Read Vute 1 Nùb Kòréèntə̀ 16 Bible Online

1 Nùb Kòréèntə̀ 16 - Vute bible

1 Nùb Kòréèntə̀ 16

¹Nɨ́m mɨ ɗú nyí nyìnnànɨ ɓe ɨ́r mwèìn kùb ɓáasona nùb Mèèín du Yèrúsàlèèm, á ɨnayâna nyí ndɨ̀ŋɓwê nɨ́m mwi̧ mɨ tɨ ta nùb Gàlàtíì ndɨ̀ŋtɨ rè.

²Kí du ye sóndèè lâs, á ɗúnɨ nò lâs kɨ́kkɨ́ mwèìn ŋgə́ tɨ ɓwáí nàniì gɨ́ní, àm ɓwâ mɨ féínsoré, kùb a dùcɨ̀ bɨ́ ɓáhèé mònéè yàcùcɨ̀r.

³Ɓwâ mɨ ɓa féísòniì, nùb nyí tɨ ca nyí ɨ́ tɨ̀nndê káàtà ŋgáré nànɨ ŋgáb nyòm hain mwèìn kɨ́ gènɨ Yèrúsàlèm ndɨ, mɨ ɓa ŋgáb tómnɨ á.

⁴Ɨ́ tà mɨ nɨ̀mɨ́r mɨ gɨ̀ɓwêtɨ, nɨ́me ŋgáb a gì.

⁵Mɨ ɓa ndóŋnɨ ɗɔ̀ɔ́b Màsèduwáàn á, mɨ a tì féínndôŋ yɨ́ nyínè, ɓetí jɨ̀r mo gùrí á kí.

⁶Mɨ lə́mnɨ mɨ ɓa jə́bhó̧nɨ jíìb ti kù ɓe nyí á, duú tàɓàcéyèwá mbɨ̀ɨ̀ŋ ɓa mɨ cɔ̧́nɨ yɨ́ nyínè ɓè á. Ndɨŋgií ɨna nyí a kpɔ̂ mɨ gìnɨ yɨ́ du ɗúnɨ mɨ gɨ̀te.

⁷Ɓetí mɨ ɗúwa nyí pə́ndóŋnɨ pə́ndó̧o̧. Mɨ á ɗúnɨ jə́bhó̧nɨ ɓe nyí jíìb ti ŋgób, ɓè Mèín ə́əmndé.

⁸Nɨ́m mwi̧ mɨ á ɗúnɨ dùnɨ Èfês hò̧ há̧á̧ ye jùrúb Pàŋtèkóòt,

⁹ɓetí mɨ kwatɨ́ mɨ́ mvókín mɨ fɨ́tɨ éíɓànɨ ə́ré, dugɨ hȩ nùb ɓi̧ní du ví̧ne.

¹⁰Tìmòtê ɨ́ féìn, gamnáɓam ŋgə́ mîn vùù tɨ̀ bɨ ŋgə́, ɓetí ə́r Kékéé mɨ du ə́nnɨ rè á ŋgə́ du éíɓwênɨ ru.

¹¹Nò kù ŋgə́ pə́tə̀ə̀ŋkɨ́wa. Kpɔ́knáam ŋgə́, ŋgə́ gɨ̀ndóŋ gùr noò ɗóóŋ, ɗà ŋgə́ a kwàcù mɨ, ɓetí nɨ́me mwin yàá bɨ ə́mní á ŋgə́ móŋnɨ.

¹²Duceé kɨ́ mwin yàá nɨ́mè Àpòlôs, mɨ á ŋgə́ tààmnàlɨ́ŋnɨ njɔ̧̀ ŋgə́ ɓe mwin yàá bɨ kù gɨ̀ yɨ́ nyínè, ɨ́dù ŋgə́ ɗúɓàwá gìnɨ gùr kɨ́ ɗàrò. Nɨ́m mwi̧ ɓwâ mvókín ɓa sə̀mniì, ŋgə́ ɓa gɨ̀sònɨ á.

¹³Dunáam jáŋ, ə́əŋnáam kpéín ə́ə́m nyínè no, ə́əŋnáɓam nɨ̀ŋgwá nɨ̀ŋgwá, nomnáɓam noóm.

¹⁴Ndɨŋnáam nɨ́ɨ́b lâs ɓe ɗûnɨ́m.

¹⁵Nyí ɗəəŋtɨ́ Sɨ̀tèfân ɓe gbàŋ noò. Nyí ɗəəŋhaá ɗɔ̀ɔ́b Àkàyíì no, ŋgáb ɨ́ du nùb ya ə́əmyaye Krístù ɗà ŋgáb ɨ́ yàrê kpɔ́knɨ gbàŋ Mèèín ndu ye! Mwin yàá bɨ ə́mní, nɨ́m mɨ ta nyí ndɨ̀ŋte á rè:

¹⁶Nyí jə̀ŋ nùb hȩ kí kɨ́, ɓe nùb ɓe ŋgáb du éíɓànɨ tamnìí.

¹⁷Mɨ ókɓatɨ́ mɨ̀tù ɓe fénnèé Sɨ̀tèfànâs, Fòrtùnàtûs ɓe Àsàyìkûs féínndé; hȩ nyí tɨ du ɗàwáá, ŋgáb naá mɨ nɨ́m tɨ du mɨ tùŋniì.

¹⁸Ŋgáb taamnaceé mɨ njɔ̧̀ hȩ ŋgáb tɨ taamnaɓwée nyí nɨ̀miib lɨ. Ɗəəŋnáam kúùmnɨ kúúŋ nùb u̧ kíì.

¹⁹Mɨ̀kwìn Nùb Ə́mní ɗɔ̀ɔ́b Àsíì nyindɨsoó nyí. Àkìlâs ɓe Pɨ̀rìsîl, ɓe mɨ̀kwìn nùb ə́mní ɓáalɨ́ŋ ŋgábè yóò nyindɨsoó nyí ɓe ɨ́r Kéké du ndɨ̀ŋnɨ nɨ́m dù ɓanné.

²⁰Mwin yàáb lâs péín ə́mní du hò̧neè nyindɨsoó nyí. Mvókín nyínè no, bɨkuukɨ́náam kùŋ mwin yàá, nyìndɨ̀nɨ ŋgə́.

²¹Mɨ Pôl, mɨ nyindɨsoó nyí, mɨ nɨ̀mɨ́r ɨ́ tɨinɓa yɨ́ nyìndíí rè ru.

²²Nò kù ɨ́ dù nɨ́ Kéké ɗúnɨ ɗàà, Mèín káí nò kɨ́. «Màrànátà» Kéké ɓawo ru.

²³Yésù Krístù nò du Kéké nɨ́mè fàm nyí.

²⁴Ɗûnɨ́m móò á nyí lâs ya, ɓe ɨ́r ju ɓaín nɨ́m duná ɓe Kékéé.