Read Vute 1 Nùb Kòréèntə̀ 14 Bible Online

1 Nùb Kòréèntə̀ 14 - Vute bible

1 Nùb Kòréèntə̀ 14

¹Mánáyàyè dùnɨ ɓe ɗûnɨ́m kùŋ mwin yàá sumí. Kɨ́knáɓwê njɔ̧̀ ɗɨɨ́ŋ Nyéhè Sarîn du nànɨ nɨ̀vɨ́tɨ̀bì ya, kɨ́ kù cóóŋ sé kɨ́ tàtèé kìn Mèèín ndè.

²Nò du nyìnnɨ nyindí kùb ɗə̀ə̀ŋwáá nɨ nɨ̀vɨ́tɨ̀b nyìnnàwá, ŋgə́ nyinna nɨ Mèín á, ɓetí nò kù nɨ óknɨ nɨ́m ŋgə́ du nyìnnɨ kɨ́ ɗàà. Ɓe nyòm Nyéhè Sarɨ́nne á ŋgə́ du nɨ́ nyìnhó̧nɨ àmɨɨr du yo̧né ru.

³Ɨ́dù nò du tànɨ Kìn Mèèín nyinna nɨ nɨ̀vɨ́tɨ̀b àm ŋgáb a gì ɓe ə́ə́m tíí á, ŋgə́ taamna nɨ ŋgáb njɔ̧̀, kpɔ́knɨ ŋgáb á.

⁴Nò du nyìnnɨ nyindí kùb ɗə̀ə̀ŋwáá taamhó̧ɗóo nɨ ə́ə́m ŋgə́ nɨ̀mɨ́rí á, u̧ kɨ́ nò du tànɨ Kìn Mèèín á nɨ́ tààmnɨ ə́ə́m Mɨ̀kwìn Nùb Ə́mní lâs.

⁵Mɨ á ɗúnɨ ɓè nyí lâs tɨ nyin nyindí kùb ɗə̀ə̀ŋwáá, ɨ́dù ví̧i̧ mɨ á mɨ́ ɗúnɨ ɓè nyí tɨ tabɨ̂ŋye Kìn Mèèín, ɓetí nò ta Kìn Mèèín ɓe nyindí kùb du ókniì ndóŋtɨ́ nɨ́ nò nyin nyindí kùb ɗə̀ə̀ŋwáá, sé ɓè nò kù du sàmàìn tahó̧ njàb nyindí kɨ́ noò, ɗà Mɨ̀kwìn Nùb Ə́mní a kwà taám ə́mní.

⁶Mwin yàá bɨ ə́mní, nɨ́m tànáyè ɨnè: ɓwâ mɨ ɓa gɨ̀sònɨ yɨ́ nyínè, mɨ vììnàgɨ̀ nyí nɨ́m du yo̧né, kɨ́ kù ɗɨɨ́ŋ kè, mɨ yè tana nyí Kìn Mèèín kè, yè tɔ̀ɔ́ kè, mɨ ɨ́ nyìnnà mɨ́ nyí ɓe nyindí kùb ɗə̀ə̀ŋwáá, mɨ kpɔ́khó̧ce nyí ní ya?

⁷Nɨ́m ánáyè túúm ɓe nɨ́ɨ́b kurɨ́b hȩ tɨ́mbɨ̀r ɓe jíín, ɗà kùb ɨ́ dù bɨ́ kúu nyiín nyin kwɨ̀ìwá, i̧ á kùb fɨ́tɨce ɗə̀ə̀ŋnɨ kɨ́ rè tɨ́mbɨ̀r á, kɨ́ rè cè jíín á?

⁸Nò kwɨi jínné ɨ́ dù nɨ́ jíín ɓə́ré mîn kwɨ̀ìwá, na ɨ́ ɓa nyààŋkɨ́nɨ gwɨ̀ì suu?

⁹Nɨ́m mwi̧ ɓwê, i̧ á kùb fɨ́tɨ óknɨ nɨ́m nyí nyinndé, ɓè nɨ́m nyí nyin kɨ́ du nɨ́ ɓe nyindí kùb ɗə̀ə̀ŋwáá du wááŋ ɗàwá rè? Nɨ́m nyí ɓa nyìnniì lâs ɓa nɨ dùnɨ hȩ uweisé mvúúm á.

¹⁰Nyindɨ́b á ɓàhá ɗɔ̀bín nyiín nyin, ɨ́dù nyindí kùb du bɨ́ njàb no kwe ókle nɨ ɗàà.

¹¹Mɨ ɨ́ dù mɨ́ óknɨ nyindí nò kù du mɨ nyìnnànɨ ɓe kíí ɗàà, nò kɨ́ du nɨ péín moò nɨ̀gúr á, mɨ duɓwéece mɨ́ péín ŋgéé nɨ̀gúr á.

¹²Péín nyínè duɓwée u̧ á. Hȩ nyí du máɓànɨ ɗɨɨ́ŋ Nyéhè Sarîn du nàniì, mánáɓam ví̧i̧ kɨ́ du ndɨ̀ŋnɨ Mɨ̀kwìn Nùb Ə́mní gɨ̀ tíí ɓe ə́mní.

