Read Vute 1 Nùb Kòréèntə̀ 7 Bible Online

1 Nùb Kòréèntə̀ 7 - Vute bible

1 Nùb Kòréèntə̀ 7

¹Mɨ pììnàgɨ̀yè nyí fɔ́ nyí tɨ fɔ́wo káàtà nyínè noò: á ɓàhá mîn nɨ̀ŋgwá dù u̧ gwi ɓùwá.

²Ɨ́dù á nɨ́ mîn nɨ̀ŋgwá ɓù nɨ gwi noò, nɨ̀gwi a ɓùcè nɨ́ ŋgwáá noò, àm nyí tɨ̀ ndɨŋ ŋguùŋ du nànɨ sə̀réé.

³Nɨ̀ŋgwá a ndɨ̀ŋ nɨ́m du ɗúnɨ ŋgə́ ndɨ̀ŋnà gwi noò, nɨ̀gwi a ndɨ̀ŋnàcê ŋgwáá noò nɨ́m du ɗúnɨ ŋgə́ ndɨ̀ŋnà ŋgéé.

⁴Nɨ ɗúwa nɨ̀gwi nɨ̀mɨr ndɨ̀ŋ nɨ́m ŋgə́ ɗú ndɨ̀ŋnɨ ɓe síí ŋgə́ nɨ̀mɨrí, síí nó kɨ́ ók nɨ́ ɓe ŋgwáá noò á. Nɨ ɗúcéwa nɨ̀ŋgwá nɨ̀mɨr ndɨ̀ŋ nɨ́m ŋgə́ ɗú ndɨ̀ŋnɨ ɓe síí ŋgə́ nɨ̀mɨrí, ɓetí síí nó kɨ́ ók nɨ́ ɓe gwi noò á.

⁵Nò kù kùŋ njum ɓàndɨ̀nàwá, sé ɓè nyí ɓwáí dùnɨ u̧ mvókín ti kù no àm nyí yóŋ Mèèín, cùr kɨ́ no nyí a dùcù ju gùmní hȩ nyí dukomndé, duú u̧ ɗàà, nyí tɨ̀ nɨ jíìwá, Sátàìn a kwà mvókín ŋgə́ kəhɨ nyínè.

⁶Mɨ tana nyí ta̧á̧ á, mɨ mɨ nyí kpɔ́hîn kpɔ́ɔ̀wá.

⁷Du nɨ́ kɨ́ moò, mɨ á mɨ́ ɗúɓànɨ ɓè nùb lâs tɨ duye hȩ mé. Ɨ́dù nò lâs á nɨ́ ɓe nyər nóò Mèín yi na ŋgéé.

⁸Nɨ́m mɨ tana nɨ̀koòm ɓe mámkwíbí á ɨnayâna ŋgáb yè tɨ dubɨ́ɨŋ bɨ́ u̧ hȩ mɨ.

⁹Ɨ́dù, duceé sàmàìn nyí jíiré ɗàà, ɓunáam gùúm. Á mîn kùb ɓùbɨ̂ŋ gùúm, ɨ́ ndôŋ kɨ́ nyí du u̧ njɔ̧̀ a yà nyí ɓə́nnɨ ɓe ŋguŋnì.

¹⁰Kɨ́ nùb ə́mní duce ɓe gùúm ŋgáréè, mɨ tanaá ŋgáb ɨnè (Kéké ɨ́ tawo ru, nɨ mɨ nɨ̀mɨ́r sé): nɨ̀gwi gùmní nɨ ɓe ŋgwáá noò gɔ̀klɨ̀r.

¹¹Ŋgə́ ɨ́ gɔ̀klè ɓe ŋgwáá noò, ŋgə́ nɨ ŋgwáá ji ɓùcùr, duceé u̧ ɗàà, ŋgə́ a nyàŋcù ɓe ŋgwáá noò. Nò kù cè nɨ́ gwi noò ŋgɨ̂r.

