Read Vute 2 Nùb Kòréèntə̀ 1 Bible Online

2 Nùb Kòréèntə̀ 1 - Vute bible

2 Nùb Kòréèntə̀ 1

¹Mɨ Pôl, nò Mèín ya ca dù nò tómé Yésù Krístùù, mɨ ɨ́ tɨin káàtà rè ru, nɨ́me Tìmòtê mwin yàá nɨ́mè. Mɨ tɨnna mɨ̀kwìn nùb ə́mní du Kòréèntə̀ rɨ á, ŋgáb nùb ók ɓe Mèèín. Mɨ tɨnnaɓwée nùb Mèèín du ɗɔ̀ɔ́b Àkàyíì bɨ̂ŋ á.

²Mɨ yóóŋ Mèín nò du Tá nɨ́mè ɓe Yésù Krístù nò du Kéké nɨ́mè ŋgáb nà nyí faám ɓe ju ɗóóŋ.

³Mgbíí dù ɓe Mèín, ŋgə́ nò du Tá Yésù Krístù nò du Kéké nɨ́mè. Ŋgə́ ɨ́ du Tá du ɓe nyàŋnjɔ̧̀, ŋgə́ ɨ́ du Mèín du nɨ́m tààmnànɨ njɔ̧̀ ɓwâ lâs lu.

⁴Vùùm jábɨ́r nɨ́m du ɓe kíí lâs, ŋgə́ á nɨ́m tààmnànɨ njɔ̧̀ no. Ɓe ndɨ̧̀ɨ̧́ u̧nè kɨ́, ŋgə́ á nɨ́m nànɨ njɔ̧̀ nɨ́m taamnaɓwée nùb du pénɨ jábɨ́rí njɔ̧̀, ɓe tààmèé njɔ̧̀ ŋgə́ ya na nɨ́m kɨ́.

⁵Ɓetí jɨ̀ nɨ́m du pénɨ jábɨ́r cei hȩ Kéké ya pə́ rɨ́, u̧ á ɓwêcé Mèín du nɨ́m tààmnàɓànɨ njɔ̧̀ ɓe ɨ́r Kékéé.

⁶Jábɨ́r nɨ́m du péniì, du àm taamna nyí njɔ̧̀ ɗà Mèín a ɓátè nyínè á. Mèín taamnace nɨ́m njɔ̧̀ àm njɔ̧̀ nyínè a tààmndóŋɓwêcè, ɗà nyí a kwà nyòm nyí jíiɓwée jábɨ́r mwi̧ nɨ́m du pénɨ rèè á.

⁷Nɨ́m á cè ɓe gíí ɨnayâna nyí á ɓà ə́ŋhîn kpéín jɨ̀r Mèèín no. Nɨ́m ɗəəŋɓwéeceé ɨnayâna jɨ̀ nyí du pə́ɓwêɓànɨ jábɨ́r hȩ nɨ́m ndɨ, u̧ á cè Mèín du nyí tààmnàɓwênɨ njɔ̧̀ ru.

⁸Mwin yàá bɨ, nɨ́m nɨ́m ɗú nyí ɗə̀ə̀ŋte á ɨnè: ɗɔ̀ɔ́b Àsî no, nɨ́m ya pə́ɓatɨ́ jábɨ́r cei. Jábɨ́r kɨ́ ya aaŋɓatɨ́ nɨ́m nyòme, nɨ́m ɨ́ lə́ə̀mɓàcéyè cwé ɗóhií ɓe nɨ́m.

⁹Nɨ́mè sumí, nɨ́m yi taɓacií nɨ́m cɔ̧́tɨ́. Ɨ́dù nɨ́m kɨ́ yi ndɨŋ nɨ u̧ àm nɨ́m a ɗə̀ə̀ŋɓà ɨnayâna nɨ ɗúwa nɨ́m sə̀ŋcùɓà gíí ɓe nɨ́m nɨ̀miib, ɗú nɨ́ nɨ́m sə̀ŋ gíí ɓe Mèín nò du kùb sə̀ə̀mcùhó̧nɨ cwéé yáá na á.

¹⁰Ŋgə́ ɨ́ ɓátɨhó̧ nɨ́m kúúŋ cwá kàm ɓáŋhîn kɨ́ no ru, ŋgə́ ɓace nɨ́m ɓátɨ̀kwànɨ á. I̧i̧, nɨ́m á mèɓà ɓe gíí ɨnayâna ŋgə́ ɓa nɨ́m ɓátɨ̀hó̧kwànɨ kúúŋ jábɨ́r bɨ kù no á.

¹¹Ɓetí nyí nɨ̀miib nyí ɓa nɨ́m kpɔ́knɨ ɓe mɨ̀yú̧ nyí ɓa yóŋnɨ Mèín ɓe ɨ́r nɨ́mè á. Mèín ɓa ə́ə̀mnɨ mɨ̀yú̧ nùb ví̧i̧ yóŋ ɓe ɨ́r nɨ́mè kɨ́ á, ŋgə́ a ə́ə̀mnà nɨ́m ndɨ̀ŋnyàáŋ kɨ́, ɗà nùb ví̧i̧ a sáktè ŋgə́ ɓe ɨ́r nɨ́mè.

