Read Vute 1 Nùb Kòréèntə̀ 3 Bible Online

1 Nùb Kòréèntə̀ 3 - Vute bible

1 Nùb Kòréèntə̀ 3

¹Mwin yàá bɨ ə́mní, kɨ́ moò, tɨ nɨ sàmàìn mɨ nyinna nyí hȩ kùb nyinnace nùb du ɓe Nyéhè Mèèín sóò ɗàà. Mɨ tɨ nyinnaá nyí hȩ kùb nyinnace nùb du jə̀ŋnɨ nɨ́ɨ́b ɓáŋhɨ́b ɗɔ̀ɔ́b lè noò, hȩ kùb nyinnace nùb du gbákyèwá ə́ə́m ŋgábè noò.

²Ma̧à̧ á mɨ tɨ na nyí ru, tɨ nɨ cɔŋ tamnì sé, ɓetí tɨ nɨ sàmàìn nyí jíiré ɗàà. Dùgɨ̀ ɗàrò, sàmàìn nyí jíiré ɗàà,

³ɓetí nyí á nɨ́ dùháyènɨ ju hȩ nùb ɓáŋhɨ́b ɗɔ̀ɔ́b lè noò. Hȩ ɓi̧í̧ ɓe mɨ̀ndárɨ̀b duháye bɨ́ mvókín nyínè noò, duha túúm ɨnayâna nyí du nɨ nùb ɗɔ̀ɔ́b lè noò á, ɗɨ́m juu nyínè á cè hȩ kɨ́ nùb ɗɔ̀ɔ́b lè noò na á ye?

⁴Ɓwâ nyí du, nò rè a tà: «Mɨ á mɨ́ Póòl cùrì», nò kù a tàcè: «Mɨ á mɨ́ Àpòlóòs cùrì» rɨ, nyí nyinɓwéeha nɨ hȩ nùb saai nyinlɨ́ŋndé á ye?

⁵Na ɨ́ duɓaye Àpòlôs? Na ɨ́ duce Pôl? Nɨ́m duɗóo nɨ nùb ə́nna Mèèín á, nɨ́m ɨ́ ndɨŋce nyí dù ɓe ə́ə́m ndu. Nò lâs éíháce nɨ́ ə́r Kéké ɗob ŋgéé á.

⁶Nɨ́m tɨ á hȩ tɨ́ɗèìn bɨ; mɨ tɨ ɗoŋ ɗo̧ó̧ á, Àpòlôs ɨ́ sùrɨ̀cê surîn. Mèín ɨ́ duce nò ndɨŋ nɨ́m kɨ́ súte ru.

⁷Yɨ́ kɨ́ ɓè, nò ɗoŋ ɗo̧né ɓe nò surɨ surɨ́nne bɨ dɨɨ́m ɗàà, Mèín ɨ́ duɓa nɨ́ dɨɨ́m ndu, ŋgə́ nò du ndɨ̀ŋnɨ nɨ́m ɗo̧ó̧ súte.

⁸Nò ɗoŋ ɗo̧né ɓe nò surɨ surɨ́nne á bɨ́ nɨ́m mwi̧, Mèín ɓa nànɨ nò mwi̧ lɔ̀ɔ́ nóò ɗóhîn ɓe ə́r ŋgə́ ə́llé á.

⁹Ɓetí nɨ́me Àpòlôs ə́nnaɓáa nɨ Mèín á, nyí duce mwai Mèèín á. Nyí du hȩ dúú Mèín óŋndé á.

¹⁰Ɗóhîn ɓe nyər Mèín ya na mé, mɨ yi yaréé ə́r dúhéé hȩ nò ɗəəŋɓa éí kíì. Ɗàrò nò ji ɨ́ du gɨ̀ndóŋnɨ ɓe ə́r kɨ́ tíí ru. Ɨ́dù nò mwi̧ gə́tɨ̀ɓà hȩ ŋgə́ du gèndóŋnɨ ə́r kɨ́ tíí.

