Read Vute 1 Nùb Kòréèntə̀ 4 Bible Online

1 Nùb Kòréèntə̀ 4 - Vute bible

1 Nùb Kòréèntə̀ 4

¹Ɗú nyí á nɨ́m hȩ nùb ə́nna Krístùù á, nùb kùb ɗob ə́r vìhèé Kìn Mèèín.

²Nɨ́m du ɗúnɨ nò kùb ɗob ə́ré ndɨ̀ŋte á ŋgə́ éíɓà ə́r nóò hàrák.

³Kɨ́ moò, nyí ŋgwìngɨ̀ mɨ yoo, nɨ̀vɨ́tɨ̀b ŋgwìngɨ̀ mɨ yoo, àm moò no ɗàà. Mɨ cè mɨ́ ŋgwìncùɓànɨ síí mɨ nɨ̀mɨ́rí ɗàà.

⁴Njɔ̧̀ moò cè nɨ́ mɨ yètɨ̀nɨ nɨ́m kù ya ɗàà. Ɨ́dù nɨ tàwá mɨ á ɗɨ́ɗɨ̧́, Kéké ɨ́ du nɨ́ nò kwá ŋgwin mé.

⁵Àm kɨ́ á mɨ ta nyí nɨ nò kù ŋgwìntàm, ɓetí ɓwâ yi du ɓwánne nɨ ɗóòyèwá. Móŋnáhá nɨ ɓwâ Kéké ɓa cùwòniì. Ŋgə́ ɓa ndɨ̀ŋnɨ nɨ́ɨ́b yi du yoó yɨ́ sɨ́mnɨ̀rí lâs fó̧ laŋtɨ̧ɨ̧́ á. Mɨ̀lə́mkáín yi du nɨ̀vɨ́tɨ̀bì njɔ̧̀ne lâs, ŋgə́ ɓa vììhó̧nɨ á, Mèín a nàgì nò lâs kúúm ɗóhe ɓe ŋgéé.

⁶Mwin yàá bɨ ə́mní, vùùm nɨ́ɨ́b mɨ nyin ndè lâs, mɨ átɨ́ nɨ́me Àpòlôs hȩ túúm ɓe ɨ́r nyínè. Hȩ mɨ ndɨ̀ŋnɨ u̧nèé, mɨ ɗú nyí tànànɨ njàb gɨ̀gàìn kù á. Gɨ̀gàìn kɨ́ á tànɨ ɨnè: «Ɗú kùb ndɨ̀ŋhá nɨ́m jɨ́k hȩ du tɨnné á.» U̧ á ɓa ndɨ̀ŋnɨ nò kù a dù nɨ́ kàmé kùtɨ̀r, ŋgə́ a tà ní tu nɨ nò rè á, ní nɨ nò rè tùnɨ ɗàà na.

⁷Na ɨ́ tana wu ɨnayâna wu ndóŋtɨ́ nùb lâs? Vùùm nɨ́ɨ́b wu du ɓe kí rè lâs, Mèín ɨ́ naha wu ru ye? Wu áce wú síí ɓe kí hȩ nɨ́m kùb du wu na̧á̧ nàwáá ɓe àm níì?

⁸Nyí kwahaá nɨ́ nɨ́m nyí ɗúré lâs ye! Nyí á hàcɨ̀ rò ɓe njɔdì ye! Nyí seihacií nɨ́ mvènnɨ́b jííb ye! Kɨ́ nɨ́mè, nɨ́m cè nɨ́ mvènnɨ́b kù sé. Ɓè nyí tɨ dumeɓa mvènnɨ́b kíì naa, nɨ́m yè duhó̧ndóŋɓwéehace nɨ́ mvènnɨ́b ye.

⁹Ɓetí nɨ́m nùb tómé rè, á hȩ Mèín njə́ətɨ́ nɨ́ nɨ́m. Ɗɔ̀ɔ́b lè no bɨ̂ŋ, nɨ́m á hȩ nùb àm tɨ bɨ, kùb ɓa kwíìkɨ́nɨ laŋtaaŋ jííbí, ɗà nɨ̀vɨ́tɨ̀b lâs, dùgɨ̀ dùgallɨb Mèèín a ɓáàwò pénɨ hȩ nɨ́m ɓa kúniì rɨ u̧.

