Read Vute 2 Nùb Kòréèntə̀ 10 Bible Online

2 Nùb Kòréèntə̀ 10 - Vute bible

2 Nùb Kòréèntə̀ 10

¹Mɨ Pôl, kùb á tànɨ ɨnayâna ɓwâ mɨ du ɓe nyínè mɨ á kerîn, ɨ́dù ɓwâ mɨ du ɓe nyí ɗàwáá mɨ á mɨ sum ɓə́ndîn na. Ɓe ɨ́r Krístù nò du kerîn ɨ́ dùkwà ɓe nyàŋnjɔ̧̀ɔ̧, nɨ́m mɨ ta nyí ndɨ̀ŋte á ɨnè:

²Yée! Mɨ yóóŋ nyí, ɓwâ mɨ ɓa dùnɨ yɨ́ nyínè, nɨ ɗúwa nyí ndɨ̀ŋ nɨ́m mɨ du ɓe sum ɓə́ndɨ́nne. Ɨ́dù nùb kù á lə́ə̀mnɨ ɨnayâna nɨ́m ndɨŋ u̧ àm nɨ́m du ɓe mɨ̀lə́m nɨ̀vɨ́tɨ̀bì á na. Ɓe nùb duɓagɨ ɓe kúúŋ mɨ̀lə́m kíì á mɨ ɓa dùnɨ sum ɓə́ndîn ndu.

³Nɨ́m duɓahá nɨ̀vɨ́tɨ̀b á, ɨ́dù nɨ́m nɨ lèènɨ su hȩ nɨ̀vɨ́tɨ̀b ɗàà.

⁴Túúŋ suu nɨ́mè nɨ kɨ́ nùb ɗɔ̀ɔ́b lè noò sé. Mèín ɨ́ du nɨ́ nɨ́m nànɨ túúŋ nɨ́m ɓei nò ɓi̧ní su ɓe kíí ru. Nɨ́m á ɗènnɨ nùb mɨ̀lə́m ɓáŋhɨ́b sumíì ɓɔ̧.

⁵Nɨ́m á ɓáàŋkɨ́nɨ nɨ́ɨ́b lâs nɨ̀vɨ́tè du ndɨ̀ŋnɨ àm mbáŋhɨ nò ɗú ɗə̀ə̀ŋnɨ Mèín ndɨ. Nɨ́m á ɗúnɨ cə́ndɨ̀nɨ kɨ̀cáàb nɨ̀vɨ́tɨ̀bì, àm ŋgáb a jə̀ŋ Krístùù.

⁶Ɓwâ nyí ɓa nɨ́m túùmnànɨ ɨnayâna nyí á ɓàcɨ̀ ɓe jɨ̧ rɨ, nɨ́m ɓa dùnɨ kə́sə́k túùmnànɨ nò ndɨŋ ŋgwé ɓáŋhɨ́nne jábɨ́r á.

⁷Góomnáɓam nɨ́ɨ́b mîn! Nò kù ɨ́ tà ní ók nɨ́ ɓe Krístù á na, ɗúú ŋgə́ ɗə̀ə̀ŋɓà ɨnayâna duú ɓè ní ók ɓe Krístùù naá, nɨ́m ókɓwée ce ɓe Krístù kɨ́ á.

⁸Kéké naá nɨ́m nyòm nɨ́m ndɨŋ mɨ̀kwìn nùb ə́mní nyínè gɨ̀ tíí, ŋgə́ nɨ nɨ́m nàwá nyòm nɨ́m ɓáaŋkɨ́ mɨ̀kwìn kɨ́ ɓáŋhɨ́nne. Mɨ á óknɨ mɨ̀tù ɓe kí, sàmàìn mɨ á síhé nɨ ɗàà.

⁹Mɨ ɗúwa nànɨ nyí vùù ɓe káàtààb mɨ du nyí tɨ̀ìnsònàniì.

