Read Vute 1 Nùb Kòréèntə̀ 9 Bible Online

1 Nùb Kòréèntə̀ 9 - Vute bible

1 Nùb Kòréèntə̀ 9

¹Mɨ mɨ dùɓànɨ ɓe síí ɗàwá à? Mɨ mɨ nò tómé sé à? Mɨ ya pə́haá Yésù nò du Kéké nɨ́mè ye? Nyí duha túúm ə́r Kékéé mɨ ə́llé á ye?

²Dugɨ hȩ nùb kù du ɗúwa ə́ə̀mnɨ ɨnayâna mɨ nò tómé á na rè, ɗú nɨ́ kɨ́ nyínè nyí ə́mnɨ̀ ɨnayâna mɨ dumeɓa nò tómé á, ɓetí ju ɓaín nyí du ɓe Kékéé ɨ́ du túúm ɨnayâna mɨ éímeɓatɨ́ ə́r nò tómé* hȩ Kéké yi ta mɨ gò ə́nniì ru.

³Ɓwâ nùb kù du mɨ yòmnɨ rɨ, ɨnè á mɨ du kààŋnɨ síí:

⁴Kí du ɓe ɨ́r ə́r móò, nɨ ɗúwa kùb nà mɨ cɔŋ ɓe súm hàye?

⁵Nɨ ɗúwa mɨ dù ɓe gwi du nò ə́mní rɨ, gènɨ ŋgə́ ŋgáré hȩ nùb tómé kù ɓe mwin yàáb Kékéé, dùgɨ̀ Piyéèr bɨ du ndɨ̀ŋtèènɨ rɨ hàye?

⁶Kèè nɨ́me Bàrnàbâs ɨ́ duɗóo nɨ́ nùb du éíyènɨ ə́r a kwàgì nɨ́m ɓáí ɓe kíí?

⁷Nyí ókkɨ́yeé yɨ́ sójà njáabcuɓa síí ɓe ə́r ŋgéé à? Kèè yɨ́ nɨ̀vɨ́tè ɗȩnɨ mwai gum yɨ̀ɨ́b na súmé, ŋgə́ á dù nɨ́ gum kɨ́ tàŋ? Nyí ókkɨ́yeé yɨ́ nɨ̀vɨ́tè túk nyèém, ŋgə́ á dù nɨ́ ma̧à̧ kɨ́ kàmhô̧ mènniì à?

⁸Nyí nɨ lə́mnɨ̀r ɨnayâna mɨ áhó̧ɗóo mɨ túúm nɨ́m du ndɨ̀ŋnɨ ye lâs ya á na, ɓíì Mòyíìs á nɨ́ tàɓwênɨ u̧.

⁹Ɓetí á tɨín káàtà ɓíhɨ̀b kíì no ɨnè: «Ndèìn du ɗèrɨ̀nɨ mvénní, nyí nɨ ŋgə́ kpááŋ ɓɔ̧ɔ̧ lə́rə́kɨ́nàr.»[2] Ndèìn bɨ kɨ́ maá Mèín só yínɨ hàye?

¹⁰Nɨ ɓà ɓe ɨ́r nɨ́mè sé ŋgə́ ya nyin u̧ à? Ɓe tàá àmɨrìí, kùb ya tɨnnaɓa nɨ́m kɨ́ nɨ́m á. Á ɗúnɨ nò ɗoŋ mvéín ɗo̧né ɓe nò láhɨ láhɨ́nne éí ə́r ɓóò ɓe gíí vúm ɓa kwànɨ lɔ̀ɔ́.

¹¹Nɨ́m ɗoŋndéé nyindí Mèèín nyínè sumí hȩ kùb ɗoŋndéce àndí mwa̧á̧ rɨ u̧. Ɗà nɨ́ɨ́b nyɔ̧ɔ̧́ nyí du ɓe kíí, nyí ɨ́ nàhó̧cè nɨ́m kɨ́ ti nɨ́m fɨ́tɨ ɓáínɨ ɓe kíí no, nyí a tà nɨ́ du nɨ ɓáŋhîn á hàye?

¹²Nùb kù ɨ́ dù ɓe nyòm gam nɨ́m ŋgáb ɓáí nóò nyínè ŋgáré, nɨ́m ɓe nyòm kɨ́ ɨ́ ààŋɓàcéyè ŋgáb ɗàwá à? Nɨ́m mwi̧ nɨ́m ɨ́ dù nɨ́ kí ɓɔ̧ɔ̧ áréwa. Nɨ́m ɨ́ jíìɓàcéyè nɨ́ nɨ́ɨ́b lâs àm nɨ́m tɨ̀ ɗeinkɨ́ nyí jɨ̀r Kìn Nyɔ̧ɔ̧́ du ɓe ɨ́r Krístùù.

¹³Nyí ɗəəŋɓatɨ́ ɨnayâna nùb du ə́nnɨ Dúú jíri Mèèín noò, cɔŋ ŋgábè fó̧ nɨ́ yó ku á. Nùb duce nànɨ satɨgà nyèèmí tə́bə̀rè múbí ya rɨ, kɨ́ ŋgáb taŋndé fó̧ nó á.

¹⁴U̧ á ɓwê Kéké ta á ɗúnɨ kùb líhɨ̀ nùb du ɓéènɨ Kìn Nyɔ̧né.