¹²Kɨ́ nùb kwè cè, nɨ́m mɨ tana ŋgábè á rè (mɨ nɨ̀mɨ́r ɨ́ taɓa ru, nɨ Kéké sé ɨ́ ta): nò ə́mní kù ɨ́ dù ɓe gwi du nɨ́ nò ə́mní sé rɨ́, gwi kɨ́ ɨ́ ə́mnè dùnɨ ɓe ŋgə́, ŋgə́ nɨ́ gwi kɨ́ ŋgɨ̂r.

¹³Nɨ́m mwi̧ ɓwê ɓe nò ə́mní du ɓe ŋgwáá du nɨ́ nò ə́mní sé rɨ́, ŋgwáá kɨ́ ɨ́ ə́mnè dùnɨ ɓe ŋgə́, ŋgə́ nɨ́ ŋgwáá kɨ́ ŋgɨ̂r.

¹⁴Nɨ̀ŋgwá du nɨ́ nò ə́mní séé á nɨ́ ɓe Mèín kə́sə́k àm ŋgə́ du nɨ́ ɓaín ɓe gwi noò rè. Nɨ́m mwi̧ ɓwê ɓe nɨ̀gwi du nɨ́ nò ə́mní sé rɨ́, ŋgə́ á nɨ́ kə́sə́k ɓe Mèín àm ŋgə́ du nɨ́ ɓaín ɓe ŋgwáá noò du nɨ́ nò ə́mní rè. Dù u̧ ɗàà munɨ́b ŋgábè yè á hȩ munɨ́b nùb du bɨ́ Mèín ə́ə̀mnde, u̧ kɨ́ ŋgáb á ɓà kə́sə́k ɓe Mèín.

¹⁵Nɨ́m mwi̧, nò du nɨ́ nò ə́mní séé ɨ́ ɗû nɨ́ gɔ̀ɔ̀nɨ ɓe kùŋ noò du nɨ́ nò ə́mní, kùb mbɨ́k bɨ ŋgə́. Ɓwâ kɨ́ ɓè nò du nɨ́ nò ə́mní rɨ, yè ŋgwáá kè, yè gwi kè, nò kɨ́ á nɨ́ mvòŋsòòŋ ɓetí Mèín á ɗúnɨ nyí dù ju ɗóóŋ.

¹⁶Wu nɨ̀gwi ə́mní, wu yè ɨ́ du nò kwá ɓátɨ ŋgwáá woò kè, wu ɗə̀ə̀ŋwá. Wu nɨ̀ŋgwá ə́mní cè, wu yè ɨ́ du nò kwá ɓátɨ gwi woò kè, wu ɗə̀ə̀ŋwá.

¹⁷Kɨ́ mɨ tɨ nyinye rɨ́ sé, kɨ́ rè mɨ ta ɓwâ Mèín ɓé nyí rɨ, á ɗúnɨ nyí dù ju hȩ ŋgə́ ɗú nyí dùte na á. Á ɗúnɨ nò lâs dùhá ə́ə́ŋ nóò Mèín yi kɨ́klé ŋgə́ nóò no. Nɨ́m mɨ ta Mɨ̀kwìn Nùb Ə́mní bɨ lâs ndɨ̀ŋte á kí.

¹⁸Duú ɓè nò kù ya lə́ ndɨ̀ ɓwâ Mèín ya ɓé ŋgéé, nɨ ɗúwa ŋgə́ má ákɨ́nɨ lɨ̀m lê ndɨ̀ɨ́ kɨ́; duceé ɓè nò kù ya du ndɨ̀ lə́yèwá ɓwâ Mèín ya ɓé ŋgéé, nɨ ɗúwa ŋgə́ má lénɨ ndɨ̀.

¹⁹Wu lə́gɨ̀ ndɨ̀ yoo, wu dùgɨ̀ ndɨ̀ lə́wa yoo, nɨ jáàbnɨ ɗàà. Nɨ́m duhá nɨ́ tíí á jə̧̀ə̧́ ɓíhɨ̀b Mèèín.

²⁰Á ɗúnɨ nò lâs dùhá nɨ ə́ə́ŋ nóò ɓwâ Mèín ya ɓé ŋgéé no.

