Read Vute 1 Nùb Kòréèntə̀ 11 Bible Online

1 Nùb Kòréèntə̀ 11 - Vute bible

1 Nùb Kòréèntə̀ 11

¹Gàndɨ̀ná mɨ hȩ mɨ duce gàndɨ̀nɨ Krístùù.

²Mɨ á nyí sáktɨ̀ɓànɨ àm ɓwâ lâs nyí du mɨ lə́ə̀mnɨ, nyí á cè gə́tɨ̀nɨ tɔ̀ɔ́ mɨ ya na nyínè rè.

³Nɨ́m mwi̧, nɨ́m mɨ ɗú nyí ɗə̀ə̀ŋte á rè: Krístù ɨ́ du nɨ́ kɨ́ɨ́nɨ nɨ̀vɨ́tɨ̀b lâs lu, nɨ̀ŋgwá ɨ́ du kɨ́ɨ́nɨ nɨ̀gwi ru, Mèín ɨ́ duce kɨ́ɨ́nɨ Krístù ru.

⁴Yɨ́ mɨ̀yú̧ú̧, ɓwâ nɨ̀ŋgwá du Mèín yóŋniì, kɨ́ kù tànɨ Kìn Mèèín kè rɨ, ŋgə́ ɨ́ dù ŋgwé ɓoóm, ŋgə́ jaaŋkɨ́ nɨ́ Krístù á.

⁵Nɨ̀gwi cè, ŋgə́ ɨ́ dù nɨ́ ŋgwé ɓoóm ɗàà ɓwâ ŋgə́ du Mèín yóŋnɨ, kɨ́ kù tànɨ Kìn Mèèín, ŋgə́ jaaŋkɨ́ nɨ́ ŋgwáá noò á. Ŋgə́ á nɨ ɓè hȩ nɨ̀gwi ŋgwé njenné[4]

⁶Nɨ̀gwi ɨ́ dù nɨ́ ɗúwa ŋgwé ɓòmnɨ, ŋgə́ ma kpàìkɨ́ kpaín. Ɨ́dù hȩ duce nɨ́ nɨ́m sə̀réé péín nɨ̀gwiì kpàìkɨ́nɨ mvɨ̀tí, kɨ́ kù njèìnkɨ́nɨ ŋgwé rèé, ŋgə́ ɓòmbɨ̂ŋhácɨ̀ ɓoóm.

⁷Kɨ́ nɨ̀ŋgwáà, nɨ ɗúɓàcéyèwá ŋgə́ ɓòm ŋgwé, ɓetí ŋgə́ du nɨ ɓɨ̀ɨ̀m ɓe mgbíí Mèèín á. Nɨ̀gwi duce nɨ́ mgbíí nɨ̀ŋgwáà á,

⁸ɓetí nɨ ɓe gbɨ́ktèìn síhé nɨ̀gwiì sé Mèín ya nyaŋhȩ nɨ̀ŋgwá, ɨ́dù ŋgə́ ya nyaaŋ nɨ nɨ̀gwi ɓe gbɨ́ktèìn síhé nɨ̀ŋgwáà á.

⁹Mèín ya nɨ́ nyààŋwá nɨ̀ŋgwá ŋgə́ ók ɓe nɨ̀gwi, nɨ̀gwi á ŋgə́ ya nyaŋhȩ ók ɓe nɨ̀ŋgwá ru.

¹⁰Àm kɨ́ á, ɓe ɨ́r dùgallɨb Mèèín, á ɗúnɨ nɨ̀gwi dùhá ɓe lɨ̀m kù ŋgwéé du túùmnɨ ɨnayâna ŋgwáá níì á ní kɨ́ɨ́niì.