¹²Nɨ́m du nɨ́m nànɨ mɨ̀tùú á ɨnè: njɔ̧̀ nɨ́mè á nɨ́m tànànɨ ɨnayâna ju nɨ́m du ɓe nɨ̀vɨ́tɨ̀bì nɨ́m yaá nɨ sàksàk, nɨ́m yɨ̀tíí só ɗàà, ví̧i̧ ɓà ɓe nyí. Nɨ ɓe kɨ̀cáàb nɨ̀vɨ́tè na nɨ́mè sé á nɨ́m du u̧. Mèín, ɓe ndɨ̀ŋnyàáŋ noò ɨ́ ndɨŋ nɨ́ nɨ́m dù ɓe ɗɨ́m kɨ́ u̧ ru.

¹³Ɓetí, káàtà nɨ́m tɨnna nyínè no, nɨ́m nɨ nyí tɨ̀ìnndóŋnànɨ nɨ́m ji ɗàà, sé nɨ́m nyí du fàìnnɨ nyí a ókce rɨ. Ɗàrò, nɨ́m mwi̧ á nyí du óknyààŋyèwá, ɨ́dù mɨ lə́mne nyí ɓa óknyààŋɓànɨ mîn á. Nɨ́m kɨ́ á ɨnè: Ye Yésù nò du Kéké nɨ́mè ɓa cùwòniì, nyí ɓa óknɨ mɨ̀tù ɓe nɨ́m hȩ nɨ́m ɓace ókɓwênɨ mɨ̀tù ɓe nyínè á.

¹⁵Ɓe àm mɨ tɨ du ɓe gíí kɨ́ sumí u̧nèé á mɨ tɨ ɓwáí gìnɨ yɨ́ nyínè, àm nyí a ô mɨ̀tù kɨ́ gwì bɨrɨ́b lu.

¹⁶Ɓetí mɨ ya ɓwáttɨ́ ndóŋnɨ yɨ́ nyínè ɓwâ mɨ ɓa gìnɨ Màsèduwáàn, ɗà nɨ́me nyí a ɓàìncùkwà ɓwâ mɨ ɓa ndóŋcùwòniì. Nyí tɨ ɓa mɨ kpɔ́knɨ ɓe gwɨ̀ì mɨ gɨsé ɗɔ̀ɔ́b Jùdéè noò á.

¹⁷Ɓwâ mɨ yi ɓwáí u̧nèé, mɨ yi ɓwáí mɨ́ ɓɔ̧ bɨrɨ́b bɨrɨ́b á à? Kèè ɓwâ mɨ du ɓwáínɨ ɓwállí mɨ̀lə́m mɨ nɨ̀mɨrí sumíì ɨ́ du nɨ́ mɨ ɗə́ə̀ŋnɨ ɗà mɨ a tà i̧i̧ ɓe éìye wùúm mwi̧ ru à?

¹⁸Mèín nɨ̀mɨr ɗəəŋɓatɨ́ ɨnayâna nɨ́m mɨ nyinna nyínè nɨ i̧i̧ ɓe éìye wùúm mwi̧ ɗàà.

¹⁹Nɨ́me Sílàs ɓe Tìmòtê, nɨ́m nyinnaá nyí àm Yésù Krístù du Mwin Mèèín. Kɨ́ ŋgéé ŋgə́ nɨ gòwá dùnɨ «i̧i̧» ɓe «éìye» wùúm mwi̧, ŋgə́ duhá nɨ́ «i̧i̧» á.

²⁰Ɓetí ŋgə́ du nɨ «i̧i̧» ɓwáár Mèèín ɓɔ̧ne á. Ɓe ɨ́r Yésù Krístùù á cè nɨ́m du tànɨ «Àmèn» nɨ́mè, àm nɨ́m mgbíhɨ Mèèín ndu.

²¹Mèín nɨ̀mɨr ɨ́ duce nɨ́me nyí tààmnɨ ɓe ɨ́r ju ɓaín nɨ́m du ɓe Krístùù ru. Ŋgə́ nɨ̀mɨr yi ɨ́ caɓace nɨ́m ndu.

²²Ŋgə́ kɨ́kléé lɨ̀m ŋgéé nɨ́mè só, ŋgə́ ɨ́ kɨ́klê Nyéhè Sarîn nɨ́mè njɔ̧̀ɔ̧, túùmnɨ ɨnayâna ní ɓa nɨ́m nànɨ nyɔ̧ɔ̧́ bɨ kù ní kɨ́kna nɨ́mè á.

²³Mɨ átɨ́ Mèín ə́ə̀ŋnà mɨ mɨ̀námé. Ŋgə́ ndɨ̀ŋ mɨ kútɨ ɓè mɨ kaaŋ kàŋnì. Mɨ du mɨ Kòréèntə̀ gɨ̀cùwá àm mɨ tɨ̀ naré nyí yəré sumíì á.

²⁴Nɨ àm nɨ́m ɗú nyí kpɔ́ɔ̀rénɨ nɨ́m nɨ́m du ɗúnɨ nyí ə́ə̀mte no kwe sé, ɓetí ə́ə́m nyínè á nɨ tamnì. Nɨ́m ɗúɗóo nɨ éíɓáànɨ ɓe nyí ɗà nyí a dù ɓe mɨ̀tù sumí á.