Read Vute 1 Nùb Kòréèntə̀ 10 Bible Online

1 Nùb Kòréèntə̀ 10 - Vute bible

1 Nùb Kòréèntə̀ 10

¹Mwin yáà bɨ ə́mní, mɨ á ɗúnɨ nyí lə́ə̀mcùyè nɨ́m ya ndóŋ ɓe tákɨ̀rɨ́b nɨ́mè, ŋgáb a cè gùrí ɓe Mòyîs. Mèín yaá ŋgáb gə́tɨ̀gènɨ ɓe ɓàk kàm kù, ɗà ŋgáb ɨ́ gì pènɨ mɨ̀kwehɨ̀r jandîn[3]

²Gwɨ̀ì ŋgáb ya gɨ ɓàk kɨ́ no, ɓe pèé ŋgáb ya pe mvúm kɨ́ ɨ́ ndɨ̀ŋ ŋgáb dù ɓaín ɓe Mòyîs hȩ ŋgáb kɔkɓwéetɨ́ kɔ ə́mní rɨ u̧.

³Ŋgáb lâs, ŋgáb yi taŋɓáatɨ́ cɔŋ Mèín yi tómworé,

⁴ŋgáb ɨ́ mèìɓáàɓwéhè mvúm Mèín yi tómworé. Ŋgáb yi mei mvúm kɨ́ ɓé yi du nyòm Mèèín yi háakom ŋgábè ya á, nyòm kɨ́ yɨɨ́m Krístù á.

⁵Dugɨ u̧, ví̧i̧ mvókín ŋgábè noò yi bɨ́ Mèín sumí nyàŋwá, àm kɨ́ á ŋgáb yi nduk ti súmnií ku ru.

⁶Nɨ́ɨ́b ya ndóŋ kɨ́ duna nɨ́m túúm á, àm nɨ́m tɨ̀ du ɓe mɨ̀lə́m ɓáŋhɨ́b njɔ̧̀ɔ̧ hȩ ŋgáb ya du ɓe kí kɨ́.

⁷Nɨ ɗúwa nyí yàréɓwê yóŋnɨ mèín nyaŋhɨ́b hȩ nùb kù mvókín ŋgábè noò ya yóŋndé, ɓetí á tɨín káàtà Mèèín no ɨnè: «Ŋgáb ya duréé ɗàá, ŋgáb ɨ́ tàŋ, ŋgáb ɨ́ mə̀r ɗà ŋgáb ɨ́ éíwúgì wòrí.»

⁸Nɨ ɗúwa nɨ́m lèèréná síí nɨ́mè ŋguùŋ du nànɨ sə̀réé no, hȩ nùb kù mvókín ŋgábè noò ya ndɨŋ, ɗà nɨ̀vɨ́tɨ̀b tɔ́sìn vɨríí ɨ́ taarɨ́b ɨ́ ndùk ye mwi̧ rɨ́.

⁹Nɨ ɗúwa nɨ́m kə̀hɨ̀ná Kéké, hȩ nùb kù mvókín ŋgábè noò ya ndɨŋ, ɗà nyó̧nɨ́b ɨ́ nóómè ŋgáb, ŋgáb ɨ́ ndùk lɨ.

¹⁰Kɨ́ cáŋhɨ̀rí, nɨ ɗúwa nyí dù ɓe nyì̧í̧ hȩ nùb kù mvókín ŋgábè yi du ɓe kí, ɗà dùgal kwíhɨ nɨ̀rì ɨ́ ndùùkî ŋgáb lɨ.

¹¹Jábɨ́r bɨ kɨ́ ya féínteena ŋgáb u̧ nànɨ nùb kù túúm á. Kùb ya ti̧nɨ nɨ́ɨ́b kɨ́ ti̧nîn, tànɨ nɨ́m gə́tìi na á, nɨ́m nùb ducɨ ŋgóblîn ɓe jíìb ɗɔ̀ɔ́b ɓa nó cɔ̧́niì rè.

