Read Vute 2 Nùb Kòréèntə̀ 12 Bible Online

2 Nùb Kòréèntə̀ 12 - Vute bible

2 Nùb Kòréèntə̀ 12

¹A ɗú bɨ́ɨŋ mɨ á síí kèè? Â síhé cè nɨ́ kpɔ́knɨ nɨ́m kù ɗàà. Ɨ́dù ɗàrò mɨ á nyìnnɨ ɓe ɨ́r nɨ́m Kéké viina mé, ɓe kɨ́ ŋgə́ ndɨŋ mɨ ɗə̀ə̀ŋtɨ hȩ nɨ́m ndɨŋ wumné rè.

²Mɨ ɗəəŋtɨ́ nò ə́mnɨ Krístùù kù, á mwáín dáín cóóŋ ɨ́ nààsɨ̀b Mèín yi áwú ŋgə́ ɓɨllin còóm cóo. (Ŋgə́ yè yi wúímetɨ́ u̧ kè, yè ndɨŋ nɨ ŋgə́ hȩ nɨ́m gam wumné á kè, mɨ ɗə̀ə̀ŋwá, Mèín mwi̧ ɨ́ ɗəŋhȩ ru.)

³I̧i̧, mɨ ɗəəŋtɨ́ ɨnayâna Mèín yi áwúmetɨ́ ŋgə́ há̧á̧ Pàràdî. (Mɨ tacukwatɨ́ ɨnayâna Mèín yè yi áwúmetɨ́ ŋgə́ há̧á̧ ɓɨllin kè, yè ndɨŋ nɨ ŋgə́ hȩ nɨ́m ndɨŋ wumné á kè, mɨ ɗə̀ə̀ŋwá, sé Mèín mwi̧ ɨ́ ɗəŋhȩ.)

⁴Ku á ŋgə́ ya ók nyindí kù du sàmàìn nɨ̀vɨ́tè sam gandɨhó̧ no ɓɔ̧ne ɗàwáá. Nɨ ɗúcéwa nò kù nyìnhó̧ nyindí kɨ́.

⁵Mɨ á ánɨ síí ɓe ɨ́r nɨ̀ŋgwá kíì. Ɨ́dù, kɨ́ mɨ nɨ̀mɨ́rí, nɨ́m mɨ fɨ́tɨ ánɨ síí ɓe kíí á àm mɨ du nò njɔ̧̀ gó̧ne rè.

⁶Tɨ tàyè mɨ á síí, mɨ yè mɨ́ nò yɨŋmîn sé, ɓetí mɨ ta mɨ àmɨɨr á. Ɨ́dù mɨ á lùnɨ â síhé, ɓetí mɨ ɗúwa nɨ̀vɨ́tɨ̀b lə́ə̀mndóŋ nɨ́m ji ɓe ɨ́r moò, a ndôŋ kɨ́ ŋgáb du lə́ə̀mnɨ ɓe àm nɨ́m ŋgáb pə́ mɨ ndɨ̀ŋnɨ ɓe kɨ́ ŋgáb ók mɨ nyìnniì.

⁷Àm mɨ tɨ̀ á síí ɓe nɨ́m kàm Kéké ndɨŋ mɨ ɗə̀ə̀ŋtɨ kíì, Mèín kɨ́kléé yînɨ́m kàm kù mo só, hȩ nɨ́m Sátàìn tómwo gò mɨ jábɨ̀nɨ, hàrɨ̀nɨ mɨ tɨ̀ du ɓe â síhé ɓe ɨ́r nɨ́m mɨ ɗəŋhɨ kíì.

⁸Mɨ yóŋtɨ́ Kéké há̧á̧ gwì taarɨ́b, ŋgə́ ɓátɨ̀hó̧ mɨ yînɨ́m kɨ́ no.

⁹Á ŋgə́ piina mɨ ɨnè: «Nɨ́m du wu ɗúnàɗóòniì á ndɨ̀ŋnyàáŋ moò, ɓetí, ɓwâ wu duɓagɨ ɓe góòsɨ́m ndɨ́ á nyòm moò duɓagɨ túùmnɨ síí ru.» Hȩ dùnɨ u̧nèé, nyɔ̧ɔ̧́ á mɨ ábɨ̂ŋ síí ɓe ɨ́r góòsɨ́m mɨ du ɓe kíí, ɗà nyòm Kékéé a gə́tɨ̀ɓà mɨ.

¹⁰Àm kɨ́ á, góòsɨ́m mɨ du ɓe kíí, nyèìn kùb du mɨ àndɨ̀niì, ɓwâ nɨ́m kù yɔ́k mé, jábɨ́r kùb túmnɨ mé, ɓe yəré du mó sumí ɓe ɨ́r Krístùù lâs mɨ du jíìnɨ ɓe mɨ̀tù cúk lu. Ɓetí ɓwâ mɨ du gó̧o̧ rɨ á mɨ du kwàndóŋɓàgɨ̀nɨ nyòme tíí tíí.

¹¹Mɨ á nyìnnɨ hȩ mɨ du mɨ yɨŋmîn. Nyí ɨ́ ndɨŋ mɨ nyìn u̧ ru. Tɨ ɗúháce nyí nyìn nɨ́m kù, kààŋnɨ mɨ á. Ɓetí mɨ mɨ nɨ́m kù sé, ɨ́dù nùb tómé kàtɨ́b nyínè ɗàrɨ́ nɨ mɨ nɨ́m kù ya ndóŋwa.

