túùmnɨ ɨnayâna ní á jə̀ŋnɨ ɓwáár níì, á ŋgə́ yi tana Rə̀békà nɨ́m ɓa ndóŋniì. Ɓwâ kɨ́ Rə̀békà munɨ́b no bɨrɨ́b lè fèìnɓàyèwá, kí ta munɨ́b no bɨrɨ́b kɨ́ ya bɨ́ nɨ́m kù ndɨ̀ŋɓàyèwá, dùgɨ̀ ɓáŋhîn, dùgɨ̀ nyɔ̧ɔ̧́ yáá na á. Ŋgə́ ya tanaá Rə̀békà ɨnè: «Nò kɨ̀jíri kwá éína nò mutí.»

¹³Káàtà Mèèín á wáànɨ ɨnè: «Mɨ yi ɗúú Yákòb mɨ ɨ́ mbɨ̂ Èsáyù.»

¹⁴Nɨ́m ma ɓa tànɨ Mèín nɨ ɗɨ́ɗɨ̧́ ɗàwá á hàye? Ɗàɓàwá!

¹⁵Ɓetí ŋgə́ ya tanaá Mòyîs ɨnè: «Nò mɨ ɗú óknɨ mwàmí, mɨ ɓa ŋgə́ óknɨ mwàm á; nò mɨ ɗúce túùmnànɨ nyàŋnjɔ̧̀ moò rɨ, mɨ ɓa ŋgə́ túùmnànɨ á.»

¹⁶Cɨca Mèín du cànɨ nɨ̀vɨ́tèé nɨ àm nò kɨ́ ɗúré sé, cè nɨ́ nɨ́ɨ́b ndɨ̧ɨ̧́ nò kíì ya ɗòŋwòwá, du nɨ àm Mèín du nɨ́ ɓe mwàmí á.

¹⁷Káàtà Mèèín no, Mèín wáanaá mvèìn jíri Èjíìbtə̀ ɨnè: «Mɨ bɨwúɓa wu, wu dù mvèìn jíri, túùmnànɨ nùb lâs nyòm kàm moò á, ɗà wúúm moò a èrè ɗɔ̀ɔ́b lè bɨ̂ŋ.»

¹⁸Hȩ dùnɨ u̧nèé, Mèín á óknɨ nò ŋgə́ ɗúré mwàm. Nò ŋgə́ ɗúce dù ɓe njɔ̧̀ ɗèìntóo rɨ, ŋgə́ a ndɨ̀ŋ njɔ̧̀ nò kíì dù u̧.

¹⁹Nò kù ɓa mɨ fɔ́nɨ ɨnè á: «Hȩ du u̧ kɨ́, Mèín ma yetɨkwacɨ nɨ̀vɨ́tɨ̀b ɓe àm níì? Hȩ du nɨ́ sàmàìn nò kù harɨ ŋgə́ ndɨ̀ŋnɨ nɨ́m ŋgə́ ɗúré ɗàwá rè?»

²⁰Ɨ́dù, wu a cè na, wu nɨ̀vɨ́tè, ndɨ̀ŋnɨ mɨ̀sə̧̀ə̧́ ɓe Mèín? Na yi ókkɨ́céye yɨ́ nu yi fɔ́ nò yi ma ŋgéé ɨnè: «Wu ma ce mɨ ɨnè àm níì?»

²¹Nò ma nuù á ndɨ̀ŋnɨ nɨ́m ŋgə́ ɗúré ɓe mè kɨ́. Ɓe mè mwi̧ kɨ́, ŋgə́ á mànɨ nɔk kùb éí ə́r nó ye dɨmɨri, ŋgə́ a màɓwê nɔk kùb éí ə́r nó ye lâs.

²²Mèín yi ɗú túùmnɨ njùŋ noò, ŋgə́ a ndɨ̀ŋɓwê kùb ɗə̀ŋhɨ̀ ɨnayâna ní á ɓe nyòme á. Ŋgə́ yi jíiɓatɨ́ nùb yi na ŋgə́ njù̧ú̧, yi duce ɗóhîn ɓe ndunduú.