¹⁵Ɨ́dù nɨ́ɨ́b kɨ́ lâs mɨ ɨ́ dù mɨ́ nɨ́m kù fɔ́wa, mɨ cè mɨ́ tɨ̀ìnsòwá àm mɨ a kwàhô̧ nɨ́m kù no kwe. Nyɔ̧ɔ̧́ á mɨ kúbɨ̂ŋtɨ. Nò kù sàmàìn ákɨ́na mɨ àm mɨ du óknɨ mɨ̀tù ɓe kí kɨ́ sumíì ɗàà.

¹⁶Nɨ ɗúwa mɨ á síí ɓe àm mɨ du ɓéènɨ Kìn Nyɔ̧né, ɓetí ɗú mɨ ɓéètɨ á. Jábɨ́r á ɓe mɨ, ɓè mɨ du Kìn kɨ́ ɓéèwáá.

¹⁷Yi dùyè ə́r mɨ nɨ̀mɨ́r yi cábɓaré, yè á sàmàìn mɨ móŋkɨ́ lɔ̀ɔ́ ə́r kɨ́ no kwe, ɨ́dù hȩ du nɨ́ nɨ́m du ɗúnɨ mɨ ndɨ̀ŋte rèé, mɨ ndɨŋháce mɨ́ jɨ̀ kùb ta mɨ ndɨ̀ŋte á.

¹⁸Lɔ̀ɔ́ móò á cè ní? Lɔ̀ɔ́ kɨ́ du àm mɨ du ɓéènɨ Kìn Nyɔ̧ɔ̧́ kɨ́, kɨ́ samí, mɨ cè mɨ́ fɔ́nɨ nɨ́m du ɗúnɨ kùb nà mɨ ɓe ɨ́r ə́r kíì ɗàà rè á.

¹⁹Mɨ duɓa ɓe síí á, mɨ mɨ mbɔ́ɔ́ nò kù sé, ɨ́dù mɨ setɨ́kíí síí móò mbɔ́ɔ́ nùb lâs àm mɨ ndɨŋ nɨ̀vɨ́tɨ̀b ví̧i̧ sèìhá nùb ə́mní.

²⁰Ɓwâ mɨ du ə́nnɨ ɓe Jwîf bɨ, mɨ duháce mɨ́ hȩ ŋgáb á, àm mɨ geróɓwée ŋgáb kpáín nùb ə́mní noò. Dugɨ hȩ mɨ du sə̀ŋnɨ gíí moò ɓe jə̧̀ə̧́ ɓíì Mòyíìs ɗàwáá, mɨ á dùnɨ hȩ nùb du sə̀ŋnɨ gíí ɓe jə̧̀ə̧́ ɓíì kíì ɓwâ nɨ́me ŋgáb du ə́nnɨ rɨ, àm mɨ geróhá ŋgáb kpáín nùb ə́mní noò.

²¹Nɨ́m mwi̧ ɓwê ɓe ɓwâ mɨ du dùnɨ ɓe nùb du ɓíì Mòyíìs ɗə̀ə̀ŋwáá rɨ, mɨ á mɨ́ dùnɨ hȩ ŋgáb, àm moò nɨ ɓe ɓíì kɨ́ ɗàà, àm mɨ geróhá ŋgáb kpáín nùb ə́mní noò. Nɨ tàwá ɨnayâna àm moò nɨ ɓe ɓíì Mèèín ɗàà, mɨ á mɨ́ jə̀ŋnɨ ɓíì Krístùù.

²²Nùb ə́ə́m ɓóò du gó̧ne, mɨ a dù ɓe ŋgáb hȩ ə́ə́m móò á ɓwê gó̧o̧, àm mɨ taamna ŋgáb ə́mní. U̧ á mɨ du dùnɨ ɓe nùb lâs àm mɨ ɓátɨhó̧há nùb kwè.

²³Mɨ ndɨŋ nɨ́ɨ́b kɨ́ lâs ɓe ɨ́r Kìn Nyɔ̧né á, àm mɨ a kwàɓwê nyɔ̧ɔ̧́ Kìn kɨ́ du nàniì.

²⁴Nyí ɗəəŋɓatɨ́ ɨnayâna ɓwâ nɨ̀vɨ́tɨ̀b du ɓáhîn lùnɨ lùú rɨ́, nɨ̀mwi̧ ɨ́ ɓa fó̧nɨ tíí ru. Lunáhácɨm nyí lâs, nyí a kwà lɔ̀ɔ́.

²⁵Nùb du lùnɨ lùhí á mbɨ́knɨ ndɨ̧̀ɨ̧́ nɨ́ɨ́b kwè lâs àm ŋgáb fobɨhá hȩ ŋgáb ɓa lùniì. Ŋgáb ndɨŋ u̧ àm ŋgáb a kwà lɔ̀ɔ́ á, lɔ̀ɔ́ kɨ́ nɨ yə̀ŋnɨ ɗàà. Kɨ́ nɨ́mè du nɨ kɨ́ lɔ̀ɔ́ ɓa yə̀ŋniì á.

²⁶Àm kɨ́ á mɨ du lùnɨ lùú, íí moò á hácè nɨ́ nɨ́m mɨ du gànniì ya ku ru. Mɨ á ɓwê hȩ nò lɨŋni du nɨ́ kútà ɗàá ku wòmsònɨ ɗàwáá rɨ u̧.

²⁷Àm kɨ́ á mɨ du túùmɓànɨ síí móò jábɨ́r àm mɨ a kɨ̂ ŋgéé. Mèín tɨ̀ cakɨ́ nɨ́ mɨ gə́nȩ̀ȩ́ ye cáŋhɨ̀rí, mɨ nò yi ɓéena kùb Kìn Nyɔ̧né.