¹⁰Kùb á tànɨ ɨnè: «Káàtààb Póòl nɨ u̧ sé, nyindí nó kwe á há nɨ tamnì. Ɨ́dù ɓwâ ŋgə́ nɨ̀mɨr du mvókín nɨ́mè noò ŋgə́ á nɨ yéin, nɨ́m ŋgə́ nyinndé á cè nɨ́ u̧ vɨ̀ràà.»

¹¹Nò nyin nyindí kíì, ŋgə́ ɗə̀ə̀ŋɓà nɨ ɨnayâna nɨ́m nɨ́m tɨnndéso káàtà̧à̧ ɓwâ nɨ́m du ɓe nyí ɗàwáá, ɓe kɨ́ nɨ́m ɓa ndɨ̀ŋnɨ ɓwâ nɨ́m ɓa gɨ̀sònɨ kwe á bɨ nɨ́m mwi̧.

¹²Á mè u̧, sàmàìn nɨ́m du kpáné mwi̧ kɨ́ kù ɗóònɨ síí ɓe nùb kù du ɓe mɨ̀lə́m ŋgáb nɨ̀mibi rɨ ɗàà. Ŋgáb nɨ̀miib ŋgáb á ánɨ síí ŋgábè hȩ mɨ̀ɗúhìn, ɗóònɨ síí ɓe kùb. Ŋgáb du bɨ ŋgwé ŋgáré ɗàà á.

¹³Duú nɨ́ kɨ́ nɨ́mè, sàmàìn nɨ́m ɓa ánɨ síí a ndôŋ nyòm nɨ́mè ɗàà. Nɨ́m ɓa nɨ ndɨ̀ŋnɨ nɨ́m kɨ́ ɗóhîn ɓe nyòm Mèín na nɨ́m nɨ́m gɨ̀sò há̧á̧ yɨ́ nyínè rè á.

¹⁴Ɓwâ nɨ́m tɨ gɨso yɨ́ nyínè rɨ, nɨ́m tɨ ɨ́ du nùb tɨ féínyaye ku gèsònànɨ nyí Kìn Nyɔ̧ɔ̧́ du ɓe ɨ́r Krístùù ru. Hȩ nɨ́m tɨ ndɨ̀ŋnɨ u̧nèé, nɨ́m tɨ nɨ ndɨ̀ŋwá nɨ́m ndóŋ nyòm nɨ́mè.

¹⁵Kí du nɨ́m nɨ ndɨ̀ŋnɨ nɨ́m a ndôŋ nyòm nɨ́mè ɗàà, nɨ́m nɨ ánɨ síí ɓe ə́r nùb kù ə́llé ɗàà. Ɓàcéyè nɨ́m á ɓe gíí ɨnayâna nyí ɓa dùndóŋɓàgɨ̀nɨ ɓe ə́ə́m tíí tíí á, ɗà nɨ́m a éíndóŋɓàgɨ̀ ə́r jíri yɨ́ nyínè, nɨ́m mwi̧ ɗóhîn há ɓe nyòm Mèín na nɨ́mè.

¹⁶Cùr kɨ́ no, á sàmàìn nɨ́m ɓagɨ gèndóŋnɨ Kìn Nyɔ̧ɔ̧́ tíí. Nɨ́m ə́nnɨ ə́r kɨ́, nɨ́m tɨ̀ nɨ síí áa ɓe ə́r nùb kù tɨ éícɨ bɨ́ mɨ̀yɨ́ ŋgábè ə́ré.

¹⁷Nɨ́m mwi̧ káàtà Mèèín á wáànɨ ɨnè: «Nò ɗú síí ániì, ŋgə́ á síí ɓe nɨ́m Kéké ndɨŋndé.»

¹⁸Nò àmɨɨr nɨ nò kúumcuɓa síhé sé, Kéké ɨ́ du nɨ́ ŋgə́ kúùmnɨ ru.