¹¹Ndàì dúhéé á cɨ̀ nɨ ku. Yésù Krístù á. Sàmàìn nò kù yaréndóŋ kɨ́ ji yáà ɗàà.

¹²Nùb kù ɓa ánɨ gôl á, nùb kù a â tú̧ kùb nyaŋhɨ mòné ɓe kíí, nùb kù sɨɨ kù ɨnè njarɨ́b njarɨ́b, óŋnɨ dúhé ɓe kí ndàì kɨ́ ya. Nùb kù a â yɔ̀, kɨ́ kù úndi, kɨ́ kù ŋgamé.

¹³Ɨ́dù ŋgáár ə́ré nò lâs kwá fó̧ laŋtɨ̧ɨ̧́ ye Mèín ɓa ŋgùnnɨ nɨ̀vɨ́tɨ̀bì. Wa kàm jíri ɓa dùnɨ ye kɨ́ á, wa kɨ́ ɨ́ ɓace túùmnɨ hȩ ŋgáár ə́ré nùb lâs duré ru.

¹⁴Nò ŋgáár ə́ré noò ɓa jíìnɨ waá ɓa kwànɨ lɔ̀ɔ́ á.

¹⁵Ɨ́dù nò ŋgáár ə́ré noò ɓa yíniì ɓa mə̀mnɨ lɔ̀ɔ́ á, nɨ́m mwi̧, ŋgə́ nɨ̀mɨ́r a ɓáì, a dù hȩ ŋgə́ tɨ ɓáíhó̧ wa̧á̧ rɨ u̧.

¹⁶Nyí du Dúú jíri Mèèín á, Nyéhè Mèèín á cè nyínè só, nyí nɨ u̧ ɗə̀ə̀ŋwá à?

¹⁷Àà, nò ɓáaŋkɨ́ɓa Dúú jíri Mèèín naá, Mèín ɓa nò kɨ́ ɓáàŋkɨ́ɓwênɨ á, ɓetí Dúú jíri Mèèín ók nɨ́ ɓe Mèín á, nyí ɨ́ duce dúú kɨ́ ru.

¹⁸Nò kù nɨ síí mbáŋhɨ̀r, nò kù mvókín nyínè no ɨ́ lə́mnè ní á ɓe kɨ̀cáàb hȩ nùb ɗɔ̀bɨ́nné, ŋgə́ sètɨ̀kɨ́bɨ̂ŋ síí nóò nò yɨŋmîn, ɗà ŋgə́ a dùmèɓà ɓe kɨ̀cáàb.

¹⁹Ɓetí kɨ̀cáàb nùb ɗɔ̀bɨ́nné du nɨ Mèèín íhín yɨŋmɨr á. Káàtà Mèèín á wáàɓàcéyènɨ ɨnè: «Mèín á bìnɨ nùb kɨ̀cáblì kɨ̀cáàb ŋgáb nɨ̀mibi ya.»

²⁰Káàtà Mèèín wáakwatɨ́ ɨnè: «Kéké ɗəəŋtɨ́ mɨ̀lə́m nùb kɨ̀cáblì du ɓe kíí, ŋgə́ ɗəəŋtɨ́ mɨ̀lə́m ŋgábè kɨ́ du nɨ nɨ́m sam á.»

²¹Hȩ dùnɨ u̧nèé, nɨ ɗúwa nò kù á síí ŋgə́ a tà ní tu nɨ nò rè á, ní tu nɨ nò ré á, ɓetí nɨ́ɨ́b lâs ók ɓe nyí á.

²²Dùgɨ̀ Pôl yoo, dùgɨ̀ Àpòlôs yoo, dùgɨ̀ Piyéèr yoo, dùgɨ̀ ɗɔ̀ɔ́b lè, dùgɨ̀ mè ɓe cwé, dùgɨ̀ jíì mwánnè, dùgɨ̀ cɨ́m yȩné, nɨ́ɨ́b kɨ́ lâs ók ɓe nyí á.

²³Ɨ́dù kɨ́ nyínè, nyí ók nɨ́ ɓe Krístù á, Krístù ókce nɨ́ ɓe Mèín á.