Read Vute 1 Nùb Kòréèntə̀ 6 Bible Online

1 Nùb Kòréèntə̀ 6 - Vute bible

1 Nùb Kòréèntə̀ 6

¹Ɓwâ mvókín nyínè no, nò kù ɓe kùùŋ du ɓe njɨ̀ɓìn ndɨ, àm níì á nò kɨ́ duce gànnɨ tɨ́ŋgù̧ú̧ bɨ du bɨ́ Mèín mɨr ɗə̀ə̀ŋwáá, ŋgə́ a dù ní gàìnyè nùb gbàŋ Mèèín na ɗàa?.

²Nyí nɨ ɗə̀ə̀ŋwá ɨnayâna nùb gbàŋ Mèèín kɨ́ ɨ́ du nùb kwá ŋgwin nùb ɗɔ̀bɨ́nné ru à? Hȩ nyí dùnɨ nùb kwá ŋgwin nùb ɗɔ̀bɨ́nné, kí du á sàmàìn nyí téínha nɨ́ àám saibi á ye!

³Nyí nɨ ɗə̀ə̀ŋwá ɨnayâna nɨ́m ɨ́ du nùb kwá ŋgwin dùgallɨb Mèèín ndu à? Ténè àm ɗɔ̀ɔ́b lè noò sàmàìn yɔ́k nɨ́mè ɗàà.

⁴Ɓwâ nyí du ɓe njɨ̀ɓìn ɓe ɨ́r àám ɗɔ̀bɨ́nné rɨ, nùb mɨ̀kwìn nùb ə́mní du pénɨ hȩ nùb saai rɨ á nyí du gànnɨ ténnà nyí àm.

⁵U̧ kɨ́ nò kɨ̀cáblì fɨ́tɨ ténnɨ àm mvókín mwin yàá ə́mní ɓe kùùŋ á ɓàhá mvókín nyínè no. Nɨ́m kɨ́ á ɓà nànɨ sə̀ré cei.

⁶Á ɓàhá hàrák ɨnayâna mwin yàá ə́mní ɓe kùùŋ fó̧ ŋgù̧ní nò du nɨ́ nò ə́mní sé rɨ tíí à?

⁷Ju nyí du, mvókín nyínè no mwin yàá ə́mní ɓe kùùŋ a fô̧ ŋgù̧ní rɨ, ducɨ nɨ túúm ɨnayâna nyí ducɨ nɨ nùb lɔ̧́ɔ̧ á na á. Àm níì á duce sàmàìn nyí jíhɨ nɨ́m du ɗɨ́ɗɨ̧́ ɗàwáá ɗàà? Sàmàìn nyí mbɨ́kbɨ̂ŋ kùb yíkɨ́ nɨ́ɨ́b nyí du ɓe kíí ɗàwá à?

⁸Nyí ɨ́ ducuɓacéye ndɨ̀ŋnɨ nɨ́m du ɗɨ́ɗɨ̧́ ɗàwáá ru, dùgɨ̀ yúk ɓwê. Mwin yàá bɨ nyínè á cè nyí du nɨ́ɨ́b kɨ́ ndɨ̀ŋcùnɨ ru.

⁹Nyí ɗəəŋɓatɨ́ mîn ɨnayâna nùb du ndɨ̀ŋnɨ ɓáŋhɨ́nne kwá bɨ Ŋgɔ̧́ɔ̧̀ Mèèín no lə̂r. Nyí nɨ síí mbáŋhɨ̀r: nùb du ndɨ̀ŋnɨ ŋguùŋ du nànɨ sə̀réé, nùb du yóŋnɨ mèín nyaŋhɨ́bí, nɨ̀ŋgwáàb du ndɨ̀ŋcùnɨ ŋguùŋ mvókín ŋgábè noò, nùb màŋnì,

¹⁰ŋgàyíìb, nùb sunɨ̀bì, mbirúúb, nùb susuŋnì, dugɨ nùb vɨréé kwá bɨ Ŋgɔ̧́ɔ̧̀ Mèèín no lə̂r.

