Read Vute 1 Nùb Kòréèntə̀ 2 Bible Online

1 Nùb Kòréèntə̀ 2 - Vute bible

1 Nùb Kòréèntə̀ 2

¹Mwin yàá bɨ ə́mní, ɓwâ mɨ nɨ̀mɨr tɨ gɨso yɨ́ nyínè ɓéènànɨ nyí kìn yi du nɨ́ yo̧ó̧ Mèín yi tómworé rɨ, mɨ yi mɨ́ nyindí kàm kù yi du ɓí ókniì nyìnwá, mɨ yɨɨ́m cè mɨ́ túùmwá mɨ ɗəəŋɓɔ̧́ré á.

²Ɓetí nɨ́m mɨ ya gɨso nyí ɓéènàniì yi duɗóohá nɨ́ àm Yésù Krístùù á. Yésù kùb yi kpáaŋwú bɨ̧̀ɨ̧́ rɨ.

³Àm kɨ́ á mɨ yi féínso nyínè tíí gókkí̧i̧, mɨ a bɨ́ndɨce ɓe vùù ru.

⁴Tɔ̀ɔ́ móò ɓe kìn mɨ yi du ɓéèniì yi nɨ́ nyindí nyɔ̧ɔ̧́ ɓe kɨ̀cáàb nɨ̀vɨ́tɨ̀bì sé, Nyéhè Sarîn yi du nɨ́ túùmnɨ nyòm Mèèín tɔ̀ɔ́ mó kɨ́ no ru,

⁵àm ə́ə́m nyínè a dù nɨ́ kɨ̀cáàb nɨ̀vɨ́tɨ̀bì ya ɗòŋwò, a ɗòŋwò nɨ́ nyòm Mèèín ya.

⁶U̧ kɨ́ kɨ̀cáàb á mɨ du tɔ̀ɔ̀nànɨ nùb ducɨ bɨ́ gbɔ̧́ɔ̧ ə́ə́m ŋgábè noò ru. Ɨ́dù kɨ̀cáàb kɨ́ nɨ kɨ̀cáàb ɗɔ̀ɔ́b lè noò sé, nɨ kɨ̀cáàb nùb ɓáŋhɨ́b du ŋgáŋnɨ ɗɔ̀ɔ́b lè no, du bɨ́ nùb kwá nduk ndu̧né sé ɓwê.

⁷Du nɨ kɨ̀cáàb Mèín ya yoona nɨ̀vɨ́tɨ̀bì á. Nɨ́ɨ́b lâs ma nyààŋɓàyèwá, ŋgə́ yaá cɨ̀ nɨ ɓe kɨ̀cáàb kɨ́ àm nɨ́m a kwàɓwéhè mgbíhɨ́rí.

⁸Nùb du ŋgáŋnɨ ɗɔ̀ɔ́b lè noò ya bɨ́ kɨ̀cáàb kɨ́ ɗə̀ə̀ŋwá. Ŋgáb yi ɗə̀ə̀ŋyèe, ŋgáb yè ya bɨ́ ndɨ̀ŋnwá kùb kpáàŋwúkɨ́ Kéké du ɓe mgbíhɨ́rí bɨ̧̀ɨ̧́.

⁹Ɨ́dù káàtà Mèèín á wáànɨ ɨnè: «Nɨ́m kùb ya du bɨ́ pə́kɨ́yèwáá, dùgɨ̀ ókɓàyènɨ ó̧o̧ rɨ, nɨ́m kùb ya du bɨ́ lə́ə̀mkɨ́ɓàyèwáá, Mèín ya nyaaŋkɨ́nacií nɨ́ nùb du ŋgə́ ɗúniì nɨ́m kɨ́.»

¹⁰Àm kɨ́ á, ɓe nyòm Nyéhè Sarɨ́nne, Mèín ya túumna nɨ́m kɨ̀cáàb yi du yo̧ó̧ kɨ́ ru, ɓetí Nyéhè Sarîn ɗəəŋtɨ́ nɨ́ɨ́b lâs, dùgɨ̀ kɨ̀cáàb yo̧ó̧ Mèín du ɓe kíí.

¹¹Duú kɨ́ nɨ̀vɨ́tèé, jɔ̀sé nyéhè du nó sóò ɨ́ ɗəŋhȩ nɨ́m du nɨ̀vɨ́tèé njɔ̧̀ne. Nɨ́m mwi̧ ɓwê ɓe Nyéhè Mèèín, ŋgə́ mwi̧ ɨ́ ɗəŋhȩ mɨ̀lə́m lâs du Mèín njɔ̧̀ne.

¹²Kɨ́ nɨ́mè, nyéhè nɨ́mè sóò nɨ kɨ́ nùb ɗɔ̀bɨ́nné du nàniì sé, du nɨ kɨ́ Mèín tómworé á, àm nɨ́m a ɗə̀ŋhȩ̀ nyər bɨ lâs Mèín na nɨ́mè.

¹³Nɨ́m nɨ nyìnnɨ àm nyər Mèín na nɨ́m kɨ́ ɓe kɨ̀cáàb nùb ɗɔ̀bɨ́nné du nàniì ɗàà, nɨ́m nyin nɨ ɓe kɨ̀cáàb Nyéhè Mèèín du nàniì á. U̧ á cè nùb du ɓe Nyéhè kíì nɨ́m du ŋgáb tànànyààŋnɨ àmɨɨr Nyéhè kɨ́ du nɨ́m túùmnàniì.

¹⁴Nò kɨ̀cáàb noò du nɨ́ kɨ̀cáàb nùb ɗɔ̀bɨ́nné nɨ ə́ə̀mnɨ nɨ́m Nyéhè Mèèín taré ɗàà, ŋgə́ á nɨ́ ánɨ nɨ́ɨ́b kɨ́ hȩ yɨŋmɨr, sàmàìn ŋgə́ ókce nɨ́ njàb kíì ɗàà, ɓetí Nyéhè Sarîn ɨ́ du nɨ́ nànɨ nyòm ók njàb kíì ru.

¹⁵Nò du ɓe Nyéhè Mèèín á ɓe nyòm ca nɨ́ɨ́b lâs. Ɨ́dù sàmàìn nò kù ta ŋgə́ ndɨŋɓáaŋtɨ́ na ɗàà.

¹⁶Káàtà Mèèín á wáànɨ ɨnè: «Nò ɗəŋhɨ mɨ̀lə́m Kéké sumíì nɨ ɗàà, nò kù sàmàìn na ŋgə́ sóŋní ɗàà.» Ɨ́dù kɨ́ nɨ́mè, nɨ́m á nɨ ɓe mɨ̀lə́m Krístù sumíì.