Read Vute 2 Nùb Kòréèntə̀ 11 Bible Online

2 Nùb Kòréèntə̀ 11 - Vute bible

2 Nùb Kòréèntə̀ 11

¹Ɓè nyí tɨ ə́əmɓaye yɨŋmɨr mo rè ŋgób naa! Ɨ́dù ə́əmnáháye mɨ u̧!

²Mɨ á nyìnɓànɨ sə̀r ɓe ɨ́r nyínè. Mèín ɨ́ ndɨŋ mɨ nyìn sə̀r kɨ́ ru, ɓetí nyí á hȩ mɨkóóme máyɨr ɓà mɨ nasokɨ́ gùmní, nɨ̀ŋgwá gùmní kɨ́ cè Krístù mwi̧ á.

³Nyí ɗəəŋtɨ́ Sátàìn ya mbáaŋtɨ́ Évà ɓe kààŋ. Àm kɨ́ á vùù du mɨ bìnɨ ru, ɓetí á sàmàìn nò kù go nyí mbáàŋnɨ ɗà jɨ̧ nyí jəŋkom Krístùù ɓe ju ɓaín nyí dukom ɓe ŋgéé a cɔ̧̂ nɨ́.

⁴Ɓetí nyí á ə́ə̀mnɨ nò kù gò nyí ɓéènànɨ Yésù du nɨ́ nò nɨ́m ya ɓéena nyí rɨ séé. Nyí á ɓwê kə́sə́k ə́ə̀mnɨ nyéhè ɓe Kìn Nyɔ̧ɔ̧́ du bɨ́ kɨ́b nɨ́m ya ɓéena nyí rɨ séé.

⁵U̧ kɨ́ mɨ lə́mne nɨ́me nùb tómé kàtɨ́b nyínè rɨ á ɓà hàrák.

⁶Nyindí mó ɓɔ̧ne ma nɨ hàrák dùkòm. Ɨ́dù kɨ́ ɗə̀ŋhȩ̀ȩ́ Mèèín nɨ nɨ́m kù sé, nɨ́m túumnaɓatɨ́ nyí ŋgə́ laŋtɨ̧ɨ̧́ nɨ́ɨ́b lâs nɨ́m du ndɨ̀ŋniì no.

⁷Ɓwâ mɨ yi ɓéena nyí Kìn Nyɔ̧ɔ̧́ du ɓe ɨ́r Mèèín, mɨ yi mɨ́ tàwá nyí gòm mɨ; mɨ ya geséé síí móò ɗàá àm nyí a dù dɨmné. Mɨ ya ndɨŋ mɨ u̧ kum á à?

⁸Mɨ yi ə́əmtɨ́ mɨ̀kwìn nùb ə́mní bɨ kù gòm mɨ, mwèìn ŋgábè á hà mɨ kpɔ́k nyí ɓe kí ru ye.

⁹Ɓwâ mɨ ya duce yɨ́ nyínè, mɨ yi mɨ́ nò kù mòné ɓwèìnɨ ɗàà ɓwâ tuŋ mé ɓetí mwin yàá bɨ ə́mní yi go Màsèduwáàn yi gewonaá mɨ nɨ́ɨ́b lâs yi du mɨ ɗúnàniì. Mɨ yi mɨ́ ɗúwa ha̧á̧ móò lúùré nyí ya, mɨ ɓaháce mɨ́ gìnɨ tíí ɓe ɗɨ́m kɨ́ á.

¹⁰Ɓe ɨ́r àmɨɨr Krístù du mo njɔ̧̀ne, mɨ taɓatɨ́ wááŋ ɨnayâna ɗɔ̀ɔ́b Àkàyíì no, nò ɓa mɨ mɨ̀tɔ̀k kɨ́ sumí ákɨ́nàniì nɨ ɗàà.

¹¹Àm níì á mɨ nyin u̧? Àm mɨ du nyí ɗúnɨ ɗàwáá kèè ní? Mèín ɗəəŋɓatɨ́ ɨnayâna mɨ á nyí ɗúnɨ.