²¹Duú ɓè wu ya du mbɔ́ɔ́ ɓwâ Mèín ya ɓé wé, wu wu só yɨ̂r, ɨ́dù mvókín wu ducu mvòŋsòòŋ ɨ́ sə̀mnà wu, wu wu mbɨ̂.

²²Ɓetí mbɔ́ɔ́ Kéké ya ɓéré á cɨ̀ nɨ mvòŋsòòŋ, ŋgə́ ókce nɨ́ ɓe Kéké á. Nɨ́m mwi̧ ɓwê ɓe nò du nɨ́ mbɔ́ɔ́ sé Krístù ya ɓéré, ŋgə́ ducɨ nɨ mbɔ́ɔ́ Krístùù á.

²³Mèín ya céínɓatɨ́ nyí ɓe nɨ́m kàm jíri, àm nyí a dùcɨ̀ mvòŋsòòŋ. Nyí nɨ mbɔ́ɔ́ nɨ̀vɨ́tɨ̀bì sé cɨ̀.

²⁴I̧i̧, mwin yàá bɨ ə́mní, á ɗúnɨ nò lâs dùhá nɨ Mèèín tíí ə́ə́ŋ nóò ɓwâ Mèín ya ɓé ŋgéé no.

²⁵Kɨ́ nùb du gùúm ɓu̧ú̧ ɗàwáá, nɨ́m mɨ du nyìnnɨ rè, mɨ mɨ Kékéé ɓɔ̧ɔ̧ ókwòwá, duɓa nɨ nɨ́m fó̧ mɨ nɨ̀mɨ́rí sumíì á, mɨ nò kùb fɨ́tɨ sə̀ŋnɨ gíí yaà á, ɓetí Kéké túumnaá mɨ nyàŋnjɔ̧̀ noò.

²⁶Ɓe ɨ́r jábɨ́r du nɨ́ ɗàrò rè, nɨ́m mɨ lə́əmndé á rè: á nyɔ̧ɔ̧́ nɨ̀vɨ́tè dùbɨ̂ŋ u̧ hȩ ŋgə́ duré.

²⁷Wu duú ɓe gwi, wu wu vúme ŋgə́ gɔ̀ɔ̀tɨ na mácɨ̀r. Wu duú ɓe gwi ɗàà, wu wu ní ɓùyè gwi na tà.

²⁸Nɨ́m mwi̧, wu ɨ́ ɓù gwi, wu wu còmwá. Mɨkóóme ɨ́ ɓùcè nɨ́ ŋgwáá, ŋgə́ nɨ còmwá. Ɨ́dù nùb ɓu gùmní ɓa dùnɨ ɓe jábɨ́r á, àm kɨ́ á mɨ ɗú nyí hə̀k jábɨ́r kɨ́ ru.

²⁹Mwin yàá bɨ ə́mní, nɨ́m mɨ ɗú nyí tànàniì á rè: jíì mecií nɨ́ ŋgób, yànɨ ɗàrò, nùb du ɓu̧né dù hȩ ŋgáb bɨ ɓu̧ú̧ ɗàà.

³⁰Nùb du kɨ́kɨ́rí dù hȩ ŋgáb bɨ óknɨ ɓáŋhîn ɗàà. Nùb du sɨ̀rí dù hȩ ŋgáb bɨ óknɨ nyɔ̧ɔ̧́ ɗàà. Nùb du gwɨ̀ìnɨ nɨ́mí, dù hȩ ŋgáb bɨ ɓe nɨ́m kɨ́ ŋgáré ɗàà.

³¹Nùb du kwànɨ nyɔ̧ɔ̧́ ɗɔ̀ɔ́b lè noò dù hȩ ŋgáb bɨ kwànɨ nɨ́m kù ɗàà ɓetí ɗɔ̀ɔ́b nɨ́m du nó rè tɨ̀ nɨ yə̀ŋcɨ̀r, ɓa nɨ cə́ndɨ̀nɨ á.

³²Mɨ ɗúwa nyí dù ɓe mɨ̀lə́m sumí. Nò du ɓe gwi ɗàwáá á nɨ́ kɨ́knɨ njɔ̧̀ noò ə́nnàá Kékéé ya, ŋgə́ máhá nɨ́ ndɨ̀ŋnɨ nɨ́m nyaŋ Kéké sumíì.