¹²Ɓwâ mɨ yi du yɨ́ nyínè, nyí yi péé jíhɨ́r kàm mɨ yi du ɓe kíí. Nyí yi péé lìím bɨ ɓe nɨ́ɨ́b kàtɨ́b Mèín yi na mɨ nyòm mɨ ndɨŋndé. Nɨ́ɨ́b kɨ́ lâs ɨ́ du túùmnɨ ɨnayâna mɨ nò tómé á ru.

¹³Ní á mɨ̀kwìn nùb ə́mní bɨ kù yi kwa, ɗà nyí ɨ́ dùcè nɨ́ kwàɓwêwá? Kèè àm mɨ yi du mɨ́ nyí líhɨ̀ mɨ na tàwá rè? Àà, tɨ́íná mɨ, ɓè nyí pə́ nɨ́ mɨ yi ndɨŋtɨ́ mɨ́ ɓáŋhɨ́nne.

¹⁴Mɨ ŋgóobtɨ́ gɨ̀sònɨ yɨ́ nyínè kɨ́ gwì taarɨ́bí rò, mɨ tɨ̀ mɨ nyí nɨ́m kù ɓòr. Nyí nɨ̀miib á mɨ du mɨ́ ɗúnɨ ru, nɨ mwèìn nyínè ŋgáréè sé, ɓetí nɨ munɨ́b sé ɨ́ du mánɨ mòné líìnɨ tá bi ɓe yà bí no, tá ɓe yà ɨ́ du mánɨ mòné líìnɨ munɨ́b no ru.

¹⁵Du nɨ́ kɨ́ moò, mɨ á kə́sə́k nàkɨ́nɨ nɨ́m du mó ŋgáréè lâs, dùɓàgɨ̀yè mè moò, ɓe àm mɨ kpɔ́k nyínè. Kí du nyí ɗúɗóo nɨ mɨ ŋgób àm mɨ ɗú mɨ́ nyí ceí á hàye?

¹⁶Nyí ɓa ə́ə̀mɓàhánɨ ɨnayâna mɨ yi mɨ́ vúm líhɨ̀ mɨ na tàwá á, ɨ́dù nùb kù nyínè mvókɨ́nní á tànɨ ɨnayâna mɨ mɨ ɓe àmɨɨr ɓɔ̧ɔ̧ ɗàà, mɨ teinatɨ́ mɨ́ vúm ndù ɓe kààŋ mo ɓɔ̧ne.

¹⁷Mvókín nùb mɨ tómso yɨ́ nyínè lâs, mɨ ɓweisotɨ́ nyí nɨ́m kù nò kù ɓɔ̧ɔ̧ à?

¹⁸Mɨ tɨ kpɔ́ɔháá Tît, ŋgə́ gɨ̀ nyí pénɨ, mɨ ɨ́ tómsò mwin yàá nɨ́mè nyí ɗəŋhɨ ɗàrɨ́ ɓe ŋgə́. Tît mbáaŋtɨ́ nyí, áhó̧nɨ nyí nɨ́m kù ŋgáré à? Nɨ́m ŋgə́ tɨ ŋdɨŋndé, ɓe kɨ́ mɨ ndɨŋndé nɨ nɨ́m mwi̧ ɗàwá à? Kèè nɨ́me ŋgə́ nɨ́ jɨ̀r mwi̧ tùwá?

¹⁹Mvin á cɨ̀ no, nyí du lə́ə̀mnɨ ɨnayâna nyínè tíí, nɨ́m má nɨ́ kààŋnɨ síí nɨ́mè á na, ɗàà. Nɨ́m nyin nɨ nɨ́m Mèín ɗəəŋndé á, nɨ́m á cè nɨ́ ɓaín ɓe Krístù. Ɓwàjììb nɨ́mè, nɨ́m nyinna nyí nɨ́ɨ́b kɨ́ lâs àm nyí a gì tíí ɓe ə́mní á.

²⁰Nɨ́m mɨ du lùniì á: ɓwâ mɨ ɓa féínnɨ yɨ́ nyínè, mɨ a dù mɨ́ nyí hȩ mɨ tɨ du lə́ə̀mniì kwà. Kɨ́ moò, nyí a dùcè nɨ́ mɨ hȩ mɨ tɨ du nyínè sumíì pə̂r. Mɨ á lùnɨ, ɓwâ mɨ ɓa féínnɨ yɨ́ nyínè, mɨ kwà péhèé ɓɔ̧ɔ̧, sə̀r, njù̧, ndárɨ̀b, ténnèé ŋgwìn kum kùŋ mwin yàá ŋgwéé, tàtùùb, â síhé ɓe ju hàrák ɗàwáá.

²¹Mɨ á lùgwànɨ nɨ́m mwi̧: gwɨ̀ì cùrìì, ɓwâ mɨ ɓa gɨ̀cùsògwànɨ yɨ́ nyínè, Mèín tɨ̀ ndɨŋ mɨ ók sə̀ré nyínè tíí, ɗà a tì ndɨ̀ŋ mɨ kɨ́íɓà cei ɓe ɨ́r nùb ví̧i̧ mvókín nyínè no duháye bɨ́ gìnɨ tíí ɓe ndɨ̧̀ɨ̧́ cumí hȩ ɓwâ tɨ tíí rè. Ɓetí ŋgáb bɨ Mèín nó ɓàndɨ̀cùréháyèwá. Ŋgáb á bɨ́ dùháyènɨ ju ndɨŋtee ŋguùŋ du nànɨ sə̀réé, ŋgáb á bɨ́ ndɨ̀ŋsònɨ nɨ́m ɗàá ku u̧.