¹¹Nɨ́m mwi̧, ɓe ju nyí du dùnɨ ɓaín ɓe Kékéé, nɨ̀ŋgwá á nɨ ɓaín ɓe nɨ̀gwi, nɨ̀gwi á cè nɨ́ ɓaín ɓe nɨ̀ŋgwá,

¹²ɓetí dugɨ nɨ́ hȩ Mèín ya nyaŋhɨ nɨ̀gwi ɓe gbɨ́ktèìn síhé nɨ̀ŋgwáà, nɨ̀gwi ɨ́ du nɨ́ fènnɨ nɨ̀ŋgwá ru. Mèín ɨ́ duce nɨ́ nànɨ nɨ́ɨ́b lâs lu.

¹³Cábnáɓaye nyí nɨ̀miib: á ɓàhá pénɨ mîn ɓwâ mɨ̀yú̧ú̧, nɨ̀gwi dù ŋgwé sam ɓwâ ŋgə́ du Mèín yóŋniì à?

¹⁴Ɗóhîn hȩ Mèín ya nyaŋhɨ nɨ́ɨ́b noò, nɨ̀ŋgwá, dùnɨ ɓe mvɨ̀tí ŋgo̧ó̧ du nɨ nɨ́m sə̀réé á.

¹⁵U̧ kɨ́, kɨ́ nɨ̀gwiì, ŋgə́ á nɨ dɨɨ́m ɓwâ mvɨ̀tí du ŋgo̧né. Ɓetí Mèín na nɨ ŋgə́ mvɨ̀tí kɨ́ ŋgo̧ó̧ u̧, a dùnà ŋgə́ hȩ nɨ́m ɓom ŋgwéé á.

¹⁶Nò du ɗúnɨ ndɨ̀ŋkwànɨ mɨ̀sə̧̀ə̧́ ɓe ɨ́r àm kíì, nɨ́m du ɗúnɨ ŋgə́ ɗə̀ə̀ŋte á ɨnayâna dùgɨ̀ Mɨ̀kwìn Nùb Ə́mní, dùgɨ̀ nɨ́m nɨ̀miib, nɨ́m ɓe ɗɨ́m kù ɗàndóŋwa.

¹⁷Hȩ mɨ du nyìnnɨ ɓe ɨ́r ɗɨ́m bɨ mɨ lə́əmteeré, mɨ sàmàìn kúmɨ nyínè ɗàà ɓetí ɓáhɨ́r nyí du ɓáàniì lâs á nyí gèrénɨ jɨ̀r ɓáŋhɨ́nne ɨ́ ndôŋ jɨ̀r nyɔ̧né.

¹⁸Tíí yàyè, kùb tanaá mɨ ɨnayâna ɓwâ nyí du ɓáàniì, gɔ̀ á mvókín nyínè no, (mɨ lə́mne á ɓàhá u̧).

¹⁹(Ɗú gɔ̀ dùmèɓà mvókín nyínè no u̧ á, àm kùb a ɗə̀ə̀ŋnyààŋɓàgì nùb ɗɨ́ɗɨ̧́).

²⁰Ɓwâ nyí ɓáhe yɨ́ mwi̧ rɨ, nyí nɨ tàŋnɨ cɔŋ ɓe ɨ́r Kékéé ɗàà.

²¹Ɓetí ɓwâ nyí duré cɔɔ̀ŋ ndɨ, nɨ̀mwi̧ a ŋgùùkɔ́ɔ̀rê kɨr cɔɔ̀ŋ noò no ɓusiín; u̧ á du ndɨ̀ŋnɨ nùb kù a dù cɨ̧̀, nùb kù acè bɨ́ dóór.

²²Nyí nɨ ɓe dúhɨ́b nyí nɨ̀mibi yɨ́ nyí fɨ́tɨ tàŋnɨ nyí a mə̀ré ɗàwá à? Kèè nyí pə́waamkɨ́ nɨ́ Mɨ̀kwìn Nùb Ə́mní nyí a ɗû sə̀ə̀kɨ́nɨ nùb du ɓe nɨ́m kù ɗàwáá á? Mɨ nyìnnà nyí ní? Mɨ kúùm nyí à? Ɗàɓàwá! Sàmàìn mɨ kúumɓa nyínè ɗàà.