³³Ɨ́dù nò du nɨ́ ɓe gwiì, mɨ̀lə́m ŋgéé á há nɨ nɨ́ɨ́b ɗɔ̀bɨ́nné ya, ŋgə́ máháce nɨ́ ndɨ̀ŋnɨ nɨ́m nyaŋ gwi sumíì.

³⁴Yɨ́ kɨ́ ɓè njɔ̧̀ noò á nɨ́ tə̧ə̧́ gɔɔrȩ́ȩ bɨrɨ́b. U̧ á ɓwê nɨ̀gwi du ɓe ŋgwáá ɗàwáá, dùgɨ̀ kɨ̀jíri, dùgɨ̀ mɨkóóme du ru. Ɓetí ŋgə́ á ɗúnɨ ní ókɓà ɓe Kéké bɨ̂ŋ, nɨ́ɨ́b ndɨ̧ɨ̧́ ɓe mɨ̀lə́m níì no. Ɨ́dù nò du ɓe ŋgwáhé máháce nɨ́ ndɨ̀ŋnɨ nɨ́m nyaŋ ŋgwáá noò sumíì á.

³⁵Mɨ nyin u̧ àm nyí a dù nyɔ̧né á, nɨ kpɔ́ɔ́ sé. Mɨ á ɗúnɨ ju nyínè dù íhín hàrák, nyí a dù ju njɔ̧̀ nyínè ókɓa ɓe Kéké ŋgə́ mwi̧í̧.

³⁶Mɨ nyincɨ ɗàrò àm kóóm ɓe ùklì á. Mutí wàánjí ɨ́ pê nɨ́ ɨnayâna ju ní du ɓe kóóm níì gùúm ɗàà rè ɓa nɨ vúm jábɨ̀nɨ á, mɨ̀lə́m ŋgə́ ɓe kóóm ɓuré ɨ́ yà nɨ́ ŋgə́ sumí ɓə́nnɨ, ŋgáb ɓù bɨ hȩ ŋgə́ ɗú kɨ́, ŋgə́ nɨ́ cum ndɨ̀ŋwá.

³⁷Ɨ́dù mutí wàánjí ɨ́ sàbɓà nɨ́ no sumí, u̧ kɨ́ nò kù nɨ gùúm kààŋwá, ŋgə́ ɨ́ tà ní nɨ ɓùnɨ gùúm ɗàà, ŋgə́ ɨ́ dùcè sàmàìn jíhɨ mɨ̀lə́m ŋgéé kíì, ŋgə́ ɨ́ ɗə̀ŋhȩ̀ hȩ ŋgə́ nɨ̀mɨ́r fɨ́tɨ ndɨ̀ŋniì, ŋgə́ ɨ́ mbɨ̂ nɨ́ kóóm kɨ́, ŋgə́ ndɨŋ nɨ nyɔ̧ɔ̧́ á.

³⁸U̧ á du, nò ɓu kóóm noò ndɨŋtɨ́ nyɔ̧ɔ̧́. Nò duce kóóm noò ɓùwáá ndɨŋnyaaŋɓagií nyɔ̧ɔ̧́ cei.

³⁹Nɨ̀gwi gùmní ŋgwáá noò duye jááŋ, duna nɨ ŋgwáá no kɨ́ á. Ɨ́dù ŋgwáá no kɨ́ ɨ́ kû, á nyòm ŋgə́ ɓundóŋ ŋgwáá tíí, ɨ́dù nɨ̀ŋgwá kɨ́ dùhá nɨ nò Krístùù.

⁴⁰Ɨ́dù mɨ lə́mne ŋgə́ ɓa dùɓà nɨ ju nyɔ̧ɔ̧́ ɓè ŋgə́ du ŋgwáá ɓùcùwáá á. Kɨ́ mo sumíì á kí. Mɨ ɗəəŋtɨ́ Nyéhè Mèèín á ɓwê ɓe mɨ.