Read Vute 2 Nùb Kòréèntə̀ 2 Bible Online

2 Nùb Kòréèntə̀ 2 - Vute bible

2 Nùb Kòréèntə̀ 2

¹Á mɨ tɨ ta mɨ́ mɨ mɨ gɨ̀sònɨ yɨ́ nyínè ɗàà àm mɨ tɨ̀ narécukwa nyí yəré sumíì.

²Ɓetí mɨ ɨ́ nàrê nyí yəré sumí, na bɨ ɨ́ ɓace mɨ nànɨ mɨ̀tù, ɓè du nɨ́ nùb mɨ naré yəré sumí kɨ́ séé?

³Àm kɨ́ á mɨ tɨ tɨinsona mɨ́ nyí tɨín hȩ mɨ tɨ tɨin ɗàrɨ́ u̧ ru.[1] Mɨ tɨ mɨ ɗúwa féínnɨ yɨ́ nyínè mɨ a dù ɓe yəré sumí ɓe ɨ́r nùb tɨ du ɗúnɨ ŋgáb nà mɨ mɨ̀tùú. Kɨ́ moò, mɨ ɗəəŋɓatɨ́ ɨnayâna ɓwâ mɨ du mɨ̀tùú rɨ, nyí lâs ɓa dùɓwênɨ mɨ̀tùú á.

⁴Ɓwâ mɨ tɨ tɨnna nyí káàtà kíì, mɨ tɨ á ɓe yəré sumí cei. Njɔ̧̀ tɨ á mɨ vɨ̀ntìì, tɨ á hȩ mɨ ɓa kɨ́ínɨ rɨ u̧. Mɨ tɨ mɨ tɨ̀ìnwá àm mɨ naré nyí yəré sumíì, tɨ du nɨ àm nyí a ɗə̀ŋhȩ̀ jɨ̀ mɨ du nyí ɗúɓàniì á.

⁵Duceé kɨ́ nò tɨ naré mɨ yəré sumíì, nɨ mɨ mwi̧ sé á ŋgə́ tɨ naré yəré kɨ́ sumí, ŋgə́ tɨ naréɓwéeɓa nɨ nyí lâs á. Mɨ nyìnnɨ ya cei ɗàmáíwa, tɨm nò nyínè mvókɨ́nní á.

⁶Kɨ́ nò kíì, yɨ̀tí nùb ví̧i̧ nyínè mvókɨ́nní yetɨ ŋgə́ rɨ ɗóotɨ́.

⁷Ɗàrò, ɗú nyí tɨ́í ŋgə́ á, nyí a tààmnà ŋgə́ njɔ̧̀, àm yəré tɨ̀ lúurémáí ŋgə́ njɔ̧̀ɔ̧ ceí.

⁸Àm kɨ́ á mɨ ta nyí ndɨ̀ŋ nɨ́ɨ́b lâs ɓe ŋgə́, túùmnɨ ɨnayâna nyí á ŋgə́ ɗúnɨ.

⁹Nɨ́m tɨ ndɨŋ mɨ tɨ̀nnà nyínè du àm mɨ ɗú pénɨ nyí yè á kə́sə́k jə̀ŋnɨ nɨ́m lâs mɨ tana nyí rè kè á.

¹⁰Nyí ɨ́ tɨ́ì nò kù ɓáŋhîn ŋgə́ tɨ ndɨŋndé, mɨ á ŋgə́ tɨ́íɓwênɨ, ɓetí ɓwâ mɨ tɨ́í hȩ mɨ tɨ tɨ́í kɨ́ rɨ, mɨ tɨ́í àm nyínè á, Krístù ɗəəŋceé u̧.

¹¹Mɨ ndɨŋ u̧ àm Sátàìn tɨ̀ ŋgáŋ nɨ́m yaà á. Nɨ́m ɗəəŋɓaceé mɨ̀lə́m ŋgéé njɔ̧̀ne mîn.

¹²Ɓwâ mɨ féín Tɨ̀ròwâs gìnɨ ɓéènɨ Kìn Nyɔ̧ɔ̧́ du ɓe ɨ́r Krístùù, mɨ ɨ́ pê mɨ́ ɨnayâna Kéké tɨ nyaaŋkɨ́naá nɨ́ mɨ àm ɓéhèé Kìn kíì ɓè.

¹³Ɨ́dù njɔ̧̀ tɨ nɨ mɨ ɗàá ɗàà àm mɨ tɨ du mɨ́ mwin yàá nɨ́mè Tît ɓè kwàwáá, àm kɨ́ á mɨ nyinndɨkɨ́so mɨ́ nùb Tɨ̀ròwâs ɓèé, mɨ ɨ́ gì mɨ́ Màsèduwân ndu.

¹⁴Ɨ́dù nɨ́m sáktɨ̀ná Mèín, ɓetí ŋgə́ á nɨ́m ɓáàrénɨ kpáín gùrí Krístù nò ɓeiwo suu no. Ŋgə́ átɨ́ nɨ́m, nɨ́m dù nùb ndɨŋ kùb ɗə̀ŋhɨ̀ Krístù yɨ́ lâs hȩ mí làmɨ́ndà nyɔ̧né erɨce yɨ́ lâs lɨ u̧.

¹⁵Nɨ́m du hȩ làmɨ́ndà du mínɨ nyɔ̧ɔ̧́ Krístù na Mèèín á. Ju hȩ làmɨ́ndà kɨ́ nɨ́m duna nùb Mèín du ɓátɨ̀niì ɓe nùb du lɔ̧́nɨ lɔ̧́ne á.

¹⁶Kɨ́ nùb du lɔ̧́nɨ lɔ̧́ne, duna nɨ ŋgáb mí du nànɨ cwéé á. Kɨ́ nùb Mèín du ɓátɨ̀niì, dunace nɨ́ ŋgáb mí du nànɨ mèè á. Na ɨ́ fɨ́tɨce ndɨ̀ŋnɨ kúúŋ ə́r kíì?

¹⁷Nɨ́m nɨ hȩ nùb kù ví̧i̧ du bɨ́ sə́rɨ̀nɨ Kìn Mèèín sə́rîn ndɨ ɗàà. Kɨ́ nɨ́mè, Mèín ɨ́ tóm nɨ́ nɨ́m nɨ́m tà nɨ Kìn ŋgéé ɓe àmɨɨr cúk lu, ŋgə́ á cè nɨ́m pénɨ àm nɨ́m du ɓaín ɓe Yésù Krístùù.