¹³Hȩ dùnɨ u̧nèé, nò du nyìnnɨ nyindí kùb ɗə̀ə̀ŋwáá ɓwèìɓwê Mèín ɗɨɨ́ŋ tana kùb njàb nyindí kíì.

¹⁴Ɓetí mɨ ɨ́ dù mɨ̀yú̧ú̧ ɓe kúúŋ nyindí kùb ɗə̀ə̀ŋwáá kɨ́, njɔ̧̀ moò á ɓàhá mɨ̀yú̧ú̧, ɨ́dù kɨ̀cáàb moò nɨ no ɗàà.

¹⁵Mɨ ma ɓa ndɨ̀ŋnɨ i̧? Mɨ ɓa yóŋnɨ ɓe njɔ̧̀ moò á, mɨ a yóŋɓwê ɓe kɨ̀cáàb moò. Mɨ ɓa sòŋnɨ wòr ɓe njɔ̧̀ moò á, mɨ a sòŋɓwê ɓe kɨ̀cáàb moò.

¹⁶Ɓetí wu ɨ́ sáktɨ̀hó̧ɗô Mèín wo njɔ̧̀ɔ̧, i̧ á nò du wu ókniì ɓa wu ə́ə̀mnànɨ «Àmèn» mɨ̀yú̧ ɨ́sòkòò wo kíì? Ŋgə́ tɨ̀ nɨ nɨ́m wu nyinndé ɗə̀ŋhɨ̀r.

¹⁷Dugɨ ɓè mɨ̀yú̧ ɨ́sòkòò wo kɨ́ duɓa nyɔ̧né, ə́ə́m nò du wu ókniì tɨ̀ nɨ ɓe kí tàm.

¹⁸Mɨ sáktií Mèín hȩ mɨ du nyìnnɨ nyindí kùb ɗə̀ə̀ŋwáá kɨ́ ndóóŋ nyí lâs lè.

¹⁹Ɨ́dù Mɨ̀kwìn Nùb Ə́mní lâs tíí, mɨ á ɗúnɨ ɓè mɨ tɨ nyinɗóo sɨ̀ɨ̀ŋ nyindíí kùb fɨ́tɨ ókniì ŋgiì, ɨ́ ndôŋ kɨ́ mɨ nyin sɨ̀ɨ̀ŋ nyindíí tɔ́sìn cóóŋ, kùb du bɨ́ óknɨ ɗàwáá.

²⁰Mwin yàá bɨ, kɨ̀cáàb nyínè ŋgwȩ́né no, nɨ ɗúwa nyí dù hȩ mucutɨ́b. Duú kɨ́ ndɨ̧̀ɨ̧́ ɓáŋhɨ́nne, dùnábɨ̂ŋ hȩ nánááb ɨ́dù kɨ̀cáàb nyínè ŋgwȩ́né no nyí a dù hȩ nùb ducɨ gbɔ̧́ne.

²¹Nɨ́m káàtà Mèèín wáaré á rè: «Kéké taá ɨnè: nùb du nyìnnɨ nyindí kùb ɗə̀ə̀ŋwáá á mɨ ɓa tómnɨ nyìnnà gbàŋ ndè nyindí ru, nùb du bɨ́ nɨ̀gwíbí ɓɔ̧ɔ̧ á mɨ ɓa nyìnnànɨ gbàŋ kɨ́ ru. Ɨ́dù dugɨ u̧, ŋgáb tɨ̀ bɨ mɨ óo.»

²²U̧ á nyìnné nyindí kùb ɗə̀ə̀ŋwáá duna nùb Mèín mɨr ə́ə̀mwáá lìím, kɨ́ nùb ə́mnɨ Mèèín, nɨ lìím sé. Tàá Kìn Mèèín dunace nɨ́ nùb ə́mnɨ Mèèín lìím á, nɨ dùnàwá nùb Mèín mɨr ə́ə̀mwáá.

²³Nɨ́m tàpéyè ɨnè: Mɨ̀kwìn Nùb Ə́mní lâs á ɓáhîn yá mwi̧, ŋgáb a yàrê nyìntèènɨ nyindɨ́b kùb ɗə̀ə̀ŋwáá. Nùb saai, kɨ́ kù nùb Mèín mɨr ə́ə̀mwáá a lə́sò mvókín kɨ́ no, ŋgáb tɨ̀ bɨ nyí nùb yɨŋmɨ́b á na tàwá à?

²⁴Ɨ́dù ŋgáb lâs ɨ́ dù bɨ́ tànɨ Kìn Mèèín, ɗà nò sam, kɨ́ kù nò Mèín mɨr ə́ə̀mwáá ɨ́ lə́sò, nɨ́m ŋgáb du nyìnnɨ kɨ́ ɓa ŋgə́ dì̧nɨ̀nɨ á ɓe ɨ́r cum ŋgéé, nyindí kɨ́ a ɗì ŋgə́ sumí.