¹²Mɨ ɓa gɨ̀hánɨ tíí ɓe ɗɨ́m mɨ du ɓe kí ɗàrò rè á, àm nùb du lə́ə̀mnɨ vúm ɓa kwànɨ mvókín vúm á síí ɗà vúm a tà vúm á éíɓwênɨ hȩ nɨ́mè, mɨ a ákɨ́nà ŋgáb mɨ̀lə́m kɨ́ sumí.

¹³Nùb kɨ́ du bɨ nùb tómé kàŋnì á, ə́r ŋgábè kɨ́ no ŋgáb á ténnɨ kààŋ ɗà ŋgáb a sèttɨ̀kî síí nùb tómé Krístùù.

¹⁴Nɨ́m kùb gbɨɨŋndé nɨ ɓè ɗàà ɓetí Sátàìn nɨ̀mɨr á sètɨ̀kɨ́nɨ síí dùgal mwahí.

¹⁵Sàmàìn nɨ́m gbɨɨŋkwacɨ ɓè nùb kɨ́ setɨkɨ́ síí ɓóò nùb tómé ɗɨ́ɗɨ̧́ na nɨ ɗàà. Ŋgáb kwá ɓáb ɓe jábɨ́r ɗóhe ɓe nɨ́ɨ́b ŋgáb ya ndɨŋndé.

¹⁶Mɨ ɓaacuháá rò: nò kù nɨ mɨ hȩ nɨ̀yɨɨ̀ŋ pə̂r. Nyí ɨ́ pə́cê nɨ́ mɨ hȩ nɨ̀yɨɨ̀ŋ, ə́ə̀mnáhácɨ̀ mɨ u̧, mɨ yè áhó̧ceé mɨ́ síí ŋgób.

¹⁷Mɨ tànàɓà nyí àmɨɨr, nɨ́m mɨ du nyìnnɨ ɗàrò rè nɨ nɨ́m Kéké ɗúré sé, ɗàrò hȩ du ɗúnɨ mɨ á síí rè, mɨ nyincɨ mɨ hȩ nɨ̀yɨɨ̀ŋ á.

¹⁸Hȩ nùb kù ví̧i̧ du bɨ́ ánɨ síí ɓe ɨ́r nɨ́ɨ́b saai nɨ̀vɨ́tɨ̀b du bɨ́ ndɨ̀ŋniì rèé, mɨ á mɨ síí kɨ́ áɓwênɨ.

¹⁹Nyí nùb kɨ̀cáblì rè, nyí á nɨ ə́ə̀mnɨ nùb yɨŋmɨ́b hàye!

²⁰Nyí á nɨ ə́ə̀mnɨ kùb ɓáín nyí hȩ mbɔ́klɨ́b ye. Nyí á nɨ ə́ə̀mnɨ kùb tàŋhó̧ nyí nɨ́ɨ́b ŋgáré, kùb mbáàŋ nyí, kùb yɨ́kɨ́ nɨ́ɨ́b nyínè, kùb pə́tə̀ə̀ŋkɨ́ nyí, kùb láà nyí hàye!

²¹Sə̀ré á ɓà mɨ bìnɨ nyìnhó̧nɨ nyindí kɨ́, nɨ́m yaáɓà gó̧o̧ cei á nɨ́m ya ə́mne u̧ ru. Nò kù ɨ́ áɓà síí ɓe ɨ́r nɨ́m kù, mɨ á mɨ áɓwênɨ, mɨ nyìnyè kí u̧ hȩ nɨ̀yɨɨ̀ŋ.

²²Nùb tómé kɨ́ Èbɨ̀rə̂ bɨ á à? Mɨ ma mɨ Èbɨ̀rə̂ á ɓwê. Ŋgáb bɨ nùb gbàŋ Ísràyéèl noò á à? Mɨ ɓwê mɨ nò gbàŋ kɨ́ noò á. Ŋgáb bɨ nyȩrɨ́b Àbɨ̀ràháàm á à? Mɨ ɓwê mɨ nyȩ Àbɨ̀ràháàm á.

