Read Vute 1 Nùb Kòréèntə̀ 12 Bible Online

1 Nùb Kòréèntə̀ 12 - Vute bible

1 Nùb Kòréèntə̀ 12

¹Ɗàrò mɨ nyinna nyí àm ɗɨɨ́ŋ bɨ Nyéhè Sarîn du nàniì á: Mwin yàá bɨ ə́mní, mɨ á ɗúnɨ nyí ɗə̀ŋhɨ̀ àmɨɨr du ɗɨɨ́ŋ bɨ kɨ́ noò.

²Nyí ɗəəŋtɨ́ ɓwâ nyí ya duye Mèín mɨr ɗə̀ə̀ŋwáá, nyí ya mbɨ́ɨ́ mèín saai ɗàmndé nyí yô̧ó̧ ŋgábè no.

³Nɨ́m mɨ ɗú nyí ə́ə̀mte á rè: Nò du nyìnnɨ ɓe nyòm Nyéhè Sarɨ́nne, sàmàìn nò kɨ́ ta: «Káá bɨ̀ Yésù» na ɗàà. Sàmàìn nò kù taɓa wááŋ ɨnè: «Yésù Kéké á» ɓè nò kɨ́ du nɨ́ nyìnwá ɓe nyòm Nyéhè Sarɨ́nne ɗàà.

⁴Ɗɨɨ́ŋ bɨ á nyiín nyin, ɨ́dù Nyéhè Sarîn mwi̧ kɨ́ ɨ́ du nànɨ ru.

⁵Kéké á kùb ɗòbnɨ ə́r nyiín nyin, ɨ́dù ŋgə́ mwi̧ kɨ́ á kùb du éínànɨ ru.

⁶Ə́rɨ́b á nyiín nyin, ɨ́dù Mèín mwi̧ kɨ́ ɨ́ du kùb ɗòbtèènɨ ə́rɨ́b kɨ́ ru.

⁷Nyéhè Sarîn á túùmnɨ nyòm noò nùb lâs ya ɓe ɗɨɨ́ŋ ndɨ̧̀ɨ̧́ kùb nyɔ̧né ŋgə́ du kùb nàniì.

⁸Nyéhè Sarîn á nànɨ nò kù ɗɨɨ́ŋ ŋgə́ nyin nyindí ɓe kɨ̀cáblì, Nyéhè mwi̧ kɨ́ á nànɨ nò kù nyòm nyin nyindí ɗóhîn ɓe ɗɨɨ́ŋ nò kɨ́ kwaré.

⁹Nyéhè mwi̧cáŋ kɨ́ á nànɨ nò kù ə́ə́m, ŋgə́ a nàcê nò kù nyòm wáaŋna nɨ̀vɨ́tɨ̀b yáàbí.

¹⁰Nyéhè á nànɨ nò kù nyòm ndɨŋ nɨ́ɨ́b sɨ̀sɨ̀rí, ŋgə́ a nà nò kù nyòm ŋgə́ tandóŋna kùb kìn Mèèín, ŋgə́ a nàcê nò kù nyòm ɗəŋhɨ kɨ́ rè nyéhè kàŋnì á, kɨ́ rè cè nyéhè àmɨrì á. Nyéhè Sarîn kɨ́ á nànɨ nò kù nyòm nyin nyindí kùb ɗə̀ə̀ŋwáá, ŋgə́ a nàcê nò kù nyòm ɓandɨna kùb nyindí kíì.

¹¹Nyéhè Sarîn mwi̧ kɨ́ ɨ́ du ndɨ̀ŋnɨ nɨ́ɨ́b lâs lu, ŋgə́ á nànɨ nò lâs ɗɨɨ́ŋ nyiín nyin hȩ ŋgə́ nɨ̀mɨr ɗúré.

¹²Nɨ́m ɗəəŋtɨ́ Krístù du hȩ síí á, ɓe gɔ̀ ya ví̧i̧. Síí á mwi̧, dugɨ hȩ ŋgə́ du ɓe gɔ̀ ya ví̧ne.

¹³Nɨ́m lâs cè, dùgɨ̀ Jwîf, dùgɨ̀ Jwîf sé, dùgɨ̀ mbɔ́klɨ́b, dùgɨ̀ nùb du mbɔ́klɨ́b séé, nɨ́m yi kɔktɨ́ kɔ ə́mní ɓe ɨ́r Nyéhè Sarîn mwi̧ kíì àm nɨ́m a dù mwi̧í̧. Vùùm nɨ́mè lâs, Nyéhè mwi̧ kɨ́ ɨ́ du nɨ́mè só ru.

¹⁴Síí nɨ̀vɨ́tèé nɨ mwi̧ kpùktùk ɗàà, gɔ̀ á yá ví̧i̧.

¹⁵Gurub ɨ́ tà ɨnè: «Mɨ mɨ ŋgáár sé, mɨ mɨ ɓe síí ókwa» na, ŋgə́ duhá nɨ́ só á.