¹¹Nùb kù mvókín nyínè noò yaá u̧. Ɨ́dù kùb ya satɨhó̧kíí bɨ́ nyí cumí tə̧ə̧́. Kùb ya cakíí bɨ́ nyí àm nyí a ô ɓe Mèèín. Mèín ya ndɨŋtɨ́ nyí dù no íhín nùb ɗɨ́ɗɨ̧́ ɓe ɨ́r Yésù Krístù nò du Kékéé, ɨ́ nyòm Nyéhè Mèín nɨ́mè ɓwê.

¹²Nùb kù mvókín nyínè noò á tànɨ ɨnè: «Ɓíì á mɨ nànɨ nyòm mɨ ndɨŋ nɨ́ɨ́b lâs.» Á ɓàhá u̧, ɨ́dù nɨ́ɨ́b lâs nɨ nyí kpɔ́knɨ ɗàà. Mɨ ɗəəŋtɨ́ ɨnayâna: «Ɓíì á mɨ nànɨ nyòm mɨ ndɨŋ nɨ́ɨ́b lâs», ɨ́dù nɨ ɗúwa mɨ sètɨ̀kɨ́ síí móò mbɔ́ɔ́ nɨ́m kwè.

¹³Nyí á tàkwànɨ ɨnè: «Cɔŋ duna nɨ ɓur á, ɓur dunace nɨ́ cɔŋ á.» Á ɓàhá u̧, ɨ́dù Mèín kwá nduukɨ́ nɨ́ɨ́b bɨrɨ́b kɨ́ lâs. Nɨ́m mwi̧, nɨ̀vɨ́tè nɨ dùwá ɓe ɨ́r ŋgə́ ndɨŋtee ŋguùŋ du nànɨ sə̀réé, ŋgə́ du nɨ ɓe ɨ́r ə́nna Kékéé á, Kéké dunace nɨ́ ŋgə́ á.

¹⁴Mèín ɓe nyòm ŋgéé, səəmcuhó̧tɨ́ Kéké Yésù cwéé. Ŋgə́ ɓa nɨ́m sə̀ə̀mcùhó̧ɓwênɨ cwéé á.

¹⁵Nyí nɨ ɗə̀ə̀ŋwá ɨnayâna síí nyínè du gbɨ́ktèìn síí Krístùù á na à? Mɨ ɓa mɨ ánɨ gbɨ́ktèìn síí Krístùù a dù nɨ́ gbɨ́ktèìn síí nɨ̀gwi màŋnì á à? Ɗàɓàwá.

¹⁶Kèè nyí nɨ ɗə̀ə̀ŋwá ɨnayâna nɨ̀ŋgwá du ɓaín ɓe nɨ̀gwi màŋnì du nɨ ɓe ŋgə́ síí mwi̧ á na à? Ɓetí káàtà Mèèín á wáànɨ ɨnè: «Ŋgáb bɨrɨ́b kwá ducɨ bɨ mwi̧.»

¹⁷Ɨ́dù nò du ɓaín ɓe Kékéé á nɨ ɓe ŋgə́ njɔ̧̀ mwi̧.

¹⁸Lunáɓa nɨ ŋguùŋ du nànɨ sə̀réé yoo! Cum lâs nɨ̀vɨ́tè du ndɨ̀ŋniì nɨ dì̧nɨ̀nɨ síí nóò ɗàà, ɨ́dù nò leeré síí nóò ŋguùŋ du nànɨ sə̀réé no kwe, comcuɓa nɨ síí ŋgə́ nɨ̀mɨrí tíí á.

¹⁹Ɓe ɨ́r Nyéhè Sarîn nyínè só Mèín ya na nyí rè, nyí nɨ ókwa ɓe síí nyí nɨ̀mibi. Síí nyínè du nɨ Dúú Jíri Nyéhè Sarɨ́nne á. Nyí nɨ u̧ ɗə̀ə̀ŋwá à?

²⁰Mèín ya céínɓatɨ́ nyí ɓe nɨ́m kàm jíri àm nyí a dù mvòŋsòòŋ. Dɨɨmnáam Mèín ɓe síí nyínè bɨ̂ŋ.