Read Vute 1 Nùb Kòréèntə̀ 5 Bible Online

1 Nùb Kòréèntə̀ 5 - Vute bible

1 Nùb Kòréèntə̀ 5

¹Kùb á nyìntèènɨ yɨ́ lâs ɨnayâna mvókín nyínè no, nò kù á ndɨ̀ŋnɨ ŋguùŋ du nànɨ sə̀réé. Kúúŋ ɗɨ́m kíì á ɓà ɓáŋhîn, dùgɨ̀ nùb Mèín mɨr ɗə̀ə̀ŋwáá ndɨ̀ŋnɨ u̧ ɗàà. Nɨ́m óó ɨnayâna nò kù á gwíncùnɨ ɓe gwi tá niì.

²Nyí ɨ́ dùkwà ɓe wútè síhé! Tɨ ɗú nɨ́m kɨ́ nà nyí yəré á, nyí a jùhó̧kî nò du ɓe kúúŋ ɗɨ́m kíì nyínè kpánȩ́ȩ́.

³Kɨ́ moò, dugɨ hȩ nɨ́me nyí du cóo, mo njɔ̧̀ɔ̧ nɨ́me nyí á cúk. Ɓe ɨ́r Yésù nò du Kéké nɨ́mè, mɨ téínɓacéyecií mɨ́ nò ndɨŋ kúúŋ nɨ́m kíì àm ŋgwéé hȩ mɨ á mvókín nyínè no rɨ u̧. Ɓwâ nyí ɓa dùnɨ ɓáhɨ́nne, mo njɔ̧̀ɔ̧, mɨ ɓa dùnɨ ɓe nyí á, ɗà nyòm Yésù nò du Kéké nɨ́mè a dùɓwê ɓe nyí.

⁵Kúúŋ nò u̧ kíì, á ɗúnɨ nyí gɔ̀ksòkɨ́nà ŋgə́ Sátàìn kùb a ɓáàŋkî ŋgə́,[1] u̧ á mè noò ɓa ɓáínɨ ye Kéké ɓa cùwòniì.

⁶Nyí nɨ mɨ̀tù ndɨ̀ŋ. Nyí ɗəəŋhaá gɨ̀gàìn du tànɨ: «Mvùùŋ ti ŋgób á múndɨ̀nɨ fàrîn» ndè ye!

⁷Ákɨ́náam cum du hȩ mvùùŋ fìn ɗàrɨ́ nyínè kpánȩ́ȩ́ àm nyí a dù járkɨ́ták. Nyí ɓa dùɓà nɨ hȩ fàrîn yɨmîn mvùùŋ no lə́yèwáá á. Nyí á ɓàcéyècɨ̀ nɨ u̧. Jùrúb Páskàà nɨ́mè yarécií nɨ́, ɓetí kùb nakɨ́cií bɨ́ Krístù hȩ satɨgà, ŋgə́ nò duna nɨ́m hȩ mwin ndèɗúú kùb téín ɓwâ Páskàà.

⁸Nɨ́m jɔ̀ná jùrúb nɨ́mè, ɨ́dù nɨ ɓe bɨ̀rê mvùùŋ fìn no kwe du cum ɓe ŋguùŋ du nànɨ sə̀réé rɨ sé, du nɨ ɓe bɨ̀rê mvùùŋ no ɗàwáá, bɨ̀rê ju járkɨ́táá, ju nɨ́m mbɨ́k ndɨ̧̀ɨ̧́ nɨ́ɨ́b ɓáŋhɨ́bí á.

⁹Káàtà mɨ tɨ tɨinsona nyínè no, mɨ tɨ taá nyí mbɨ́k ɓáhèé ju ɓe nùb du ndɨ̀ŋnɨ ŋguùŋ du nànɨ sə̀réé.

¹⁰Mɨ tɨ mɨ tɨ̀ìnwá ɓe ɨ́r nùb lâs ɗɔ̀ɔ́b lè no du ndɨ̀ŋnɨ ŋguùŋ du nànɨ sə̀réé, nùb hàŋfìí, ŋgàyíìb tamŋgwéé ɓe nùb jəŋtee mèín nyaŋhɨ́bí. Ɨ́ tà nyí nɨ ju ɓe ŋgáb ɓáhɨ̀r, ma ɗúha nɨ nyí éíkɨ́ ɗɔ̀bín á ye.

¹¹Mɨ tɨ ta mɨ nò ɨ́r du só nò Krístùù, a dùcùkwà ju ndɨŋ ŋguùŋ du nànɨ sə̀réé, ju hàŋfìí, ju jəŋtee mèín nyaŋhɨ́bí, ɓáàŋtèèkî kùb ɨ́ré, ju mɨlli ɓe ju yúú rɨ á. Kúúŋ nò kíì, dùgɨ̀ cɔŋ nyí ɓe ŋgə́ yɨ́ mwi̧ tàŋwá.

¹²Ŋgwìn nùb du bɨ́ ɓe Krístù ókwaá nɨ mɨ góòmwá, Mèín ɨ́ ɓa nɨ́ ŋgáb ŋgwìnɓànɨ ru. Kɨ́ nyínè, ɗú nyí ŋgwìn nùb nyínè kpánéné á. Káàtà Mèèín á wáànɨ ɨnè: «Ŋgɨ́íhó̧kɨ́náam nò ɓáŋhîn nyínè kpánȩ́ȩ́.»