²⁵Mɨ̀lə́mkáín yi du ŋgéé sumí yoó lâs a dù laŋtɨ̧ɨ̧́, ɗà ŋgə́ a gùcáàmsê ɗàá ŋgwé ɗo̧ó̧, ŋgə́ a ɗôm Mèín, ŋgə́ a tà: «Mèín á mèɓà nyínè tə̧ə̧́.»

²⁶Mwin yàá bɨ, mɨ tàndóŋgwàcɨ̀ ní? Ɓwâ nyí ɓáhɨ ɗómnɨ Mèín ndɨ, nɨ̀mwi̧ á ɓe wòr, nò kù ɓe tɔ̀ɔ́, nò kù ɓe vìhèé nɨ́m du yo̧né, nò kù tàá kìn ɓe nyindí kùb ɗə̀ə̀ŋwáá, nò kù cè tàá njàb nɨ́m du yo̧ó̧ nyindí kùb ɗə̀ə̀ŋwáá kɨ́ no kwe. Ɗú nɨ́ɨ́b kɨ́ lâs kpɔ́k Mɨ̀kwìn Nùb Ə́mní gɨ̀ ɓe ə́ə́m tíí á.

²⁷Ɨ́ tà nyìn nyindí kùb ɗə̀ə̀ŋwáá, ɗú nɨ̀vɨ́tɨ̀b bɨrɨ́b ɓe taarɨ́b nyìntɨ á, tùré tùré cè. Nò kù a dùcè nò tahó̧ njàb nɨ́m ŋgáb du tànɨ kíì.

²⁸Nò ɓandɨ nyindí kíì ɨ́ dù nɨ́ ɗàà, ŋgáb mbɨ́k bɨ nyìnwû kúu còmné mɨ̀kwìn kɨ́ no, nɨ̀mwi̧ a nyìnnàɓà nɨ́ Mèín no sumí.

²⁹Duce kɨ́ nùb du tànɨ Kìn Mèèín, nɨ̀vɨ́tɨ̀b bɨrɨ́b ɓe taarɨ́b nyìntɨ, ɗà nùb meré a cà njàb nɨ́m ŋgáb du nyìnnɨ kíì.

³⁰Ɨ́dù mvókín nùb du ɓèé, Mèín ɨ́ tàwònà nò kù nɨ́m ŋgə́ viina nɨ̀vɨ́tɨ̀bì, nò tɨ du nyindíí a dù néín.

³¹Nyí lâs, á sàmàìn nyí ta Kìn Mèèín, tùré tùré, ɗà nò lâs a kwà kɨ̀cáàb, njɔ̧̀ a tàmcè nò lâs.

³²Nùb du ɓe ɗɨɨ́ŋ ta Kìn Mèèín, éí ə́r kɨ́ jɨ́k hȩ du ɗúniì.

³³Ɓetí Mèín nɨ tàwá nɨ́m dùtèèsòɓà ju ɗàá ku, ŋgə́ ɗú nɨ́ nɨ́m dù ju ɗóóŋ á. Hȩ du Mɨ̀kwìn Nùb Ə́mní bɨ lâs no kwe,

³⁴ɗú nɨ̀gub dù néín Mɨ̀kwìn Nùb Ə́mní no á. Nɨ ɗúwa ŋgáb wèì ɓɔ̧. Ɗú nɨ́ ŋgáb dù néín hȩ du tɨín káàtà ɓíhɨ̀bì Mòyíìs noò á.

³⁵Ŋgáb ɨ́ ɗû ɗə̀ə̀ŋnɨ nɨ́m kù, ŋgáb fɔ́ ɓe ŋgwásɨ̀b ɓoò yó, nɨ nyɔ̧ɔ̧́ ɗàà nɨ̀gwi wèì ɓɔ̧ Mɨ̀kwìn Nùb Ə́mní no.

³⁶Nyí yi ɨ́ yawo Kìn Mèèín ndu à? Kèè nyindí kɨ́ yi gohó̧nabɨ̂ŋ nyí?

³⁷Nò kù ɨ́ tà ní nò ta Kìn Mèèín á, kɨ́ kù ní nò Nyéhè Sarîn na ɗɨɨ́ŋ kù á na, á ɗúnɨ ŋgə́ ɗə̀ŋhɨ̀ ɨnayâna nɨ́m mɨ du nyí tànànɨ rè du ɓíì Kékéé á.

³⁸Ɨ́dù ŋgə́ ɨ́ dù nɨ́ u̧ ɗə̀ə̀ŋcùwá, nyí nɨ ŋgə́ ɓɔ̧ɔ̧ árə̂r.

³⁹Hȩ dùnɨ u̧nèé, mwin yàá bɨ ə́mní, mɨ̀lə́m nyínè njɔ̧̀ne dùhá nɨ kɨ́ tatee Kìn Mèèín, ɨ́dù nyí nɨ nùb du nyìntèènɨ nyindɨ́b kùb ɗə̀ə̀ŋwáá kàŋhɨ̀r.

⁴⁰Ndɨŋnáam nɨ́ɨ́b lâs hàrák, ɓe dɨmɨɨr cúk.