¹²Hȩ dùnɨ u̧nèé, nò lə́mnɨ ní á nɨ́ còóm ə́ŋhîn ndɨ, ŋgə́ gə́tìi, ŋgə́ tɨ̀ gu.

¹³Vùùm kɨhɨr yi kwatee nyínè lâs duɓahá kɨhɨr fɨ́tɨ kwànɨ nɨ̀vɨ́tɨ̀bì á, Mèín á jə̀ŋnɨ ɓwáár noò, sàmàìn ŋgə́ ɓa ə́ə̀mnɨ ɨnayâna kɨhɨr kwà nyí, a ndôŋ nyòm nyínè ɗàà. Ɨ́dù ɓwâ kɨhɨr ɓa nyí féínnàniì, ŋgə́ ɓa nyí nànɨ nyòm nyí jíiré á, ŋgə́ a túùmnàɓwê nyí hȩ nyí fɨ́tɨ ɓáíhó̧nɨ kɨhɨr kɨ́ no kwe.

¹⁴Ɓwàjììb moò, àm kɨ́ á mɨ ta nyí gə́tɨ̀ɓà ɓe yô̧ó̧ mèín nyaŋhɨ́bí.

¹⁵Mɨ nyinna nyí hȩ kùb nyinnace nùb du ɓe kɨ̀cáblì á, nyí nɨ̀miib canáɓam nɨ́m mɨ nyin kɨ́.

¹⁶Lə́əmcunáye tob famí nɨ́m du sáktɨ̀nɨ Mèín ɓe kí rè: ɓwâ nɨ́m du mènnɨ tob kɨ́ no kwe, nɨ́m á náhà ɓaín ɓe tɨ́m Krístùù ye! Bɨ̀rê nɨ́m kumnálɨ́ŋ ndɨ́ ɓwâ nɨ́m du tàŋniì nɨ́m á náhà ɓaín ɓe síí Krístùù ye!

¹⁷Bɨ̀rê á há nɨ mwi̧ ndúk, dugɨ hȩ nɨ́m du ví̧ne, nɨ́m du nɨ lâs síí mwi̧ á, ɓetí nɨ́m á lâs tàŋɓáànɨ bɨ̀rê mwi̧ kɨ́.

¹⁸Pə́náye gbàŋ Ísràyéèl, nùb du tàŋnɨ fè kùb na satɨgà ɓe kí á bɨ ɓaín ɓe Mèín nò tə́bə̀rè múbí ók ɓe kíí.

¹⁹Mɨ mɨ tàwá ɨnayâna mèín nyaŋhîn ɓe fè kùb na satɨgà móbnɨ mèín nyaŋhîn ɓe kíí á kpɔ́knɨ nɨ́m kù.

²⁰Ɨ́dù mɨ taɓatɨ́ ɨnayâna nɨ́ɨ́b nùb Mèín mɨr ɗə̀ə̀ŋwáá du nànɨ satɨgà ɓe kíí duna nɨ nyéhɨ̀b ɓáŋhɨ́b á, nɨ Mèín dunaá sé. Mɨ cè mɨ́ ɗúwa nyí dù ɓaín ɓe nyéhɨ̀b ɓáŋhɨ́b.

²¹Sàmàìn nyí mei tob Kékéé no, nyí a mèìcùkwàcì kɨ́ nyéhɨ̀b ɓáŋhɨ́bí noò ɗàà. Sàmàìn nyí taŋ tə́bə̀rè Kékéé ya, nyí a tàŋcùkwàcì kɨ́ nyéhɨ̀b ɓáŋhɨ́bí yaà ɗàà.

²²Kèè nɨ́m ɗúná ə́tɨ̀wúnɨ njùŋ Kéké sumíì? Nɨ́m lə́mne nɨ́m á ná tamnì ndóóŋ ŋgə́ à?

