Read Vute 1 Nùb Kòréèntə̀ 13 Bible Online

1 Nùb Kòréèntə̀ 13 - Vute bible

1 Nùb Kòréèntə̀ 13

¹Mɨ ɗə̀ə̀ŋgɨ̀ nyìnnɨ nyindɨ́b lâs, kɨ́b nɨ̀vɨ́tɨ̀bì ɓe kɨ́b dùgallɨbi lâs, mɨ ɨ́ dù ɓe ɗûnɨ́m sumí ɗàà, nyindí mó ɓɔ̧ɔ̧ kɨ́ du nɨ hȩ jíín, kɨ́ kù mgbááŋ á.

²Mɨ dùgɨ̀ ɓe nyòm mɨ ɓéenyaaŋɓa kìn Mèèín yoo, mɨ dùgɨ̀ ɓe nyòm mɨ ɗəəŋɓa nɨ́ɨ́b du yoó yoo, mɨ dùgɨ̀ ɓe ɗɨɨ́ŋ lâs yoo, kɨ́ kù ɓe ə́ə́m mɨ fɨ́tɨ ŋgɨ́ínɨ ɓəb ɓe kíí, mɨ ɨ́ dù mɨ́ ɓe ɗûnɨ́m sumí ɗàà, mɨ du mɨ nɨ́m sam á.

³Dùgɨ̀ sàmàìn mɨ gɔkkɨ́na nùb cɨ̧̀ du nómniì nyɔ̧ɔ̧́ moò lâs, mɨ a kàìkî síí móò kùb yíìkíi, mɨ ɨ́ dù mɨ́ ɓe ɗûnɨ́m sumí ɗàà, nɨ́ɨ́b kɨ́ lâs nɨ mɨ kpɔ́knɨ ɗàà.

⁴Nò du ɗúnɨ kùŋ mwin yàá á nɨ́ kerîn, ŋgə́ á nɨ́ kpɔ́knɨ kùŋ mwin yàá. Ŋgə́ kɨ́knɨ njɔ̧̀ nɨ́m nɨ́ kùbè ya ɗàà. Ŋgə́ nɨ́ ánɨ síí ɗàà, ŋgə́ ɓe tamŋgwé ɗàà.

⁵Nò kɨ́ nɨ ndɨ̀ŋnɨ nɨ́m sə̀réé ɗàà. Ŋgə́ nɨ ɓe mgbó ɗàà, ŋgə́ nɨ njù̧ óknɨ ɗàà, ŋgə́ cè gə́tɨ̀nɨ ɓi̧í̧ ɗàà.

⁶Nò kɨ́ nɨ óknɨ mɨ̀tù ɓe nɨ́ɨ́b ɓáŋhɨ́b nùb kù du ndɨ̀ŋniì ɗàà, ŋgə́ ók nɨ́ mɨ̀tù ɓe nɨ́ɨ́b àmɨrì á.

⁷Ɗûnɨ́m á ndɨ̀ŋnɨ kùb dù ɓe tɨ́ɨ́r, ŋgə́ a ndɨ̀ŋ kùb gə́tɨ̀ ə́ə́m, gíí ɓe jíhɨ́r ɓwâ lâs.

⁸Ɗûnɨ́m nɨ́ cɔ̧́nɨ cɔ̧́ɔ̧ ɗàà. Kìn kùb ta ɓe ɨ́r Mèèín kwá cɔ̧́, nyìntèé nyindí kùb ɗə̀ə̀ŋwáá kwá cɔ̧́, ɗɨɨ́ŋ kwá cɔ̧́.

⁹Ɓetí nɨ́m nɨ nɨ́ɨ́b lâs ɗə̀ə̀ŋwá. Kìn du ɓe ɨ́r Mèèín, nɨ́m cè nɨ́ lâs ɗə̀ə̀ŋcáàŋwá.

¹⁰Ɨ́dù ɓwâ nɨ́ɨ́b lâs du nyaŋhîn mɨ́nne kwá féínndé, nɨ́ɨ́b du nyaŋhîn mîn ɗàwáá kwá cɔ̧́.

¹¹Ɓwâ mɨ yi du mutíí, nyindí mó ɓɔ̧ne, mɨ̀lə́m móò ɓe kɨ̀cáàb moò lâs yaá nɨ́ kɨ́ mutíí. Ɨ́dù ɓwâ mɨ hamcɨré, mɨ ɨ́ mbɨ́kcì mɨ́ nɨ́ɨ́b mutɨlli kɨ́.

¹²Ɗàrò, nɨ́ɨ́b nɨ́m du péniì lâs á vùkù vùkù hȩ pə́b du jɨ́nɨ̀m yaà. Ɨ́dù cùrì còò, nɨ́m kwá pə́ nɨ́ɨ́b kɨ́ dùkɨ́ɓànɨ laŋtɨ̧ɨ̧́ fèín. Ɗàrò mɨ nɨ́ɨ́b lâs ɗə̀ə̀ŋyèwá, ɨ́dù cùrì còò, mɨ ɓa ɗə̀ə̀ŋɓàgɨ̀nɨ nɨ́ɨ́b lâs hȩ Mèín ɗəəŋce mé á.

¹³Ɗàrò, nɨ́ɨ́b taarɨ́b lè á há bɨ ku: ə́ə́m, gíí ɓe ɗûnɨ́m. Ɨ́dù mvókín ŋgáb taarɨ́bí, nò jíri á ɗûnɨ́m.