²³Ɓetí tɔ̀ɔ́ mɨ ya ókwo Kékéé ɓɔ̧ɔ̧, mɨ ɨ́ tàndóŋnàcê nyínè á ɨnè: Yésù nò du Kékéé, sɨ́mnɨ̀r kùb yi du ŋgə́ nó sə́rɨ̀niì, ŋgə́ ɨ́ â bɨ̀rê,

²⁴ŋgə́ ɨ́ sáktè Mèín, ŋgə́ ɨ́ kùm, ɗà ŋgə́ ɨ́ tà: «Nɨ́m ndè síí móò á, síí du ɓe ɨ́r nyínè. Ndɨ̀ŋlɨ́ŋná u̧, nyí a vùùŋcù mɨ no.»

²⁵Cùr cɔɔ̀ŋ, ŋgə́ ɨ́ áɓwéhè tob súmé, ŋgə́ ɨ́ tà: «Tob lè, tob jin nyàŋ hehí Mèín kwéí ɓe nɨ̀vɨ́tɨ̀b ɓe ɨ́r tɨ́m moò á. Ɓwâ lâs nyí kwá mei tob lè noò, meináam nyí a vùùŋcù mɨ no.»

²⁶Ɓetí ɓwâ lâs nyí du tàŋnɨ bɨ̀rê kɨ́ nyí ɨ́ mèìcê tob kɨ́ noò, nyí ɓéhɨ cwá Kékéé á, há̧á̧ hȩ ŋgə́ kwá cuworé.

²⁷Àm kɨ́ á du, nò kù ɨ́ tàŋ bɨ̀rê kɨ́, ŋgə́ ɨ́ mèì tob kɨ́ no ɓe waàr cúk, jɨ̧ ɗàà, nò kɨ́ ɓíì bií nɨ́ ŋgə́ ɓe ɨ́r tɨ́m ɓe síí Kékéé.

²⁸Nɨ̀mwi̧ lə́ə̀mɓàyè no njɔ̧̀ɔ̧ pénɨ ɗɨ́m juu noò, nò kɨ́ a tàŋgì bɨ̀rê kɨ́, ŋgə́ a mèìgì tob kɨ́ no.

²⁹Ɓetí nò kù ɨ́ dù nɨ́ góòmyàyèwá hȩ ŋgə́ du ɓaín ɓe síí Kékéé, ŋgə́ ɨ́ tàŋ, ŋgə́ ɨ́ mèìsòhácè nɨ́ tob kɨ́ no u̧, ŋgə́ máréɓa nɨ ŋgù̧ú̧ ŋgéé só á.

³⁰Àm kɨ́ á nùb kù nyínè mvókɨ́nní du yábnɨ, gókkí̧i̧ lâs. Nùb kù kúɓacéyetɨ́.

³¹Nɨ́m ɨ́ dù góòmnyààŋɓànɨ ɗɨ́m juu nɨ́mè, Mèín tɨ̀ nɨ nɨ́m jábɨ́r túmnɨ̀r ɓwâ ŋgù̧ní.

³²Ɨ́dù Kéké ŋgwin nɨ nɨ́m, mvə̀ndɨ̀nɨ nɨ́m u̧ àm ŋgwìn jíri tɨ̀ bɨ nɨ́ nɨ́m hȩ nùb ɗɔ̀bɨ́nné á.

³³Mwin yàá bɨ ə́mní, àm kɨ́ á du ɗúnɨ ɓwâ nyí ɓáhɨ yɨ́ mwi̧ ɓe ɨ́r Kékéé, tàŋnɨ cɔŋ ndɨ, ɗú nùb kù móŋcé kùb ɓoò á.

³⁴Cɨ̧̀ ɨ́ dù nɨ́ nò kù nómnɨ, ŋgə́ tàŋwòyàyènɨ cɔŋ no yó, àm nyí tɨ̀ geró nɨ́ ŋgwìn Mèèín ɓáhɨ́r nyínè kɨ́ noò. Duceé kɨ́ fɔ́ bɨ kwè, mɨ ɓa pììnɨ ɓwâ mɨ ɓa gɨ̀sònɨ yɨ́ nyínè á.