²³Nùb ŋgə́ du óknɨ mwàmí, nùb ŋgə́ ya nyaaŋkɨ́cɨ àm gam mgbíí noò, ŋgə́ ya ɗútɨ́ nùb kɨ́ túùmnànɨ mgbíí kàm no kɨ́.

²⁴Ɓetí nɨ́m du nùb ŋgə́ ya ɓéré á; nɨ tàhó̧ɗóòwá mvókín Jwîf bɨ no, duɓwée nɨ mvókín gbààŋ bɨ lâs no á.

²⁵Ɓàcéyè Mèín wáatɨ́ káàtà Òsê yi tɨnndé no ɨnè: «Gbàŋ ya du Gbàŋ moò séé, mɨ ɓa ŋgə́ ɓénɨ Gbàŋ moò á. Ti mɨ ya du ɗúnɨ ɗàwáá, mɨ a ɓécê ŋgə́ ti mó ɗûnɨ́mí.

²⁶Mɨ̀yɨ́ Mèín ya tanace ŋgáb ɨnè: ‹nyí nɨ gbàŋ moò sé› rɨ, yɨ́ kɨ́ ɓàgɨ̀ á Mèín ɓa ŋgáb ɓénɨ munɨ́b Mèín nò du jááŋ.»

²⁷Kɨ́ Èsáyàà cè, ŋgə́ taá ɓe ɨ́r gbàŋ Ísràyéèl ɨnè: «dugií hȩ nùb Ísràyéèl duɓa ví̧i̧ hȩ sasé gín mɨ̀kwehɨ̀rí, nùb cutɨ́b kù ɨ́ ɓa ɓáíhó̧ɗóònɨ ru.

²⁸Ɓetí ŋgwìn Mèín ta ní á ŋgwìnnɨ nùb ɗɔ̀bɨ́nné kɨ́, ŋgə́ tɨ̀ nɨ ɗà̧nɨ̀r, ŋgə́ ɓace nɨ́ ŋgwìnmènɨ á.»

²⁹Èsáyà mwi̧ kɨ́ ya taɓwéeyeé ɨnè: «Mèín nò du ɓe nyòme lâs ya dùyè nɨ́m nyȩrɨ́b kù mbɨ́knàwá, nɨ́m yè settɨ́ nùb Sòdóòm,[1] nɨ́m yè á hȩ nùb Gòmóòr.»

³⁰Nɨ́m ma ɓa tànánɨ ɨna? Nɨ́m tàná ɨnè: nùb du bɨ́ Jwîf sé, yi du bɨ́ mánɨ ju ɗɨ́ɗɨ̧́ Mèèín íhín ɗàwáá, Mèín yi áá ŋgáb nùb ɗɨ́ɗɨ̧́ ɓe ə́ə́m ŋgáb yi du ɓe kíí,

³¹u̧ kɨ́, nùb gbàŋ Ísràyéèl, yi du mánɨ vúm dù Mèèín íhín nùb ɗɨ́ɗɨ̧́ ɓe tùú ɓíhɨ̀bì, jə̧̀ə̧́ ɓíhɨ̀bì ŋgábè kɨ́ ɨ́ dùhà nɨ́ ŋgwé kɨ́kwa ye!

³²Àm níì á yi duce nɨ́ ŋgwé kɨ́kwa? Àm ŋgáb yi du bɨ́ mánɨ ju ɗɨ́ɗɨ̧́ Mèèín tíí ɓe ə́ə́m ŋgábè ɗàwáá á, ŋgáb yaá lə́ə̀mnɨ vúm á Mèèín sumí nyɔ̧ɔ̧́ ɓe nɨ́m vúm du ndɨ̀ŋniì. Ŋgáb mátií bɨ́ gusɨ̀r sɨkli ya.

³³Á tɨín káàtà Mèèín no ɓe ɨ́r gàŋ kíì ɨnè: «Mɨ kɨ́ɨ́ sɨɨ kùb mátɨ gusɨ̀r yaà Sìyôŋ. Sɨɨ kɨ́ á ndɨ̀ŋnɨ nɨ̀vɨ́tɨ̀b gùu. Ɨ́dù nò səŋ gíí ɓe sɨɨ kíì sə̀ré tɨ̀ nɨ ŋgə́ bɨ̀r.»