Read Vute 1 Nùb Kòréèntə̀ 8 Bible Online

1 Nùb Kòréèntə̀ 8 - Vute bible

1 Nùb Kòréèntə̀ 8

¹Ɗàrò, mɨ nyinna nyí àm fè kùb na mèín nyaŋhɨ́b satɨgà ɓe kíí á. Nyí á tànɨ: «Nɨ́m lâs nɨ́m á ɓe ɗɨɨ́ŋ», ɨ́dù ɗɨɨ́ŋ kɨ́ á nànɨ nɨ̀vɨ́tè wútèé síhé, u̧ kɨ́ ɗûnɨ́m á mɨ̀kwìn nùb ə́mní tààmnànɨ njɔ̧̀.

²Nò du lə́ə̀mnɨ ní ɗəŋhi̧í̧ nɨ́m kù rɨ nɨ ɗə̀ə̀ŋháyèwá hȩ du ɗúnɨ ŋgə́ ɗə̀ə̀ŋte.

³Ɨ́dù nò du ɗúnɨ Mèèín, Mèín ɗəəŋtɨ́ nɨ́ ŋgə́.

⁴Fɔ́ kɨ́ á gɨ̀ rè: á sàmàìn kùb taŋ fè kùb na mèín nyaŋhɨ́b satɨgà ɓe kíí à? Nɨ́m ɗəəŋtɨ́ ɗɔ̀ɔ́b lè no mèín nyaŋhɨ́b bɨ nɨ́m kù sé, Mèín á hácè nɨ́ mwi̧ ndúk.

⁵Á mè u̧, nùb kù á tànɨ mèín bɨ á ɓɨllin, kɨ́b kù á ɗɔ̀bín. Àmɨɨr á, kɨ́ ŋgábè, «mèín» á ví̧i̧, «Kéké» á cè ví̧i̧.

⁶Ɨ́dù kɨ́ nɨ́mè, Mèín á há nɨ mwi̧. Tá á, ŋgə́ ɨ́ du nànɨ nɨ́ɨ́b lâs lu, nɨ́m dunace ŋgə́ á. Kéké á ɓwê há nɨ mwi̧: Yésù Krístù. Mèín yi nyaŋhɨ nɨ́ɨ́b lâs ɓe ɨ́r ŋgéé á, ŋgə́ ɨ́ duce nɨ́m nànɨ nyòm nɨ́m duna Mèèín ndu.

⁷Ɨ́dù nùb lâs bɨ àmɨɨr kɨ́ ɗə̀ə̀ŋwá. Nùb kù yi marɨcií bɨ́ ɓe yô̧ó̧ mèín nyaŋhɨ́bí; há̧á̧ ɗàrò ŋgáb á bɨ́ tàŋháyènɨ fè satɨgàà hȩ tɨm fè kùb móbmeɓa mèín nyaŋhɨ́b ɓe kíí. Njɔ̧̀ ŋgábè gó̧o̧ rè a vɨ̀ndɨ̀régì ŋgáb ɓɔ̧ɔ̧, ŋgáb a lə́mnè vúm settɨ́ bɨ́ nùb ɓáŋhɨ́b Mèèín tíí àm vúm tɨ taŋ fè kíì.

⁸U̧ kɨ́ nɨ cɔŋ sé ɨ́ du ndɨ̀ŋnɨ Mèín ə́mnɨ̀ nɨ́m. Nɨ́m tàŋgìi yoo, nɨ́m dùgɨ̀ tàŋwá yoo, Mèín tɨ̀ nɨ nɨ́m ɓe kí ə́mnɨ̀r.

⁹Nɨ́m mwi̧ gə́tɨnáam, nɨ́m nyí du ndɨ̀ŋɓànɨ ɓe síí kɨ́ tɨ̀ ndɨŋ nùb ə́ə́m ɓóò du gó̧ne gùré cumí.

¹⁰Ɓetí, wu nò du ɓe ɗɨŋhí̧, nò njɔ̧̀ nóò du gó̧ne ɨ́ pê wu tàŋnɨ cɔŋ dúú mèín nyaŋhɨ́bí no, njɔ̧̀ tɨ̀ nɨ ŋgə́ nèìwá ní tàŋɓwê fè kùb mób mèín nyaŋhɨ́b ɓe kíí à?

¹¹U̧ á ɓa ndɨ̀ŋnɨ mwin yàá wo ə́ə́m gó̧ne Krístù ya kú nɨ́ ɓe ɨ́r noò kɨ́ lɔ̧́ ɓe ɨ́r ɗɨɨ́ŋ wó kíì.

¹²Ɓwâ nyí ndɨŋ mwin yàá nyínè ɓáŋhîn kɨ́, ɓwâ nyí vɨndɨkɨ́ njɔ̧̀ gó̧o̧ ŋgábè u̧ kɨ́, Krístù nɨ̀mɨ́r á nyí ndɨŋ u̧ ru.

¹³Àm kɨ́ á, cɔŋ mɨ du mɨ́ tàŋnɨ fèhí ɨ́ dù nɨ́ ndɨ̀ŋnɨ mwin yàá moò gùré cumí, mɨ a mbɨ́kcì mɨ́ cɔŋ fèhí àm ŋgə́ tɨ̀ guré cumíì.