²³Ŋgáb bɨ nùb ə́nna Krístùù á à? Àà mɨ á nyìngɨ̀nɨ ɗàrò hȩ mɨ duɓagɨ mɨ yɨŋmîn ndɨ u̧: mɨ ɓàgɨ̀ nò ə́ré Krístùù á, ndóóŋ ŋgáb. Mɨ éíɓatɨ́ cei ndóóŋ ŋgáb. Kùb yaáɓà mɨ kɨ́klélɨ́ŋnɨ nìrì, jɨ̀ɨ̀m kùb jɨm mé ɨ́ ààŋɓàgì jɔ̀, mɨ yaálɨ́ŋɓwê ŋgwé cwéé ya ɓwâ kù.

²⁴Jwîf bɨ yi jɨmtɨ́ mɨ ŋgɨ́ŋ vɨríí cóóŋ ɨ́ ɓwécɔ̧́ há̧á̧ gwì ŋgiì,

²⁵Nùb Róòm jɨɨ́m mɨ gwì taarɨ́b ɓe lòré, gwì mwi̧ kùb ya ɗúú mɨ lóòŋkwíìkɨ́nɨ ɓe sɨɨ; kór yi wúbɨtɨ́ mɨ gwì taarɨ́b ɗà gwì mwi̧ mɨ ɨ́ jə̂b mvúúm kpíí.

²⁶Gwɨ̀ì ví̧i̧ mɨ ya gɨteekomndé no, ɓáŋhɨ́b ya kwateeɓatɨ́ cei: kɨ́b ɓwâ mbɨ̀ɨ̀ŋ ndóoŋndé kèè, kɨ́b ɓwâ ŋgàyíìb bɨ mé kèè, kɨ́b kùb moò Jwîf ndɨllé mɨ yaà kèè, kɨ́b nùb du Jwîf séé móbɨ kùb ndɨ̀ŋ mɨ ɓáŋhɨ́nne kèè, kɨ́b kwatee mɨ kwé tə̧né kèè, kɨ́b ŋgwàì ndɨ̀ŋnì kèè, kɨ́b mɨ̀kwehɨ̀rí kèè, dùgɨ̀ kɨ́b mɨ ya kwa mvókín mwin yàáb kàŋnì.

²⁷Mɨ yi éíteeɓatɨ́ ə́rɨ́b tamnɨ̀b, kɨhɨr bɨ kwateetɨ́ mɨ. Ɓwâ kù cɨ̧̀ kèè, síì kèè, ndoŋnɨr kèè, tùŋ júú kèè. Ɓwâ kù cɔŋ yaá mɨ tùŋnɨ.

²⁸Mɨ nyìnɓàyèwá ɓe ɨ́r nɨ́m dunaɓa mɨ tíí: kí du nɨ́m du mɨ yínɨ só ɓe ɨ́r mɨ̀kwìn nùb ə́mní bɨ rè á. Mɨ á lə́ə̀mɓànɨ àm kɨ́ cei.

²⁹Nò kù ɨ́ dù gó̧o̧, mɨ á ɓe góòsɨ́m kɨ́ ɓwê. Nò kù ɨ́ gùrê cumí, á mɨ ɓáàŋɓànɨ sumí.

³⁰Ɨ́ tà mɨ á síí, mɨ ɓa ánɨ síí ɓe ɨ́r nɨ́ɨ́b lâs du túùmnɨ góòsɨ́m móò á.

³¹Mèín nò du Tá Yésù nò du Kéké nɨ́mè ɗəəŋtɨ́ ɨnayâna mɨ mɨ kààŋ kàŋwá, ŋgìím dùnà ŋgə́ ɓwâ lâs.

³²Ɓwâ mɨ ya du Dàmáàs, gómnà yi du ə́nnànɨ Àrètâs mvèìn jírií ɨ́ kɨ́ktèè sójààb gín kúrì àm bɨ mé.

³³Ɨ́dù kùb ɨ́ hàìnndóŋhô̧ mɨ wúndàà, lɨ̀ŋtɨ̧̀ kù no. U̧nè á mɨ ya ɓáíhó̧ no ŋgáré.