²³Nùb kù á tànɨ: «Ɓíì á kùb nànɨ nyòm ndɨŋ nɨ́ɨ́b lâs», á ɓàhá u̧, ɨ́dù nɨ́ɨ́b lâs nɨ nyɔ̧ɔ̧́ ɗàà. «Ɓíì á kùb nànɨ nyòm ndɨŋ nɨ́ɨ́b lâs», ɨ́dù nɨ́ɨ́b lâs nɨ kpɔ́knɨ nɨ̀vɨ́tè ɗàà.

²⁴Nò kù nɨ nyɔ̧ɔ̧́ ɓe ɨ́r ŋgə́ nɨ̀mɨrí mâ, mánábɨ̂ŋ nyɔ̧ɔ̧́ ɓe ɨ́r nùb lâs.

²⁵Fè lâs nyí kwa kùb sə́rɨ̀nɨ mákə́tìì, gwɨináhá nɨ gwiín nyí a tàŋ, nyí nɨ fɔ̧́ɔ̧ fɔ̂, njɔ̧̀ tɨ̀ lomndé nɨ́ nyí ɓɔ̧ɔ̧.

²⁶Ɓetí káàtà Mèèín á wáànɨ ɨnè: «Ɗɔ̀ɔ́b ɓe nɨ́ɨ́b du nó kwe lâs ók nɨ́ ɓe Kéké á».

²⁷Nò du nɨ́ nò ə́mní séé ɨ́ ɓénà nyí cɔŋ, nyí ɨ́ ə́mnè gìnɨ, taŋnáhácɨ nɨ nɨ́m ŋgə́ na nyínè lâs, nyí nɨ fɔ̧́ɔ̧ fɔ̂, njɔ̧̀ tɨ̀ lomndé nɨ́ nyí ɓɔ̧ɔ̧.

²⁸Ɨ́dù, nò kù ɨ́ gì nyí tànànɨ ɨnè: «Fè ɗàrɨ́ fè kùb tɨ mób mèín nyaŋhɨ́b ɓe kíí á», nyí nɨ fè kɨ́ tàŋcɨ̀r, àm nyí tɨ̀ naré nò tɨ tana nyí àm kíì yəré sumí.

²⁹Mɨ nyin àm njɔ̧̀ nò kíì á, kɨ́ nyínè sé. Nɨ́m nò kù ɓa fɔ́niì á ɨnè: «Ɨna! Àm níì á mɨ̀lə́m nò kù njɔ̧̀ne fɨ́tɨce nɨ́ ŋgùnnɨ ju mɨ duɓa ɓe síhé?

³⁰Mɨ ɨ́ nà mɨ́ Mèín kùsùk ɓe ɨ́r cɔŋ mɨ taŋndé, kùb yomce bɨ́ mɨ àm mɨ tɨ na Mèín kùsùk ɓe ɨ́r cɔŋ kíì ɓe àm níì?»

³¹Nyí tàŋgɨ̀ cɔŋ yoo, nyí mèìgɨ̀ súm yoo, nyí ndɨ̀ŋgɨ̀ ní, ndɨ̀ŋná nɨ́ɨ́b lâs àm nyí mgbíhɨ Mèèín.

³²Nɨ ɗúwa ɗɨ́m juu nyínè ndɨ̀ŋ ə́ə́m nò kwè gùtɨ: dùgɨ̀ Jwîf, dùgɨ̀ nò du Jwîf séé, dùgɨ̀ Mɨ̀kwìn Nùb Ə́mní.

³³Ndɨŋnáam hȩ mɨ; mɨ á mánɨ nɨ̀vɨ́tɨ̀b lâs ók mɨ̀tù ɓe mɨ nɨ́ɨ́b lâs mɨ du ndɨ̀ŋniì no. Mɨ mɨ mánɨ nyɔ̧ɔ̧́ ɓe ɨ́r mɨ nɨ̀mɨrí ɗàà, mɨ má mɨ́ nyɔ̧ɔ̧́ ɓe ɨ́r nùb lâs á, ɗà nùb lâs a kwà ɓə́r.