¹⁰Nɨ́m á yɨŋmɨ́b àm nɨ́m du nùb ə́mnɨ Kékéé. Ɨ́dù nyí á wóŋnɨ́b àm nyí du ɓaín ɓe Krístùù. Nɨ́m á góób, nyí á cè tamnɨ̀b. Nɨ́m nùb kùb njə́əré á, nyí cè nùb kùb dɨɨmndé á.

¹¹Há̧á̧ ɗàrò nɨ́m á cɨ̧̀ kɨ̀ cɨ̧̀, síì kɨ̀ síì, júk ŋgáré ɗàà, yɨ́ juu ɗàà, nɨ́m á u̧ jâblíì,

¹²nɨ́m tamɓahá ŋgáré. Ɓwâ kùb ande nɨ́mè, nɨ́m a fàm nò kɨ́. Ɓwâ kùb túmnɨ nɨ́m jábɨ́r ɓe ɨ́r ə́mní, nɨ́m a jíhè.

¹³Ɓwâ kùb nyinɓáŋhȩ ɓe ɨ́r nɨ́mè, nɨ́m a nyìnnà nò kɨ́ nyɔ̧ɔ̧́. Há̧á̧ ɗàrò kùb á nɨ́m pénɨ hȩ káhɨ́b, hȩ nɨ́ɨ́b nyákánéé nùb lâs du mvúniì.

¹⁴Mɨ mɨ nyí tànàwá àm mɨ ɗú nyí nànɨ sə̀réé, ɨ́dù mɨ ɗú nyí tɔ̀ɔ̀nɨ hȩ mɨ tɔɔce munɨ́b moò mɨ ɗúɓaré á.

¹⁵Ju nyí du ɓe Krístùù, nyí dùgɨ̀ ɓe nùb tɔhɨ nyínè meeb yoo, nyí á há nɨ ɓe Tá mwi̧, ɓetí kɨ́ ju ɓaín nyí du ɓe Yésù Krístùù, mɨ settɨ́ tá nyínè, ɓe gèé mɨ gesona nyí Kìn Nyɔ̧né.

¹⁶Tunáhácɨm guur gùrí moò.

¹⁷Àm kɨ́ á mɨ tómsona nyí Tìmòtê mwin mó ɗûnɨ́mí du jə̀ŋɓànɨ Kékéé ru. Ŋgə́ ɓa nyí lə́ə̀mcùnànɨ ɗɨ́m juu du ndɨ̀ŋnɨ mɨ dù ɓaín ɓe Krístùù á, kí á mɨ duce tɔ̀ɔ̀tèènɨ yɨ́ lâs, Mɨ̀kwìn Nùb Ə́mní bɨ no ru.

¹⁸Nùb kù mvókín nyínè noò tɨ á wútɨ̀nɨ síí ɓetí ŋgáb á lə́ə̀mnɨ mɨ tɨ̀ mɨ yɨ́ vúmè cùwòcɨ̀r.

¹⁹Ɨ́dù, Kéké ɨ́ ə́mnè, mɨ á gɨ̀sònɨ yɨ́ nyínè. Mɨ a ɗə̀ə̀ŋɓàgì nɨ́m nùb wútɨ síhé ɗəŋhɨ ndɨ̀ŋniì. Kɨ́ ŋgáb duye nyìnhó̧nɨ ɓɔ̧ɔ̧ rɨ sé.

²⁰Ɓetí Ŋgɔ̧́ɔ̧̀ Mèèín nɨ nyindí ɓɔ̧ne ya sé, du nɨ nɨ́m ndɨ̧ɨ̧́ ya á.

²¹Kɨ́ ŋge á nyí ɗú? Mɨ gɨ̀sò yɨ́ nyínè ɓe ŋgɨ̧́ ŋgáré kèè, mɨ gɨ̀sò ɓe njɔ̧̀ kerîn, njɔ̧̀ ɗûnɨ́mí?