¹⁶Tó ɨ́ tà ɨnè: «Mɨ mɨ íí sé, mɨ mɨ ɓe síí ókwa» na, ŋgə́ duhá nɨ́ só á.

¹⁷Síí bɨ̂ŋ tɨ dùyè íí kɨ̀ íí, ŋgə́ tɨ ɓace óknɨ ɓe ní? Kèè síí tɨ dùyè tó kɨ̀ tó, ŋgə́ tɨ ɓace óknɨ mí ɓe ní?

¹⁸Ɓe tàá àmɨrìí, Mèín yi kɨ́kteetɨ́ nɨ́ɨ́b sóò lâs hȩ ŋgə́ ɗúré.

¹⁹Tɨ tàyè síí á ɗóò ɓe gɔ̀ mwi̧cáŋ, ŋgə́ yè nɨ́ síí sé.

²⁰Síí á ɗóò mwi̧cáŋ, ɨ́dù gɔ̀ á yá ví̧i̧.

²¹Sàmàìn íí tana ŋgáár ɨnè: «Àm moò ɓe wu ɗàà» kɨ́ kù ŋgwé a tànà gurub: «Àm moò ɓe nyí ɗàà» na ɗàwá.

²²Ɓàcéyè nɨ́ɨ́b nɨ̀vɨ́tèé só kùb du pénɨ gó̧o̧ rɨ ɨ́ duyaɓagɨ nɨ́ɨ́b tíí ru.

²³Nɨ́ɨ́b nɨ́m du pénɨ nɨ̀vɨ́tèé só nɨ́ɨ́b saai rɨ, nɨ́m á ŋgáb gə́tɨ̀nyààŋɓànɨ ndóóŋ kɨ́b kù; kɨ́b kùb du nyìnnɨ àm ɓoò ɗàà rɨ, nɨ́m á góòmɓanɨ íí ya cei.

²⁴Nɨ́ɨ́b nɨ́mè sóò du laŋtɨ̧né, nɨ́m ŋgáb góòmnyààŋɓànɨ íí ya ɗàà. Ɨ́dù Mèín yi naɓatɨ́ nɨ́ nɨ́ɨ́b sóò kùb du íí ya góòmnyààŋnɨ ɗàwáá dɨmɨɨr cei.

²⁵Hȩ dùnɨ u̧nèé, nɨ́ɨ́b nɨ́mè sóò bɨ ɓe ɓi̧í̧ ɗàà, nò lâs á ɓe yíìnɨ́m só ɓe ɨ́r kùùŋ.

²⁶Nɨ́mè só, nɨ́m mwi̧ ɨ́ dù ɓe jábɨ́r, kɨ́b meré lâs á pə́ɓáànɨ jábɨ́r kɨ́ ɓe ŋgə́. Nɨ́m mwi̧ ɨ́ dù dɨɨ́m, nùb meré lâs á ókɓáànɨ mɨ̀tù ɓe ŋgə́.

²⁷Nyí lâs, nyí síí Krístùù á, nò lâs cè gɔ̀ síí kíì á.

²⁸U̧ á cè, Mɨ̀kwìn Nùb Ə́mní no, Mèín ya kɨ́kyayeé nùb tómé tíí, ɨ́ tùrê tɨ́kɨ̀nɨ́b Mèèín, taarɨ́bí nùb tɔ̀hí. Cùr kɨ́ no, nùb ndɨŋtee nɨ́ɨ́b sɨ̀sɨ̀rí ɨ́ tùrê, ɗà ɨ́ tùrégì nùb du ɓe nyòm wáŋhɨ nɨ̀yábì, nùb kpɔ́ktee kùb mwin yàá bɨ, nùb du ɓe nyòm kɨ́k kùb mwin yàá bɨ, ɨ́ tùrégì nùb du ɓe nyòm nyin nyindɨ́b kùb ɗə̀ə̀ŋwáá.

²⁹Vùùm nùb kíì lâs bɨ nùb tómé kɨ̀ nùb tómé sé, kɨ́ kù tɨ́kɨ̀nɨ́b kɨ̀ tɨ́kɨ̀nɨ́b, ŋgáb bɨ lâs nùb tɔ̀hí sé. Ŋgáb bɨ lâs ɓe nyòm ndɨŋtee nɨ́ɨ́b sɨ̀sɨ̀rí ɗàà,

³⁰ŋgáb bɨ lâs ɓe nyòm wáŋhɨ nɨ̀yábì ɗàà, kɨ́ kù nyòm nyin nyindɨ́b kùb ɗə̀ə̀ŋwáá, ŋgáb lâs ɓe nyòm ɓandɨ nyindɨ́b kíì ɗàà.

³¹Hȩ dùnɨ u̧nèé, mánáam ɗɨɨ́ŋ duɓa jííb lɨ. Ɨ́dù ɗàrò, mɨ á nyí túùmnànɨ jɨ̀r du nyɔ̧ɔ̧́ ndóŋ kɨ́b lâs.