Read Vute 2 Nùb Kòréèntə̀ 13 Bible Online

2 Nùb Kòréèntə̀ 13 - Vute bible

2 Nùb Kòréèntə̀ 13

¹Kɨ́ gwì taarɨ́bí á mɨ ɓa gɨ̀sònɨ yɨ́ nyínè rò. Káàtà Mèèín á wáànɨ ɨnè: «Á ɗúnɨ ŋgù̧ú̧ lâs, nùb ə́ŋhɨ mɨ̀náméé dù bɨrɨ́b kɨ́ kù taarɨ́b.»

²Mɨ na sóóŋ ndè nùb tɨ ndɨŋ cumí á, dùgɨ̀ nùb lâs. Mɨ tɨ nacií sóóŋ kɨ́ ɓwâ mɨ tɨ gɨso yɨ́ nyínè kɨ́ gwì bɨrɨ́bí. Ɨ́dù mɨ ɓaacuhá ɗàrò ɓwâ mɨ du ɓe nyí cóo rè á. Mɨ tatɨ́ ɨnayâna ɓwâ mɨ ɓa gɨ̀cùsògwànɨ yɨ́ nyínè, mɨ tɨ̀ mɨ nò kù mwàm ô.

³Nyí á hà ɗúnɨ ɗə̀ə̀ŋnɨ ɓè Krístù dumeɓa nyìnwònɨ mo ɓɔ̧ne ye? Mɨ ma ɓa nyí túùmnàmènɨ á. Ɓwâ ŋgə́ du nyínè mvókɨ́nní, ŋgə́ nɨ́ gó̧o̧ ɗàà, ɓetí ŋgə́ á túùmnɨ nyòm noò.

⁴Á mè u̧, kùb ya kpáŋwúú ŋgə́ bɨ̧̀ɨ̧́ àm góòsɨ́m síí nɨ̀vɨ́tèé ŋgə́ ya du ɓe kíí, ɨ́dù ŋgə́ á nɨ́ jáŋ ɓe nyòm Mèèín. Ɓe ju ɓaín nɨ́m du ɓe ŋgéé, nɨ́m á ɓwê gó̧o̧, ɨ́dù nɨ́me ŋgáb ɓa bɨ dùnɨ jáŋ ɓe nyòm Mèèín á, ɓwâ nɨ́m ɓa féínnɨ yɨ́ nyínè.

⁵Góomcunáɓaye ju nyí nɨ̀mibi, pénɨ ɓè nyí du ə́ə̀mmèɓànɨ Yésùù. Nyí ɗəəŋhaá ɨnayâna Yésù Krístù á mèɓà vúmè mvókɨ́nní ye? Sé ɓè nyí du sàmàìn túmnɨ ə́ə́m nyí du ɓe kíí ɗàwáá kà.

⁶Du nɨ́ kɨ́ nɨ́mè, nɨ́m á nɨ́ sàmàìn túmnɨ ə́ə́m nɨ́m du ɓe kíí, nyí ɓace pénɨ á.

⁷Nɨ́m á yóŋnɨ Mèín, nyí nɨ ɓáŋhîn kù ndɨ̀ŋ. Nɨ àm nɨ́m ɗú nyí túùmnànɨ ɨnayâna àm nɨ́mè á àmɨɨr na nɨ sé. Nɨ́m ɗúhá nɨ́ nyí ndɨ̀ŋ nyɔ̧ɔ̧́ á, dùgɨ̀ ɓè ɓa dùnɨ hȩ àm nɨ́mè á kumí.

⁸Ɓetí nɨ sàmàìn nɨ́m ndɨŋcu nɨ́m àmɨɨr Mèèín du ɗúwaá ɗàà, nɨ́m ə́nnaɗóo nɨ àmɨɨr kɨ́ á.

⁹Nɨ́m á óknɨ mɨ̀tù ɓwâ nɨ́m du gó̧o̧ nyí acè tamnì rɨ. Nɨ́m nɨ́m du ɓwèìnɨ mɨ̀yú̧ nɨ́mè noò á nyí sèì nùb ɗɨ́ɗɨ̧́.

¹⁰Àm kɨ́ á mɨ tɨinsokɨ́nayaye nyí ɓwâ mɨ duye cóo ɓe nyí rè, àm ɓwâ mɨ ɓa féínniì, mɨ tɨ̀ ge mɨ́ ɗɨ́m tamnì ɓe nò kù ru, ɓetí nyòm Mèín naré mɨ sóò nɨ nyòm mɨ ndɨŋ mɨ̀kwìn nùb ə́mní nyínè gɨ̀ tíí á, nɨ kɨ́ ɓáaŋkɨ́ ɓáŋhɨ́nne nɨ sé.

¹¹Ɗàrò, mwin yàá bɨ ə́mní, óknáam mɨ̀tù, mánáam sènnɨ nùb ɗɨ́ɗɨ̧́, taamnáam njɔ̧̀ mvókín nyínè, dunáam kúu mwi̧, dunáam ju ɗóóŋ ɗà Mèín nò du nànɨ ɗûnɨ́m ɓe ju ɗóóŋ a dù ɓe nyí.

¹²Nyindɨnáam nyìndí ɗûnɨ́mí, nò rè nyindií kùŋ, nò rè a nyìndɨ̀cè kùŋ. Nùb gbàŋ Mèèín lâs nyindɨsotɨ́ nyí.

¹³Mɨ yóóŋ Yésù Krístù nò du Kékéé fàm nyí. Ɗûnɨ́m Mèèín, ɓe Nyéhè Sarîn nò du nɨ́m ɓáàniì dù ɓe nyí.